केंद्र-सड़क निर्माण
केंद्र सरकार वित्त बछर दू हजार छब्बीस-सत्ताईस म ग्रामीण क्षेत्र म छब्बीस हजार किलोमीटर ले जादा सड़क के निर्माण करही। ग्रामीण विकास मंत्रालय के अनुसार, प्रधानमंत्री ग्राम सड़क योजना अउ संबंधित ग्रामीण संपर्क पहल म अवइया ग्रामीण क्षेत्र म सड़क के निर्माण बर अट्ठारह हजार नौ सौ करोड़ रूपिया ले जादा आवंटित करे गेहे।
ग्रामीण सड़क संपर्क परियोजना के प्रगति के आंकलन करे बर ग्रामीण विकास विभाग के सचिव रोहित कंसल के अध्यक्षता म उच्च स्तरीय समीक्षा बइठका आयोजित करे गीस। बइठका म छत्तीसगढ़ के संग, आंध्रप्रदेस, बिहार, झारखंड, मध्यप्रदेस, महराष्ट्र, राजस्थान अउ आने राज्य के वरिष्ठ अधिकारी मन ह भाग लीन। ए दउरान राज्य ल प्रधानमंत्री ग्राम सड़क योजना अउ पीएम-जनमन म अवइया लंबित परियोजना म सरलग काम करे के निरदेस दे गेहे।
दल्लीराजहरा-रावघाट रेल परियोजना
दल्लीराजहरा-रावघाट रेल परियोजना के तहत काली सत्रह जून ले रावघाट रेलखंड म नियंत्रित गति अउ सीमित भार के संग तकनीकी ट्रायल सुरू करे गीस। ए ट्रायल आने-आने चरण म आगू भी जारी रइही। ए दउरान रेल लाइन के परिचालन के क्षमता, सुरक्षा अउ तकनीकी मानक के परिक्षण करे जाही। करीब पंचानवे किलोमीटर लंबा दल्लीराजहरा-रावघाट रेल परियोजना ल सेल-भिलाई इस्पात संयंत्र अउ भारतीय रेलवे के साधा प्रयास ले विकसित करे जात हे।
नशा मुक्ति भारत सप्ताह
युवा अउ आम मनखे मन ल नसा के दुष्प्रभाव के प्रति जागरूक करे बर छत्तीसगढ़ समाज कल्याण विभाग डहार ले काली सत्रह जून ले प्रदेसभर म नसा मुक्त भारत सप्ताह के आयोजन करे जात हे। समाज कल्याण विभाग के प्रमुख सचिव शहला निगार ह मंत्रालय म आयोजित कारीकरम म अधिकारी अउ कर्मचारी मन ल नसा मुक्ति के सपथ दिलाइन। ओमन ह बतइन कि ए बछर ‘‘नसा मुक्त भारत अभियान-विकसित भारत के पहिचान‘‘ थीम म सप्ताह भर आने-आने गतिविधि के आयोजन करे जाही। छब्बीस जून तक चलइया नसा मुक्त भारत सप्ताह के दउरान स्कूल, कालेज अउ आने शैक्षणिक संस्था म सेमीनार, समूह चर्चा, सपथ ग्रहण, जागरूकता रैली अउ संवाद कारीकरम आयोजित करे जात हे। उहें, स्वास्थ्य विभाग डहार ले नसा छोड़ चुके मनखे मन के प्रेरणादायक सफलता के कहानी के प्रचार-प्रसार करे जात हे। एखर अलावा महिला अउ बाल विकास विभाग, पंचायत अउ ग्रामीण विकास विभाग डहार ले मानव श्रृंखला, सपथ कारीकरम अउ जागरूकता गतिविधि के आयोजन करे जाही
शराब व्यसन मुक्ति अभियान
समाज कल्याण विभाग के प्रमुख सचिव शहला निगार के अध्यक्षता म आज मंत्रालय म छत्तीसगढ़ सराब व्यसन मुक्ति अभियान बर गठित राज्य स्तरीय समिति के बइठका होइस। बइठका म राज्य के हरेक विकासखंड के एक हजार ले जादा जन संख्या वाला नवा ग्राम पंचायत म भारतमाता वाहिनी के गठन अउ विस्तार संबंधी प्रस्ताव उपर विचार विमर्स करे गीस। समिति ह नसा पीड़ित मनखे मनके पुर्नवास बर संचालित पंद्रह बिस्तर वाला एकीकृत पुर्नवास केंद्र के क्षमता पंद्रह ले बढ़ाके पचास बिस्तर करे के सुझाव दीन। संगेसंग पांच जिला मोहला-मानपुर-अंबागढ़ चैकी, खैरागढ़-छुईखदान-गंडई, सुकमा, बेमेतरा अउ कोरबा म नवा नसा मुक्ति केंद्र खोले के निर्णय ले गीस।
सुपोषण वृक्ष मुनगा
प्रदेस म कुपोषण के समस्या ल दूर करे बर महिला अउ बाल विकास मंत्री लक्ष्मी राजवाड़े ह ‘‘सुपोषण वृक्ष-मुनगा‘‘ के रोपण ल जन आंदोलन के स्वरूप देके आह्वान करे हे। श्रीमती राजवाड़े ह सबो जनप्रतिनिधि मन ले वर्षा ऋतु के दउरान जल स्त्रोत के तीर-तखार, ग्राम पंचायत परिसर, सार्वजनिक जघा अउ हितग्राही मनके घर म मुनगा के पउधा लगाय के आग्रह करे हे। ओमन ह सबो मनखे मन ले ए अभियान म सक्रिय भागीदारी निभाके ‘‘सुपोषित छत्तीसगढ़‘‘ के निर्माण म योगदान देके अपील करीन हे।
विशेष भेंटवार्ता
आकाशवाणी रईपुर के प्रादेशिक समाचार एकांश डहार ले उन्नीस शासकीय भर्ती परीक्षा पास करके अनोखा रिकॉर्ड बनइया चारू पांडे ले लेगे साक्षात्कार के प्रसारण आज रतिहा आठ बजके पंद्रह मिनट म करे जाही। ए कारीकरम ल छत्तीसगढ़ स्थित आकाशवाणी के सबो केंद्र रिले करही।
गांजा-बरामद
सक्ति जिला के फगुरम चैकी पुलिस ह आज दू कुंटल ले जादा गांजा के संग दू आरोपी मन ल गिरफ्तार करे हे। जब्त गांजा के कीमत करीब एक करोड़ पैंतालीस लाख रूपिया बताय जात हे।
जिला के पुलिस अधीक्षक प्रफुल्ल ठाकुर ह बतइन कि मुखबिर ले मिले सूचना के आधार म पुलिस ह नाकाबंदी करके गाड़ी के जांच करीन। ए दउरान पुलिस ह ओडिसा ले राजस्थान ले जावत गांजा ल एक ट्रेलर ले बरामद करीन। आरोपी मनके खिलाफ एनडीपीएस एक्ट के तहत मामला दर्ज करे गेहे।
एसीबी-कार्रवाई
एंटी करप्शन ब्यूरो-एसीबी के टीम ह काली प्रदेस के टीम आने-आने जिला म दबिस देके भ्रष्टाचार के मामला म तीन लोगन मन ल गिरफ्तार करे हे। एसीबी के टीम ह काली भिलाई नगर निगम ले सेवा निवृत्त चीफ इंजीनियर ल भ्रष्टाचार के एक मामला म हिरासत म लीन।
एखर अलावा धमतरी म विद्युत यांत्रिकी विभाग म पदस्थ प्रोगेसमेंन ल एक लाख रूपिया के रिस्वत लेवत रंगेहाथ गिरफ्तार करीन।
उहें, एसीबी ह जशपुर नगर म आर.ई.एस. विभाग के एसडीओ ल घलो पच्चीस हजार के रिस्वत लेवत रंगेहाथ गिरफ्तार करे हे।
मुख्यमंत्री-गरियाबंद
मुख्यमंत्री विष्णुदेव साय ह काली गरियाबंद जिला ल छै सौ तीन करोड़ छियालीस लाख रूपिया ले जादा के विकास काम के सौगात दीन। पुलिस परेड ग्राउंड म आयोजित कारीकरम म मुख्यमंत्री ह छिहत्तर विकास काम के लोकार्पण भूमिपूजन अउ सिलन्यास करीन। एमा सड़क, सिंचई, स्वास्थ्य, शिक्षा, पानी अउ बिजली ले जुड़े काम सामिल हे।
रानी लक्ष्मी बाई-बलिदान दिवस
वीरांगना रानी लक्ष्मी बाई के बलिदान दिवस म राज्यपाल रमेन डेका ह आज लोकभवन म उंखर चित्र म फूल चढ़ाके ओमन ल नमन करीन। ए अवसर म लोकसभा अध्यक्ष ओम बिरला, केंद्रीय राज्य मंत्री तोखन साहू अउ सांसद बृजमोहन अग्रवाल के संग लोकभवन के आने अधिकारी, कर्मचारी मन ह घलो रानी लक्ष्मी बाई ल श्रध्दांजलि दीन।
कोरिया-हत्याकांड
कोरिया जिला के कलेक्टर रोक्तिमा यादव ह एक आदेस जारी करके महलपारा बैकुंठपुर, नौगई के संग भाजपा नेता भरत सिंह गहरवार के कटगोड़ी स्थित क्रेशर प्लांट एरिया के तीन सौ मीटर दायरा म धारा-एक सौ तिरसठ लागू कर देहे। जारी आदेस के अनुसार कोनो भी प्रकार के हथियार अउ विस्फोटक समान पाय जाय म कड़ा कारवाई करे जाही। एखर अलावा ए क्षेत्र म जुलूस, धरना-प्रदर्सन अउ आमसभा म प्र्रतिबंध लगाय गेहे। जिला दंडाधिकारी ह स्पष्ट करे हे कि ए आदेस ओ शासकीय अधिकारी-कर्मचारी उपर लागू नइ होही, जेन मन ह अपन शासकीय दायित्व के निर्वहन बर लाठी या शस्त्र राखे के जरूरत होथे। पुलिस अउ प्रशासनिक अधिकारी मन ल ए संवेदनसील क्षेत्र म लगातार निगरानी राखे अउ कोनो भी अप्रिय स्थिति ले निपटे के निरदेस दे गेहे।
जानबा के मुताबिक कोरिया जिला के कटगोड़ी गांव म भाजपा नेता के संग तीन लोगन के मउत के मामला म पुलिस ह चार लोगन मन ल गिरफ्तार करे हे।
अरूण साव-लोरमी
लोरमी म आयोजित महाराणा प्रताप जयंती समारोह म उपमुख्यमंत्री अरूण साव ह किहीन कि महाराणा प्रताप के जीवन साहस, स्वाभिमान अउ राष्ट्र भक्ति के अमर मिसाल हे।
पीएम सेतु योजना
पीएम सेतु योजना के तहत प्रदेस के शासकीय औद्योगिक प्रसिक्षण संस्थान-आईटीआई ल आधुनिक अउ उद्योग के लायक बनाय जात हे। योजना के तहत छात्र मन ल आर्टिफिसियल इंटेलीजेंस-एआई अउ ड्रोन जइसन नवा तकनीक के प्रसिक्षण दे जाही। संगेसंग पुराना मसीन के जघा म आधुनिक उपकरण, डिजीटल कंटेट अउ स्मार्ट क्लास रूम के सुविधा उपलब्ध कराय जाही। मुख्य सचिव विकासशील के अध्यक्षता म मंत्रालय म आयोजित राज्य स्तरीय स्टीयरिंग समिति के बइठका म पीएम सेतु योजना के प्रगति के समीक्षा करे गीस।
ईस्टर्न स्लैम
राजधानी रईपुर म पहिली बार ईस्टर्न स्लैम के आयोजन करे जाही। एखर तहत बाईस ले सत्ताईस जून तक बूढ़ापारा स्थित स्क्वैश कॉम्प्लेक्स म प्रतियोगिता आयोजित करे जाही। एमा सिंगापुर के संग भारत के इक्कीस राज्य ले लगभग साढ़े तीन सौ जूनियर अउ सीनियर खिलाड़ी भाग लिही। प्रतियोगिता बर दू हजार अमेरिकी डॉलर के पुरस्कार रासि निर्धारित करे गेहे।
उपमुख्यमंत्री-खेल प्रशिक्षण केंद्र
उपमुख्यमंत्री अउ खेल मंत्री अरूण साव ह बिलासपुर के बहतराई राज्य खेल प्रसिक्षण के निरीक्षण करीन। ए दउरान ओमन ह निर्माण काम के प्रगति उपर नराजगी जतइन। ओमन ह किहीन कि खिलाड़ी मन ल अच्छा सुविधा उपलब्ध कराना सरकार के प्राथमिकता हे अउ एमा कोनो भी प्रकार के लापरवाही स्वीकार नइ करे जाही। मुख्यमंत्री ह संबंधित विभाग ल सबो काम म तेजी लाय अउ पंद्रह दिन के अंदर प्रगति रिपोर्ट प्रस्तुत करे के निरदेस दीन।