प्रधानमंत्री ह अंतर्राष्ट्रीय योग दिवस के चर्चा करीन, जेला दुनिया भर म मनाय गीस। ए बार ए आयोजन ढाई हजार ले जादा जघा म होइस। भारत म करोड़ो लोगन मन ह योग दिवस म भागीदारी दीन। श्री मोदी ह अहमदाबाद म विश्व योगासन चैंपियनशिप म पदक विजेता एथलिट ल बधाई दीन।
प्रधानमंत्री ह पश्चिम एशिया म युध्द के दउरान उंखर अपील म देसवासी मन के समर्थन अउ सहयोग बर आभार जतइन।
प्रधानमंत्री ह देसवासी मन ले जन संरक्षण के संबंध म किहीन कि बरसा जल के एक-एक बूंद ल बचाय जाना चाही। ओमन ह किहीन कि कैच द रेन अभियान म जरा भी ढिलाई नइ होना चाही।
मन की बात-छत्तीसगढ़
मन की बात कारीकरम ल छत्तीसगढ़ के आने-आने जघा म सुने गीस। मुख्यमंत्री विष्णुदेव साय ह रईपुर स्थित अपन निवास कार्यालय म जन प्रतिनिधि अउ मनखे मन संग ए कारीकरम ल सुनिस। ए बेरा म मुख्यमंत्री ह किहीन कि ‘‘मन की बात‘‘ आज जनता अउ नेतृत्व के बीच संवाद के सशक्त माध्यम बन चुके हे। प्रधानमंत्री के विचार देसवासी ल प्रेरित करे के संगेसंग समाज म सकारात्मक परिवर्तन के रद्दा घलो प्रशस्त करत हे।
पल्स पोलियो अभियान
राष्ट्रीय पल्स पोलियो अभियान के तहत आज प्रदेसभर म सून्य ले पांच बछर तक के लइका मन ल पोलियो के दवई पिलाय गीस। आज जउन लइका मन दवई पिये ले छूट गेहे, ओमन काली अउ परनदिन स्वास्थ्य कार्यकर्ता अउ मितानिन घर-घर जाके दवई पिलाही। ए अभियान के तहत प्रदेस म पैंतीस लाख अंठानवे हजार ले जादा लइका मन ल पोलियो के खुराक पिलाय के लक्ष्य राखे गेहे।
इही बीच, मुख्यमंत्री विष्णुदेव साय अउ स्वास्थ्य मंत्री श्याम बिहारी जायसवाल ह प्रदेसवासी मन ले अपील करे हे कि ओमन अपन सून्य ले पांच बछर तक के हरेक लइका मन ल पोलियो के दू बूंद दवई जरूर पिलाय। श्री साय ह अपन संदेस म किहीन कि ए दवई नही, लइका मनके स्वस्थ, सुरक्षित अउ उज्जवल भविष्य के सुरक्षा के संकल्प हे। ओमन ह सबो मनखे मन ले आग्रह करे हे कि ओमन तीर-तखार घलो ए सुनिश्चित करे कि कोनो भी लइका पोलियो के दू बंूद ले छूटे झन।
राष्ट्रीय ग्रामीण विकास सम्मेलन
कंेद्रीय ग्रामीण विकास मंत्री शिवराज सिंह चौहान ह विकसित भारत दू हजार सैंतालीस के दृष्टिकोण ल साकार करे म गांव के मुख्य भूमिका के उल्लेख करीन। नई दिल्ली म राष्ट्रीय ग्रामीण विकास सम्मेलन म श्री चौहान ह किहीन कि ग्रामीण विकास म तेजी लाय बर विकसित भारत ग्रामीण योजना म अवइया राज्य मनके योगदान के संग एक लाख इंक्यावन हजार करोड़ रूपिया ले जादा के प्रावधान करे गेहे।
सहकारिता सप्ताह
ककेंद्रीय सहकारिता मंत्रालय के स्थापना के पांच बछर पूरा होय म छत्तीसगढ़ म काली उनतीस जून ले सहकारिता सप्ताह मनाय जाही। छै जुलाई तक चलइया ए सप्ताह के दउरान प्रदेसभर म सहकारिता ल बढ़ावा देबर आने-आने कारीकरम आयोजित होही। रईपुर म अवइया तीन अउ चार जुलाई के राज्य स्तरीय चिंतन सिविर सहकार मेला अउ संगोष्ठी के आयोजन करे जाही। एमा मुख्यमंत्री विष्णुदेव साय मुख्य अतिथि के रूप म सामिल होही। सहकार मेला म सहकारिता क्षेत्र के उपलब्धि अउ सफल मॉडल के प्रदर्सन करे जाही। छै जुलाई के केंद्रीय सहकारिता मंत्री अमित शाह डहार ले अन्न भंडारण योजना के तहत प्रदेस के नौ पैक्सो म गोदाम निर्माण काम के भूमिपूजन करे जाही।
एनीमिया मुक्त भारत अभियान
कंेद्रीय स्वास्थ्य अउ परिवार कल्याण मंत्री जगत प्रकाश नड्डा काली उनतीस जून के नई दिल्ली म केंद्रीय स्वास्थ्य अउ परिवार कल्याण परिषद के सोलहवां बइठका म एनीमिया मुक्त भारत अभियान बर परिचालन गत दिसा-निरदेस जारी करही। ए सुभारंभ एनीमिया मुक्त भारत ले एनीमिया मुक्त भारत अभियान म परिवर्तित होय के कारण एनीमिया के विरूध्द देस के लड़ाई म एक जरूरी मील के पत्थर साबित होही। ए अभियान म हिमोग्लोबीन परीक्षण, आयरण अल्पता, एनीमिया के प्रोटोकॉल आधारित उपचार, व्यवस्थित फॉलोअप अउ लाभार्थी के संदर्भ देना अउ स्वस्थ आहार संबंधी आदत उपर केंद्रीय परामर्स देना सामिल हे।
भाजपा-बैठक
पंडित दीनदयाल प्रसिक्षण अभियान के तहत डिजीटल लर्निंग प्लेटफॉर्म कारीकरम ल लेके काली भारतीय जनता पार्टी के प्रदेस इकाई के वर्चुअल बइठका होइस। ए बइठका म मुख्यमंत्री विष्णुदेव साय घलो सामिल होइन। ए बेरा म मुख्यमंत्री ह किहीन हे कि डिजीटल लर्निंग प्लेटफॉर्म प्रसिक्षण ले न केवल कार्यकर्ता के बल्कि जन प्रतिनिधि मनके घलो डिजीटल अउ तकनीकी ज्ञान बाढ़ही।
बइठका ल पार्टी के प्रदसे अध्यक्ष किरण सिंह देव अउ संगठन महामंत्री पवन साय ह घलो संबोधित करीन। उहें, भाजपा के प्रदेस उपाध्यक्ष अउ डिजीटल लर्निंग प्लेटफॉर्म के प्रदेस प्रभारी जगन्नाथ पाणिग्रही ह बइठका म ए अभियान के विस्तृत रूपरेखा अउ उद्देस्य के जानकारी साझा करीन।
हाईकोर्ट-एरियर्स भुगतान
छत्तीसगढ़ हाईकोर्ट ह पेंशनर के हित म बड़का फइसला सुनात हुए छठवां अउ सातवां वेतन आयोग ले जुड़े उनसठ महिना के बकाया एरियर्स के भुगतान के रद्दा साफ कर देहे। मुख्य न्यायाधीश रमेश सिन्हा अउ न्यायमूर्ति रविन्द्र कुमार अग्रवाल के खंडपीठ ह राज्य सरकार के रिट अपील खारिज करत हुए एकल पीठ के आदेस ल बरकरार राखिन। अदालत ह किहीन कि दू राज्य के बीच वित्तीय समन्वय या सहमति के अभाव पेंशनर के वैद्य अधिकार ल प्रभावित नइ कर सकय।
रामगढ़ महोत्सव
सरगुजा जिला के रामगढ़ म काली उनतीस जून ले दू दिवसीय रामगढ़ महोत्सव के आयोजन करे जाही। महोत्सव के सुभारंभ मुख्यमंत्री विष्णुदेव साय करही। महोत्सव के पहिली दिन छत्तीसगढ़ के लोकसंस्कृति उपर आधारित आने-आने लोकनृत्य अउ लोकगीत प्रस्तुत करे जाही।
दुर्घटना/हादसा
जांजगीर-चांपा जिला के ग्राम कोरबी म आज होय एक सड़क हादसा म तीन लोगन के मउत मउका म ही होगिस। जानबा के मुताबिक बलौदा थाना क्षेत्र म अवइया भारतमाला रद्दा म मॉर्निंग वॉक म निकले तीन लोगन मन ल अज्ञात वाहन ह अपन चपेट म ले लीस। मृतक म दू डोंगरी अउ एक कोरबी गांव के रहवइया रिहीस। हादसा के बाद चालक फरार होगिस।
उहें, सक्ति जिला के भेड़ीकोना गांव म चारपहिया वाहन ह मोटर साइकिल सवार युवक मन ल टक्कर मार दीस। ए हादसा म एक युवक के मउत होगिस। उहें, एक आने युवक घायल होगिस।
इही बीच, बेमेतरा जिला के ग्राम राउरपुर म अचानक कच्चा दीवार के ढह जाय ले दू बहिनी के मउत होगिस। उहें, एक माईलोगिन घायल होगिस। जानबा के अनुसार दूनों लइका घर के आंगन म बइठे रिहीस, इही दउरान दीवार भरभरा के गिर गीस।
बुधरी ताती-साक्षात्कार
राष्ट्रपति द्रौपदी मुर्मु डहार ले हालहे म पद्मश्री ले सम्मानित दंतेवाड़ा के समाज सेवी डॉक्टर बुधरी ताती के आकाशवाणी डहार ले लेगे साक्षात्कार काली उनतीस जून के प्रसारित करे जाही। ए कारीकरम बिहनिया दस बजे आकाशवाणी के रईपुर केंद्र डहार ले प्रसारित करे जाही। एला छत्तीसगढ़ स्थित आकाशवाणी के सबो केंद्र रिले करही।
अउ अब पेस हे मौसम के हाल…
मौसम विभाग ह अवइया तीन दिन तक बस्तर संभाग म एक-दू जघा म मध्यम ले भारी बरसा होय के चेतावनी देहे। उहें, कुछेक जघा म गरज-चमक के संग गाज गिरे के संभावना जताय हे।
मौसम विज्ञानी डॉक्टर गायत्री वाणी ह आकाशवाणी समाचार ल बतइन कि आज ले अवइया सात दिन तक प्रदेस म बरसा के गतिविधि बाढ़ही। उहें, उत्तर अउ दक्षिण छत्तीसगढ़ म जादा बरसा के संभावना हे।
इही बीच, आज बस्तर के संग प्रदेस के कतकोन जघा म हल्का ले मध्यम बरसा होय के खबर हे। जगदलपुर म गरज-चमक अउ तेज हवा के संग जमके बरसा होइस।
मुख्यमंत्री आईटी फेलोशिप
मुख्यमंत्री आईटी फेलोशिप बर ऑनलाइन आवेदन अवइया सात जुलाई ले करे जा सकत हे। ए योजना के तहत एम.टेक.- डाटा साईंस अउ आर्टिफिसियल इंटेलीजेंस म प्रवेस लेवइया चयनित छात्र मन ल हर महिना पचास हजार रूपिया फेलोशिप दे जाही। ट्यूशन फीस के पूरा खर्च राज्य सरकार वहन करही।