मुख्यमंत्री-विशेष ऑडिट
मुख्यमंत्री विष्णुदेव साय ह राज्य म जनसुरक्षा ल ध्यान म राखत हुए बहुमंजिला भवन, कोचिंग संस्थान, होटल अउ व्यावसायिक दुकान के सुरक्षा व्यवस्था के विशेष ऑडिट कराय के निरदेस दीन। मुख्यमंत्री ह मुख्य सचिव ल राज्यभर म अग्नि सुरक्षा, भवन सुरक्षा अउ आपातकालीन व्यवस्था के जांच कराय बर किहीन। एखर तहत सबो जिला म विशेष निरीक्षण अभियान चलाय जाही। ए दउरान भवन के सुरक्षा, फायर एनओसी, अग्निशमन उपकरण, आपातकालीन निकास, बिजली व्यवस्था के जांच करे जाही। मुख्यमंत्री ह केहे हे कि सुरक्षा मानक के अनदेखी करइया मन उपर नियम के अनुसार कार्रवाई करे जाही।
मुख्यमंत्री-स्वास्थ्य/गृहमंत्री मुलाकात
मुख्यमंत्री विष्णुदेव साय ह आज नई दिल्ली म केन्द्रीय स्वास्थ्य अउ रसायन उर्वरक मंत्री जेपी नड्डा ले मुलाकात करीन। ए दउरान जन स्वास्थ्य, औषधि अउ उर्वरक क्षेत्र के संग आने-आने विभागीय विषय म चर्चा होइस। बइठका के दउरान मुख्यमंत्री ह केन्द्रीय मंत्री ल जानकारी दीन कि राज्य म खाद्य वितरण व्यवस्था उपर लगातार निगरानी रखे जावत हे। कालाबाजारी अउ जमाखोरी के खिलाफ घलो कार्रवाई करे जात हे। संगेसंग राज्य सरकार नैनो यूरिया अउ नैनो डीएपी के उपयोग ल बढ़ावा देवत हे। किसान मन ल ए लाभ के जानकारी दे बर जागरूकता अभियान घलो चलाय जात हे। केन्द्रीय मंत्री श्री नड्डा ह छत्तीसगढ़ म स्वास्थ्य सेवा के विस्तार अउ किसान मनके हित म उठाय जावत परयास के सराहना करत हुए हरसंभव सहयोग के भरोसा दिलईन।
एखर पहिली, काली मुख्यमंत्री ह नई दिल्ली प्रवास के दउरान केन्द्रीय गृहमंत्री अमित शाह ले मुलाकात कर छत्तीसगढ़, विशेषकर बस्तर क्षेत्र के विकास काम अउ जनकल्याणकारी योजना उपर चर्चा करीन। ए दउरान श्री साय ह छत्तीसगढ़ म अखिल भारतीय आयुर्वेद संस्थान के स्थापना के प्रस्ताव घलो राखीन। मुख्यमंत्री ह केन्द्रीय बजट म देस म तीन नवा अखिल भारतीय आयुर्वेद संस्थान के घोषणा के उल्लेख करत हुए आग्रह करीन कि एमा ले एक संस्थान छत्तीसगढ़ ल दे जाय। ओमन ह बतईन कि छत्तीसगढ़ म दुर्लभ औषधीय वनस्पति अउ जड़ी-बूटी प्राकृतिक रूप ले पाय जाथे। केन्द्रीय मंत्री ह राज्य म करे जात जनकल्याणकारी काम के सराहना करत हुए सहयोग करे के बात घलो कहिन।
मुख्यमंत्री-भाजपा अध्यक्ष मुलाकात
नई दिल्ली प्रवास के दउरान आज मुख्यमंत्री विष्णुदेव साय ह भारतीय जनता पार्टी के राष्ट्रीय अध्यक्ष नितिन नबीन ले मुलाकात करीन। ए बेरा म संगठन ले जुड़े आने-आने बिसय के संग प्रदेस म संगठनात्मक गतिविधि के प्रभावी क्रियान्वयन उपर चर्चा होइस।
मुख्यमंत्री-ट्राइबल यूथ हॉस्टल
मुख्यमंत्री विष्णुदेव साय आज नई दिल्ली स्थित छत्तीसगढ़ सदन म संघ लोक सेवा आयोग-यूपीएससी के प्रारंभिक परीक्षा म सफल होय ट्राइबल यूथ हॉस्टल के विद्यार्थी मन ले मुलाकात करके उंखर उत्साहवर्धन करीन। ए बेरा म ओमन ह छात्र मन ल मुख्य परीक्षा बर सुभकामना दीन।
जानबा के मुताबिक यूपीएससी के प्रारंभिक परीक्षा म द्वारका स्थित ट्राइबल यूथ हॉस्टल के तेरह छात्र मन ह सफलता पाय हे। एमा ले जादा विद्यार्थी जनजातीय, ग्रामीण अउ सामाजिक रूप ले वंचित वर्ग के हरय।
नगरीय निकाय-आपात निधि
नगरीय प्रशासन अउ विकास विभाग ह प्रदेस म सबो नगरीय निकाय के मरम्मत अउ रखरखाव बर बाईस करोड़ रूपिया ले जादा के आपात निधि जारी करे हे। विभाग डहार ले चालू वित्तीय बछर के पहिली तिमाही अप्रैल ले जून महीना बर ए रासि जारी करे गेहे। एखर तहत चौदह नगर निगम ल तेरह करोड़ छिहत्तर लाख रूपिया जारी करे हे। उहें, छप्पन नगर पालिका बर पांच करोड़ अट्ठारह लाख रूपिया स्वीकृत करे गेहे। विभाग ह एक सौ चौबीस नगर पंचायत बर घलो तीन करोड़ छियासठ लाख रूपिया जारी करे हे।
विशेष भेंटवार्ता
स्कूल शिक्षा मंत्री गजेन्द्र यादव ले गे विशेष भेंटवार्ता के प्रसारण आकाशवाणी डहार ले काली छब्बीस जून के करे जाही। ए कार्यक्रम बिहनिया दस बजे ले दस बजके पच्चीस मिनट तक प्रसारित होही। प्रादेशिक समाचार एकांश, आकाशवाणी रायपुर डहार ले तैयार ए कार्यक्रम के प्रसारण छत्तीसगढ़ के सबो आकाशवाणी केन्द्र ले करे जाही।
संविधान हत्या दिवस
आज संविधान हत्या दिवस मनाय जात हे। ए बेरा म देसभर म आने-आने कार्यक्रम आयोजित करे जात हे। ए दिन पच्चीस जून उन्नीस सौ पचहत्तर के लगाय गे आपातकाल के याद दिलाथे, जब देस म संवैधानिक अधिकार अउ लोकतांत्रिक मूल्य गंभीर रूप ले प्रभावित होय रिहीस।
प्रधानमंत्री नरेन्द्र मोदी ह संविधान हत्या दिवस म आपातकाल के दउरान लोकतांत्रिक मूल्य के रक्षा बर दृढ़ संकल्पित रेहे लोगन मन ल श्रद्धांजलि दीन। सोशल मीडिया पोस्ट म श्री मोदी ह कहिन कि आपातकाल संविधान उपर सीधा हमला रिहीस। प्रधानमंत्री ह कहिन कि ए दउरान लोकतांत्रिक संस्था घलो निसाना म रिहीन।
उहें, मुख्यमंत्री विष्णुदेव साय ह सोशल मीडिया म एक वीडियो साझा करत हुए आपातकाल ल भारतीय लोकतंत्र के सबसे काला अध्याय बतईन। ओमन प्रदेसवासी मन ले लोकतंत्र सेनानी मनके त्याग अउ बलिदान ल याद करत हुए संविधान के रक्षा अउ लोकतांत्रिक मूल्य ल सशक्त बनाय के संकल्प लेके आह्वान करीन।
पल्स पोलियो अभियान
पल्स पोलियो अभियान के तहत अट्ठाईस जून के प्रदेस म सून्य ले लेके पांच बछर तक के लइका मन ल पोलियो के दवई पिलाय जाही। उहें, छूटे लइका मन ल उनतीस अउ तीस जून के मॉपअप अभियान के तहत स्वास्थ्य कार्यकर्ता अउ मितानिन घर-घर जाके दवई पिलाही। स्वास्थ्य विभाग ह पालक मन ले अपील करे हे कि ओमन अट्ठाईस जून के अपन तीर के पोलियो बूथ म जाके लइका मन ल पोलियो के दवई जरूर पिलाय।
राज्यपाल-सक्ती
राज्यपाल रमेन डेका ह लोकभवन म वीडियो कॉन्फ्रेंसिंग के जरिया ले सक्ती जिला के अधिकारी मनके संग चर्चा करके जनकल्याणकारी योजना के जानकारी लीन। राज्यपाल ह जल संरक्षण अउ पर्यावरण संवर्धन ल सबले आगू राखे के निरदेस दीन।
उहें, राज्यपाल ह रायपुर के माना कैम्प म स्थित फिजिकल रेफरल रिहैबिलिटेशन सेंटर, सेरेब्रल पाल्सी गेट लैब अउ दिव्यांगजन मन बर संचालित महाविद्यालय के निरीक्षण करके उहां उपलब्ध सुविधा के जायजा लीन। ए दउरान ओमन ह दिव्यांगजन मन ल ट्राईसाइकिल घलो दीन।
बद्रीनारायण मीणा-बस्तर आईजी
वरिष्ठ आईपीएस बद्रीनारायण मीणा ल बस्तर रेंज के नवा पुलिस महानिरीक्षक नियुक्त करे गेहे। ओमन बस्तर आईजी संुदरराज पी. के जगह लीहीं। ए संबंध म गृह विभाग ह आदेस जारी कर देहे। श्री मीणा पुलिस मुख्यालय नवा रायपुर म आईजी के पद म तैनात रइही। एखर पहिली, ओमन दुर्ग रेंज के आईजी के रूप म अपन सेवा दे चुके हे।
जशपुर पुलिस-जागरूकता अभियान
जशपुर पुलिस ह काली चौबीस जून के जिला के सबो सात सौ छियासठ गांव म एक संग जनचौपाल लगाके हेलमेट जागरूकता अभियान चलईन। ए अभियान ल गोल्डन बुक ऑफ वर्ल्ड रिकॉर्ड म दर्ज करे गेहे। जशपुर पुलिस अधीक्षक कार्यालय म आयोजित कार्यक्रम गोल्डन बुक ऑफ वर्ल्ड रिकॉर्ड के राज्य प्रमुख सोनल राजेश शर्मा ह एसएसपी डॉक्टर लाल उमेद सिंह ल वर्ल्ड रिकॉर्ड के प्रमाण पत्र अउ मेडल प्रदान करीन।
मोहर्रम
काली छत्तीसगढ़ के संग देस के आने-आने जघा म मोहर्रम श्रद्धा अउ आस्था के संग मनाय जाही। करबला म सत्य अउ न्याय के रक्षा बर पैगम्बर मोहम्मद के नवासे हजरत इमाम हुसैन अउ उंखर साथी मनके सहादत के याद म मुहर्रम मनाय जाथे। ए बेरा म ताजिया निकाले जाथे अउ करबला के सहीद मनके सर्वोच्च बलिदान के याद म मजलिस के आयोजन करे जाथे।
मुहर्रम के बेरा म राजधानी रायपुर के संग राज्य के कतकोन सहर म काली ताजिया निकाले लाही। रायपुर के कर्बला म हजरत हुसैन के बड़का कुर्बानी ल याद करत हुए मजलिस यानी धार्मिक बइठका के आयोजन करे जाही।
फर्जी बिलिंग-आरोपी गिरफ्तार
राजनांदगांव म राज्य कर विभाग ह फर्जी बिलिंग के मामला म कार्रवाई करत हुए मैसर्स आदेश्वर ट्रेड लिंक के संचालक आदेश्वर चौरड़िया ल गिरफ्तार करे हे। जांच म करीब छिहत्तर करोड़ रूपिया के कागजी लेन-देन अउ आठ करोड़ बाईस लाख रूपिया के संदिग्ध इनपुट टैक्स क्रेडिट के मामला आगू आय हे। विभाग के अनुसार फर्म ह बिना वास्तवित खरीदी के फर्जी बिल के जरिया ले कर लाभ लेके प्रयास करीन।