केंद्रीय गृहमंत्री-मादक पदार्थ
केंद्रीय गृहमंत्री अमित शाह ह नसा के खिलाफ एकजुट होके लड़े के आह्वान करीन हे। ओमन किहीन कि मादक पदार्थ के कारोबार देस के सुरक्षा, सामाजिक व्यवस्था, आर्थिक हित अउ युवा मन के भविष्य बर खतरा हे। ओमन आधात्यमिक नेता, युवा अउ महिला मन ले ए अभियान म मिलके भाग ले के अपील करीन। श्री शाह ह ए बात आज नई दिल्ली म नार्को कोऑर्डिनेटर सेंटर याने एन.सी.ओ.आर.डी. के दसवां शीर्ष स्तरीय बइठका ल संबोधित करत किहीन।
गृहमंत्री ह किहीन कि नार्कोटिक्स कंट्रोल ब्यूरो ह मादक पदार्थ ले जुड़े अपराध के जानकारी बेरा म साझा करे बर कई ठिन ऑनलाइन पोर्टल सुरू करे हे। ओमन जम्मों राज्य के मुख्य सचिव अउ पुलिस महानिदेसक मन ले ए पोर्टल म नसा ले जुड़े मामला के जानकारी तय समय-सीमा के अंदर अपलोड करे बर किहीन।
मुख्यमंत्री-गृह निर्माण
मुख्यमंत्री विष्णुदेव साय ह आज नवा रईपुर म आयोजित एक कारीकरम म छत्तीसगढ़ गृह निर्माण अउ अधोसंरचना विकास मंडल के नवा लोगो के विमोचन करीन। ए मउका म बछर दू हजार इक्कीस के आवास मेला म मकान बुक करइया हितग्राही मन ल लकी ड्रा के माध्यम ले पुरस्कार बांटे गीस। ए मउका म मुख्यमंत्री ह लोगो तियार करने वाला अंशुल कश्यप ल घलो प्रतियोगिता के पुरस्कार रासि के रूप म ढाई लाख रूपिया के चेक दीन।
मुख्यमंत्री ह उम्मीद जतइन कि गृह निर्माण मंडल अब अधोसंरचना विकास के क्षेत्र म घलो महत्वपूर्ण भूमिका निभाही, जेखर ले प्रदेस के विकास ल नवा गति मिलही। ओमन बतइन कि पाछू दू बछर म मंडल ह लगभग सात हजार तीन सौ अठासी संपत्ति के विक्रय करके एक हजार पांच सौ बत्तीस करोड़ रूपिया के राजस्व अर्जित करीस हे।
कारीकरम म आवास अउ पर्यावरण मंत्री ओपी चौधरी ह बतइन कि अब कोनो भी नवा आवासीय परियोजना के निर्माण तभे सुरू होही, जब पर्याप्त बुकिंग सुनिश्चित हो जाही, जेखर ले अनावश्यक निर्माण अउ वित्तीय जोखिम ले बांचे जा सकही।
मंडल के अध्यक्ष अनुराग सिंह देव ह बतइन कि भविष्य म मांग आधारित, गुणवत्तापूर्ण अउ वित्तीय रूप ले व्यवहारिक परियोजना उपर बिसेस जोर दे जाही।
बस-ट्रैकिंग डिवाइस
प्रदेस म यात्री बस के सुरक्षा व्यवस्था ल मजबूत करे बर परिवहन विभाग ह जम्मों बस म वाहन लोकेशन ट्रैकिंग डिवाइस याने वीएलटीडी लगाना अनिवार्य कर देहे। परिवहन सचिव ह बस संचालक मन ल पंद्रह दिन के भीतर बिना वीएलटीडी वाला बस म उपकरण लगाय अउ बंद उपकरण मन ल चालू करे के निरदेस दीन हे। नियम के पालन नइ करइया वाला संचालक मन उपर मोटरयान अधिनियम के तहत कारवाई करे जाही।
केंद्र-एलपीजी
केंद्र सरकार ह औद्योगिक अउ वाणिज्यिक-एलपीजी उपभोक्ता मन ल बड़का राहत देवत गैर-घरेलू पैक्ड एलपीजी के आपूर्ति म जम्मों क्षेत्रीय प्रतिबंध हटा देहे। अइसन म, अब पश्चिम एशिया संकट ले पहिली के जारी आपूर्ति व्यवस्था बहाल कर दे गेहे। ए बहाली हाले म एलपीजी आपूर्ति के स्थिति म होवत सुधार ल देखत करे गेहे।
वित्त मंत्री-एआई
वित्त मंत्री ओपी चौधरी ह युवा मन ल आह्वान करीन हे कि ओमन आर्टिफिसियल इंटेलीजेंस-एआई अउ नवा तकनीक ले डरे के बजाय ओला अपन भविष्य के निर्माण के सबले बड़का अवसर मानय। श्री चौधरी ह ए बात रईपुर म महाराजा अग्रसेन इंटरनेशनल कालेज डहार ले आर्टिफिसियल इंटेलीजेंस अउ डिजीटल ट्रांसफार्मेशन-अवसर चुनौती अउ भविष्य के प्रभाव बिसय म आयोजित राष्ट्रीय सम्मेलन म किहीन। ओमन किहीन कि आज पूरा दुनिया तेजी ले ज्ञान, तकनीक अउ नवाचार आधारित अर्थव्यवस्था कोति बाढ़त हे। एखरे सेति युवा मन ल बेरा रहत तकनीकी परिवर्तन ल समझ के खुद ल ओखर अनुरूप तियार करना होही। ओमन किहीन कि जउन एआई ल अपनाही, उही भविष्य के अगुवई करही। श्री चौधरी ह युवा मन ले आग्रह करीन कि ओमन केवल नौकरी ढूंढे तक सीमित झन रहे, बल्कि नवाचार अउ उद्यमिता के दिसा म घलो आगू बाढ़य। संघर विश्व स्तरीय स्टार्टअप अउ तकनीकी कंपनी बनाय के लक्ष्य राखय।
पासपोर्ट आवेदन-शुल्क
सरकार ह पासपोर्ट आवेदन सुल्क म बढ़ोत्तरी कर देहे। आवेदक मन ल नवा पासपोर्ट या नवीनीकरण करे बर अब दू हजार पांच सौ रूपिया सुल्क देना होही। नवा दर पहिली जुलाई ले लागू होही। नवा सुल्क संरचना के तहत तत्काल श्रेणी म छत्तीस पृष्ठ वाला नवा पासपोर्ट या पासपोर्ट ल फेर जारी करे के लागत पांच हजार रूपिया होही। पासपोर्ट के दूसर श्रेणी म घलो सुल्क म बढ़ोत्तरी करे गेहे।
डंप बरामद
प्रदेस ले माओवाद के समस्या सिराय के बाद अब सुरक्षा बल के जवान माओवादी मन कोति ले लुकाय गे जिनिस के बरामदगी म लगे होय हे। इही कड़ी म नारायणपुर जिला म टेकला के जंगल ले इंसास, एसएलआर, थ्री नॉट थ्री रायफल समेत बड़का मात्रा म गोला-बारूद अउ विस्फोटक जिनिस बरामद करे गेहे। एखर अलावा छोटेडांेगर के तोयामेटा जंगल-पहाड़ी ले घलो माओवादी कोति ले लुकाय गे चौबीस लाख रूपिया नगद रासि बरामद करे गेहे।
बातों-बातों-में
प्रादेशिक समाचार एकांश के समसामयिक बिसय उपर आधरित कारीकरम ‘‘बातों-बातों-में‘‘ ए दारी एक जुलाई ले लागू होवइया वीबी जी-राम-जी योजना उपर छत्तीसगढ़ के उपमुख्यमंत्री अउ गृह मंत्री विजय शर्मा ले लेगे भेंटवार्ता के प्रसारण करे जाही। एखर प्रसारण काली सत्ताईस जून के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
एसीबी-कार्रवाई
एंटी करप्शन ब्यूरो-एसीबी ह बेमेतरा जिला के थान खम्हरिया थाना के प्रधान आरक्षक अजय लहरे ल पंद्रह हजार रूपिया के रिस्वत लेवत रंगेहाथ गिरफ्तार करे हे। एसीबी के टीम आरोपी ले पूछताछ करके मामला के जांच म लगे हे।
उहें, एसीबी के टीम ह बिलासपुर म रतनपुर तहसील के लालपुर हल्का के पटवारी ल घलो पच्चीस हजार रूपिया रिस्वत लेवत गिरफ्तार करे हे। पटवारी उपर नक्सा बटांकन बर रिस्वत ले के आरोप हे।
मोहर्रम
आज छत्तीसगढ़ समेत देस के आने-आने जघा म मोहर्रम श्रध्दा अउ आस्था के संग मनाय जात हे। प्रधानमंत्री नरेंद्र मोदी ह मोहर्रम म संदेस जारी करके हजरत इमाम हुसैन के बलिदान के सुरता करीन हे। ओमन किहीन कि हजरत इमाम हुसैन के बलिदान सत्य अउ न्याय के रद्दा म अडिग रहे के प्रेरणा देथे।
मोहर्रम के मउका म राजधानी रईपुर समेत प्रदेस के कई ठिन सहर म ताजिया निकाले जाथे। रईपुर के करबला म घलो हजरत हुसैन के कुर्बानी ल सुरता करत आज रतिहा मजलिस यानी धार्मिक बइठका के आयोजन करे जाही।
अउ अब पेस हे मौसम के हाल….
मौसम विभाग के अनुसार अवइया दू तीन दिन म दक्षिण-पश्चिम मानसून के प्रदेस के बांकी हिस्सा म आगू बढ़े बर अनुकूल परिस्थिति बने हुए हे। उहें, काली सत्ताईस जून ले राज्य म मानसून के गतिविधि बाढ़े के संभावना हे। मौसम विभाग ह अवइया सात दिन तक प्रदेस के कुछेक इलाका मन म गाज गिरे के चेतावनी घलो देहे।
इही बीच, बलरामपुर जिला के कंदरी गांव म गाज के चपेट म आय ले दू युवक के मउत होगे। बरसा ले बचे खातिर ए युवक मन रूख के नीचे खड़े रिहीन।
एल्डरमैन-नियुक्त
नगरीय प्रशासन अउ विकास विभाग ह प्रदेस के आने-आने नगरीय निकाय बर एल्डरमैन के नियुक्ति करे हे। विभाग कोति ले रईपुर अउ सरगुजा संभाग के नौ जिला के बांसठ नगरीय निकाय म दू सौ बावन एल्डरमैन नियुक्त करे गेहे। नगरीय निकाय म एल्डरमैन मनोनीत पार्षद के रूप म काम करथे। ओमन निकाय के बइठका म भाग लेके स्थानीय समस्या अउ विकास कार्य उपर सुझाव देथे।
अउ अब थोरकुन समाचार सार म –
– सक्ती जिला के जांगरा गांव म आज दू अज्ञात मनखे मन एक युवती ल गोली मार दीन, जेखर ले ओखर मउत होगे। घटना के बाद आरोपी फरार होगिन। पुलिस ह मामला के जांच सुरू कर दीन। बताय जात हे कि दूनों युवक मोटर साइकिल म पहुंचे रिहीन अउ पता पूछे के बहाना युवती उपर हमला कर दीस।
– सुशासन तिहार के दउरान मिले सिकायत उपर कारवाई करत सारंगढ़-बिलाईगढ़ जिला कलेक्टर ह पटवारी बद्री प्रसाद साहू ल निलंबित कर देहे।
– धमतरी जिला के मगरलोड थाना क्षेत्र स्थित कपालफोड़ी गांव म तरिया म नहाय के दउरान डूबे ले दू नोनी के मउत होगिन।
– जांजगीर के प्रकाश इंडस्ट्रीज म काम करे के दउरान ऊंचाई ले गिरके एक ठेका मजदूर के मउत होगिन।
अउ
– जिला रोजगार अउ स्व-रोजगार मार्गदर्सन केंद्र डहार ले काली सत्ताईस जून अंबिकापुर के राजीव गांधी शासकीय स्नात्कोत्तर महाविद्यालय म संभाग स्तरीय रोजगार मेला के आयोजन करे जाही। ए मेला म निजी कंपनी डहार ले करीबन दू हजार रिक्त पद उपर भर्ती करे जाही।