मन की बात
प्रधानमंत्री नरेन्द्र मोदी ह कहिन कि किसान अउ गांव मनके मजबूत होय ले ही भारत आत्मनिर्भर बनही। आकाशवाणी ले आज ‘‘मन की बात‘‘ कारीकरम म ओमन कहिन कि कृषि क्षेत्र, किसान अउ गांव ही आत्मनिर्भर भारत के आधार हरय। ओमन कहिन कि संकट के ए घड़ी म कृषि क्षेत्र ह अपन दमखम दिखाय हे।
श्री मोदी ह यहू कहिन कि किसान मन अपन फल, साग-भाजी ल कहू भी अउ कोन्हों ल घलो बेचे के ताकत राखथे। श्री मोदी ह ए बात उपर जोर दीस कि अब इही ताकत देस के दूसर किसान मन ल घलो मिले हे। श्री मोदी ह कहिन कि खेती म नवा-नवा तौर-तरीका अपनाय के जरूरत हे।
प्रधानमंत्री ह मन की बात कारीकरम म कहानी सुनाय के कला के बारे म बतईन कि कइसे ए ह सुरू ले भारतीय संस्कृति के हिस्सा रिहीस। ओमन कहिन कि परिवार म कोनो न कोनो सियान अउ बड़े कहानी सुनावत रिहीस हे अउ घर ल नवा जोस अउ ऊर्जा ले भर देवत रिहीन।
प्रधानमंत्री ह लोगन ले आग्रह करे हे कि परिवार के जम्मों सदस्य ल देस के स्वतंत्रता संग्राम अउ स्वतंत्रता सेनानी मनके सौर्य गाथा ले परिचित कराना चाही।
प्रधानमंत्री ह कहिन कि दू अक्टूबर पवित्र अउ प्रेरक दिवस हरय। ए दिन महात्मा गांधी अउ लाल बहादुर शास्त्री ल सुरता करे के दिवस हरय। ओमन कहिन कि कहूं गांधी के आर्थिक चिंतन के मूल भावना ल समझे गे रहितिस त आज आत्मनिर्भर भारत अभियान के जरूरत नइ पड़तीस।
विश्व पर्यटन दिवस
आज विश्व पर्यटन दिवय हे। ए मउका म राज्यपाल अनुसुईया उइके कहिन कि छत्तीसगढ़ ल कृषि पर्यटन राज्य के रूप म घलो स्थापित करे जा सकथे। राज्यपाल ह आज छत्तीसगढ़ पर्यटन म आधारित एक ठिन स्मारिका के आॅनलाईन विमोचान करत कहिन कि प्रदेस म पर्यटन ल बढ़ावा मिले ले इहां के लोगन ल रोजगार मिलही।
उहें, मुख्यमंत्री भूपेश बघेल ह प्रदेसवासी मन ल पर्यटन दिवस के बधाई अउ सुभकामना दीन। ओमन अपन संदेस म कहिन कि छत्तीसगढ़ प्राकृतिक सौंदर्य ले परिपूर्ण – नंदियां, झरना, जलप्रपात अउ सघन वन ले घेराय कतकोन पर्यटन स्थल हे। एखर अलावा प्रदेस म धार्मिक अउ पौराणिक के संग आध्यामिक, ऐतिहासिक अउ सांस्कृतिक विरासत ले जुड़े कतकोन जगह हे। ओमन कहिन कि छत्तीसगढ़ ल विश्व पटल म स्थापित करे बर राज्य सरकार डहार ले कतकोन कदम उठाय जात हे।
इही बीच, प्रदेस के बिलासपुर अउ अंबिकापुर ल देस के आने-आने भाग ले सीधा जोड़े बर विमान सेवा सुरू होय के संभावना हे।
खबर के मुताबिक ए बछर के बिसय हे – ‘‘पर्यटन और ग्रामीण विकास‘‘ राखे गेहे।
निजी स्कूल फीस
कोरोना संक्रमण काल के दउरान निजी स्कूल डहार ले छात्र मन ले ले जात फीस ल लेके राज्य सरकार सख्त होगे हे। छत्तीसगढ़ उच्च न्यायालय के निरदेस अउ माता-पिता मन डहार ले मिलत सिकायत के बाद लोक शिक्षण संचालनालय ह लाॅकडाउन के अवधि म निजी स्कूल मन डहार ले वसूले गे फीस के जानकारी मांगीन। एखर बर लोक शिक्षण संचालनालय के संचालक ह प्रदेस के सबो जिला सिक्षा अधिकारी मन ल निरदेस जारी करे हे। निरदेस म फीस ले संबंधित सबो जानकारी निजी स्कूल मन ले जुटाय बर केहे हे।
हमर बिलासपुर संवाददाता ह बतईन कि जिला सिक्षा अधिकारी ह सबो निजी स्कूल मन ल छात्र मनके फीस से जुड़े जानकारी दू दिन के भीतर जिला सिक्षा कार्यालय म देके निरदेस देहे।
उहें, राजनांदगांव जिला म घलो जिला सिक्षा अधिकारी डहार ले निजी स्कूल मन ल छात्र मन ले जावत फीस के संबंध म जानकारी दे बर केहे हे।
कोरोना-आॅक्सीजन विस्तार
प्रदेस म कोविड अस्पताल अउ कोविड केयर सेंटर म आॅक्सीजन के सुविधा वाले बिस्तर मनके संख्या करीबन नौ हजार तक पहुंचाय के लक्ष्य राखे गेेहे। एखर तहत राज्य म पांच हजार तीन सौ तेरह अउ बिस्तर मन म आॅक्सीजन के सुविधा देवाय के तैयारी करे जात हे। एमा ले दू हजार पांच सौ छत्तीस बिस्तर मन म पाईप लाइन ले अउ दू हजार सात सौ ले जादा बिस्तर मन म आॅक्सीजन सिलेंडर के माध्यम ले आॅक्सीजन पहुंचाय जाही। एखर अलावा कतकोन नवा कोविड सेंटर म आॅक्सीजन जनरेटर प्लांट, लिक्विड टैंक अउ जादा क्षमता के सिलेंडर मन ले पाइप लाइन ले आॅक्सीजन आपूर्ति के व्यवस्था स्थापित करे जात हे। जल्दी ही प्रदेस के नौ कोविड अस्पताल मनके दू हजार अट्ठाईस बिस्तर मन म मरीज मन ल आॅक्सीजन सुविधा मिले बर लगही। उहें, क्षेत्रीय कोविड अस्पताल मन म आॅक्सीजन सुविधा के संगेसंग आपात स्थिति ले निपटे बर सबो जिला म आॅक्सीजन सुविधा वाले कोविड केयर सेंटर घलो तैयार करे जात हे।
इही बीच, कोरोना संक्रमण के जांच करवइया मन अपन रिपोर्ट पोर्टल म घलो देख सकही। एखर बर स्वास्थ्य विभाग के पोर्टल ‘‘सीजी हेल्थ डाॅट एनआईसी डाॅट इन‘‘ म क्लिक करना होही। प्रदेस म कोनों भी मनखे जउन ह सितंबर महीना के पांच तारीख के बाद कोरोना संक्रमण के जांच कराय होही, ओमन अपन रिपोर्ट देख सकही। संगेसंग प्रिंट घलो ले सकही।
कोरोना-समाचार
महासमुंद जिला म कोरोना संक्रमण ले बचाव बर अपनाय जावत डाॅक्टरी अउ प्रबंकीय बेवस्था ल अउ अच्छा करे जात हे। जिला के कोरोना वायरस नियंत्रण अउ रोकथाम दल ल जिला नोडल अधिकारी डाॅक्टर अनिरूद्ध कसार के मुताबिक जिला म कान्टेªक्ट ट्रेसिंग अब आॅनलाईन दर्ज करे जाही। अब मरीज के पाॅजिटिव मिले म कान्ट्रेक्ट ट्रेसिंग के दउरान ओमन ल मउका म ही इलाज बर होम आइसोलशन या तीर के कोविड सेंटर ल चुने के सुविधा मिल सकही।
उहें, जिला म कोरोना संक्रमण के रोकथाम बर रोग-प्रतिरोधक क्षमता ल बढ़ाय खातिर आयुष काढ़ा के सात सौ ले जादा पैकेट ल काली बांटे जाही।
इही बीच, महासमुंद जिला म लागू लाॅकडाउन बेरा म किसान मन ल कीटनासक दवई के होम डिलीवरी करे जात हे। एखर तहत किसान, कृषि कार्यालय के उप संचालक अउ संबंधी विकासखंड के वरिष्ठ कृषि विकास अधिकारी के फोन नंबर म बिहनिया दस बजे ले संझा छह बजे तक संपर्क कर सकथे।
ऐति, दुगरू जिला म होम अइसोलेशन मैनेजमेंट के माॅडल सफल होवत हे। जिला म चार हजार आठ सौ बैसठ कोरोना संक्रमित मरीज मन ल होम आइसोलेशन के अनुमति देहे। उहें, आरटी-पीसीआर ले टेस्ट करइया मरीज मन ल कान्ट्रेक्ट ट्रेसिंग टीम डहार ले उंखर घर म ही दवाई अउ आने-आने सामान दे जात हे। होम आइसोलेशन कंट्रोल रूम म पहिली ले कोनों आने बीमारी ले पीड़ित मरीज मनके रिकार्ड अलग रखे जाथे, जेखर ले आपात स्थिति म ओमन ल बीमारी के अनुसार तुरते सहायता पहुंचाय जा सकय।
माओवादी-गिरफ्तार
छत्तीसगढ़ अउ मध्यप्रदेश के इनामी माओवादी ल मध्यप्रदेश के पुलिस ह गिरफ्तार करे हे। खबर के मुताबिक बालाघाट जिला के मलाजखंड पुलिस ह माओवादी बादल मरकाम ल समनापुर के बादाटोला ले गिरफ्तार करे हे। ए माओवादी उपर छत्तीसगढ़ राज्य ह दू लाख रूपिया के अउ मध्यप्रदेश ह दस लाख रूपिया के इनाम घोषित करे रिहीन। बताय जात हे कि ए माओवादी कबीरधाम जिला म होय आने-आने माओवादी घटना म घलो सामिल रिहीस। एखर सेती कबीरधाम के पुलिस ह घलो ए माओवादी ल गिरफ्तार करके पूछताछ बर छत्तीसगढ़ लेके आही।
प्रमुख सचिव-मोहल्ला क्लास
प्रदेस के स्कूल शिक्षा विभाग के प्रमुख सचिव डाॅक्टर आलोक शुक्ला ह बस्तर जिला म शिक्षा व्यवस्था के निरीक्षण करीन। ए दउरान डाॅक्टर शुक्ला ह जिला के कंगोली, पटेलपारा, पोटानार अउ सिंघनपुर म चलत मोहल्ला कक्षा मनके जानकारी लीन। ए मउका म ओमन लइका मन ल दे जात सिक्षा ल अउ अच्छा बनाय के सुझाव दीन। प्रमुख सचिव ह केबल टीवी के माध्यम ले लेजात वर्चुअल क्लास ल घलो देखीन।