पद्म पुरस्कार
राष्ट्रपति द्रौपदी मुर्मु ह आज राष्ट्रपति भवन म राखे गे दूसर नागरिक अलंकरण समारोह म पद्म पुरस्कार दीन। ए दउरान ओमन दू पद्म विभूषण, सात पद्म भूषण अउ छप्पन पद्मश्री समेत कुल पैंसठ पद्म अलंकरण दीन। एमा छत्तीसगढ़ के बुधरी ताती घलो सामिल हे, जउन मन ल पद्मश्री ले सम्मानित करे गीस।
गणतंत्र दिवस के पूर्व संध्या म केन्द्र सरकार ह बछर दू हजार छब्बीस बर पांच पद्म विभूषण समेत एक सौ इकतीस पद्म अलंकरण के घोसना करे रिहीन।
मंत्रिपरिषद निर्णय
मुख्यमंत्री विष्णुदेव साय के पगरइति म आज मंत्रालय म राखे गे राज्य मंत्रिपरिषद के बइठका म कतकोन फइसला ले गीस। बइठका के बाद पत्रकार मन ल गोठबात करत उपमुख्यमंत्री अरूण साव ह बतईन कि मंत्रिपरिषद ह ‘‘विकसित भारत- रोजगार अउ आजीविका गारंटी मिशन-ग्रामीण योजना छत्तीसगढ़‘‘ के प्रारूप के अनुमोदन करे हे। ए योजना के तहत पात्र ग्रामीण परिवार के सदस्य मन ल हरेक वित्तीय बछर म एक सौ पच्चीस दिन के रोजगार के गारंटी दे जाही। एखर तहत जल संरक्षण, प्राकृतिक संसाधन प्रबंधन, ग्रामीण आधारभूत संरचना निर्माण, आजीविकामूलक परिसंपत्ति के विकास अउ ग्रामीण क्षेत्र मन म रोजगार के मउका दे जाही। ए योजना के तहत चालू वित्तीय बछर बजट म चार हजार करोड़ रूपिया के प्रावधान करे गेहे।
उहें, मंत्रिपरिषद ह ‘‘अटल आजीविका समृद्धि हाट‘‘ योजना सुरू करे के घलो फइसला लेहे। ए योजना के तहत ग्रामीण क्षेत्र म हथकरघा, बुनाई-सिलाई, हस्तशिल्प केन्द्र के संगेसंग दलहन, तिलहन, प्रसंस्करण इकाई, राइस मिल, डेयरी के संग सेवा केन्द्र के स्थापना करे जाही। एखर तहत कोल्ड स्टोरेज, सोलर ड्रायर, कृषि सामान मरम्मत, अटल डिजिटल केन्द्र, विपणन केन्द्र अउ आपूर्ति केन्द्र घलो ग्रामीण क्षेत्र मन म स्थापित करे जाही। ए योजना के उद्देश्य स्थानीय उत्पादन, प्रसंस्करण, सेवा अउ विपणन गतिविधि ल बढ़ावा देना हे। एखर ले गांव वाले मन ल अपन क्षेत्र म रोजगार अउ स्वरोजगार के नवा मउका मिलही।
उहें, एक आने फइसला म मंत्रिपरिषद ह ‘‘छत्तीसगढ़ कम्प्रेस्ड बायोगैस नीति‘‘ के प्रारूप के अनुमोदन करे हे। ए नीति के माध्यम ले राज्य म उपलब्ध कृषि अवशेष, नगरीय ठोस अपशिष्ट, पशुधन अपशिष्ट अउ आने जैविक संसाधन के वैज्ञानिक प्रबंधन करके ओमन ल कम्प्रेस्ड बायोगैस ईंधन म बदले जाही।
केन्द्रीय गृहमंत्री-नैफैड
केन्द्रीय गृह मंत्री अमित शाह ह आज नई दिल्ली म नैफेड के नीलामी पोर्टल के सुभारंभ करीन। ए मउका म श्री शाह ह किसान मनके सीधा भागीदारी मन ल मजबूत करे बर खरीदी काम म बिचौलिया मनके भूमिका ल समाप्त करे के आह्वान करीन।
नैफेड के प्रगति के जिक्र करत श्री शाह ह कहिन कि बारह बछर पहिली गंभीर वित्तीय कठिनाई के सामना करत ए संगठन ह आज चौहत्तर लाख किसान मनके सेवा करइया एक मजबूत संस्थान बनके उभरे हे।
ए मउका म कृषि मंत्री शिवराज सिंह चौहान घलो मौजूद रिहीन।
केन्द्रीय कृषि मंत्री-समीक्षा
केन्द्रीय कृषि मंत्री शिवराज सिंह चौहान ह आज नई दिल्ली म अल नीनो के मौसम म पड़इया प्रभाव अउ कृषि उपर एखर असर के समीक्षा बर एक ठिन बइठका करीन।
बइठका के बाद श्री चौहान ह मीडिया ले गोठबात करत बतईन कि अल नीनो के सेती देशभर म कमजोर मानसून के स्थिति बने हे, जेखर सेती करीबन तीन सौ पन्द्रह जिला अइसन हे, जिहां बरसा कमती होय के संभावना हे। श्री चौहान ह कहिन कि अल नीनो के संभावित स्थिति ल देखत सरकार ह किसान मनके हित के रक्षा अउ खेती म पड़इया प्रतिकूल प्रभाव ल कमती करे बर प्रतिबद्ध हवय।
ए बइठका म छत्तीसगढ़ के कृषि मंत्री रामविचार नेताम ह वीडियो कॉन्फ्रेंसिंग के माध्यम ले सामिल होइन। ओमन कहिन कि सूखा के स्थिति ले निपटे बर राज्य सरकार ह कमती बेरा वाले फसल, दलहन-तिलहन उपर जोर देय के संगेसंग बीज सुरक्षा अउ फसल बीमा ल प्राथमिकता देवत व्यापक रणनीति बनाय हे।
ग्राम सभा
प्रदेस के ग्यारह हजार छह सौ ले जादा ग्राम पंचायत मन म काली चौबीस जून के ग्राम सभा के आयोजन करे जाही। ग्राम सभा म ‘‘आवास प्लस – टू पॉइंट ओ‘‘ के स्थायी प्रतीक्षा सूची समेत आने-आने बिसय म गोठबात करे जाही। ‘‘आवास प्लस – टू पॉइंट ओ‘‘ सर्वेक्षण ले मिले सिस्टम जनरेटेड स्थायी प्रतीक्षा सूची ल पढ़े जाही। संगेसंग पात्र हितग्राही मनके प्राथमिकता सूची तैयार करे जाही अउ ग्रामीण मन ले मिले दावा आपत्ति के निराकरण करे जाही। ग्राम सभा म विकसित भारत, रोजगार अउ आजीविका मिशन ग्रामीण के बारे म घलो गांव वाले मन ल जानकारी दे जाही।
श्यामा प्रसाद मुखर्जी-पुण्यतिथि
प्रखर राष्ट्रवादी नेता अउ शिक्षाविद् डॉक्टर श्यामा प्रसाद मुखर्जी के आज पुण्यतिथि हरय। ए मउका म उपराष्ट्रपति सीपी राधाकृष्णन अउ प्रधानमंत्री नरेन्द्र मोदी ह ओमन ल श्रद्धांजलि अर्पित करीन हे। प्रधानमंत्री ह सोशल मीडिया पोस्ट म कहिन कि डॉक्टर मुखर्जी ह अपन जिनगी ल देस के विकास बर समर्पित कर दीन।
ऐति, छत्तीसगढ़ के राज्यपाल रमेन डेका ह आज लोकभवन म डॉक्टर मुखर्जी के फोटू म फूलमाला चढ़ाके श्रद्धांजलि दीन। ए मउका म राज्यपाल ह डॉक्टर मुखर्जी के राष्ट्र निर्माण म दे गे योगदान ल सुरता करत कहिन कि ओमन राष्ट्रीय एकता अउ अखंडता ल मबजूत करे बर अपन जिनगी ल समर्पित कर दीन।
उहें, मुख्यमंत्री विष्णुदेव साय ह घलो रायपुर के मुख्यमंत्री निवास म डॉक्टर श्यामा प्रसाद मुखर्जी के फोटू म फूलमाला चढ़ईन। ओमन कहिन कि डॉक्टर मुखर्जी के विचार, संघर्ष अउ त्याग भारतीय लोकतंत्र अउ राष्ट्रवादी चिंतन के अमूल्य धरोहर आय।
महासमुंद-हीरा
महासमुंद जिला के सरायपाली क्षेत्र के बलौदा-बेलमुंडी डायमंड ब्लॉक म वैज्ञानिक अन्वेषण के दउरान हीरा मिले ले छत्तीसगढ़ के खनिज क्षेत्र म नवा संभावना बने हे। एनएमडीसी-सीएमडीसी लिमिटेड डहार ले दू सौ टन खनिज सामान के परीक्षण के बाद पांच हीरा मिले हे, जेखर वजन एक दशमलव दू-दू कैरेट के हवय। एमा दू जेम क्वालिटी के हीरा सामिल हे। मुख्यमंत्री विष्णुदेव साय ह एला प्रदेस बर महत्वपूर्ण बतावत कहिन हे कि एखर ले निवेस, रोजगार अउ आर्थिक विकास के नवा मउका बाड़ही।
पोस्ट मैट्रिक छात्रवृत्ति आवेदन
अनुसूचित जनजाति, अनुसूचित जाति अउ अन्य पिछड़ा वर्ग के विद्यार्थी मन बर पोस्ट मैट्रिक छात्रवृत्ति योजना के तह ऑनलाइन आवेदन के प्रक्रिया बीस जून ले सुरू होगे हे। आदिवासी विकास विभाग के मुताबिक छात्रवृत्ति बर ऑनलाइन आवेदन राज्य छात्रवृत्ति पोर्टल के माध्यम ले जाही। उहें, नवा आवेदन एक अगस्त ले मंजूर करे जाही। विभाग ह स्पष्ट करे हे कि छात्रवृत्ति के रासि सार्वजनिक वित्तीय प्रबंधन प्रणाली-पीएफएमएस के माध्यम ले सीधा विद्यार्थी मनके आधार ले लिंक बैंक खाता म जमा करे जाही।
अउ अब पेस हे मौसम के हाल…
छत्तीसगढ़ म दक्षिण-पश्चिम मानसून ह काली दस्तक देय के बाद आज मध्य छत्तीसगढ़ तक पहुंच गेहे। मौसम विज्ञानी डॉक्टर गायत्री वाणी ह बतईन कि बाईस जून के मानसून ह बस्तर संभाग के दंतेवाड़ा जिला के रद्दा ले प्रदेस म आ गेहे अउ आज के स्थिति म मानसून मध्य छत्तीसगढ़ तक पहुंच गेहे। अवइया दू ले तीन दिन म मानसून के अउ आगू बाढ़े के संभावना हे।
अउ अब थोरकुन समाचार सार म –
– छत्तीसगढ़ भवन अउ अन्य सन्निर्माण कर्मकार कल्याण मंडल डहार ले संचालित अटल उत्कृष्ट शिक्षा योजना के तहत पंजीकृत निर्माण श्रमिक मनके प्रतिभावान लइका मन ले तीन जुलाई तक ऑनलाइन आवेदन मंगाय गेहे।
– मत्स्य विभाग डहार ले प्रधानमंत्री मत्स्य किसान समृद्धि सह-योजना के तहत पच्चीस जून के रायपुर म जल कृषि बीमा जागरूकता कार्यक्रम के आयोजन करे जाही।
– अंबिकापुर ले हजरत निजामुद्दीन के बीच चलइया एक्सप्रेस ट्रेन अब हफ्ता म दू दिन चलही।
– कर्मचारी चयन मंडल डहार ले छत्तीसगढ़ उच्च न्यायालय म डाटा एंट्री ऑपरेटर के रिक्त पद म भर्ती बर अट्ठाईस जून के पहिली चरण के परीक्षा आयोजित करे जाही।
अउ
– मुंगेली जिला म लालपुर थाना क्षेत्र के बैगाकापा गांव के तीर होय सड़क हादसा म एक लइका के मउत होगे। उहें, दू झिन लइका मन घायल होगे हे।