प्रधानमंत्री किसान सम्मान निधि
प्रधानमंत्री नरेंद्र मोदी अब ले कुछेक देर बाद पश्चिम बंगाल के हुगली जिला के तारकेश्यवर ले प्रधानमंत्री किसान सम्मान निधि–पीएम-किसान योजना के तेईसवां किस्त जारी करही। एखर तहत देस के नौ करोड़ चवालीस लाख किसान मन के बैंक खाता म अट्ठारा हजार आठ सौ अस्सी करोड़ रूपिया ले जादा के रासि सीधा भेजे जाही। ए योजना के तहत छत्तीसगढ़ के चौबीस लाख बावन हजार ले जादा किसान मनके बैंक खाता म चार सौ नब्बे करोड़ चौव्वन लाख रूपिया ले जादा के रासि के अंतरण करे जाही।
प्रधानमंत्री विकसित भारत रोजगार योजना
प्रधानमंत्री नरेंद्र मोदी ह काली नई दिल्ली म राखे गे एक कारीकरम म प्रधानमंत्री विकसित भारत रोजगार योजना के तहत चौबीस सौ करोड़ रूपिया के प्रोत्साहन रासि के वितरण करीन। ए मउका म प्रधानमंत्री ह किहीन कि इक्कीसवीं सदी म अवसर उही देस के होही, जेन कुसल प्रतिभा मनके पोषण करही, नवाचार ल बढ़ावा दिही अउ गुणवत्ता के ऊंचा मानक ल बनाय राखही। श्री मोदी ह किहीन हे कि अवइया बछर म भारत के युवा मन दुनिया के विकास, नवाचार अउ उद्यमिता ल तेजी ले बढ़ाय म आगू होही।
ए योजना म पहिली पइत रोजगार पाने वाला कर्मचारी मन ल पंद्रह हजार रूपिया तक के प्रोत्साहन दे जावत हे अउ अतकहा रोजगार देने वाला नियोक्ता मन ल हर अतिरिक्त कर्मचारी उपर हर महिना तीन हजार रूपिया के प्रोत्साहन दे जावत हे।
प्रधानमंत्री-12 साल
प्रधानमंत्री नरेंद्र मोदी के अगुवई म केंद्र म एनडीए सरकार के बारा बछर पूरा होय के मउका म प्रदेस म आने-आने जघा म योजना मनके प्रचार-प्रसार अउ पंजीयन सिविर के आयोजन करे जावत हे।
इही कड़ी म दुरूग म राखे गे कारीकरम म केंद्रीय राज्य मंत्री दुर्गादास उइके ह सामिल होइस। कारीकरम ल संबोधित करत हुए श्री उइके ह किहीन कि प्रधानमंत्री नरेंद्र मोदी के अगुवई म देस ह विकास अउ विरासत के संरक्षण के दिसा म बड़का प्रगति करे हे। ओमन किहीन कि केंद्र सरकार ह समाज के आखिरी मनखे के विकास ल धियान म राखत हुए कई ठिन जन कल्याणकारी योजना लागू करे हे। कारीकरम म स्कूल शिक्षा मंत्री गजेन्द्र यादव, महापौर अलका बाघमार समेत अब्बड़ अकन जनप्रतिनिध अउ भाजपा पदाधिकारी मन सामिल रिहीन।
बाद म पत्रकार मन ले गोठबात करत हुए केंद्रीय राज्य मंत्री श्री उइके ह किहीन हे कि केंद्र सरकार के सेवा, सुशासन, विकास अउ विस्वास के मंत्र के संग चलाय जावत योजना के सकारात्मक प्रभाव ले आज लोगन के जिनगी म बदलाव आय हे।
अंतर्राष्ट्रीय योग दिवस
छत्तीसगढ़ समेत देसभर म काली इक्कीस जून के बारहवां अंतर्राष्ट्रीय योग दिवस मनाय जाही। ए बछर अंतर्राष्ट्रीय योग दिवस के थीम ‘‘स्वस्थ्य आयु के लिए योग‘‘ राखे गेहे। एखर बर प्रदेस म तियारी पूरा कर ले गेहे।
राज्यपाल रमेन डेका ह राजधानी रईपुर म अंतर्राष्ट्रीय योग दिवस के मउका म सामूहिक योग अभ्यास कारीकरम के मुख्य पहुना होही। उहें, मुख्यमंत्री विष्णुदेव साय के अगुवई म सरगुजा जिला म बिहनिया सात बजे सामूहिक योग अभ्यास होही। ए कारीकरम के अध्यक्षता स्वास्थ्य मंत्री श्याम बिहारी जायसवाल ह करही। केंद्रीय राज्य मंत्री तोखन साहू ह बिलासपुर म, उपमुख्यमंत्री अरूण साव ह दुरूग म, उपमुख्यमंत्री विजय शर्मा ह कबीरधाम म अउ विधानसभा अध्यक्ष डॉक्टर रमन सिंह ह राजनांदगांव म अंतर्राष्ट्रीय योग दिवस के मउका म होवइया कारीकरम के मुख्य पहुना होही।
कांग्रेस प्रशिक्षण शिविर
प्रदेस कांग्रेस के जिला अध्यक्ष मनके प्रसिक्षण सिविर आज ले रईपुर जिला के अभनुपर म सुरू होय हे। कांग्रेस के प्रदेस अध्यक्ष दीपक बैज ह पत्रकार मनले गोठबात करत हुए बतइन कि ए सिविर म कांग्रेस के प्रभारी महासचिव सचिन पायलट ह सामिल होइन हे। उहें, लोकसभा म नेता प्रतिपक्ष राहुल गांधी ह घलो ए सिविर म सामिल होही। सिविर म जिला अध्यक्ष मन ल अखिल भारतीय कांग्रेस कमेटी के प्रसिक्षण विभाग कोति ले प्रसिक्षण दे जावत हे। संगेसंग बिसय-बिसेसज्ञ मन कोति ले हाल फिलहाल के बिसय उपर जानकारी घलो दे जाही।
नीट/यूजी-पुनर्परीक्षा
राष्ट्रीय परीक्षा एजेंसी यानी एनटीए कोति ले काली इक्कीस जून के छत्तीसगढ़ समेत देसभर के आने-आने परीक्षा केंद्र म नीट-यूजी के पुनर्परीक्षा के आयोजन करे जाही। एखर बर सुरक्षा के कड़ा बेवस्था करे गेहे। परीक्षा मंझनिया दू बजे ले संझा पांच बजके पंद्रह मिनट तक होही। परीक्षार्थी मन ल बिहनिया ग्यारा बजे ले मंझनिया डेढ़ बजे तक ही परीक्षा केंद्र म प्रवेस के अनुमति होही। एखर बाद अवइया कोनो भी अभ्यर्थी ल भीतर नइ करे जाही।
एनटीए ह नीट-यूजी के पुनर्परीक्षा देवइया उम्मीदवार मन बर एक ठिन आधिकारिक व्हाट्सअप संचार चैनल सुरू करे हे। एनटीए ह बतइस हे कि सबो आधिकारिक व्हाट्सअप संदेस ह सिर्फ सत्यापित नंबर-सात आठ-दू सात- नौ आठ-सून्य दू -आठ सात के माध्यम ले ही भेजे जाही।
ऐति, रईपुर जिला म नीट परीक्षा के सफल अउ सांतिपूर्ण आयोजन बर जिला प्रशासन अउ एनटीए ह जरूरी तियारी पूरा कर लेहे। जिला नोडल अधिकारी अउ कोऑडिनेटर लक्ष्मी सिंह ह बतइन कि जिला म पच्चीस कंेद्र बनाय गेहे। ओमन परीक्षार्थी मन ले बेरा ले पहिली परीक्षा केंद्र पहुंचे के अपील करे हे।
इही बीच, दक्षिण पूर्व मध्य रेलवे ह नीट परीक्षा के परीक्षार्थी मनके सुविधा बर बिसेस रेल सेवा के व्यवस्था करे हे। रईपुर रेलमंडल म मंडल रेल प्रबंधक दयानंद ह बतइन कि रेलवे कोति ले कोरबा-दुर्ग- कोरबा के बीच मेमू पैसेंजर ट्रेन आज अउ कल चलाय जाही। एखर अलावा हसदेव एक्सप्रेस के अस्थायी विस्तार दुरूग स्टेसन तक करे गेहे।
एनटीए ह नीट यूजी दुबारा परीक्षा ले पहिली मानक तियारी के निरीक्षण बर आज देसभर म मॉकड्रिल करीस। इही कड़ी म रईपुर समेत प्रदेस के आने-आने परीक्षा केंद्र म मॉकड्रिल करे गीस।
विद्यारंभ अभियान
प्रदेस म लइका मनके सुरूआती शिक्षा ल व्यवस्थित करे के उद्देस्य ले विद्यारंभ अभियान चलाय जावत हे। एखर तहत आंगनबाड़ी केंद्र म पूर्व प्राथमिक शिक्षा पूरा करइया छै बछर के लइका मन ल विद्यारंभ प्रमाण पत्र देके स्कूल म भर्ती करे जावत हे। ए पहल के उद्देस्य लइका मनके जीवन म शिक्षा के नवा चरण के सुरूआत ल तिहार के रूप म मनाना अउ आंगनबाड़ी ले स्कूल तक के सफर ल सरल अउ सुघ्घर बनाना हे।
सुपोषित बचपन अभियान
बलौदाबाजार-भाटापारा जिला म कुपोषण के खिलाफ सुपोषित बचपन अभियान सुरू करे गेहे। राजस्व मंत्री टंकराम वर्मा ह अभियान के सुरूआत करत हुए किहीन कि स्वस्थ्य लइका ही देस के मजबूत भविष्य हे। अभियान म जिला के नौ हजार कुपोषित लइका मन ल छै महिना तक हफ्ता म छै दिन पौष्टिक लाडू दे जाही, जेखर निर्माण महिला स्व-सहायता समूह ह करही। लइका मन के स्वास्थ्य परीक्षण अउ देखभाल के व्यवस्था घलो करे गेहे।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सबो आकाशवाणी कंेंद्र एके संघरा रिले करही। ए दारी के अंक म आपमन ‘‘कोरबा‘‘ जिला के बारे म जानकारी सुनिहा।
प्रधानमंत्री राष्ट्रीय बाल पुरस्कार
प्रधानमंत्री राष्ट्रीय बाल पुरस्कार बर इकत्तीस जुलाई तक नामांकन मंगाय गेहे। महिला अउ बाल विकास विभाग ह प्रदेस के प्रतिभासाली लइका मनले ए राष्ट्रीय पुरस्कार बर आवेदन करे के अपील करे हे। ए पुरस्कार पांच ले अट्ठारा बछर के ओ लइका मन ल दे जाथे, जेमन बहादुरी, सामाजिक सेवा, पर्यावरण ल बचाय, खेल, कला, संस्कृति, विज्ञान अउ प्रौद्योगिकीय जइसन क्षेत्र म सुघ्घर उलपब्धि हासिल करे हे। आवेदन सिर्फ राष्ट्रीय पुरस्कार पोर्टल अवाडर््स डॉट जीओवी डॉट इन के माध्यम ले स्वीकार करे जाही।