संस्कृति मंत्री राजेश अग्रवाल ह किहीन कि सोमनाथ धाम के ए यात्रा श्रध्दालू मन ल सिरिफ आधात्यमिक अनुभूति भर नइ देही, एखर अलावा भारत के महान सांस्कृतिक परंपरा अउ राष्ट्रीय गौरव ल जाने के मउका घलो दिही।
सोमनाथ स्वाभिमान सांस्कृतिक यात्रा के तहत बिसेस ट्रेन ले प्रदेस ले सोमनाथ बर एक हजार ले जादा विशिष्ट लोगन, पद्मश्री, राज्य अउ राष्ट्रीय सम्मान ले सम्मानित कलाकार अउ साहित्यकार मन रवाना होइन। यात्रा म सामिल श्रध्दालु मन ह छत्तीसगढ़ के शिव मंदिर मनके पावन भूमि के माटी कलश अउ पवित्र नदी के जल कलश बाबा सोमनाथ ल अर्पित करही।
प्रधानमंत्री-आभार
प्रधानमंत्री नरेंद्र मोदी ह अंतर्राष्ट्रीय योग दिवस ल वैश्विक उत्सव बनाय बर दुनियाभर के लोगन बर अपन आभार जतइन हे। सोसल मीडिया पोस्ट म प्रधानमंत्री ह किहीन हे कि ए देख के खुसी होथे कि योग, सबो क्षेत्र अउ आने-आने देस के लोगन ल स्वस्थ जीवन के एक संघरा खोज म एकजुट करत हे।
उहें, अंतर्राष्ट्रीय योग दिवस के मउका म काली बीजापुर जिला म कर्रेगुट्टा पहाड़ी म घलो सुरक्षाबल के अधिकारी अउ जवान मन ह सामूहिक योगाभ्यास करीन। ब्लैक फॉरेस्ट के नाव ले प्रसिध्द पांच हजार फीट ऊंचा ए पहाड़ी ह कभू माओवादी मनके सबले सुरक्षित गढ़ रिहीस, फेर पाछू बछर ऑपरेसन ब्लैक फॉरेस्ट के तहत सुरक्षाबल के टीम ह माओवादी मनके ए गढ़ ल ध्वस्त कर दे रिहीस अउ तलासी अभियान म इंहा ले भारी मात्रा म हथियार अउ साढ़े चार सौ ले जादा आईईडी बरामद करे गे रिहीस।
ग्राम सभा
प्रधानमंत्री आवास योजना-ग्रामीण के आवास प्लस टू प्वाइंट ओ सर्वे के आखिरी प्राथमिकता सूची बनाय बर चौबीस जून के राज्य के ग्यारा हजार छै सौ ले जादा ग्राम पंचायत म ग्रामसभा के आयोजन करे जाही। ए ग्राम सभा म आवास योजना बर सर्वेक्षण के आधार म तैयार सूची ल सार्वजनिक रूप ले पढ़के सुनाय जाही। यदि कोनो पात्र हितग्राही के नाव सूची म नइ आही या कोनो प्रकार के कमी दिखही त ग्रामीण मन ह ग्रामसभा म दावा अउ आपत्ति पेस कर सकही।
प्रधानमंत्री-बारह साल
प्रधानमंत्री नरेंद्र मोदी के अगुवई म केंद्र सरकार के बारह बछर पूरा होय े मउका म नारायणपुर जिला म अबूझमाड़ क्षेत्र के ओरछा म जन कल्याणकारी योजना के फायदा लोगन तक पहुंचाय बर तीन दिवसीय सिविर लगाय गीस। ‘‘विस्वास के, विकास के, जन कल्याण के‘‘ अभियान म लगे ए सिविर म प्रशासन ल मिले तीन सौ छियानवे आवेदन म दू सौ सतहत्तर मामला के मउकाच म निपटारा करे गीस।
अवैध खनन कार्रवाई
राज्य म खनिज संसाधन के संरक्षण, नियम के अनुसार ओखर उपयोग अउ अवैध गतिविधि उपर रोक लगाय बर सरलग कारवाई करे जात हे। ए कड़ी म केंद्रीय खनिज उड़नदस्ता के संघरा टीम ह सिकायत के आधार म काली अउ आज आने-आने जिला म औचक निरीक्षण करके जांच अभियान चलाइस। ए दउरान बलौदाबाजार के खपरीडीह म चूना पत्थर के भंडारण स्थल अउ खदान म अनियमितता पाय जाय म छै ठन क्रशर इकाई ल सील बंद करके उंहा के संचालक मन ल नोटिस जारी करे गीस। अइसने, सारंगढ़-बिलाईगढ़ के ग्राम दहिदा म महानदी क्षेत्र म अवैध रूप ले रेत खनन करइया मसीन ल जब्त करके सील बंद कर दे गीस।
एखर अलावा मनेन्द्रगढ़-चिरमिरी-भरतपुर जिला के दंडाहस्वाही म केवाई नदी, पसौरी, कुटरा अउ हसदेव नदी क्षेत्र के अवैध रूप ले रेत उत्खनन करइया मन ल कारण बताओ नोटिस जारी करे गेहे।
आईएसआई युवक-गिरफ्तार
जांजगीर-चांपा जिला के अकलतरा पुलिस ह आतंकी संगठन-आईएसआई के संपर्क म होय के आरोप म एक झन युवक ल गिरफ्तार करे हे। पंजाब निवासी सेवक सिंह उपर आरोप हे कि ओहा अकलतरा म रहिके ठेकेदारी के काम के आड़ म मोबाइल के माध्यम ले गोपनीय जानकारी विदेस भेजत रिहीस, जांच म ओखर संपर्क पाकिस्तान, सउदीअरब अउ मैक्सिको ले जुड़े होय के बात आगू आय हे। पुलिस ह ओखर मोबाइल जब्त करके जांच बर साइबर सेल ल भेज देहे।
म्यूल अकाउंट-गिरफ्तार
दुर्ग पुलिस ह ऑनलाइन जुआ-सट्टा अउ म्यूल अकाउंट चलइया अंतर्राज्यीय गिरोह के खुलासा करे हे। ए मामला म तीन झन आरोपी मन ल गिरफ्तार करे गेहे। आरोपी मन तीर ले इक्यासी ठन एटीएम कार्ड, बांसठ ठो बैंक पासबुक, पांच ठन चेकबुक, तेरह मोबाइल, ग्यारा सिमकार्ड, एक ठन लैपटॉप अउ हार्ड डिस्क संघरा करीबन ढाई लाख रूपिया मूल्य के समान जब्त करे गेहे। पुलिस ल सूचना मिले रिहीस कि आईटीआई खेल मैदान तीर कोनो युवक मन ल ह लैपटॉप अउ मोबाइल के माध्यम ले ऑनलाइन जुआ-सट्टा चलावत हे। सूचना के आधार म पुलिस ह घेराबंदी करके आरोपी मन ल गिरफ्तार करीस। पूछताछ म आरोपी मन ह ऑनलाइन सट्टा खेलाय के अउ एखर बर आर्थिक रूप ले कमजोर लोगन के नाव ले म्यूल खाता खोलवाय के बात ल कुबूलिन।
पुलिस ह लोगन ल अपील करे हे कि ओमन ह कोनो भी मनखे ल अपन बैंक खाता, एटीएम कार्ड, पासबुक, चेकबुक या सिमकार्ड उपयोग करे बर झन देवय, काबर कि अइसन दस्तावेज के उपयोग साइबर अपराध, ऑनलाइन सट्टा, वित्तीय धोखाधड़ी अउ मनी लॉन्ड्रिंग जइसन अवैध काम बर करे जा सकत हे।
‘‘पेंशन संवाद‘‘
संयुक्त संचार लेखा नियंत्रक कार्यालय रईपुर म काली तेईस जून के ‘‘पेंशन संवाद‘‘ के आयोजन करे जाही। ए कारीकरम बिसेस रूप ले ओ पेंसन भोगी मन बर हे, जउन मन ह संयुक्त संचार लेखा नियंत्रक कार्यालय के छत्तीसगढ़ सर्कल ले अपन पेंसन पावत हे। ए दउरान पेंसनर मनके समस्या के निपटारा करे जाही अउ उंखर सुझाव सुने जाही।
गन्ना राशि-भुगतान
कबीरधाम जिला के भोरमदेव सहकारी शक्कर कारखाना ह सरलग दूसर बछर जून महिनाच म किसान मन ल समर्थन मूल्य अउ उपराहा रासि के भुगतान करके देस के सहकारी शक्कर उद्योग म नवा कीर्तिमान बनाय हे। कवर्धा म काली होय एक ठन कारीकरम म उप मुख्यमंत्री विजय शर्मा ह उनतीस करोड़ तिरालीस लाख रूपिया ल सीधा किसान मनके बैंक खाता म भेजिन।
ढोलकल ट्रैकिंग रूट
वन अउ जलवायु परिवर्तन मंत्री केदार कश्यप ह दंतेवाड़ा जिला म ढोलकल ट्रैकिंग रूट के लोकार्पण करीन। जिला खनिज संस्थान न्यास के तहत करीबन इकसठ लाख रूपिया के लागत ले एला बनाय गे हवय। आसा जताय जावत हे कि ए रद्दा के सुरू होय ले क्षेत्र म साहसिक पर्यटन ल बढ़ावा मिलही अउ स्थानीय युवा मन ल रोजगार के नवा मउका मिलही।
स्केटिंग चैंपियनशिप
कलकत्ता म होय ऑल इंडिया ओपन स्पीड स्केटिंग चैंपियनशिप म छत्तीसगढ़ के स्कैटर मन ह सुघ्घर प्रदर्सन करत पंद्रह ले जादा पदक जीते हवय। एमा बिसेस रूप ले भिलाई ले चुने गे सबो आठ खिलाड़ी मन ह पदक हासिल करीन हे। देसभर के चार सौ ले जादा खिलाड़ी मनके ए प्रतियोगिता म होय सानदार प्रदर्सन बर खेल संगठन अउ खेल प्रेमी मन ह खुसी जतइन हे।
छत्तीसगढ़ म आज मानसून ह दस्तक दे देहे। मौसम विभाग ह दंतेवाड़ा जिला ले प्रदेस म दक्षिण-पश्चिम मानसून के प्रवेस के पुष्टि करे हे। मौसम विज्ञानी डॉक्टर गायत्री वाणी ह आकाशवाणी समाचार ले बात करत अवइया चौबीस ले अड़तालीस घंटा के दउरान राज्य केे कतकोन हिस्सा म बरसा के गतिविधि बाढ़े के संभावना जताय हे।
अउ अब थोरकुन समाचार सार म –
– छत्तीसगढ़ म अनुसूचित जाति, अनुसूचित जनजाति अउ अन्य पिछड़ा वर्ग के विद्यार्थी मन ह शिक्षा सत्र दू हजार छब्बीस-सत्ताईस के पोस्ट मैट्रिक छात्रवृत्ति के नवीनीकरण बर तीन जून तक ऑनलाइन आवेदन कर सकत हे।
अउ
– कोरबा सक्ति मुख्य मार्ग म ट्रैक्टर के टक्कर ले दुपहिया म बइठे एक झन युवक के मउकाच म मउत होगे।