बीवी – जी राम जी योजना
विकसित भारत गारंटी रोजगार अउ आजीविका मिशन-ग्रामीण योजना देशभर म काली एक जुलाई ले लागू हो जही। ए योजना महात्मा गांधी राष्ट्रीय ग्रामीण रोजगार गारंटी अधिनियम-मनरेगा के जघा लीही। एखर तहत हरेक ग्रामीण परिवार मन ल हर वित्तीय बछर म एक सौ पच्चीस दिन के रोजगार देवाय के गारंटी दे जाही। ए योजना के तहत कोनो मनखे ल बेरा काम नइ मिलही, त ओला बेरोजगारी भत्ता देय के प्रावधान घलो हे। योजना के तहत ग्रामीण क्षेत्र म सड़क, तरिया, जल संरक्षण, सिंचाई, वृक्षारोपण, सार्वजनिक परिसंपत्ति के निर्माण अउ आने-आने विकास काम मन ल प्राथमिकता दे जाही।
छत्तीसगढ़ म ए योजना के प्रचार-प्रसार बर ग्राम सभा, चौपाल, पोस्टर-बैनर, मुनादी, रथ प्रचार अउ डिजिटल माध्यम के उपयोग ले करे गीस। उहें, सरपंच, सचिव, रोजगार सहायक, स्व-सहायता समूह के माईलोगिन, जनप्रतिनिधि अउ स्थानीय सामाजिक संगठन डहार ले लोगन मन ल योजना के जानकारी दे गीस। एखर अलावा ग्राम अउ जनपद पंचायत के संगेसंग जिला स्तर म प्रसिक्षण, बइठका अउ ग्राम सभा के आयोजन करे गीस।
पेट्रोल/डीजल-प्रतिबंध
केन्द्र सरकार ह पेट्रोल अउ डीजल के बेचे अउ खरीदी म लगाय गे अस्थायी प्रतिबंध ल एक जुलाई ले हटाय के फइसला करे हे। पेट्रोलियम अउ प्राकृतिक गैस मंत्रालय ह केहे हे कि सार्वजनिक क्षेत्र के तेल विपणन कंपनी के खुदरा पेट्रोल पंप म अब सामान्य व्यवस्था के तहत ईंधन के बिक्री होही। मंत्रालय डहार ले केहे गेहे कि अब देस म पेट्रोलियम उत्पाद के आपूर्ति सामान्य होगे हे अउ पेट्रोल-डीजल पूरा मात्रा म हवय। एखर सेती जनहित म ए अस्थायी रोक ल वापिस लेके फइलसा ले गेहे।
राष्ट्रीय ग्रामीण विकास सम्मेलन
नई दिल्ली म राखे गे दू दिन के राष्ट्रीय ग्रामीण विकास सम्मेलन म छत्तीसगढ़ के मटेरियल बैंक ल राष्ट्रीय स्तर म सराहना मिले हे। केन्द्रीय ग्रामीण विकास मंत्री शिवराज सिंह चौहान ह प्रधानमंत्री आवास योजना-ग्रामीण के अंतर्गत विकसित ए मॉडल के सराहना करत ग्रामीण आवास निर्माण ल गति देना वाला बतईन। सम्मेलन म छत्तीसगढ़ के प्रतिनिधित्व उपमुख्यमंत्री अउ पंचायत अउ ग्रामीण विकास मंत्री विजय शर्मा ह करीन।
खेत बचाओ अभियान-समापन
केन्द्रीय कृषि अउ किसान कल्याण मंत्री शिवराज सिंह चौहान ह किहीन हे कि कृषि क्षेत्र के विकास के बिना विकसित भारत के सपना पूरा नइ हो सकय। हरियाणा के हिसार म खेत बचाओ अभियान के समापन समारोह ल संबोधित करत श्री चौहान ह किहीन कि सरकार एक मोबाइल ऐप विकसित करे म काम करत हे, जउन ह माटी अउ ओमा जरूरी उर्वरक के मात्रा के बारे म जानकारी दीही। ओमन किसान मन ल जैविक खेती अपनाय के सलाह दीन।
यूरिया/नैनो डीएपी
राज्य सरकार ह सहकारी समिति मनके माध्यम ले किसान मन ल देवइया यूरिया उपर लागू अस्सी प्रतिशत के सीमा ल खतम कर देहे। अब किसान मन ल अब किसान मन ल पाछु खरीफ बछर जइसन उंखर पात्रता के मुताबिक एकमुश्त यूरिया देवाय जाही। प्रदेस म यूरिया के पर्याप्त मात्रा ल देखत पहिली लागू कुछेक रोक मन ल खत्म कर दे गेहे।
जाजंगीर-चांपा जिला के कृषि विभाग के उप संचालक राकेश शर्मा ह बतईन कि संबंधित सहकारी समिति म पर्याप्त मात्रा म स्टॉक होय के सेती किसान मन ल एकमुश्त यूरिया दे जाही। उहें, कोनों समिति म स्टॉक के कमी होय म बांचे मात्रा ल यूरिया पहुंचतेच किसान ल बांटे जाही।
उहें, वैश्विक परिस्थिति के सेती रासासयनिक उर्वरक के उपलब्धता म पड़त प्रभाव ल देखत कृषि विभाग डहार ले राज्य म नैनो डीएपी अउ नैनो यूरिया के उपयोग ल बढ़ावा दे जावत हे। राज्य सरकार ह किसान मन ल नैनो उर्वरक के प्रति जागरूक करे बर अभियान चलावत हे।
कृषि विभाग ह किसान मन ले अपील करे हे कि अपन तीर ले सहकारी समिति अउ कृषि विभाग के अधिकारी मन ले संपर्क करके नैनो डीएपी अउ नैनो यूरिया के वैज्ञानिक उपयोग के जानकारी लेवय।
रामगढ़ महोत्सव-समापन
सरगुजा जिला के रामगढ़ म राखे गे दू दिन के रामगढ़ महोत्सव आज सिरा गे। समापन समारोह म मुख्यमंत्री विष्णुदेव साय सामिल होइन। ए मउका म श्री साय ह कहिन कि रामगढ़, सरगुजा के हजारों बछर जुन्ना सांस्कृतिक चेतना, कला, आस्था अउ गौरवशाली इतिहास के जीवंत प्रतीक हरय। ओमन कहिन कि विश्व के प्राचीनतम नाट्यशाला के रूप म विख्यात ए स्थल संस्कृति, इतिहास, साहित्य अउ पर्यटन के संगम हरय। ओमन किहीन कि छत्तीसगढ़ के धरती प्राकृतिक संपदा के संगेसंग सांस्कृतिक अउ पुरातात्विक रूप म घलो विश्व स्तर म बड़का चिन्हारी राखथे।
ए मउका म मुख्यमंत्री ह रामगढ़ के विकास बर एक करोड़ रूपिया अउ उदयपुर-डूमरडीह ल मिलाके नगर पंचायत बनाय के घोसना करीन।
ए दउरान मुख्यमंत्री ह विश्व के प्राचीनतम नाट्यशाला के रूप म विख्यात सीताबेंगरा गुफा, जोगीमारा गुफा अउ क्षेत्र के अनूठा प्राकृतिक धरोहर हाथीपोल के अवलोकन करीन। ए मउका म कृषि मंत्री रामविचार नेताम, पर्यटन अउ संस्कृति मंत्री राजेश अग्रवाल समेत आने-आने जनप्रतिनिधि मौजूद रिहीन।
भाजपा महिला मोर्चा-नियुक्ति
भारतीय जनता पार्टी ह महिला मोर्चा म संभाग प्रभारी अउ सह-प्रभारी मनके नियुक्ति करे हे। ए सूची भाजपा के प्रदेस अध्यक्ष किरण सिंह देव की सहमति ले प्रदेस महामंत्री अउ मुख्यालय प्रभारी नवीन मारकंडे ह जारी करीन हे।
हेमलता चंद्राकर ल रायपुर संभाग के प्रभारी अउ सुषमा खलको ल सहप्रभारी नियुक्त करे गेहे। अइसने, शीतल नायक ल दुर्ग संभाग के प्रभारी अउ वर्षा सिंह ल सहप्रभारी बनाय गेहे। रंजीता रंधावा ल बस्तर संभाग के प्रभारी अउ जानकी कोरसा ल सहप्रभारी, फुलेश्वरी पैकरा ल बिलासपुर संभाग के प्रभारी अउ किरण साहू ल सहप्रभारी के संग किरण मरकाम ल सरगुजा संभाग के प्रभारी अउ रजनी तिवारी ल सहप्रभारी बनाय गेहे।
रथयात्रा-स्पेशल ट्रेन
रथयात्रा के मउका म यात्री मनके सुविधा बर दक्षिण पूर्व मध्य रेलवे ह गोंदिया-पुरी-गोंदिया के बीच रथयात्रा स्पेशल ट्रेन चलाय के फइसला लेहे। ए बिसेस ट्रेन दू, नौ, सोलह अउ उनतीस जुलाई के गोंदिया ले पुरी बर चलही। वापसी म ए ट्रेन तीन, दस, सत्रह अउ तीस जुलाई के पुरी ले गोंदिया बर रवाना होही। ट्रेन के स्टॉपेज डोंगरगढ़, राजनांदगांव, दुरूग, रायपुर, समेत कई ठिन प्रमुख स्टेसन मन म रइही। उहें, हटिया-एलटीटी-हटिया समर स्पेशल ट्रेन के अवई-जवई पन्द्रह जुलाई तक बढ़ाय गेहे।
आरक्षक-फर्जी प्रमाण पत्र
केन्द्रीय औद्योगिक सुरक्षा बल-सीआईएसएफ म आरक्षक के पद म भर्ती बर कथित रूप ले फर्जी जाति अउ निवास प्रमाण पत्र प्रस्तुत करे के मामला म आरक्षक के सेवा खतम कर दे गेहे। उहें, उतई पुलिस ह आरक्षक के पद म चयनित आरोपी मोहित के खिलाफ अपराध दरज करके मामला ल कार्रवाई करे बर मध्यप्रदेश पुलिस ल भेज देहे।
मिले खबर के मुताबिक एसएससी जीडी भर्ती परीक्षा- दू हजार पच्चीस के तहत भर्ती प्रक्रिया के दउरान आरोपी मन ह फर्जी जाति अउ निवास प्रमाण पत्र प्रस्तुत करे रिहीन। दस्तावेज के सत्यापन के बाद जाति अउ निवास प्रमाण पत्र फर्जी पाय गीस, जेखर बाद आरक्षक के सेवा समाप्ति के कार्रवाई करे गीस।
अउ अब पेस हे मौसम
मौसम विभाग के मुताबिक दक्षिण-पश्चिम मानसून आज पूरा छत्तीसगढ़ म सक्रिय होगे हे। एखर असर ले पूरा प्रदेस म हल्का ले मध्यम बरसा के दउर सुरू होगे हे। मौसम विज्ञानी डॉक्टर गायत्री वाणी ह आकाशवाणी समाचार ले गोठबात करत बतईन कि जुलाई महीना म मानसून के गतिविधि म बढ़ोतरी होय के संभावना हे। इही बीच, सरगुजा जिला म काली हवा-गरेर अउ तेज बरसा के दउरान गाज गिरे ले पांच साल के लइका समेत तीन लोगन के मउत होगे। उहें, एक झिन नोनी ह गंभीर रूप ले रूप ले घायल होगे हे।