स्कूल-शाला प्रवेश उत्सव
नवा सैक्षणिक सत्र के सुरूआत होय के संगेसंग आज ले प्रदेस के जम्मों सरकारी अउ प्राईवेट स्कूल मन खुल गेहे। आज ले स्कूल मन म शाला प्रवेश उत्सव घलो मनाय जावत हे, जउन सत्ताईस जून तक चलही। शाला प्रवेश उत्सव के दउरान स्कूल पहुंचइया नवा लइका मनके टीका लगाके स्वागत करे गीस। उहें, विद्यार्थी मन ल निःशुल्क पाठ्यपुस्तक, यूनिफॉर्म अउ साइकिल घलो बांटे जावत हे।
नवा सिक्षा सत्र के सुरूआत ले पहिली काली परिवहन विभाग, यातायात पुलिस, स्वास्थ्य विभाग अउ जिला सेनानी कार्यालय के सामलात टीम ह स्कूल बस मनके जांच करीन। ए दउरान स्कूल बस के सुरक्षा मानक, दस्तावेज अउ कर्मचारी मनके स्वास्थ्य के परीक्षण करे गीस। निरीक्षण के दउरान अनुपस्थित पाए गे पैंतालीस स्कूल बस संचालक मन ल कारण बताओ नोटिस जारी करे गीस।
राज्यपाल-समर्थ भारत कॉन्क्लेव
राज्यपाल रमेन डेका ह आज डॉक्टर सी.वी. रमन विश्वविद्यालय बिलासपुर अउ आईसेक्ट इंडिया ग्रुप संग राखे गे दू दिवसीय समर्थ भारत कॉन्क्लेव के सुभारंभ करीन। ए मउका म राज्यपाल ह कहिन कि एआई आधुनिक युग के एक बिसेस तकनीक हरय, जउन चिकित्सा, कृषि, अर्थव्यवस्था अउ सिक्षा समेत आने-आने क्षेत्र म मानव के सहायक बन सकत हे। फेर, ए ह मानव बुद्धि, संवेदनशीलता अउ नैतिक मूल्य के स्थान नइ ले सकय। ओमन युवा मन ले आह्वान करीन कि ओमन एआई अउ आने-आने तकनीक के उपयोग नवाचार अउ समाज के हित म काम करयं।
ए मउका म राज्यपाल ह एआई कौशल रथ ल हरियर झंडा देखाके रवाना करीन। ए रथ प्रदेस के आने-आने क्षेत्र म जाके विद्यार्थी, सिक्षक अउ आम लोगन मन ल एआई के उपयोगिता, संभावना अउ रोजगार के मउका के जानकारी दीहीं।
ग्राम सभा
प्रदेस के जम्मों ग्राम पंचायत मन म चौबीस जून के ग्राम सभा के आयोजन करे जाही। ग्राम सभा म ‘‘आवास प्लस टू प्वाइंट ओ‘‘ के स्थायी प्रतीक्षा सूची समेत आने-आने बिसय उपर चर्चा करे जाही। एखर संगेसंग विकसित भारत – रोजगार अउ आजीविका मिशन ग्रामीण – वीबी जी राम जी के बारे म घलो लोगन मन ल जानकारी दे जाही। ग्राम सभा म पाछु बइठका म पारित प्रस्ताव के समीक्षा, पंचायत के आय-व्यय के अनुमोदन, आने-आने विकास काम के प्रगति अउ पंचायत संपत्ति के प्रबंधन जइसन विषय म घलो गोठबात करे जाही।
यूपीएससी-परिणाम
संघ लोक सेवा आयोग-यूपीएससी ह ए बछर के सिविल सेवा प्रारंभिक परीक्षा के रिजल्ट घोसित कर देहे। आयोग ह बतईन कि एक हजार ले जादा पद मन बर तेरह हजार ले जादा उम्मीवार मनके सिविल सेवा मुख्य परीक्षा बर चुनई होय हे। यूपीएससी ह उम्मीदवार मन ल यहू बतईन कि उंखर नंबर, कट ऑफ अंक अउ उत्तर सूची, आखिरी रिजल्ट घोषित होय के बाद आयोग के वेबसाइट म अपलोड करे जाही। उम्मीदवार यूपीएससी के आधिकारिक वेबसाइट ‘‘यूपीएससी डॉट जीओवी डॉट इन‘‘ म प्रारंभिक परीक्षा परिणाम ल डाउनलोड कर सकत हे।
एनडीए सरकार-बारह वर्ष
प्रधानमंत्री नरेन्द्र मोदी के अगुवई म केन्द्र म एनडीए सरकार के बारह बछर पूरा होय म भारतीय जनता पार्टी डहार ले प्रदेस के आने-आने जिला म पत्रकारवार्ता आयोजित करे जावत हे। इही कड़ी म रायपुर म पत्रकार मन ले गोठबात करत भाजपा के प्रदेस मंत्री अमित साहू ह कहिन कि प्रधानमंत्री नरेन्द्र मोदी के हर एक दिन राष्ट्र प्रथम अउ गरीब कल्याण ल समर्पित रेहे हे। उहें, पूर्व नेता प्रतिपक्ष नारायण चंदेल ह मुंगेली म राखे गे पत्रकारवार्ता म कहिन कि मोदी सरकार के बारह बछर विकास, विश्वास अउ जनकल्याण के ऐतिहासिक यात्रा के प्रतीक हरय।
ओति, खैरागढ़ जिला भाजपा कार्यालय म राखे गे पत्रकारवार्ता ल संबोधित करत प्रदेस भाजपा प्रवक्ता अमित चिमनानी ह प्रधानमंत्री नरेन्द्र मोदी के अगुवई म केन्द्र सरकार के बारह बछर के उपलब्धि, जनकल्याणकारी, योजना अउ भारत के विकास यात्रा के बारे जानकारी दीन।
मत्स्याखेट-प्रतिबंध
वर्षा ऋतु म मछली मनके प्रजनन ल देखत राज्य सरकार ह आज ले मछली पकड़े म रोक लगा देहे। ए रोक पन्द्रह अगस्त तक रइही। ए दउरान नदिया-नरवा अउ तरिया मन म मछली पकड़े म रोक रइही। छोटे तरिया अउ अउ जल-स्त्रोत जिखर संपर्क कोनों भी नदी-नरवा ले नइ हे, उहां ए रोक नइ राहय। एखर संगेसंग बड़े जलाशय म व्यावसायिक रूप ले संचालित करइया केज कल्चर गतिविधि मन ल घलो ए प्रतिबंध ले बाहिर राखे गेहे। छत्तीसगढ़ मत्स्य क्षेत्र अधिनियम के तहत कोनों भी मनखे या संस्था प्रतिबंध के उल्लंघन करत पाए जाही, त उंखर मन उपर पच्चीस हजार रूपिया तक के जुर्माना लगाय जाही।
अंतर्राष्ट्रीय योग दिवस
अवइया इक्कीस जून के मनाय जाने वाला बारहवां अंतर्राष्ट्रीय योग दिवस के तैयारी के बारे म राज्य के मुख्य सचिव विकासशील ह आज मंत्रालय म बइठका लीन। ए समीक्षा बइठका म आने-आने विभाग के बड़का अधिकारी मन सामिल होइन। अधिकारी मन बतईन कि ए बछर अंतर्राष्ट्रीय योग दिवस के मउका म राज्य स्तरीय मुख्य कार्यक्रम सरगुजा जिला राखे जाही। उहें, राज्य के हरेक ग्राम पंचायत के प्रमुख जघा मन म योगाभ्यास के कार्यक्रम राखे के जम्मों जिला अधिकारी मन ल निरदेस दे गेहे। मुख्य सचिव ह अधिकारी मन केहे हे कि इक्कीस जून के नीट पुनर्परीक्षा राखे गेहे। एला ध्यान म राखत ए सुनिश्चित करे जाय कि योग दिवस आयोजन के सेती नीट परीक्षा केन्द्र अउ परीक्षार्थी मन ल कोनों किसम के असुविधा झन होवय। ए बछर योग दिवस के थीम ‘‘स्वस्थ आयु के लिए योग‘‘ निर्धारित करे गेहे।
अरूण साव-लोरमी
लोरमी विधानसभा क्षेत्र म उपमुख्यमंत्री अरूण साव ह पांच गांव म जनचौपाल लगाके गांव वाले मन ले गोठबात करीन। ओमन विकास काम अउ सरकारी योजना मनके जानकारी लीन। ए दउरान आने-आने गांव बर लाखों रूपिया के विकास काम के घोषणा करीन अउ युवा खिलाड़ी मन ल क्रिकेट किट घलो दीन।
कांग्रेस-बिजली दर विरोध
छत्तीसगढ़ राज्य विद्युत नियामक आयोग डहार ले बिजली के दर म करे गे बढ़ोतरी के प्रदेस कांग्रेस डहार ले विरोध करे जावत हे। प्रदेस कांग्रेस अध्यक्ष दीपक बैज ह आज रायपुर म पत्रकार मन ले गोठबात करत कहिन कि बिजली के दाम म करे गे बढ़ोतरी अउ स्मार्ट मीटर वापिस ल लेके कांग्रेस ह आंदोलन करही। ओमन कहिन कि काली सत्रह जून के प्रदेस के सबो जिला के बिजली आफिस के घेराव करे जाही। उहें, अट्ठारह जून के कांग्रेस ह जम्मों जिला म पत्रकारवार्ता करके बिजली के दाम म होय बढ़ोतरी के विरोध करही। श्री बैज ह बतईन कि जुलाई के पहिली हफ्ता म कांग्रेस कार्यकर्ता मन ह स्मार्ट मीटर के खिलाफ घर-घर ले आवेदन भरवा के स्मार्ट मीटर हटाय के मांग करही। खबर के मुताबिक राज्य सरकार ह घरेलू उपभोक्ता मनके बिजली बिल म हरेक यूनिट पाछु तीस ले पचास पइसा अउ गैर घरेलू बिजली दर म बीस ले चालीस पइसा प्रति यूनिट के बढ़ोतरी करे हे।
रविशंकर शुक्ल विवि-प्रवेश प्रक्रिया
पंडित रविशंकर शुक्ल विश्वविद्यालय के जुड़े सबो सरकारी अउ प्राईवेट कॉलेज मन म स्नातक अउ स्नातकोत्तर पहिली सेमेस्टर म प्रवेस के प्रक्रिया आज ले सुरू होगे हे। प्रवेस प्रक्रिया तीन चरण म होही। विद्यार्थी मन ल पंडित रविशंकर शुक्ल विश्वविद्यालय के ऑनलाइन पोर्टल म आवेदन करना होही।
एसीबी-कार्रवाई
सक्ती जिला म एसीबी बिलासपुर के टीम ह रिश्वत लेवत सक्ती जनपद पंचायत के सीईओ निखिल कश्यप, बाबू अविनाश ठाकुर अउ चपरासी लच्छन भानु ल गिरफ्तार करे हे। आरोपी मन उपर एक लाख रूपिया के रिश्वत लेके आरोप हवय। बताय गेहे कि प्रधानमंत्री आदर्श ग्राम योजना के तहत लिमतरा पंचायत के निर्माण काम के चेक जारी के एवज म रिश्वत मांगे रिहीस। एसीबी ह तीनों झन के खिलाफ भ्रष्टाचार निवारण अधिनियम के तहत कार्रवाई सुरू कर देहे।