सहकारी सम्मेलन
रईपुर स्थित इंदिरा गांधी कृषि विश्व विद्यालय म सहकारिता मंत्रालय के पांच बछर पूरा होय के मउका म आज ले दू दिन के राज्य स्तरीय सहकारी सम्मेलन सुरू होइस। शुभारंभ कारीकरम म मुख्य अतिथि के रूप म मुख्यमंत्री विष्णुदेव साय सामिल होइन। ए मउका म ओमन किहीन कि सहकारिता किसान के आय बढ़ाय अउ ग्रामीण अर्थ व्यवस्था ल मजबूत करे के सबले प्रभावी माध्यम बनत हे। ओमन किहीन कि सहकारिता के जरिया विकसित छत्तीगढ़ के मजबूत नींव तियार होही। मुख्यमंत्री ह बतइन कि प्रदेस म अब तक तेरह सौ ले जादा नवा सहकारी समिति मनके गठन करे जा चुके हे। सहकारिता के माध्यम ले पशुपालन, दुग्ध उत्पादन, वनोपज, मत्स्य पालन अउ ग्रामीण उद्यमिता ल घलो बढ़ावा दे जात हे।
मुख्यमंत्री ह ए मउका म उत्कृष्ट समिति मन ल सहकार प्रेरणा पुरस्कार दीन। संघरा संग्रहण बछर दू हजार तेईस के सात लाख ले जादा तेंदूपत्ता संग्राहक मन बर एक सौ करोड़ रूपिया ले जादा के पारिश्रमिक रासि के वितरण के सुभारंभ करीन। एखर अलावा मुख्यमंत्री ह कारीकरम म सहकारिता विभाग के ऑनलाइन पोर्टल के सुभारंभ घलो करीन।
‘‘सहकार संकल्प दौड़‘‘
सहकारिता विभाग डहार आज राजधानी रईपुर के तेलीबांधा मरीन ड्राइव म ‘‘सहकार संकल्प दौड़‘‘ के आयोजन करे गीस। कारीकरम के सुभारंभ सहकारिता मंत्री केदार कश्यप ह हरा झंडी दिखाके करीन। ए दउड़ म युवा, विद्यार्थी, किसान, सहकारी संस्था के सदस्य, महिला समूह अउ आने वर्ग के लोगन मन हिस्सा लीन।
अमरनाथ यात्रा
श्री अमरनाथ जी यात्रा आज बिहनिया जम्मू कश्मीर के पहलगाम अउ बालतल रद्दा मन ले सुरू हो गेहे। पूरा देस ले लाखों श्रध्दालु संतावन दिन के तीर्थ यात्रा के दउरान पवित्र अमरनाथ गुफा के दर्सन करही।
उपराष्ट्रपति सी.पी.राधाकृष्णन, प्रधानमंत्री नरेंद्र मोदी अउ केंद्रीय गृह मंत्री अमित शाह ह श्रध्दालु मन ल सुभकामना दीन हे।
सरकार-फसल अपील
राज्य सरकार ह खंड अउ अल्प वरसा के संभावना ल देखत किसान मनले धान के रोपा पध्दति के बजाय सीधा बोआई याने डीएसआर तकनीक अपनाय के अपील करीन हे। सरकार के अनुसार डीएसआर तकनीक ले लगभग बीस प्रतिसत पानी के बचत होथे, प्रति एकड़ करीबन पांच हजार रूपिया तक के लागत कम आथे अउ फसल बारह ले पंद्रह दिन पहिली तियार हो जाथे। सरकार ह धान के जघा म अरहर, मूंग, उरद, मूंगफल्ली, तिली, रामतील अउ सोयाबीन जइसे दलहन अउ तिलहन फसल के खेती अपनाय उपर जोर दीन हे। किसान मन ले बीज उपचार, संतुलित उर्वरक उपयोग, बरसा जल संरक्षण अउ ड्रिप के संघरा स्प्रिंकलर जइसे सूक्ष्म सिंचाई तकनीक ल अपनाय बर घलो कहे गेहे।
बातों-बातों-में
प्रादेशिक समाचार एकांश के समसामयिक बिसय उपर आधरित कारीकरम ‘‘बातों-बातों-में‘‘ ए दारी मानसून ल देखत किसान मन ल खेती ले जुड़े सलाह उपर कृषि मौसम विज्ञान विभाग के प्रोफेसर डॉक्टर गोपी कृष्ण दास ले लेगे भेंटवार्ता के प्रसारण करे जाही। एखर प्रसारण काली चार जुलाई के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
चिंतन-शिविर
नवा रईपुर स्थित भारतीय प्रबंधन संस्थान-आईआईएम म काली चार जुलाई ले चिंतन सिविर के आयोजन करे जाही। दू दिन के ए सिविर म मुख्यमंत्री विष्णुदेव साय के संघरा राज्य मंत्रिमंडल के सदस्य सामिल होही। ए सिविर के उद्देस्य बदलत तकनीकी परिवेस के अनुरूप शासन ल अउ जादा प्रभावी बनाना हे। सिविर म सरकार के अब तक के उपलब्धि, चुनौती अउ भविष्य के प्राथमिकता के समीक्षा करे जाही।
राज्यपाल-शांति पदयात्रा
राज्यपाल रमेन डेका ले आज लोकभवन म डॉक्टर मणिभद्र महाराज के अगुवई म संचालित सर्वोदय सांति पदयात्रा ले जुड़े संत मनले सौजन्य भेंट करीन। ए मउका म राज्यपाल ह किहीन कि संत समाज के विचार अउ जीवन मूल्य सांति, सद्भाव के संघरा मानवीय मूल्य ल मजबूत बनाय म महत्वपूर्ण भूमिका निभाथे। ओमन सर्वोदय सांति पदयात्रा ल सामाजिक समरस्ता, अहिंसा अउ विश्व बंधुत्व के प्रेरक अभियान बतइन। बतादन कि ए पदयात्रा नेपाल ले सुरू होके लगभग सोलह सौ किलोमीटर के दूरी तय करत छत्तीसगढ़ पहुंचे हे।
महिला बाल विकास मंत्री-समीक्षा बैठक
महिला बाल विकास मंत्री लक्ष्मी राजवाड़े ह बस्तर संभाग म विभाग के योजना मनके प्रचार-प्रसार गोंडी अउ हल्बी भाषा म करे के निरदेस दीन हे, जेखर ले दूर-दराज अउ जनजातीय क्षेत्र के पात्र हितग्राही मन तक योजना के जानकारी आसानी ले पहुंच सकय। मंत्रालय म विभागीय योजना मनके समीक्षा बइठका म ओमन अधिकारी मन ल योजना के फायदा आखिरी मनखे तक पहुंचाय के निरदेस दीन। ओमन आंगनबाड़ी कार्यकर्ता, सहायिका पर्यवेक्षक के खाली पद मन उपर जल्दी भर्ती, आंगनबाड़ी केंद्र म बुनियादी सुविधा के सुदृढ़ीकरण अउ पोषण पुनर्वास केंद्र मन म लइका अउ महतारी मन ल बेहतर सुविधा उपलब्ध कराय उपर जोर दीन। संघरा दिव्यांग जन अउ सियान मन ले जुड़े योजना के प्रभावी क्रियान्वयन अउ नियमित सिविर के आयोजन के निरदेस घलो दीन।
योग आयोग अध्यक्ष-पदभार
छत्तीसगढ़ योग आयोग के नवनियुक्त अध्यक्ष संजय अग्रवाल ह पदभार ग्रहण करीन हे। ए मउका म राखे गे अभिनंदन समारोह म मुख्यमंत्री विष्णुदेव साय मुख्य अतिथि के रूप म सामिल होइन। ए मउका म ओमन किहीन कि संजय अग्रवाल के अनुभव के फायदा प्रदेसवासी मन ल मिलही। योग अउ जादा सर्वव्यापी होही। लोगन अपन दिनचर्या म योग ल सामिल करही।
आकाशीय बिजली मौत
प्रदेस म गाज गिरे के अलग-अलग घटना म चार मनखे मनके मउत हो गेहे।
बलरामपुर जिला के राजपुर थाना क्षेत्र के पतरापारा गांव म गाज गिरे ले मां-बेटी के मउत होगे। पुलिस के अनुसार ए दूनों खेत म काम करत रिहीन। इही दउरान तेज बरसा सुरू होय ले दूनो एक ठिन रूख के नीचे खड़ा होगिन, तभे गाज गिरे ले उंखर मउकाच म मउत होगे।
उहें, सक्ती जिला के डभरा थाना क्षेत्र के बसंतपुर गांव म आज गाज गिरे ले एक दंपत्ति के मउत होगे। पुलिस के अनुसार ए पति-पत्नी खदान म मजदूरी करे बर गे रिहीन। इही दउरान तेज बरसा के बीच गाज गिर गे, जेखर चपेट म आय ले दूनों मउकाच म मउत होगे।
पुलिस अउ प्रशासन ह नागरिक मन ले अपील करीन हे कि बरसा अउ गरज-चमक के दउरान खुला जघा अउ पेड़ के नीचे खड़ा होय ले बांचे अउ संघरा सुरक्षित जघा मन म सरण ले के अपील करीन हे।
सुखनंदन बंजारे-निधन
रईपुर के वरिष्ठ पत्रकार सुखनंदन बंजारे के आज निधन होगे। मुख्यमंत्री विष्णुदेव साय, सांसद संतोष पांडे अउ भाजपा के प्रदेस अध्यक्ष किरण सिंह देव ह सुखनंदन बंजारे के निधन उपर गहरा दुख जतइन हे। ओमन सुखनंदन बंजारे के निधन ले पत्रकारिता जगत बर अपूरनीय क्षति बतइन।
साइबर ठगी-आरोपी गिरफ्तार
दुरूग पुलिस ह बीमा पॉलिसी रिफंड के नाव म करीबन एक करोड़ साठ लाख रूपिया के साइबर ठगी करइया अंतरराज्यीय गिरोह के पर्दाफास करीन। ए मामला म पुलिस ह दिल्ली ले तीन झिन आरोपी मन ल गिरफ्तार करे हे। पुलिस के अनुसार आरोपी खुद ल बीमा अधिकारी बताके बंद पड़े बीमा पॉलिसी के रासि लहुटाय के झांसा देत रिहीन अउ आने-आने बैंक खाता म रकम जमा कराके ठगी करत रिहीन। आरोपी मनके कब्जा ले मोबाइल फोन, बैंक पासबुक, चेकबुक अउ सिमकार्ड बरामद करे गेहे।
अउ अब पेस हे मौसम के हाल…
मौसम विभाग ह अवइया चौबीस घंटा के दउरान मध्य अउ दक्षिण छत्तीसगढ़ म एक-दू जघा म गरज-चमक के संग भारी ले अतिभारी बरसा होय के संभावना जताय हे। उहें, एक-दू जघा म गाज गिरे के चेतावनी दे गेहे। प्रदेस के अधिकांश जघा मन म काली हल्का ले मध्यम बरसा हो सकत हे।