अंतर्राष्ट्रीय योग दिवस
प्रधानमंत्री नरेंद्र मोदी ह आज कलकत्ता म बारहवां अंतर्राष्ट्रीय योग दिवस के प्रमुख कारीकरम के अगुवई करीन। ए दउरान प्रधानमंत्री ह किहीन कि योग मानसिक स्वास्थ्य ले शारीरिक स्वास्थ्य के रद्दा दिखाथे।
ओमन किहीन कि दुनिया के कोनो-कोनो जघा म इक्कीस जून ह बछर के सबले बड़े दिन होथे अउ योग के सेति एहा अब सबले बड़े सामूदायिक उत्सव बन गे हवय। प्रधानमंत्री ह किहीन कि योग सिरिफ शारीरिक व्यायाम भर नइ हे, फेर एहा भावना के अभिव्यक्ति घलो हे, जउन ह कोनो उमर तक सीमित नइ हे। ओमन किहीन कि योग सबला जोड़थे अउ एके संघरा राखथे।
ऐति, छत्तीसगढ़ म घलो अंतर्राष्ट्रीय योग दिवस म सामूहिक योगाभ्यास करे गीस। राज्यपाल रमेन डेका आज रईपुर के इंदिरा गंाधी कृषि विश्वविद्यालय म राखे गे योग सिविर म मुख्य अतिथि के रूप म सामिल होइन। ए मउका म राज्यपाल ह किहीन हे कि आज पूरा छत्तीसगढ़ सामूहिक योगाभ्यास के माध्यम ले स्वास्थ्य, संतुलन अउ सकारात्मकता के संदेस ल जन-जन तक पहुंचावत हे।
उहें, अंबिकापुर के पीजी कालेज ग्राउंड म राज्य स्तरीय सामूहिक योगाभ्यास कारीकरम म मुख्यमंत्री विष्णुदेव साय मुख्य अतिथि के रूप म सामिल होइन। ए मउका म मुख्यमंत्री ह योगाभ्यास करके प्रदेस के लोगन ल नियमित रूप ले योग ल अपना के स्वस्थ अउ निरोगी जीवन जिए के संदेस दीन। मुख्यमंत्री ह किहीन कि स्वस्थ व्यक्ति ही स्वस्थ परिवार, स्वस्थ समाज अउ विकसित राष्ट्र के आधारसिला होथे। एखर सेति योग ल सिरिफ एक ठन आयोजन नइ समझ के एला जीवन के हिस्सा बनाना चाही।
कारीकरम के अध्यक्षता स्वास्थ्य अउ परिवार कल्याण मंत्री श्यामबिहारी जायसवाल ह करीन। कारीकरम म छत्तीसगढ़ योग आयोग के अध्यक्ष संजय अग्रवाल घलो अतिविशिष्ट अतिथि के रूप म मौजूद रिहीन।
उहें, उपमुख्यमंत्री अरूण साव दुरूग जिला के खालसा पब्लिक स्कूल प्रांगण म राखे गे योगाभ्यास कारीकरम म सामिल होके योग करीन। ए मउका म ओमन ह लोगन ले योग ल अपन जिनगी के हिस्सा बनाय के अपील करीन।
अइसने, उपमुख्यमंत्री विजय शर्मा ह घलो कबीरधाम जिला के पीजी कालेज म राखे गे योगाभ्यास कारीकरम म सामिल होइन। ए मउका म ओमन ह नियमित रूप ले योगाभ्यास करे उपर जोर दीन।
वित्त मंत्री ओपी चौधरी ह जांजगीर-चांपा जिला के भीमा तालाब के जाज्वल्य देव द्वार परिसर म सामूहिक योगाभ्यास कारीकरम म सामिल होइन। ए दउरान श्री चौधरी ह ग्राम कुटराबोड़ के युवा मलखंभ खिलाड़ी डिम्पी सिंह ल स्वेच्छानुदान मद ले पच्चीस हजार रूपिया के सहायता रासि दे जाय के घोसना करीन। संगेसंग ओमन ह नवागढ़, पामगढ़ अउ अकलतरा विकासखंड बर तीन ठन नवा एंबुलेंस ल हरा झंडा दिखाके रवाना करीन।
अंतर्राष्ट्रीय योग दिवस के मउका म आज छत्तीसगढ़ के सबो तैंतीस ठन जेल मन म योग कारीकरम आयोजित करे गीस। ए दउरान हजारों बंदी मन ह योगाभ्यास करीन। केंद्रीय जेल रईपुर म राखे गे योग सिविर म पांच सौ पुरूष अउ डेढ़ सौ महिला बंदी मन ह भाग लीन। कारीकरम म जेल महानिदेसक हिमांशु गुप्ता मुख्य अतिथि के रूप म सामिल होइन।
उहें, कंेद्रीय संचार ब्यूरो डहार ले जगदलपुर के शासकीय काकतीय स्नात्कोत्तर महाविद्यालय प्रांगण म योग सिविर के आयोजन करे गीस। ए सिविर म एनसीसी, एनएसएस, पतंजली योग समिति अउ युवा मन संघरा करीबन एक सौ पचास प्रतिभागी मन ह हिस्सा लीन।
अइसने, केंद्रीय संचार ब्यूरो अंबिकापुर डहार ले सरगुजा जिला के ग्राम सखौली के उच्चतर माध्यमिक शाला म बिसेस जन जागरूकता कारीकरम कराय गीस, जेमा छात्र-छात्रा, शिक्षक अउ ग्रामीण मन ह भाग लीन। ए दउरान रंगोली अउ प्रश्नमंच जइसन प्रतियोगिता कराय गीस।
प्रदेस के दूसर जिला मन म घलो आज योग कारीकरम कराय गीस, जेमा मंत्री, सांसद अउ विधायक मन ह मुख्य अतिथि के रूप म सामिल होइन।
नीट-परीक्षा
राष्ट्रीय परीक्षा एजेंसी-एनटीए डहार ले आज छत्तीसगढ़ संघरा देसभर के आने-आने परीक्षा केंद्र म कड़ा सुरक्षा के बीच नीट-यूजी के पुनर्परीक्षा कराय गीस। परीक्षा मंझनियाकुन दू बजे ले सुरू होइस, जउन ह संझा पांच बजके पंद्रह मिनट तक चलिस। विद्यार्थी मन ल बिहनिया ग्यारा बजे ले मंझनिया डेढ़ बजे तक ही परीक्षा केंद्र म प्रवेस के अनुमति दे गीस।
राहुल गांधी-दौरा
लोकसभा म नेता प्रतिपक्ष राहुल गांधी आज एक दिन के दउरा म छत्तीसगढ़ पहुंचिन। राहुल गांधी रईपुर जिला के अभनपुर म राखे गे प्रसिक्षण कारीकरम म कांग्रेस के नवा नियुक्त इकचालीस झन जिला अध्यक्ष मन ल प्रसिक्षण दीन। ए मउका म कांग्रेस के छत्तीसगढ़ प्रभारी सचिन पायलट संघरा दूसर बड़े नेता मन मौजूद रिहीन। खबर के मुताबिक कांग्रेस के ए प्रसिक्षण सिविर आज ले सुरू होय हे, जउन ह अवइया दस दिन तक चलही। सिविर म प्रदेस भर के पार्टी के जिला अध्यक्ष अउ संगठन पदाधिकारी मन ल प्रसिक्षण दे जाही।
मैत्री कैफे
नारायणपुर जिला म एक ठन नवा पहल करत डीआरजी परिसर म ‘‘मैत्री कैफे‘‘ के सुरूआत करे हे। ए कैफे स्थानीय जनजातीय कला, बस्तर के सांस्कृतिक विरासत अउ पारंपरिक स्थापत्य सैली म आधारित हे। ए कैफे के सुरूआत करत वन मंत्री केदार कश्यप ह किहीन कि विकास, रोजगार अउ विस्वास ले स्थायी संाति के आधार हे अउ मुख्यधारा म लहुटे लोगन ल आगू बढ़ाय बर अइसन प्रयास जरूरी हे।
कोटा-नगर पालिका
बिलासपुर जिला के कोटा नगर पंचायत ल अब नगर पालिका के दर्जा मिल गे हवय। ए संबंध म नगरीय प्रशासन विभाग ह राजपत्र म अधिसूचना प्रकासित कर दे हे, जेखर अनुसार नगर पंचायत कोटा के सीमा ही नगर पालिका कोटा के सीमा होही।
दुर्घटना
गौरेला-पेण्ड्रा-मरवाही जिला म होय दू ठन आने-आने हादसा म दू झन लोगन के मउत होगिस। पहिली घटना अंधियारखोर क्षेत्र म होइस, जिंहा एक ठन ट्रैक्टर के पलटे ले ओमा बइठे युवा के मउत होगिस। उहें, कारीआम घाट तीर होय दूसर घटना म एक ठन तेज रफ्तार ट्रेलर ह सड़क किनारे खड़े एक झन युवक ल टक्कर मार दीस। गंभीर रूप ले घायल युवक ल जिला अस्पताल ले जाय गीस, जिंहा ईलाज के दउरान ओखर मउत होगिस।
अउ अब पेस हे मौसम के हाल…
छत्तीसगढ़ म अवइया पांच दिन तक मौसम के मिजाज बदल सकत हे। मौसम विभाग के अनुसार एक ठन द्रोणिका उत्तर छत्तीसगढ़ ले तेलंगाना तक बाढ़े हे, जेखर असर ले राज्य के उत्तर अउ दक्षिण छत्तीसगढ़ म कुछेक हिस्सा म गरज-चमक के संग बिजली गिरे के अउ हल्का ले मध्यम बरसा होय के संभावना जताय गेहे। फेर, मध्य छत्तीसगढ़ म अधिकतम तापमान चार ले छै डिग्री जादा हे, जेखर सेति अवइया दू-तीन दिन म रईपुर अउ दुरूग संभाग म लू चले के यलो अलर्ट जारी करे गेहे। विभाग के अनुसार तेईस जून के आसपास दक्षिण-पश्चिम मानसून प्रदेस के अउ कोनो इलाका म बाढ़ सकत हे।
अउ अब थोरकुन समाचार सार म –
– कोरिया जिला के ग्राम नौगई म होय तिहरे हत्याकांड के मामला म पुलिस ह सबो आरोपी मन ल गिरफ्तार कर लेहे। पाछू सोलह जून के रतिहा आपसी रंजिस के चलत चारपहिया गाड़ी म आगी लगाय के घटना म तीन झन लोगन के मउत होगे रिहीस।
अउ
– दुरूग पुलिस ह साइबर ठगी ले मिले रूपिया के लेन-देन म उपयोग करे गे म्यूल अकाउंट मामला म एक आरोपी ल भिलाई ले गिरफ्तार करे हे। पुलिस के अनुसार आरोपी के खाता ले चौदह लाख रूपिया ले जादा के संदिग्ध लेन-देन पाय गेहे।