सीरो सर्विलेंस-अंतरिम रिपोर्ट
प्रदेस के रईपुर, दुगरू अउ राजनांदगांव जिला म सीरो सर्विलेंस के आखिरी रिपोर्ट आई.सी.एम.आर. ह जारी कर देहे। आखिरी रिपोर्ट के अनुसार राजनांदगांव के तीन दशमलव सात छह प्रतिसत, दुरूग के आठ दशमलव तीन एक प्रतिसत अउ रईपुर के तेरह दशमलव के चार एक प्रतिशत मनखे के सरीर म कोरोना संक्रमण ले लड़े के एंटीबाॅडीज पाय गेहे।
सीरो सर्विलेंस के दउरान दुरूग जिला के मनखे मनके उच्च जोखिम वाले वर्ग के पांच सौ सत्रह, राजनांदगांव म पांच सौ चार अउ रईपुर म चार सौ बयानवे नमूना इकट्ठा करे गे रिहीस। ए नमूना म ले आठ दशमलव पांच प्रतिसत माने एक सौ अट्ठाईस नमूना म एंटीबाॅडीज पाय गेहे। आई.सी.एम.आर. डहार ले प्रदेस के दस जिला म करे गे सीरो सर्विलेंस के पूरा रिपोर्ट अउ निष्कर्ष अवइया पन्द्रह दिन म जारी करे जाही।
महात्मा गांधी जन्मशताब्दी-कार्यक्रम
राष्ट्रपिता महात्मा गांधी के जन्मशताब्दी बछर के समापन अवसर म प्रदेस के सबो ग्राम, जनपद अउ जिला पंचायत मन म कारीकरम आयोजित करे जाही। कोरोना संक्रमण ले बचे के उपाय अउ प्रोटोकाॅल के पालन के संग अवइया दू अक्टूबर के सबो त्रिस्तरीय पंचायत राज संस्था मनके कार्यालय मन म ए कारीकरम होही।
राज्य सासन ए संबंध म सबो जिला पंचायत मनके मुख्य कार्यपालन अधिकारी मन ल परिपत्र जारी करे हे। पंचायत विभाग के प्रमुख सचिव ह जारी परिपत्र म कहिन कि दू अक्टूबर दू हजार उन्नीस के राष्ट्रपिता महात्मा गांधी के जनम के एक सौ पचासवां वर्षगांठ के उपलक्ष्य म राज्य सासन डहार ले बछर भर आने-आने कारीकरम के आयोजन के निर्णय ले गे रिहीस। साल भर चलइया ए समारोह के समापन अवइया दू अक्टूबर के होही। स्थानीय निकाय मनके प्रतिनिधि अउ ग्रामीण मन डहार ले ग्राम, जनपद अउ जिला पंचायत मन म गांधी जन्म शताब्दी बछर के समापन अवसर म दू अक्टूबर के गांधी जी के मूर्ति या छायाचित्र म फूल-माला चढ़ाके उंखर भजन के गान अउ उंखर विचार उपर गोठबात करे जाही।
गिरदावरी कार्य
प्रदेस के आने-आने जिला मन म चालू खरीफ विपणन बछर बर फसल मनके गिरदावारी के काम करे जात हे। गिरदावरी फसल पंजीयन करे के मामला म जशपुर जिला पूरा प्रदेस म अव्वल हवय।
उहें, महासमुंद जिला म घलो खरीफ फसल गिरदावरी के काम पूरा कर ले गेहे अउ भूईंया साॅफ्टवेयर म फसलवार के संगेसंग कृषकवार फसल के प्रविष्टि घलो करे गेहे।
खबर के मुताबिक भूईंया साॅफ्टवेयर म फसल मनके वास्तविक जानकारी आॅनलाइन प्रविष्टि करे जाथे। एखर तहत ग्राम पंचायत मन म किसान मन ले दावा-आपत्ति करे के आखिरी तारीख अट्ठाईस सितंबर राखे गेहे। दावा आपत्ति मनके निराकरण सत्ताईस अक्टूबर तक करे जाही।
मन की बात
प्रधानमंत्री नरेन्द्र मोदी ह काली बिहनिया ग्यारह बजे आकाशवाणी ले ‘‘मन की बात‘‘ कारीकरम म अपन बिचार साझा करही। ए ह मासिक रेडियो कारीकरम के उनहत्तरवां कड़ी होही। एखर प्रसारण आकाशवाणी अउ दूरदर्शन के जम्मों नेटवर्क ले करे जाही। अउ ए ह वेबसाइट न्यूज आॅन एआईआर डाॅट अउ न्यूज आॅन एआईआर मोबाइल ऐप म घलो उपलब्ध होही। ए आकाशवाणी, डीडी न्यूज, प्रधानमंत्री कार्यालय, सूचना अउ प्रसारण मंत्रालय के यूट्यूब चैनल मन म घलो सीधा प्रसारित होही।
हिन्दी प्रसारण के तुरते बाद एखर क्षेत्रीय भासा मन प्रसारण करे जाही। क्षेत्रीय भासा मन म ‘‘मन की बात‘‘ कारीकरम रतिहा आठ बजे दुबारा सुने जा सकही।
पर्यटन मंत्री-विशेष भेंटवार्ता
विश्व पर्यटन दिवस म छत्तीसगढ़ के गृह, लोक निर्माण अउ पर्यटन मंत्री ताम्रध्वज साहू के विशेष भेंटवार्ता काली आकाशवाणी केन्द्र रायपुर ले बिहनिया साढ़े दस बजे प्रसारित करे जाही। एला छत्तीसगढ़ स्थित आकशवाणी के जम्मों केन्द्र रिले करही। ए कारीकरम मीडियम वेव नौ सौ इक्यासी किलोहटर््स म प्रसारित करे जाही।
पढ़ई तुहंर दुआर
स्कूल शिक्षा विभाग के प्रमुख सचिव डाॅक्टर आलोक शुक्ला ह सुकमा जिला के स्कूल मन म अउ उहां संचालित ‘‘पढ़ई तुहंर दुआर‘‘ कारीकरम के क्रियान्वयन के जानकारी लीन। ओमन ह जिला के आने-आने गांव मन म चलत मोहल्ला क्लास के संगेसंग उत्कृष्ट अंग्रेजी माध्यम स्कूल के घलो निरीक्षण करीन।
डाॅक्टर शुक्ला ह मोहल्ला क्लास के निरीक्षण के दउरान सिक्षक, सिक्षिका अउ विद्यार्थी मन ले गोठबात करके पढ़ई तुंहर कारीकरम के जानकारी लीन।
पुलिस अधिकारी-दौरा
माओवादी मनके खिलाफ जारी अभियान के समीक्षा बर विशेष महानिदेशक नक्सल आॅपरेसन अशोक जूनेजा, बस्तर आई.जी. सुंदरराज पी. अउ सीआरपीएफ के महानिरीक्षक प्रकाश ह बीजापुर जिला के दउरा करीन। ए दउरान ओमन ह बीजापुर म पुलिस अधीक्षक अउ सुरक्षा बल के अधिकारी मनके बइठका लेके माओवादी विरोधी अभियान के समीक्षा करीन। एखर बाद श्री जूनेजा ह अधिकारी मनके संग पामेड़ क्षेत्र के दउरा करीन। संगेसंग पामेड़ थाना म पदस्थ सुरक्षा बल के अधिकारी अउ जवान मन ले भेंट करके गोठबात करीन। ए दउरान श्री जूनेजा ह सुरक्षा बल के अधिकारी अउ जवान मन ल माओवादी मनके खिलाफ अभियान तेज करके अउ संवेदनसील इलाका म सतर्कता राखे के निरदेस दीन।
होटल मैनेजमेंट-प्रवेश
पर्यटन विभाग के अधीन स्टेट इंस्टीट्यूट आॅफ होटल मैनेजमेंट, केटरिंग टेक्नोलाॅजी एंड एप्लाइड न्यूट्रीशन नवा रईपुर म बीएससी इन हाॅस्पिटे-लिटी एंड होटल एडमिनिस्टेªशन के तीन वर्षीय पाठ्यक्रम म प्रवेस बर आवेदन अवइया बारह अक्टूबर तक मंगाय गेहे। ए डिग्री कोर्स म प्रवेस बर न्यूनतम सैक्षणिक योग्यता बारहवीं पास होना जरूरी हे। उहें, डिप्लोमा कोर्स म प्रवेस बर अवइया एक अक्टूबर तक आॅनलाइन, आॅफलाइन आवेदन करे जा सकथे। ए बारे म अउ जादा जानकारी वेबसाइट म उपलब्ध हे।
जशपुर-स्वास्थ्य परीक्षण
जशपुर जिला के पत्थलगांव विकासखंड के दर्रापारा अउ इमलीपारा आंगनबाड़ी केन्द्र मन म किशोरी नोनी अउ माईलोगिन मनके निःसुल्क स्वास्थ्य परीक्षण करे गीस अउ ओमन ल पौष्टिक आहार के बारे म जनकारी दे गीस। उहें, जिला म राष्ट्रीय कृमि मुक्ति कारीकरम के तहत आंगनबाड़ी कार्यकर्ता अउ सहायिका मन डहार ले घर-घर जाके एक ले उन्नीस बछर तक के नोनी अउ बाबू मन ल कृमिनासक गोली एल्बेंडाजोल घलो खिलाय जात हे।
करंट-मौत
गरियाबंद जिला म करेंट के चपेट म आय ले तीन लोगन के मउत होगे। ए घटना पाडुंका थाना क्षेत्र के सरकड़ा गांव के हरय।
खबर के मुताबिक एके परिवार के तीन झिन लोगन खेत म दवाई छिड़के के काम करत रिहीस। इही दउरान ओमन करेंट के चपेट म आ गे। बताय गेहे कि विद्युत पंप के तार टूट के खेत म गिरे रिहीस, जेखर ले करेंट पूरा खेत म फइले गे अउ तीनों मनखे के मउका म ही मउत होगे।
गांजा-बरामद
महासमुुुंद जिला म पुलिस ह एक ठिन ट्रक ले करीबन आठ क्विंटल गांजा बरामद करे हे। जब्त गांजा के अनुमानित कीमत लगभग एक करोड़ बैसठ लाख रूपिया बताय गेहे।
खबर के मुताबिक कोमाखान थाना क्षेत्र म टेमरी नाका के तीर गाड़ी मनके चेकिंग करे जात रिहीस। इही दउरान ओड़िसा ले आवत एक ठिन ट्रक ले आठ क्विंटल ले जादा गांजा करे गीस। ए गांजा साग-भाजी के खाली कैरेट म लुका के राखे गे रिहीस। ए मामला म पुलिस ह दू झिन आरोपी मन ल गिरफ्तार करे हे। ए दूनों आरोपी राजस्थान के रहइया हरय।