वीबी – जी राम जी अधिनियम
विकसित भारत रोजगार अउ आजीविका गारंटी मिशन – जी राम जी अधिनियम आज ले छत्तीसगढ़ के संग देसभर म लागू होगे हे। केन्द्रीय ग्रामीण विकास मंत्रालय ह कहिन कि वीबी – जी राम जी अधिनियम म अवइया ग्रामीण परिवार ल हर वित्तीय बछर म एक सौ पच्चीस दिन के रोजगार के गारंटी होही। एखर ले ग्रामीण भारत सशक्त बनही। वर्तमान वित्तीय बछर म ए योजना ल चलाय बर पंचानवे हजार छह सौ बयानवे करोड़ रूपिया के प्रावधान करे गेहे।
विकसित भारत जी राम जी अधिनियम म अवइया संशोधित पारिश्रमिक दर आज ले लागू होगे हे। राष्ट्रीय औसत परिश्रमिक मनरेगा के दू सौ अंठावन रूपिया अस्सी पइसा ले बढ़ाके विकसित भारत जी राम जी म अवइया तीन सौ सत्ताईस रूपिया चालीस पइसा रोज के कर दे गेहे। अइसने, पारिश्रमिक दर म दस ले जादा के औसत वृद्धि होय हे। इक्कीस राज्य अउ केन्द्रसासित प्रदेस म जिहां पहिली मजदूरी तीन सौ ले कम रिहीस। उहें, अब नवा दर लागू होगे हे।
केन्द्रीय ग्रामीण विकास मंत्री शिवराज सिंह चौहान ह विकसित भारत जी राम जी अधिनियम लागू होय ल एक ऐतिहासिक उपलब्धि बताय हे। श्री चौहान ह कहिन कि ए अधिनियम लाखों ग्रामीण श्रमिक मन बर गरिमा, आत्मसम्मान अउ आजीविका सुनिश्चित करे के नवा अध्याय हे। ओमन ह कहिन कि ए अधिनियम गांव के हर परिवार ल एक सौ पच्चीस दिन के रोजगार के वैधानिक अधिकार देथे।
एलपीजी सिलेंडर
तेल विपणन कंपनी ह उन्नीस किलोग्राम के व्यावसायिक एलपीजी सिलेंडर के दाम म एक सौ तिरासी रूपिया पचास पइसा के कमी करे हे। भारतीय तेल निगम लिमिटेड के अनुसार नवा दर आज ले लागू होगे हे। ए कटौती के बाद अब उन्नीस किलोग्राम के व्यावसायिक एलपीजी सिलेंडर दिल्ली म दू हजार नौ सौ तीस रूपिया म मिलही। ए फइसला ले रेस्टोरेंट, ढाबा, होटल अउ आने खान-पान के व्यवसायी मन ल लाभ मिलही।
बिजली नई दर-लागू
छत्तीसगढ़ विद्युत नियामक आयोग डहार ले तय बिजली के नवा दर आज ले लागू होगे हे। अब उपभोक्ता मन ल प्रति यूनिट तीस ले पचास पइसा जादा बिल देना होही। गैर घरेलू उपभोक्ता के बिजली दर म बीस पइसा ले चालीस पइसा प्रति यूनिट बढ़ोतरी होय हे। उहें, कृषि पंप के दर चालीस पइसा प्रति यूनिट महंगा करे गेहे। एखरे संग नवा टैरिफ म कतकोन बदलाव करे गेहे। एमा बिजली बिल के पहिली भुगतान करे जाय म एक दमशलव दू-पांच प्रतिशत छूट ल घटाके शून्य दशमलव सात-पांच प्रतिशत कर दे गेहे।
शिक्षक-पुनर्नियुक्ति
छत्तीसगढ़ शासन के स्कूल सिक्षा विभाग ह सासकीय अउ शत-प्रतिशत अनुदान प्राप्त स्कूल म काम करइया पात्र सिक्षक मनके सिक्षा सत्र दू हजार छब्बीस-सत्ताईस के आखिरी तक पुनर्नियुक्ति देके स्वीकृति जारी करे हे। एमा सहायक सिक्षक ले लेके प्राचार्य तक के सिक्षक सामिल हे। लोक शिक्षण संचालनालय ल निरदेस दे गेहे कि सबो जिला म जरूरी कार्यवाही जल्दी पूरा करे जाय।
बीमित व्यक्ति कल्याण योजना
बीमित मनखे मन बर बेरोजगारी भत्ता योजना, अटल बीमित व्यक्ति कल्याण योजना आज ले अवइया बछर तीस जून तक बढ़ा दे गेहे। एखरे संग नवा ईएसआई अस्पताल के प्रबंधन अब सीधा निगम डहार ले करे जाही, जेखर ले उच्च गुणवत्ता वाले स्वास्थ्य सेवा सुनिश्चित करे जा सकें।
डिजिटल इंडिया अभियान/कृषि सिंचाई योजना
डिजिटल इंडिया अभियान के आज ग्यारह बछर पूरा होगे हे। ए पहल ले देसभर म नागरिक ले जुड़े, सीखे, लेनदेन करे अउ सरकारी सेवा के लाभ उठाय के तरीका ल बदल देहे। पाछु ग्यारह बछर म भारत ह दुनिया के सबले बड़का डिजिटल पब्लिक इंफ्रास्ट्रक्चर इकोसिस्टम म ले एक ल तैयार करे हे।
प्रधानमंत्री नरेन्द्र मोदी ह केहे हे कि डिजिटल इंडिया अभियान ह सुशासन ल नवा दिसा अउ देस के सबो विकास काम ल गति देहे। ओमन ह कहिन कि डिजिटल भुगतान अउ प्रत्यक्ष लाभ हस्तांतरण के जरिया ले सरकारी सहायता पारदर्सिता के संग सीधा लाभ पइवया मन तीर पहुंचत हे।
उहें, प्रधानमंत्री कृषि सिंचाई योजना ल घलो आज दस बछर पूरा होगे हे। ए योजना एक जुलाई दू हजार पन्द्रह के सुरू करे गे रिहीस। ए योजना सिंचाई म सुधार, सतत जल प्रबंधन अउ कृषि भूमि ल सिंचाई के दायरा म लाके खेती म बड़का बदलाव लाय म मददगार साबित होय हे।
राष्ट्रीय चिकित्सक दिवस
आज राष्ट्रीय चिकित्सक दिवस मनाय जात हे। ए दिवस जन स्वास्थ्य के रक्षा के प्रति डॉक्टर मनके समर्पण अउ योगदान ल देखाथे। ए दिन हर बछर एक जुलाई के डॉक्टर बिधान चंद्र रॉय के जयंती अउ पुण्यतिथि के याद म मनाय जाथे। ए बछर के बिसय हे – ‘‘बिहाईन्ड द मॉस्क, हू हील्स द हीलर्स‘‘।
प्रधानमंत्री नरेन्द्र मोदी ह राष्ट्रीय डॉक्टर दिवस म देस के सबो डॉक्टर मन ल सुभकामना दीन।
राष्ट्रीय चिकित्सक दिवस म आज छत्तीसगढ़ म घलो आने-आने कार्यक्रम आयोजित करे जात हे। गौरेला-पेण्ड्रा-मरवाही जिला म स्थित पुलिस कंट्रोल रूम परिसर म अधिकारी अउ कर्मचारी मन बर स्वास्थ्य परीक्षण सिविर के आयोजन करे गीस। सिविर म पचपन पुलिस अधिकारी अउ कर्मचारी के स्वास्थ्य के जांच करे गीस।
हत्याकांड-सीबीआई जांच
राज्य सासन ह कोरिया जिला के सोनहत इलाका म बहुचर्चित नवगई तिहरे हत्याकांड के जांच सीबीआई ल सौंपे के अधिसूचना जारी कर देहे। जानबा के मुताबिक पाछु सोलह जून के नवगई निवासी भरत सिंह गहरवार उर्फ लल्ला सिंह के संग नागेन्द्र सिंह अउ वीरेन्द्र सिंह के कार म जिंदा जलाके हत्या कर दे गे रिहीस। ए मामला के जांच अब सीबीआई करही।
जनप्रतिनिधि-शपथ ग्रहण समारोह
जांजगीर-चांपा जिला के बम्हनीडीह नगर पंचायत म नवनिर्वाचित अध्यक्ष अउ पार्षद के शपथ ग्रहण समारोह काली दू जुलाई के आयोजित करे जाही। समारोह म मुख्य अतिथि के रूप म मुख्यमंत्री विष्णुदेव साय सामिल होही। उहें, कार्यक्रम के अध्यक्षता उपमुख्यमंत्री अरूण साव करही। समारोह म नगर पंचायत के नवनिर्वाचित अध्यक्ष रमेश कुमार डडसेना अउ सबो नवनिर्वाचित पार्षद पद अउ गोपनीयता के सपथ लीहीं।
धमतरी-एकलव्य विद्यालय
आदिम जाति अउ अनुसूचित जाति विकास विभाग ह धमतरी जिला म एक अउ एकलव्य आदर्श आवासीय विद्यालय के स्थापना ल मंजूरी दे देहे। ए नवा एकलव्य विद्यालय म छात्र-छात्रा के विकास बर विश्व स्तरीय सुविधा मुहैया कराय जाही। संगेसंग विद्यार्थी मन ल नीट, जेईई अउ क्लैट जइसन राष्ट्रीय स्तर के प्रतियोगी परीक्षा बर अनुभवी सिक्षक मन डहार ले बिसेस कोचिंग अउ कैरियर काउंसलिंग दे जाही। नवा संस्थान के सुरू हो जाय ले जिला के दुर्गम अउ वन क्षेत्र के होनहार आदिवासी विद्यार्थी मन ल आधुनिक, उत्कृष्ट अउ निःशुल्क आवासीय सिक्षा मिल सकही।
जानबा के मुताबिक जिला के नगरी विकासखंड के पथररीडीह म पहिली ले एकलव्य आदर्श विद्यालय संचालित हे।
वन्यजीव तस्करी
कांकेर जिला म भानुप्रतापपुर पुलिस अउ एंटी पोचिंग टीम ह महराष्ट्र-छत्तीसगढ़ सीमा म वन्यजीव तस्करी के नेटवर्क के खुलासा करे हे। ऑपरेशन सेफ पैसेज के तहत उदंती-सीतानदी टाईगर रिजर्व, वन्यजीव अपराध नियंत्रण ब्यूरो, वन विभाग अउ पुलिस के संयुक्त कार्रवाई म दू बाघ के खाल के संग दू आरोपी मन ल गिरफ्तार करे गेहे। जांच म आरोपी मन तीर ले पैंगोलिन के शल्क घलो बरामद करे गेहे। दूनों आरोपी पुलिस विभाग ले जुड़े बताय जावत हे।
अउ अब थोरकुन समाचार सार म –
– राष्ट्रीय आयुर्विज्ञान आयोग ह छत्तीसगढ़ आयुर्विज्ञान संस्थान सिम्स बिलासपुर ल सैक्षणिक सत्र दू हजार छब्बीस-सत्ताईस बर एक सौ पच्चीस एमबीबीएस सीट बर मान्यता के नवीनीकरण प्रदान करे हे।
– राज्य शासन ह श्रम विभाग म ग्यारा अधिकारी के स्थानांतारण के आदेस जारी करे हे। सबो अधिकारी मन ल प्रशासनिक दृष्टिकोण ले अवइया आदेस तक नवा पद स्थापना दे गेहे। उंहे, तैंतीस जिला म जनपद पंचायत मुख्य कार्यपालन अधिकारी के घलो तबादला करे गेहे।
– कोण्डागांव जिला के फरसगांव तहसील कार्यालय म एंटी करप्शन ब्यूरो-एसीबी ह स्टेनो टायपिस्ट के नामांतरण के मामला म एक किसान ल दस हजार रूपिया के रिश्वत लेवत रंगे हाथ गिरफ्तार करे हे।
– रायगढ़ जिला के घड़घोड़ा वन परिक्षेत्र म वन विभाग के टीम ह कुरकुट नदी ले रेत के अवैध परिवहन करत बारह टैªक्टर ल जब्त करे हे।
अउ
– खैरागढ़-छुईखदान-गंडई पुलिस ह जिला स्तरीय ड्रग डिस्पोजल समिति के निगरानी म अलग-अलग मामला ले जब्त तैंतीस किलोग्राम ले जादा गांजा अउ तीन हजार नग ले जादा नसीला कैप्सूल अउ टैबलेट नष्ट करे हे।