केंद्रीय गृहमंत्री-सहकारी टैक्सी शुभारंभ
कंेद्रीय गृह और सहकारिता मंत्री अमित शाह ह किहीन हे कि सहकारी टैक्सी प्लेटफॉर्म-भारत टैक्सी के अवइया दू बछर म देसभर के पांच सौ सहर अउ कस्बा मन म बिस्तार करे जाही। गुजरात म भारत टैक्सी के सुभारंभ करत हुए श्री शाह ह ए पहल ल सरकारी क्षेत्र म एक ठन क्रांतिकारी कदम बतइन। ओमन किहीन कि भारत टैक्सी के उद्देस्य चालक मन ल सीधा लाभ पहुंचा के निष्पक्ष अउ पारदर्सी व्यवस्था सुनिश्चित करना हरय।
श्री शाह ह डेयरी उत्पाद ले संबंधित अमूल सहकारी अभियान के सफलता के घलो उल्लेख करीन।
पल्स पोलियो अभियान
प्रदेस म काली अट्ठाईस जून ले राष्ट्रीय पल्स पोलियो अभियान चलाय जाही। एखर तहत जनम से लेके पांच बछर तक के पैंतीस लाख अंठानवे हजार ले जादा लइका मन ल पोलियो के खुराक पियाय के लक्ष्य राखे गेहे। अभियान के संचालन बर अट्ठाईस हजार टीम मनके संग संतावन हजार ले जादा वैक्सीनेटर तैनात करे गेहे। अभियान के दिन छूटे हुए लइका मन ल अवइया दू दिन तक याने उनतीस अउ तीस जून के घर-घर जाके खुराक दे जाही। राज्य टीकाकरण अधिकारी डॉक्टर वी.आर.भगत ह बतइन कि दूरस्थ गांव, वनांचल क्षेत्र, सहरी बस्ती, ईंटा भट्ठी, निर्माण स्थल अउ प्रवासी अउ घुमंतू परिवार मन तक पहुंच के लइका मन ल पोलियो के खुराक दे जाही।
मन की बात
प्रधानमंत्री नरेंद्र मोदी काली अट्ठाईस जून रविवार के आकाशवाणी के ‘‘मन की बात‘‘ कारीकरम म देस अउ विदेस के लोगन मन ले अपन विचार साझा करही। ए मासिक रेडियो कारीकरम के एक सौ पैंतीसवां एपिसोड होही।
कारीकरम के प्रसारण आकाशवाणी अउ दूरदर्शन के सबो चैनल, एआईआर न्यूज के वेबसाइट अउ न्यूज ऑन एआईआर मोबाइल ऐप म करे जाही। संगेसंग एआईआर न्यूज, डीडी न्यूज, प्रधानमंत्री कार्यालय अउ सूचना अउ प्रसारण मंत्रालय के यूट्यूब चैनल मन म घलो एखर सीधा प्रसारण करे जाही। हिन्दी प्रसारण के तुरते बाद क्षेत्रीय भाषा मन म घलो कारीकरम के प्रसारण होही।
सहकारिता सप्ताह
कंेद्रीय सहकारिता मंत्रालय के स्थापना के पांच बछर पूरा होय उपर छत्तीगढ़ म घलो उनतीस जून ले छै जुलाई तक सहकारिता सप्ताह मनाय जाही। ए दउरान प्रदेसभर म सहकारिता ल बढ़ावा देबर आने-आने कारीकरम के आयोजन होही। रायपुर म अवइया तीन अउ चार जुलाई के राज्य स्तरीय सहकारी चिंतन सिविर, सहकार मेला अउ संगोष्ठी के आयोजन करे जाही। एमा मुख्यमंत्री विष्णुदेव साय मुख्य अतिथि के रूप म सामिल होही। सहकार मेला म सहकारिता क्षेत्र के उपलब्धि अउ सफल मॉडल मनके प्रदर्सन करे जाही।
छत्तीसगढ़ राज्य सहकारी बैंक के अध्यक्ष केदारनाथ गुप्ता ह बतइन कि छै जुलाई के केंद्रीय सहकारिता मंत्री अमित शाह डहार ले अन्न भंडारण योजना के तहत प्रदेस के नौ ठन पैक्स मन म गोदाम निर्माण काम के भूमिपूजन करे जाही।
राष्ट्रीय ग्रामीण विकास सम्मेलन
कंेद्रीय ग्रामीण विकास मंत्री शिवराज सिंह चौहान काली अट्ठाईस जून के नई दिल्ली म राष्ट्रीय ग्रामीण विकास सम्मेलन के अध्यक्षता करही। दू दिन के सम्मेलन म सबो राज्य अउ केंद्रशासित प्रदेस मनके ग्रामीण विकास मंत्री, वरिष्ठ अधिकारी अउ बिसेसज्ञ मन समग्र ग्रामीण विकास उपर विचार विमर्स करे बर सकलाही। बइठका म प्रमुख परियोजना मनके समीक्षा अउ ग्रामीण भारत बर भविष्य के रूपरेखा तैयार करे उपर घलो विचार विमर्स करे जाही।
विजय शर्मा-कांकेर
उपमुख्यमंत्री विजय शर्मा ह किहीन कि प्रदेसभर म वीर शहीद मनके स्मृति ल चिरस्थायी बनाय बर बिसेस अभियान चलाय जाही। एखर तहत गांव मन म सामुदायिक भवन, चौक-चौराहा अउ दूसर सार्वजनिक स्थल मनके नामकरण शहीद मनके नाम म करे जाही। संगेसंग जेन जघा म नक्सल हिंसा के बड़े घटना होय हे, उंहा उपयुक्त स्थान चिन्हित कर स्मारक मनके निर्माण करे जाही। ताकि अवइया पीढ़ी शहीद मनके सर्वोच्च बलिदान ले प्रेरणा ले सकय। ए बात ओमन काली कांकेर म नक्सल पीड़ित परिवार अउ शहीद जवान मनके परिजन ले मुलाकात के दउरान किहीन।
उहें, उपमुख्यमंत्री ह नारायणपुर म पुनर्वासित युवा मन ले घलो मुलाकात कर उनला गांव के विकास म भागीदारी निभाय के आह्वान करीन। ए दउरान ओमन युवा मनले पुनर्वास केंद्र म मिलत सुविधा, प्रसिक्षण अउ रोजगार के जानकारी लीन। ओमन जिला पंचायत सभाकक्ष म आयोजित सर्व आदिवासी समाज के बइठका म घलो सामिल होइन अउ समाज के लोगन मन ले माओवाद मुक्त बस्तर के नौ निर्माण म अग्रणी भूमिका निभाय के आह्वान करीन।
उहें, उपमुख्यंत्री श्री शर्मा ह कांकेर जिला के ग्राम किसकोड़ो म जनचौपाल लगाके ग्रामीण मन के जन समस्या ल सुनिन। ओमन किहीन कि किसकोड़ो ल आदर्स ग्राम के रूप म विकसित करे जाही।
लक्ष्मी राजवाड़े-दौरा
महिला अउ बाल विकास मंत्री लक्ष्मी राजवाड़े ह आज सुकमा जिला के जगरगुंडा चिंतलनार, पूवर्ती अउ सिलगेर के दौरा करीन। ए दउरान ओमन पूवर्ती अउ सिलगेर स्थित आंगनबाड़ी केंद्र मनके निरीक्षण करीन। संगेसंग अन्न प्रासन अउ गोदभराई कारीकरम म सामिल होके महिला मन ले चर्चा करीन।
श्रीमती राजवाड़े ह सक्षम आंगनबाड़ी केंद्र, लस्केपारा छिंदगढ़ के पोषण वाटिका म लइका मनके संग मुनगा अउ पपीता के पौधा लगइन। ए मउका म ओमन ‘‘हर-घर मुनगा, घर-घर सुपोषण‘‘ के संदेस देवत हुए पौष्टिक आहार, पर्यावरण संरक्षण अउ सामुदायिक सहभागिता के आह्वान करीन।
महासमुंद हीरा-खनन
महासमुंद जिला के बलौदा-बेलमुंडी डायमंड ब्लॉक म हीरा खनन ल लेके तैयारी तेज हो गेहे। एनएमडीसी-सीएमडीसी लिमिटेड के निदेशक मंडल के नई दिल्ली म आयोजित बइठका म ए परियोजना के अवइया चरण म लार्ज डायमीटर ड्रिलिंग सुरू करे के निर्णय ले गेहे। ए निर्णय ए क्षेत्र म हीरा के वास्तविक भंडार के वैज्ञानिक आकलन करही अउ भविष्य म व्यावसायिक हीरा खनन के मार्ग प्रशस्त करही। निर्णय के अनुसार बड़े व्यास के ड्रिलिंग ले किम्बरलाइट पाइप म मौजूद हीरा भंडार के सटीक आकलन करे जाही। एखर बाद फिजिब्लिटी रिपोर्ट तैयार होही, जेखर आधार म व्यावसायिक हीरा खदान विकसित करे के अंतिम निर्णय ले जाही।
केजव्हील ट्रैक्टर-रोक
प्रदेस म रबर टायर के बिना आयरन केजव्हील वाला ट्रैक्टर मनके सड़क म संचालन उपर रोक लगाय गेहे। परिवहन विभाग ह नियम मनके उल्लंघन करइया मन उपर चालानी कार्रवाई के निरदेस देहे। अइसन पहिया मनके उपयोग सिरिफ खेत म किसनहा काम बर करे जा सकत हे।
मुख्यमंत्री आईटी फेलोशिप
मुख्यमंत्री आईटी फेलोशिप बर ऑनलाइन आवेदन के आखिरी तारीख बढ़ाके सात जुलाई कर दे गेहे। ए योजना के तहत एम टेक डाटा साईंस अउ आर्टिफिसियल इंटेलीजेंस म प्रवेस लेवइया चयनित विद्यार्थी मन ल हर महिना पचास हजार रूपिया फेलोशिप दे जाही। ट्यूसन फीस के पूरा खर्चा राज्य सरकार वहन करही।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सबो आकाशवाणी कंेंद्र एके संघरा रिले करही। ए बखत के अंक म ‘‘जशपुर‘‘ जिला के बारे म जानकारी दे जाही।
अउ अब पेस हे मौसम के हाल….
मौसम विभाग ह अवइया तीन दिन के दउरान प्रदेस के कुछेक जघा म भारी बरसा होय के संभावना जताय हे। उहें, कुछेक जघा म गरज-चमक के संग गाज गिर सकत हे। पाछू चौबीस घंटा के दउरान राजधानी रायपुर समेत प्रदेस के कुछेक हिस्सा म हल्का ले मध्यम बरसा दर्ज करे गीस।
इही बीच, मौसम विभाग ह किहीन हे कि अवइया तीन ले चार दिन म दक्षिण-पश्चिम मानसून के छत्तीसगढ़ समेत गुजरात, मध्यप्रदेस अउ झारखंड के कुछेक क्षेत्र म आगू बाढ़े के परिस्थिति बने हुए हे।