वीबी – जी राम जी अधिनियम
केन्द्रीय ग्रामीण विकास, कृषि अउ किसान कल्याण मंत्री शिवराज सिंह चौहान ह कहिन हे कि विकसित भारत जी राम जी अधिनियम देस म रोजगार सुनिश्चित करे, ग्रामीण आजीविका ल मजबूत करे अउ गांव के विकास म तेजी लाय के दिसा म एक जरूरी कदम हरय। श्री चौहान ह आज तिरूपति जिला के मुक्कावरिपल्ले गांव म विकसित भारत जी राम जी अधिनियम के सुभारंभ करीन। कार्यक्रम ल संबोधित करत हुए श्री चौहान ह कहिन कि योजना के उद्देश्य ए सुनिश्चित करना हे कि कोनो भी गरीब मजदूर बेरोजगार न रहे अउ सबो ल रोजगार मिलय।
वीबी – जी राम जी-कबीरधाम
छत्तीसगढ़ के कबीरधाम जिला के गंडईखुर्द ग्राम पंचायत ले आज विकसित भारत – जी राम जी योजना के राज्य स्तरीय सुभारंभ होइस। आंध्रप्रदेश के तिरूपति ले केन्द्रीय ग्रामीण विकास मंत्री शिवराज सिंह चौहान ए कार्यक्रम म वर्चुअल सामिल होइन। कार्यक्रम म उपमुख्यमंत्री अउ पंचायत ग्रामीण विकास मंत्री विजय शर्मा मुख्य अतिथि के रूप म सामिल होइन। ए बेरा म श्री शर्मा ह कहिन कि ए केवल रोजगार उपलब्ध कराय के योजना नइ, बल्कि विकसित गांव ले विकसित भारत के निर्माण के अभियान हे। ओमन ह कहिन कि केन्द्र सरकार ह छत्तीसगढ़ बर तीन हजार तीन सौ करोड़ रूपिया के प्रावधान करे हे। श्री शर्मा ह बतईन कि योजना के तहत तीन सौ अट्ठारह प्रकार के काम सामिल करे गेहे। एमा जल संरक्षण ले जुड़े एक सौ सात, ग्रामीण अधोसंरचना के नब्बे, आजीविका संवर्धन के छियासी अउ आपदा प्रबंधन ले संबंधित पैंतीस काम सामिल हे। ओमन ह कहिन कि अब जॉब कार्ड के जघा म जीआरजी कार्ड जारी करे जाही। कार्यक्रम म उपमुख्यमंत्री ह गंडईखुर्द म प्रदेस के पहिली विकास काम के रूप म शेड निर्माण प्रस्ताव ल स्वीकृति दीन।
उच्च सिक्षा मंत्री-समीक्षा
प्रदेस म सहायक प्राध्यापक के सात सौ खाली पद म जल्दी भर्ती प्रक्रिया सुरू करे जाही। उच्च सिक्षा मंत्री टंकराम वर्मा के अध्यक्षता म मंत्रालय म होय समीक्षा बइठका म ए निरदेस दे गीस। संगेसंग ओमन ह इकतीस जुलाई तक स्नातक कॉलेज म प्राचार्य के पदोन्नति के प्रक्रिया पूरा करे बर कहिन। बइठका म बताय गीस कि ग्रामीण अउ आदिवासी क्षेत्र के विद्यार्थी मन बर महाविद्यालय म अंग्रेजी संप्रेषण पाठ्यक्रम घलो सुरू करे जाही। उहें, सरकार ह राष्ट्रीय सिक्षा नीति ल स्नातकोत्तर स्तर म लागू करे के तैयारी सुरू कर देहे।
सहकारी सम्मेलन
राजधानी रईपुर म तीन अउ चार जुलाई के राज्य स्तरीय सहकारी सम्मेलन के आयोजन करे जाही। मुख्यमंत्री विष्णुदेव साय सम्मेलन म मुख्य अतिथि होही। सहकारिता विभाग अउ अपेक्स बैंक डहार ले आयोजित ए कार्यक्रम म प्रदेसभर ले किसान, सहकारी संस्था के प्रतिनिधि अउ बिसेसज्ञ सामिल होही। कृषि मंडपम ऑडिटोरियम म होवइया ए दू दिवसीय सम्मेलन म सहकारिता, कृषि विकास अउ ग्रामीण अर्थव्यवस्था ल मजबूत बनाय उपर चर्चा करे जाही। कार्यक्रम के उद्देश्य सहकारिता आंदोलन ल बढ़ावा देना अउ सहकार ले समृद्धि के संदेश जन-जन तक पहुंचाना हे।
उहें, काली तीन जुलाई के बिहनिया छह बजे रायपुर के मरीन ड्राईव म सहकार संकल्प दौड़ के आयोजन करे जाही। ‘सहकारिता के भावना के साथ, एक कदम समृद्ध छत्तीसगढ़ की ओर‘ थीम म आधारित ए दउड़ म युवा, विद्यार्थी, किसान, सहकारी संस्था के सदस्य अउ आने वर्ग के लोगन सामिल होही। दौड़ म पुरूष अउ माईलोगिन वर्ग के प्रतिभागी बर पहिली, दूसरइया अउ तीसरइया जघा के विजेता मन ल आकर्षक पुरस्कार दे जाही।
जांजगीर-शपथ ग्रहण समारोह
मुख्यमंत्री विष्णुदेव साय आज जांजगीर-चांपा जिला के बम्हनीडीह नगर पंचायत के नवनिर्वाचित अध्यक्ष अउ पार्षद मनके शपथ ग्रहण समारोह म सामिल होइन। ए बेरा म चांपा एसडीएम पवन कोसमा ह अध्यक्ष रमेश डडसेना अउ पार्षद मन ल पद अउ गोपनीयता के सपथ दिलईन।
समारोह म मुख्यमंत्री ह बम्हनीडीह-दहिदा तक हसदेव नदी म पुल बनाय, बम्हनीडीह म विद्युत मंडल के सब डिवीजन ऑफिस खोले अउ मंगल भवन निर्माण के घोषणा करीन।
अटल उत्कृष्ट शिक्षा योजना-आवेदन
छत्तीसगढ़ भवन अउ अन्य सन्निर्माण कर्मकार कल्याण मंडल ह अटल उत्कृष्ट सिक्षा योजना के तहत पंजीकृत निर्माण श्रमिक मनके लइका मन बर ऑनलाइन आवेदन के आखिरी तिथि तीन जुलाई ले बढ़ाके बारह जुलाई कर देहे। इच्छुक आवेदक श्रम विभाग के पोर्टल म अपन आवेदन कर सकत हे।
लक्ष्मी राजवाड़े-अन्नापूर्णा देवी मुलाकात
छत्तीसगढ़ के महिला अउ बाल विकास मंत्री लक्ष्मी राजवाड़े ह आज नई दिल्ली म केन्द्रीय महिला अउ बाल विकास मंत्री अन्नापूर्णा देवी ले मुलाकात करीन। ए दउरान दूनों मंत्री मनके बीच महिला अउ बाल विकास ले जुड़े आने-आने बिसय म चर्चा होइस। श्रीमती राजवाड़े ह केन्द्रीय मंत्री ल बस्तर के दूर अउ जनजातीय अंचल म संचालित योजना के प्रगति, चुनौती अउ संभावना के जानकारी दीन।
एल्डरमैन-नियुक्ति
राज्य सरकार ह आज बस्तर, दुर्ग अउ बिलासपुर संभाग ले संबंधित नगरीय निकाय बर चार सौ दो एल्डरमैन के नियुक्ति करे हे। बिलासपुर नगर निगम म एक सौ संतानवे, दुर्ग नगर निगम म एक सौ बयालीस अउ जगदलपुर नगर निगम म तिरसठ एल्डरमैन मनके नियुक्ति करे गेहे। एखर पहिली, रायपुर संभाग के कतकोन नगरीय निकाय बर घलो एल्डरमैन के नियुक्ति करे गे रिहीस।
शासकीय कर्मचारी-अल्पावधि ऋण
राज्य सरकार ह प्रदेस के सासकीय कर्मचारी मन बर अल्पावधि ऋण के सुविधा सुरू करे हे। ए सुविधा राज्य सासन के ई-कोष प्रणाली ले एकीकृत डिजिटल प्लेटफॉर्म के जरिया ले संचालित करे जाही। नवा व्यवस्था के तहत कर्मचारी अपन पात्रता के अनुसार अल्पावधि ऋण बर आवेदन कर सकही। आवेदन के बाद ई-केवाईसी, डिजिटल प्रमाणीकरण अउ सहमति के प्रक्रिया पूरा होय म ऋण स्वीकृति अउ वितरण के प्रक्रिया जल्दी पूरा करे जाही।
मुख्यमंत्री विष्णुदेव साय ह कहिन कि राज्य सरकार सरकारी कर्मचारी मनके कल्याण अउ उंखर आर्थिक सुरक्षा बर प्रतिबद्ध हे।
उहें, वित्त मंत्री ओपी चौधरी ह कहिन कि अल्पावधि ऋण सुविधा कर्मचारी मन ल जरूरत के समय तुरते वित्तीय सहायता उपलब्ध कराही अउ ओमन मन ल सम्माजनक अउ सुविधाजनक वित्तीय विकल्प प्रदान करही।
मुख्यमंत्री-किसान अपील
मुख्यमंत्री विष्णुदेव साय ह प्रदेस के किसान मन ले मौसम के परिस्थिति मन ल ध्यान म राखत हुए खेती-बाड़ी के समुचित योजना बनाय के अपील करे हे। ओमन कहिन कि सरकार किसान के संग खड़े हे। मौसम विभाग ह पहिली ही बताय रिहीन कि अल नीनो के कारण ए बछर मानसून कमजोर रइही
चिंतन शिविर
नवा रायपुर स्थित भारतीय प्रबंधन संस्थान-आईआईएम म अवइया चार अउ पांच जुलाई के ‘चिंतन शिविर‘ के आयोजन करे जाही। दू दिवसीय ए सिविर म मुख्यमंत्री विष्णुदेव साय के संग ही राज्य मंत्रिमंडल के सदस्य सामिल होही। ए सिविर के उद्देश्य बदलत तकनीकी परिवेश के अनुरूप शासन ल अउ प्रभावी बनाना हे। सिविर म सरकार के अब तक के उपलब्धि, चुनौती अउ भविष्य के प्राथमिकता के समीक्षा करे जाही।
मुख्यमंत्री विष्णुदेव साय ह कहे हे कि लगातार तीसरइया बछर आयोजित होवत ए चिंतन सिविर सुशासन ल जादा प्रभावी, पारदर्शी अउ जनकेन्द्रित बनाय के दिसा म जरूरी पहल हे।
तेजस कार्यशाला
युवा, माईलोगिन, किसान अउ नवा उद्यमी मन ल स्वरोजगार अउ उद्योग स्थापित करे बर प्रोत्साहित करइया जिला व्यापार अउ उद्योग केन्द्र डहार ले काली तीन जुलाई के सुकमा के शबरी ऑडिटोरियम म ‘‘तेजस कार्यशाला‘‘ के आयोजन करे जाही। कार्यशाला म बिसेसज्ञ प्रतिभागी मन ल स्टार्टअप पंजीकरण, आने-आने सासकीय योजना, बैंक ऋण, वित्तीय सहायता, मार्केटिंग, ब्रांडिंग अउ व्यवसाय सुरू करे अउ ओला आगू बढ़ाय के बारे म जानकारी दीहीं। संगेसंग वन डिस्ट्रिक्ट वन प्रोडक्ट, फूड प्रोसेसिंग, विनिर्माण अउ सेवा क्षेत्र म उद्योग स्थापित करे के संभावना उपर घलो चर्चा करे जाही।
दुर्ग पुलिस-म्यूल अकाउंट
दुर्ग पुलिस ह लगभग एक हजार एक सौ उनचास खाता के पहिचान करके उनचालीस लोगन मन उपर एफ.आई.आर दर्ज करे हे। ए मामला म अब तक एक सौ पैंसठ लोगन मन उपर कार्रवाई करे जा चुके हे। जांच म ए खुलासा होय हे कि आम लोगन के बैंक खाता ल म्यूल अकाउंट यानी किराया खाता बनाके करोड़ों रूपिया के साइबर ठगी करे गेहे। सुरूआती जांच म ए आगू आय हे कि बैंक खाता के प्रयोग साइबर अपराध ले अवइया पइसा ल छिपाय अउ आने-आने खाता म ट्रांसफर करे बर करे जात रिहीस।