लाॅकडाउन
कोरोना संक्रमण के बाढ़त मामला के सेती रईपुर अउ बिलासपुर जिला म पाछु बाईस सितंबर ले लागू लाॅकडाउन आज रतिहा बारह बजे ले सिरा जही। राज्य सरकार ह अब ए जिला मन म लाॅकडाउन के बेरा ल नइ बढ़ाय।
जारी आदेस के मुताबिक राजधानी रईपुर जिला म काली उनतीस सितंबर ले जम्मों दुकान खुल जही। दुकान बिहनिया आठ बजे ले रतिहा आठ बजे तक खुलही। जम्मों आफिस मन सासन डहार ले राखे गे बेरा म चलही। पेट्रोप पंप अउ मेडिकल दुकान घलो तय करे गे बेरा के मुताबिक खुलही। आदेस म केहे गेहे कि कोरोना प्रोटोकाल अउ दिसा-निरदेस के पालन जउन मनखे नइ करही, उंखर मनके खिलाफ कड़ा कार्रवाई करे जाही। कोरोना संक्रमण ले बचाव अउ संक्रमण के कड़ी ल तोड़े बर फिजिकल डिस्टेंसिंग, मास्क अउ बेरा-बेरा म हाथ धोय के संगेसंग सैनिटाईज करना जादा जरूरी हे।
स्वास्थ्य मंत्री-वैक्सीन वेबपोर्टल
केन्द्रीय स्वास्थ्य अउ परिवार कल्याण मंत्री डाॅक्टर हर्षवर्धन ह कोविड-नाइंटीन बर भारतीय आयुर्विज्ञान अनुसंधान परिषद के वैक्सीन वेबपोर्टल अउ राष्ट्रीय क्लीनिकल रजिस्ट्री के सुभारंभ करीन। ए वैक्सीन वेबपार्टल भारत अउ विदेस म कोरोना संक्रमण बर वैक्सीन के विकास ले जुड़े जानकारी दीही।
धान खरीदी-किश्त
राष्ट्रीय सहकारिता विकास निगम ह न्यूनतम समर्थन मूल्य के तहत धान बिसाय बर तीन ठिन राज्य मन ल उन्नीस हजार चार सौ चवालीस करोड़ रूपिया के पहिली किश्त मंजूर कर देहे। ए राज्य छत्तीसगढ़, हरियाणा अउ तेलंगाना हरय। छत्तीसगढ़ ल सबले जादा नौ हजार करोड़ रूपिया दे गेहे।
कृषि सुधार विधेयक-मंजूरी
राष्ट्रपति रामनाथ कोविंद ह संसद म पारित तीन ठिन कृषि सुधार विधेयक ल मंजूरी दे देहे। एमा किसान उपज व्यापार अउ वाणिज्य विधेयक, मूल्य आश्वासन अउ कृषि सेवा विधेयक के संगेसंग आवश्यक वस्तु संसोधन विधेयक सामिल हे। ए विधेयक के उद्देश्य देस के कृषि बेवस्था म बदलाव लाना अउ किसान मनके आय ल बढ़ाना हे। नवा विधेयक म कोनों भी उपज ल बोआई के पहिली समझौता करे के नियम हे।
नवा कानून के उद्देश्य किसान मनके उपरहा आय देवाय बर कृषि उपज विपणन समिति मंडी के संगेसंग किसान मन ल अपन उपज ल दूसर जघा बेचे के घलो विकल्प देना हे।
कृषि विधेयक-पैदल मार्च
कृषि सुधार विधेयक के विरोध म छत्तीसगढ़ के मुख्यमंत्री भूपेश बघेल अउ कांग्रेस के प्रदेश अध्यक्ष मोहन मरकाम के संगेसंग पार्टी के आने पदाधिकारी मन काली रईपुर म राजीव भवन ले लेके राजभवन तक पैदल मार्च करही। एखर बाद राष्ट्रपति के नाव राज्यपाल ल ज्ञापन सौंपही। कांग्रेस ह आरोप लगाय हे कि केन्द्र सरकार ह संसद म बिना गोठबात के ए विधेयक ल पारित करा लेहे।
कृषि विधेयक-भाजपा
भारतीय जनता पार्टी के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह ह किहीन हे कि कृषि सुधार संबंधी विधेयक के खिलाफ विधानसभा म प्रस्ताव लाय अउ एला लेके कोर्ट जाय के बात कहि के प्रदेस कांग्रेस ह अपन संविधान, किसान अउ मजदूर विरोधी होय के परिचय देहे। डाॅक्टर सिंह ह किहीन कि कांग्रेस ल ए विधेयक के विरोध करे के पहिली अपन घोषणा पत्र म करे गे वादा ले पूरा करना चाही।
उहें, नेता प्रतिपक्ष धरमलाल कौशिक ह किहीन कि देस म कृषि विधेयक के माध्यम ले किसान मन ल बढ़िया बाजार मिलही।
भगत सिंह-जयंती
राष्ट्र आज क्रांतिकारी सहीद भगत सिंह ल उंखर एक सौ तेरहवीं जयंती के मउका म श्रद्धांजलि देवत हे। ओमन देस के आजादी बर अंग्रेजी सासन के खिलाफ लड़ीन अउ सिरिफ तेईस साल के उमर म ओमन ल राजगुरू अउ सुखदेव के संग लाहौर जेल म फांसी दे दे गीस।
हमर ग्राम सभा
पंचायत ग्रामीण विकास अउ स्वास्थ्य मंत्री टी.एस. सिंहदेव ह किहीन हे कि स्वास्थ्य अउ महिला बाल विकास विभाग डहार ले चलाय जात कतकोन कारीकरम के माध्यम ले प्रदेस म लइका अउ गर्भवती माईलोगिन मनके पोषण अउ स्वास्थ्य के निगरानी करे जात हे। बढ़िया पोषण बर ए बेरा कतकोन कारीकरम चलाय जात हे।
स्वास्थ्य मंत्री ह काली आकाशवाणी रायपुर ले प्रसारित विशेष कारीकरम ‘‘हमर ग्राम सभा‘‘ म कुपोषण अउ आंगनबाड़ी बिसय उपर गोठबात करीन। ओमन किहीन कि प्रदेस म करीबन साढ़े सैंतालीस हजार आंगनबाड़ी केन्द्र चलाय जात हे अउ करीबन तिहत्तर हजार मितानिन मन ह लोगन मनके स्वास्थ्य के देखभाल करके ओमन ल जरूरी दवई देवत हे।
माओवादी-मुठभेड़
बीजापुर जिला म सुरक्षा बल मनके संग होय मुठभेड़ म एक झिन माओवादी मारे गीस। जानबा के मुताबिक गंगालूर थाना क्षेत्र म सुरक्षा बल मनके टीम ह गश्त म निकले रिहीन। इही दउरान हीरानार-पेद्दापाल के जंगल म माओवादी मन संग मुठभेड़ होईस। सुरक्षा बल मन के फायरिंग ल देखके माओवादी मन जंगल कोति भाग गे। बाद म घटना वाले जघा ले तलासी के दउरान एक झिन माओवादी के सव के संग हथियार अउ विस्फोटक जिनीस बरामद करे गेहे।
हाथी मौत
प्रदेस म हाथी मनके मौत के घटना सरलग आगू आवत हे। गरियाबंद जिला म आज एक ठिन हाथी के मउत करेंट लगे ले होय हे। हमर संवाददाता ले मिले जानबा के मुताबिक जउन जघा म बाईस ठिन हाथी के दल ह घुमत रिहीन। उहां बिजली के तार ह अतेक नीचे रिहीस कि एक ठिन हाथी ह उहां ले निकल नइ पाईस अउ तार के टकराय ले उंखर मउत होगे। दल के बांचे हाथी मन ह जंगल कोति चले गे।
जानबा के मुताबिक दू दिन पहिली महासमुंद जिला के पिथौरा वन परिक्षेत्र म घलो एक ठिन मादा हाथी के मउत करेंट लगे ले होय रिहीस। एखर अलावा थोरिक महीना पहिली घलो सूरजपुर, जशपुर अउ धमतरी जिला म हाथी मनके मउत होय हे।
विश्व रैबीज दिवस
आज विश्व रैबीज दिवस हरय। ए मउका म स्वास्थ्य विभाग ह रैबीज ले बचाव बर घर म पोसे गे जानवर के काटे के बाद घाव उपर तुरते साबुन या एंटीसेप्टिक ले पन्द्रह ले बीस मिनट तक धोय के सलाह देहे। स्वास्थ्य विभाग ह रैबिज ले बांचे बर घर के पालतू जानवर कुकुर, बिलई या आने पशु मन ल जरूरी टीका लगाय बर केहे हे। कुकुर मन ल तीन महीना के उमर म टीका लगाय जाना चाही। रैबीज ले बचाव, प्रबंधन अउ टीकाकरण ले लोगन मन ल जागरूक करे बर पूरा दुनिया म अट्ठाईस सितंबर के हर साल विश्व रैबीज दिवस मनाय जाथे।
स्वास्थ्य विभाग के पशु चिकित्सक डाॅक्टर इंद्र कुमार पटेल ह बतईन कि रैबीज होय मनखे के गला के नली ह चिपक जथे, जेला हाइड्रोफोबिया केहे जाथे। सरकारी अस्पताल मन म एखर इलाज के पूरा बेवस्था हवय।
संक्षिप्त समाचार
अउ अब थोरकुन समाचार सार म-
– कामरेड शंकर गुहा नियोगी के सहादत दिवस के मउका म आज जन्ममुक्ति मोर्चा छत्तीसगढ़ डहार ले बालोद जिला के दल्लीराजहरा म फ्लैगमार्च के आयोजन करे गीस।
– राजधानी रईपुर के एक ठिन क्लब म होय गोलीकांड के मामला म पुलिस ह चैदह लोगन मनके खिलाफ एफ.आई.आर दर्ज करे हे अउ क्लब ल सील कर दे गेहे।
– महासमुंद जिला के सरायपाली वन परिक्षेत्र ले जंगल सुअर के सिकाय करे के आरोप म चार झिन लोगन मन ल गिरफ्तार करे गेहे।
अउ
– राजनांदगांव नगर निगम क्षेत्र के गरीब परिवार मन ल अब प्रधानमंत्री आवास योजना के तहत घर मिलही।