सुघ्घर छत्तीसगढ़ अभियान
प्रदेस म सुघ्घर छत्तीसगढ़ अभियान सुरू करे जाही। ए अभियान के तहत सरकार के जन कल्याणकारी योजना मनके फायदा हरेक पात्र हितग्राही तक पहुंचाय के लक्ष्य राखे गेहे। मुख्यमंत्री विष्णुदेव साय ह बतइन कि नियद नेल्लानार योजना के सफलता ल आगू बढ़ात रईपुर, बिलासपुर, दुरूग अउ सरगुजा संभाग के तेईस जिला म इकतीस योजना मनके संतृप्तिकरण सुनिश्चित करे जाही। ओमन किहीन कि तकनीक आधारित रियल टाइम मॉनिटरिंग, विभाग के समन्वय अउ जवाबदेह व्यवस्था ले लोगन मन ल बेहतर सेवा उपलब्ध कराय जाही। मुख्यमंत्री ह किहीन कि हरेक परिवार तक शासन के योजना पहुंचे लेही विकसित छत्तीसगढ़ के सपना साकार होही। ओमन बतइन कि ए अभियान के तहत सामाजिक सुरक्षा, आवास अउ रोजगार, खाद्य सुरक्षा, स्वास्थ्य शिक्षा, महिला सशक्तिकरण, कृषि, कौशल विकास अउ बुनियादी नागरिक सेवा ल सामिल करे गेहे।
मुख्यमंत्री ह बतइन कि अभियान के क्रियान्वयन तीन चरण म करे जाही। पहिली चरण म ग्रामवार आधारभूत सर्वेक्षण अउ डेटा मानचित्रण करे जाही। पीडीएस डेटाबेस अउ विभागीय आंकड़ा के आधार म संभावित परिवार मनके पहिचान करके ए योजना बर बेसलाइन तियार करे जाही। उहें, दुसरइया चरण म ग्राम, क्लस्टर अउ विकासखंड स्तर म बिसेस संतृप्तिकरण सिविर राखे जाही। ए सिविर के माध्यम ले पात्र हितग्राही मन ल योजना ले जोड़े जाही अउ जरूरी दस्तावेज अउ सेवा के उपलब्धता सुनिश्चित करे जाही। तीसरइया अउ आखिरी चरण म सतत निगरानी समीक्षा अउ मूल्यांकन के प्रक्रिया के माध्यम ले योजना मनके प्रगति के आंकलन करे जाही। संघरा जरूरत के अनुसार सुधारे के कदम घलो उठाय जाही।
केंद्र-समर्थन मूल्य
केंद्र सरकार ह किसान मन ल राहत देत रबी विपणन बछर दू हजार छब्बीस-सत्ताईस बर चना, मसूर अउ सरसों के न्यूनतम समर्थन मूल्य म खरीदी के अवधि पंद्रह दिन बढ़ा देहे। ए निर्णय प्रधानमंत्री अन्नदाता आय संरक्षण अभियान के तहत ले गेहे। कृषि मंत्री रामविचार नेताम ह प्रदेस के किसान मन ले बाढ़े बेरा के फायदा उठाय अउ पास के सहकारी समिमि म जाके अपन उपज बेचे के अपील करीन हे। ओमन किहीन कि एखर ले किसान बाजार के उतार-चढ़ाव ले बाचही अउ ओमन ल फसल के उचित दाम मिलही।
प्रधानमंत्री किसान सम्मान निधि
प्रधानमंत्री नरेंद्र मोदी काली पश्चिम बंगाल के हुगली जिला के तारकेश्वर ले प्रधानमंत्री किसान सम्मान निधि-पीएम-किसान योजना के तेइसवां किस्त जारी करही। कृषि अउ किसान कल्याण मंत्रालय ह बतइस कि देसभर म चौरानवे करोड़ ले जादा किसान मनके बैंक खाता म सीधा अट्ठारा हजार आठ सौ अस्सी करोड़ रूपिया ले जादा के रासि अंतरित करे जाही। ए किस्त ले दू करोड़ अट्ठारा लाख ले जादा महिला किसान मन ल घलो फायदा मिलही।
प्रधानमंत्री-12 साल
प्रधानमंत्री नरेंद्र मोदी के अगुवई म केंद्र सरकार के बारह बछर पूरा होय के मउका म प्रदेस भाजपा कोति ले बिसेस जनसंपर्क अभियान चलाय जात हे। इही कड़ी म केंद्रीय आवास अउ सहरी कार्य राज्य मंत्री तोखन साहू ह मुंगेली म वरिष्ठ नागरिक मन ले सौजन्य भेंट करीन। ए दउरान श्री साहू ह कंेंद्र सरकार के जन कल्याणकारी योजना, विकास कार्य अउ आने उपलब्धि के जानकारी दीन अउ ओमन ले गोठबात करीन।
उहें, गौरेला-पेण्ड्रा-मरवाही जिला के पेण्ड्रा म छयाचित्र प्रदर्सनी अउ पंजीकरण सिविर के आयोजन करे गीस।
ऐति रईपुर जिला के आरंग म राखे गे सिविर म कैबिनेट मंत्री गुरू खुशवंत सिंह साहब ह केंद्र अउ राज्य सरकार के योजना मनके जानकारी दीन।
बातों-बातों-में
प्रादेशिक समाचार एकांश के समसामयिक बिसय उपर आधरित कारीकरम ‘‘बातों-बातों-में‘‘ ए दारी अंतराष्ट्रीय योग दिवस उपर केंद्रित रइही। एखर तहत रईपुर के योग प्रसिक्षक अमित तिवारी ले लेगे भेंटवार्ता के प्रसारण करे जाही। एखर प्रसारण काली बीस जून के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
नीट परीक्षा-तैयारी
राष्ट्रीय परीक्षा एजेंसी-एनटीए ह ईतवार के होवइया राष्ट्रीय पात्रता-सह-प्रवेस परीक्षा-स्नातक-नीट-यूजी के पुर्नपरीक्षा म सामिल होवइया उम्मीदवार मन बर एक ठिन आधिकारिक व्हाट्सअप संचार चैनल सुरू करे हे। एनटीए ह स्पष्ट करे हे कि जम्मो आधिकारिक व्हाट्सअप संदेस केवल ओखर सत्यापित नंबर-सात-आठ दू-सात नौ-आठ सून्य-दो आठ-सात के माध्यम ले भेजे जाही। एजेंसी ह उम्मीदवार मन ल सलाह देहे कि एनटीए ले भेजे गे कोनो भी संदेस उपर भरोस करे के पहिली नीला सत्यापन चिनहा अउ राष्ट्रीय परीक्षा एजेंसी नांव के जांच कर लेवय।
इही बीच, दक्षिण पूर्व मध्य रेलवे ह नीट परीक्षा म सामिल होवइया परीक्षार्थी मनके सुविधा बर बिसेस रेल सेवा के व्यवस्था करे हे। रेलवे कोति ले कोरबा-दुर्ग-कोरबा के बीच मेमू पेसेंजर स्पेसल ट्रेन के संचालन के बीस अउ इक्कीस जून के करे जाही। एखर अलावा हसदेव एक्सप्रेस के अस्थायी विस्तार दुरूग तक करे गेहे। यात्री मनके अतिक्ति भीड़ ल देखत दस ठिन ट्रेन म चालीस अतिरिक्त सामान्य कोच घलो लगाय जाही।
ऐति नीट यूजी के परीक्षा परिणाम अउ प्रवेस प्रक्रिया के दउरान विद्यार्थी मन म बाढ़त मानसिक तनाव ल देखत बिलासपुर स्थित छत्तीसगढ़ आयुर्विज्ञान संस्थान-सिम्स ह मानसिक स्वास्थ्य हेल्पलाइन सेवा सुरू करे हे। ए सुविधा मनोरोग विभाग डहार ले उपलब्ध कराय गेहे। विद्यार्थी अट्ठारा जून ले दू जुलाई तक मोबाइल नंबर-नौ-चार दू-पांच-पांच सून्य-दू तीन-पांच-तीन म तनाव चिंता काउंसिलिंग अउ प्रवेस प्रक्रिया ले जुड़े समस्या बर बिसेसज्ञ मन ले सलाह ले सकही।
योग आयोग-अध्यक्ष
राज्य सरकार ह संजय अग्रवाल ल छत्तीसगढ़ योग आयोग के अध्यक्ष नियुक्त करे हे। चिकित्सा शिक्षा आयुष विभाग डहार ले ए संबंध म आदेस जारी कर दे गेहे। मुख्यमंत्री विष्णुदेव साय ह श्री अग्रवाल ल नियुक्ति म बधई दीन हे। ओमन किहीन कि योग स्वस्थ्य अउ जागरूक समाज निर्माण के महत्वपूर्ण माध्यम हे। मुख्यमंत्री ह भरोसा जतइन कि श्री अग्रवाल के अगुवई म प्रदेस म योग के प्रचार-प्रसार अउ जन जागरूकता ल नवा गति मिलही।
इही बीच, नव नियुक्त अध्यक्ष संजय अग्रवाल ह आज मुख्यमंत्री विष्णुदेव साय ले रईपुर स्थित उंखर निवास म सौजन्य भेंट करीन। ए दउरान योग के संवर्धन अउ प्रदेस म योग संबंधी गतिविधि ल अउ जादा प्रभावी बनाय ले जुड़े बिसय मन उपर चर्चा होइस।
रेत उत्खनन-कार्रवाई
प्रदेस म रेत उत्खनन, परिवहन अउ भंडारण उपर सरलग कार्रवाई करे जात हे। इही कड़ी म आज बलौदाबाजार भाटापारा जिला म राजस्व अउ पुलिस के संयुक्त टीम ह अवैध रेत परिवहन करत दस ठिन हाइवा ल जब्ती करे हे। सिमगा एसडीएम ह बतइन कि सिमगा करा जांच अभियान चलाय जात रिहीस। इही दउरान गाड़ी मन ल रोक के परिवहन पास संबंधी दस्तावेज मांगे गीस, लेकिन दस वाहन के चालक मन कोति ले दस्तावेज नइ देखाय गीस, जेखर बाद टीम ह पंचनामा तियार करके आगू के कारवाई करीस।
ओति, बीजापुर विधायक विक्रम मंडावी के अगुवई म खनिज विभाग अउ पुलिस के टीम ह मिंगाचल नदिया म पाछू देर रतिहा छापा मारके रेत उत्खनन करत जेसीबी, पोकलेन मसीन अउ चार वाहन ल पकड़िस।
बिजली-विरोध
कांग्रेस ह राज्य सरकार ले बिजली के दर म करे गे बढ़ोत्तरी ल तुरते वापस लेके अउ उपभोक्ता मन ल राहत देके मांग करीस हे। कोटा विधायक अटल श्रीवास्तव ह मुंगेली म राखे गे पत्रकारवार्ता म आरोप लगइन कि भाजपा सरकार के कार्यकाल म सरलग पांचवां घांव बिजली के दर म बढ़ोत्तरी करे गेहे, जेखर ले घरेलू व्यावसायिक अउ कृषि उपभोक्ता मन उपर अतिरिक्त आर्थिक बोझा पड़ही।
अउ अब पेस हे मौसम के हाल…
प्रदेस म अवइया तीन ले चार दिन के अंदर दक्षिण-पश्चिम मानसून के आय के संभावना हे। मौसम विभाग के अनुसार पूर्वी विदर्भ ले तेलंगाना अउ आंध्रप्रदेस होवत तमिलनाडु तक एक ठिन द्रोणिका बने हुए हे। एखर असर ले अवइया चौबीस घंटा के दउरान प्रदेस म कुछेक जघा म हल्का ले मध्यम बरसा होय के संभावना हे। उहें, एक-दू जघा म गरज-चमक के संग गाज गिरे के चेतावनी दे देहे।