सहकारिता-सप्ताह
केंद्रीय सहकारिता मंत्रालय के स्थापना के पांच बछर पूरा होय के मउका म आज ले सहकारिता सप्ताह मनाय जावत हे। छै जुलाई तक चलइया ए सप्ताह म प्रदेसभर म कतकोन कारीकरम कराय जावत हे। आज पहिली दिन जिला सहकारी केंद्रीय बैंक रईपुर म सहकारिता सप्ताह कारीकरम के आयोजन करे गीस, जेमा सहकारिता मंत्री केदार कश्यप मुख्य अतिथि के रूप म सामिल होइन। ओमन ह छत्तीसगढ़ म सहकारिता के जनक पंडित वामन राव बलिराम लाखे के प्रतिमा म माला चढ़ाके अपन श्रध्दांजलि दीन। कारीकरम म छत्तीसगढ़ राज्य सहकारी बैंक मर्यादित के अध्यक्ष केदारनाथ गुप्ता, जिला सहकारी केंद्रीय बैंक रईपुर के अध्यक्ष निरंजन सिन्हा अउ उपाध्यक्ष अभिनेष कश्यप मौजूद रिहीन।
उहंे, सहकारिता सप्ताह के तहत सारंगढ़-बिलाईगढ़ जिला के कतकोन प्राथमिक कृषि शाख सहकारी समिति मन म ध्वजारोहण कारीकरम कराय गीस। सहसपुर समिति म राखे गे कारीकरम म जनप्रतिनिधि, अधिकारी अउ बड़े संख्या म किसान मन ह भाग लीन। कारीकरम के दउरान समिति के उपनियम के वाचन करके किसान मन ल उंखर अधिकारी अउ सहकारी प्रक्रिया के जानकारी घलो दे गीस।
सहकारिता सप्ताह के अंतर्गत रईपुर म अवइया तीन अउ चार जुलाई के राज्य स्तरीय सहकारी चिंतन सिविर, सहकार मेला अउ संगोष्ठी के आयोजन करे जाही, जेमा मुख्यमंत्री विष्णुदेव साय सामिल होही। उहें, छै जुलाई के कें्रदीय सहकारिता मंत्री अमित शाह अन्न भंडारण योजना के तहत प्रदेस के नौ पैक्स म गोदाम बनाय के काम के भूमिपूजन करही।
कबीर जयंती
आज कबीर जयंती हरय। ए मउका म प्रदेसभर म कतकोन कारीकरम करे जावत हे। रईपुर संघरा दूसर जघा म घलो आज कबीरहा मन ह रैली निकालीन।
मुख्यमंत्री विष्णुदेव साय ह आज संत कबीरदास के जयंती के मउका म रईपुर के सोनपैरी म संत असंगदेव के साथ कबीर जयंती महोत्सव म सामिल होइन। कारीकरम म मुख्यमंत्री ह किहीन कि संत कबीरदास के आदर्स जातिपंथ ले उपर उठके सामाजिक सद्भाव, आत्मचिंतन अउ लोक कल्याण के प्रेरणा देथे।
ए मउका म श्री साय ह घोसना करीन कि ‘‘मुख्यमंत्री बिजली बिल भुगतान समाधान योजना‘‘ के अवधि ल अवइया तीन महिना बर बढ़ाय जाही, जेखर ले जादा ले जादा उपभोक्ता सरचार्ज माफी अउ आकर्षक प्रावधान के लाभ लेके अपन लंबित बिजली बिल के भुगतान कर सकही। कारीकरम म कर्नाटक के राज्यपाल थावरचंद गहलोर अउ विधानसभा अध्यक्ष डॉक्टर रमन सिंह मौजूूद रिहीन।
स्वास्थ्य-डिजीटल पहल
केंद्रीय स्वास्थ्य अउ परिवार कल्याण मंत्री जगत प्रकाश नड्डा ह आज नई दिल्ली म स्वास्थ्य क्षेत्र बर कतकोन डिजीटल पहल के सुरूआत करीन। एमा आरोग्य सेतु के दूसर चरण, आयुष्मान सारथी चैटबॉट, आयुष्मान ऐप, ई-सुश्रुत क्लीनिक, राष्ट्रीय स्वास्थ्य दावा विनिमय अउ भारत के डिजीटल सार्वजनिक स्वास्थ्य बुनियादी ढांचा ल मजबूत करे बर स्वास्थ्य मानक सामिल हे।
सभा म श्री नड्डा ह ए पहल ल सरकार डहार ले हासिल एक ठन बड़े उपलब्धि बतइन।
सीबीएसई-त्रिभाषा नीति
केंद्रीय माध्यमिक शिक्षा बोर्ड-सीबीएसई ह आज त्रिभाषा नीति के बारे म निरदेस जारी करीस। बोर्ड ह केहे हे कि कक्षा दसवीं के वर्तमान बैच ल नवा भाषा नीति के पालन नइ करे बर पड़य। बोर्ड ह यहू किहीस हे कि कक्षा सातवीं, आठवीं अउ नवमीं म पढ़त लइका मन ल घलो कक्षा दसवीं पहुंचे के बाद तीसर भाखा म बोर्ड परीक्षा देके जरूरत नइ होही। बोर्ड ह केहे हे कि कक्षा के अनुसार संसाधन सामग्री देगे बेरा म देवाय जाही।
प्रधानमंत्री सूर्यघर मुफ्त बिजली योजना
प्रधानमंत्री सूर्यघर मुफ्त बिजली योजना म रूफटॉप सोलर लगइया उपभोक्ता मन ल उपराहा बिजली के फायदा मिलही। छत्तीसगढ़ राज्य विद्युत वितरण कंपनी ह सोलर एनर्जी कार्पोरेसन ऑफ इंडिया डहार ले तय करे गे बायबैक दर ल लागू करे के प्रक्रिया ल सुरू कर दे गेहे। मंजूरी मिले के बाद ग्रिड म भेजे गे उपराहा सोलर बिजली के रासि उपभोक्ता मन के अवइया बिजली बिल म क्रेडिट के रूप म मिलही। नेट मीटरिंग व्यवस्था ले उपराहा बिजली के हिसाब राखे जाही।
आगजनी बचाव-जांच
प्रदेसभर म आगजनी के घटना ले बांचे बर बहुमंजिला भवन, कोचिंग सेंटर अउ संस्थान म अग्निसमन अउ आपातकालीन सेवा के जांच ल तेज कर दे गेहे। ए कड़ी म दुरूग जिला म अग्निसमन अउ आपातकालीन सेवा अउ एसडीआरएफ के टीम ह चालीस ले जादा कोचिंग संस्थान के निरीक्षण करीन। ए दउरान कतकोन कोचिंग संस्थान म अग्निसमन यंत्र, अलार्म अउ आपातकालीन निकास व्यवस्था म कमी पाय गेहे। जिला सेनानी नागेन्द्र कुमार सिंह ह बतइन कि संबंधित संस्थान ल कमी ल दूर करे बर हफ्ता भरके समय दे गेहे। दे गे बेरा म सुधार नइ होय म कोचिंग सेंटर ल सील कर दे जाही।
गोंचा पर्व
बस्तर के ऐतिहासिक अउ विश्व प्रसिध्द गोंचा महापर्व आज ले देव स्नान पूर्णिमा के साथ सुरू होवत हे। ए दउरान जगन्नाथ मंदिर म भगवान जगन्नाथ, बलभद्र अउ माता सुभद्रा के वैदिक विधि ले महाभिषेक होही। एखर बाद अवइया पंद्रह दिन तक भगवान जगन्नाथ, बलभद्र अउ माता सुभद्रा के मंदिर के कपाट बंद कर दे जाही।
रामगढ़ महोत्सव
सरगुजा जिला के रामगढ़ म आज ले दू दिन के रामगढ़ महोत्सव सुरू हो गेहे। पर्यटन अउ संस्कृति मंत्री राजेश अग्रवाल ह ए महोत्सव के सुरूआत करीन। उद्घाटन के मउका म स्कूली लइका अउ स्थानीय कलाकार मन ह सांस्कृतिक कारीकरम के प्रस्तुति दीन। कारीकरम म श्री अग्रवाल ह किहीन कि रामगढ़ सिरिफ सरगुजाच के नही, फेर पूरा देस के ऐतिहासिक अउ सांस्कृतिक पहिचान के केंद्र हरय। राज्य सरकार ह एला राष्ट्रीय अउ अंतर्राष्ट्रीय पर्यटन मानचित्र म स्थापित करे बर सरलग परयास करत हे।
‘इन्फ्लुएंसर मीट और फेमिलराइजेशन टूर‘
डिजीटल माध्यम के जरिया छत्तीसगढ़ पर्यटन ल राष्ट्रीय अउ अंतर्राष्ट्रीय स्तर म पहिचान देवाय बर छत्तीसगढ़ पर्यटन मंडल डहार ले छब्बीस ले तीस जून तक ‘इन्फ्लुएंसर मीट और फेमिलराइजेशन टूर‘ के आयोजन करे जावत हे, जेमा राज्य के आने-आने जिला ले चुने प्रमुख सोसल मीडिया इन्फ्लुएंसर मन ल छत्तीसगढ़ के प्रमुख पर्यटन स्थल के भ्रमण कराय जावत हे। ए दउरान प्रतिभागी मन ह मैनपाट अउ सतरेंगा के भ्रमण करत हे।
अवैध अतिक्रमण-कार्रवाई
रईपुर जिला के धरसींवा विकासखंड के ग्राम सम्मानपुर-नकटी म आज राजस्व, पुलिस अउ नगर निगम के अमला म कार्रवाई करत लगभग नौ हेक्टेयर शासकीय भूमि म बने सतहत्तर ठन अवैध मकान ल हटाइस। अधिकारी मन ह बतइन कि ए सरकारी जमीन म बहुत बेरा ले अवैध कब्जा रिहीस। प्रशासन डहार ले सबो कब्जाधारी मन ल नोटिस जारी करे गे रिहीस। कार्रवाई के बाद सबो कब्जाधारी मनके व्यवस्थापन जिला प्रशासन डहार ले नवा रईपुर के सेक्टर तीस के आवास म करे जावत हे।
अउ अब पेस हे मौसम के हाल…
मौसम विभाग ह अवइया दू दिन तक बस्तर संभाग म एक-दू जघा म मध्यम ले भारी बरसा होय के चेतावनी देहे। अवइया चौबीस घंटा के दउरान सुकमा, बीजापुर, दंतेवाड़ा, बस्तर अउ नारायणपुर जिला म गरज-चमक के संग बरसा होय के संभावना हे। उहें, कुछेक जघा म आकाशीय बिजली गिरे के चेतावनी दे गेहे हवय। मौसम विज्ञानी डॉक्टर गायत्री वाणी ह आकाशवाणी समाचार ल बतइन कि अवइया छै दिन तक प्रदेस म बरसा के गतिविधि बाढ़ही। उहें, उत्तर अउ दक्षिण छत्तीसगढ़ म बने बरसा होय के आसार हे।
इही बीच, कबीरधाम जिला के बरकोही बांध तीर आकाशीय बिजली गिरे ले एक झन किसान के मउत होगिस बरसा ले बांचे बर ओहा पेड़ के नीचे खडे़ होगे रिहीस।
अउ अब थोरकुन समाचार सार म –
– बलरामपुर जिला के राजपुर थाना क्षेत्र के ग्राम कोटागहना म सोवत खानी सांप कांटे ले एक झन नोनी अउ सियान माईलोगिन के मउत होगे।
– कोरबा जिला के कटघोरा वन मंडल के जटगा वन परिक्षेत्र के धवलपुर जंगल म हाथी के हमला ले एक झन ग्रामीण के मउत होगिस।
अउ
– मुंगेली जिला म जरहागांव पुलिस ह ऑपरेसन बाज के तहत गांजा के अवैध खेती करे के मामला म एक झन आरोपी ल गिरफ्तार करे हे। पुलिस ह आरोपी के कब्जा ले लगभग साढे़ तीन किलो वजन के गांजा के तीन ठन पउधा घलो जब्त करे हे।