प्रधानमंत्री दीनदयाल उपाध्याय जयंती
प्रधानमंत्री नरेंद्र मोदी ह कीहिन कि हाल ही म संसद म पारित कृषि विधेयक अउ श्रम कानून ले देश के किसान अउ कामगार मन ल बिना जरूरी कानून ले छुटकारा मिलही।
पंडित दीनदयाल उपाध्याय के जयंती के अवसर म आज प्रधानमंत्री ह भारतीय जनता पार्टी के कार्यकर्ता मन ल वीडियो कान्फ्रेसिंग के माध्यम ले संबोधित करीन। प्रधानमत्रंी ह विपक्षी दल मनके आलोचना करत कीहिन कि ओमन ह झूठ अउ भ्रष्टाचार के माध्यम ले देश के लोगन मन ल गलत जानकारी देत हे। प्रधानमंत्री ह कृषि विधेयक अउ सरकार के श्रम सुधार मनके बढ़ई करत कीहिन कि स्वतंत्रता के बाद सत्तारूढ़ ताकत मन ह सिरिफ झूठा वादा करके किसान अउ कामगार मन ले राजनीतिक लाभ लेके परयास करे हे।
प्रधानमंत्री ह कहिन कि राजनीतिक स्वार्थ, अर्थव्यवस्था अउ आने क्षेत्र मन म पंडित दीनदयाल उपाध्याय के विचार अउ शिक्षा अवइया पीढ़ी ल पे्ररित करत रीही।
गोधन न्याय योजना
गोधन न्याय योजना के अंतर्गत आज प्रदेश के लगभग चैरासी हजार पशुपालक अउ गोबर बेचइया मन ल चैथा किश्त के रूप म आठ करोड़ दू लाख रूपिया के राशि के आॅनलाईन भुगतान सीधा उंखर बैंक खाता मन म करे गीस।
मुख्यमंत्री भूपेश बघेल ह वीडियो कॅान्फे्रसिंग के माध्यम ले हितग्राही मनके बैंक खाता म ये राशि जमा करीन। चैथा किश्त के ये राशि एक सितंबर ले पंद्रा सितंबर तक राज्य के तीन हजार एक सौ बाईस गौठान मन म खरीदे गे लगभग चार लाख कुंटल गोबर के खरीदी के बदला म दे गीस। ए योजना के अंतर्गत अब तक बीस करोड़ बहत्तर लाख रूपिया के भुगतान करे जा चुके हे।
कोरोना समाचार/लाॅकडाउन
प्रदेश म कोरोना संक्रमण के मामला सरलग बाढ़त हे। राज्य म कोरोना संक्रमित मरीज मनके संख्या पंचानवे हजार ले जादा होगे हे। एमा दस हजार ले जादा मरीज रायपुर जिला के हे। प्रदेश म काली दू हजार दू सौ बहत्तर मरीज मनके पुष्टि करे गीस। उंहें प्रदेश म अब तक सात सौ बावन मरीज के मउत कोरोना ले हो चुके हे। आज घलो प्रदेश के आने आने जिला मन म कोरोना के नवा मरीज मिले हे।
जांजगीर चंापा के पामगढ़ थाना म पदस्थ तीन एएसआई समेत छै झिन पुलिसकर्मी के कोरोना जांच रिपोर्ट पाॅजीटिव आय हे ।
ओति कोंडागांव जिला के केशकाल म पंद्रा नवा कोरोना पाॅजीटिव मरीज मनके पहिचान करे गेहे।
दूसर डहार कोरोना संक्रमण के रोकथाम बर कतकोन जिला मन म लाॅकडाउन लगाय गेहे। महासमुंद जिला के बसना म लाॅकडाउन के उल्लघंन करे म सात ठिन दुकान मन ल सील कर दे गीस। इही जिला म बिना मास्क पहिने घुमत पाय गे उनतीस लोगन मन उपर चालानी कार्रवाई करे गीस।
जांजगीर – चंापा जिला के शहरी क्षेत्र अउ सैंतीस गांव मन म लाॅकडाउन लागू हे। जेला कलेक्टर ह आज शहर म स्थिति के जायजा लीन अउ बिना काम के घुमइया लोगन मनके खिलाफ कार्रवाई के निर्देश दीन। इही बीच बिलासपुर म समाजसेवी अउ व्यावसायी मन डहार ले जिला कलेक्टर ल सतरा आॅक्सीजन सिलेण्डर भेंट करे गीस।
कोरोना जांच
प्रदेश म कोरोना ले संक्रमित लोगन मनके संख्या सरलग बाढ़त हे। संगेसंग राज्य म बड़ संख्या म कोरोना संक्रमण के जांच कराये जात हे। अस्पताल अउ प्राथमिक स्वास्थ्य केंद्र मनके अलावा मोबाइल टीम घलो कोरोना जांच म जुटे हे।
छत्तीसगढ़ म कोरोना संक्रमण मरीज मनके पहिचान बर अभी के बेरा म आठ सौ बत्तीस केंद्र मन म रैपिड एंटीजन किट ले कोरोना के जांच करे जात हे। एमा ले पांच सौ उनतालिस केंद्र ग्रामीण क्षेत्र म हे। उंहें छत्तीस केंद्र शहरी क्षेत्र म बनाय गेहे। जांच के सुविधा शासकीय मेडिकल काॅलेज, जिला अस्पताल, सिविल अस्पताल, शहरी अउ ग्रामीण प्राथमिक स्वास्थ्य केंद्र अउ सामुदायिक स्वास्थ्य केंद्र मन म उपलब्ध कराय गेहे। एखर अलावा मोबाइल टीम मन द्वारा घलो कोरोना के जांच कराय जात हे। प्रदेश म अब तक लगभग दस लाख नमूना के जांच करे जा चुके हे।
मेडिकल आॅक्सीजन
प्रदेश म संचालित अस्पताल मन म मेडिकल आॅक्सीजन के सुलभ वितरण अउ परिवहन सुनिश्चित करे बर राज्य स्तरीय मेडिकल आॅक्सीजन कंट्रोल कक्ष बनाय गेहे। एखर ले कोविड मरीज ल आसानी ले आॅक्सीजन मिल सकही।
स्वास्थ्य विभाग के विशेष सचिव सी.आर. प्रसन्ना ह एखर बारे म आदेश जारी करीन। जिला स्तर म घलो मेडिकल आॅक्सीजन कंट्रोल कक्ष बनाय जात हे।
शासकीय बैठक-दिशा निर्देश
कोरोना संक्रमण ल देखत राज्य सरकार ह शासकीय बइठका, वीडियो कॅान्फे्रसिंग अउ वर्चुअल बैठक म सीमित संख्या म उपस्थिति सुनिश्चित करे के दिशा निर्देश जारी करे हे।
सामान्य प्रशासन विभाग ह सबो विभाग मनके सचिव, संभागीय कमिश्नर, विभागाध्यक्ष, अउ कलेक्टर मन ल ए संबंध म चिट्ठी भेजके स्पष्ट करे हे कि शासन के संज्ञान म ये बात आय हे कि कोरोना काल के बेरा घलो शासकीय बइठका अउ वीडियो काॅन्फ्रेसिंग म अनाधिकृत लोगन मन घलो शामिल होत हे। अब ये स्पष्ट निर्देशित करे जात हे कि शासकीय बइठका अउ वीडियो कॅान्फ्रेसिंग म सिरिफ अधिकृत लोगन मनके ही उपस्थित सुनिश्चित करे जाय ।
मनरेगा-रोजगार
मुख्यमंत्री भूपेश बघेल ह कीहिन कि महात्मा गांधी राष्ट्रीय ग्रामीण रोजगार गारंटी योजना – मनरेगा के अंतर्गत ग्रामीण परिवार मन ल बछर म जादा ले जादा रोजगार दे जाही। एखर बर कार्ययोजना बनाये बर मुख्य सचिव के अध्यक्षता म समिति गठित करे गेहे। समिति ल पंद्रा दिन के भीतर ग्रामीण मन ल ए साल म जादा ले जादा रोजगार देके कार्ययोजना तियार करे बर केहे गेहे।
मुख्यमंत्री ह कीहिन कि मनरेगा के अंतर्गत हर ग्रामीण परिवार ल वित्तीय वर्ष म सौ दिन के रोजगार देके गारंटी दे गेहे। छत्तीसगढ़ म एखर अलावा घलो पचास दिन के रोजगार दे जात हे।
गौरेला-पेण्ड्रा-मरवाही/नगर पालिका
प्रदेश के नवा जिला गौरेला-पेण्ड्रा-मरवाही के नगर पंचायत गौरेला अउ पेण्ड्रा ल नगर पालिका के दर्जा दे जाही। जिला के प्रभारी मंत्री जयसिंह अग्रवाल ह गौरेला अउ पेण्ड्रा के भ्रमण करे के बेरा इंहा के लोगन मन ल एखर जानकारी दीन।
श्री अग्रवाल ह बताइन कि मुख्यमंत्री भूपेश बघेल ह जनभावना ल देखत गौरेला अउ पेण्ड्रा नगर पंचायत ल नगर पालिका के दर्जा देके घोषणा करे हे।
माओावादी गिरप्तार/आईजी दौरा
बीजापुर जिला म सुरक्षा बल मन गश्त के बेरा माओवादी संगठन के एक झिन डॅाक्टर ल गिरप्तार करे हे। सीआरपीएफ के एक सौ अड़सठवंा बटालियन अउ कोबरा जवान मनके टीम ह बासागुड़ा थाना क्षेत्र के चिरपुरभट्ठी अउ कुसपाका डहार सर्चिंग म निकले रीहिन इही बेरा माओवादी संगठन के एक झिन डॅाक्टर ल पकड़ लीस।
इही बीच बस्तर आईजी सुंदरराज पी. ह बीजापुर अउ बासागुड़ा क्षेत्र के दौरा करीन। इही बेरा ओमन सीआरपीएफ, कोबरा बटालियन, एसटीएफ, सहित पुलिस के अधिकारी मनके बइठका लीन।
हाथी उत्पात
जशपुर जिला म आज हाथी के हमला ले दू झिन ग्रामीण मनके मउत होगे। मिले जानकारी के अनुसार ये घटना पत्थलगांव के टपकरा वन परिक्षेत्र के गांव दाईजबहार के हरे। घटना के बाद क्षेत्र म वन विभाग ह लोगन मन ल हाथी मनले सतर्क रेहे बर केहे हे।
उंहें महासमुंद जिला के बरोंडा बजार – साराडीह रद्दा म घलो हाथी के हमला ले दू झिन युवक घायल होगे। घायल मन ल इलाज बर अस्पताल म भर्ती कराय गेहे।
निलंबन कार्रवाई
कोरिया जिला म जल संसाधन विभाग के कार्यपालन अभियंता अउ अनुविभागीय अधिकारी ल तत्काल प्रभाव ले निलंबित कर दे गेहे। ए कार्रवाई जिला के खाड़ा जलाशय के टूटे के मामला म करे गेहे। खाड़ा जलाशय के टूटे के सेती तीन गांव के किसान मनके करीबन पचास हेक्टेयर रकबा के फसल ल नुकसान पहुंचे हे।
जल संसाधन मंत्री रविंद्र चैबे ह ये मामला ल गंभीरता ले लेत एखर बर दोषी अधिकारी मनके खिलाफ सख्त कार्रवाई के निर्देश दे रीहिन।