विधानसभा मानसून सत्र
छत्तीसगढ़ विधानसभा के मानसून सत्र तेरह जुलाई ले सुरू होही। विधानसभा सचिव दिनेश शर्मा ह ए बारे म अधिसूचना जारी कर देहे। सत्रह जुलाई तक चलइया ए सत्र म कुल 5 बइठका होही। सत्र के दउरान वित्तीय कामकाज के संगेसंग आने सरकारी काम पूरा करे जाही।
पश्चिम एशिया-समझौता
भारत ह पश्चिम एशिया म चलत संघर्ष ल खतम करे बर अमेरिका अउ ईरान के बीच होय समझौता के सुवागत करे हे। ए संघर्ष ले विश्व भर म गंभीर आर्थिक संकट खड़े होगे रिहीस। सोसल मीडिया पोस्ट म प्रधानमंत्री ह किहीन कि ए समझौता ले क्षेत्र म सांति अउ स्थिरता बहाल होही।
प्रधानमंत्री-बारह साल
प्रधानमंत्री नरेंद्र मोदी ह किहीन हे कि देस के मध्यम वर्ग ह राष्ट्र निर्माण म बड़का योगदान देहे। सोसल मीडिया पोस्ट म प्रधानमंत्री ह किहीन कि पाछू एक दसक म सरकार ह आम लोगन मनके जिनगी ल सुधारे बर बढ़िया बुनियादी ढांचा, कम खर्चा म स्वास्थ्य सेवा, बने ढंग ले पढ़ई-लिखई, साफ-सफाई वाले सहर के संगेसंग सार्वजनिक सेवा मन उपर धियान दे हवय।
बिजली दर-बढ़ोत्तरी
छत्तीसगढ़ राज्य विद्युत विनियामक आयोग ह घरेलू उपभोक्ता के बिजली दर म तीस पइसा प्रति यूनिट ले पचास पइसा प्रति यूनिट के बढ़ोत्तरी करे हे। अइसने बिजली दर म छै दसमलव दू-तीन प्रतिसत के औसत बढ़ोत्तरी करे हे। उहें, गैर घरेलू उपभोक्ता के बिजली दर म बीस पइसा ले चालीस पइसा प्रति यूनिट के बढ़ोत्तरी करे गेहे। कृषि पंप मन म बिजली के भाव म प्रति यूनिट चालीस पइसा के बढ़ोत्तरी करे गेहे। उहें, गैर सब्सिडी वाले कृषि पंप कनेक्सन ल उर्जा प्रभार म दे जाय छूट ल तीस प्रतिसत ले बढ़ाके चालीस प्रतिसत कर दे गेहे। बिजली के बाढ़े दर अवइया एक जुलाई ले प्रभावी होही।
स्कूल-संचालन
गर्मी के छुट्टी के बाद काली ले प्रदेस के जम्मो सरकारी अउ प्राइवेट स्कूल खुल जही। ए दउरान होवइया कारीकरम म शाला प्रवेस उत्सव बर स्कूल प्रबंधन ह पूरा तियारी कर लेहे। शाला प्रवेस उत्सव के दउरान स्कूल अवइया नवा लइका मन ल तिलक लगाके सुवागत करे जाही अउ संगेसंग छात्र मन ल पुस्तक, डेªस अउ साइकिल दे जाही। इही बीच, स्कूल शिक्षा विभाग ह प्रदेस के स्कूल मन म नवा शिक्षा सत्र ले राष्ट्रगान, राष्ट्रगीत अउ राज्यगीत के संगेसंग आने-आने गतिविधि ल जरूरी रूप ले कराय जाय के निरदेस जारी करे हे।
मुख्यमंत्री ह प्रदेस के जम्मो जन प्रतिनिधि मन ल चिट्ठी लिख के सोलह ले सत्ताईस जून तक होवइया शाला प्रवेस उत्सव म अपन भागीदारी देके आहवान करे हे। मुख्यमंत्री ह किहीन कि शिक्षा ह कोनो भी समाज अउ राष्ट्र के विकास के आधार हरय। ओमन मंत्री, सांसद, विधायक, जिला पंचायत अउ जनपद पंचायत अध्यक्ष, महापौर के संगेसंग नगरीय निकाय मन के जनप्रतिनिध मन ले विनती करीन कि अपन क्षेत्र के स्कूल म जाके ए अभियान म सहभागी बनय।
हाईकोर्ट सुनवाई
छत्तीसगढ़ उच्च न्यायालय के गर्मी के छुट्टी खतम होय के बाद आज ले खंडपीठ अउ एकल पीठ मन म सुनवई एक घांव फेर सुरू होगे। आज ले वकील मन ह अदालत कक्ष म आके अपन पक्ष राखिन। जानबा के मुताबिक हाईकोर्ट म गर्मी छुट्टी अट्ठारा मई ले सुरू होय रिहीस, ए दउरान सिरिफ जरूरी मामला मनके सुनवई बर हरेक हफ्ता बिसेस अवकाशकालीन पीठ बनाय गे रिहीस।
अभ्यारण्य-बंद
अवइया मानसून ल देखत आज ले छत्तीसगढ़ के जम्मो टाइगर रिजर्व, राष्ट्रीय उद्यान अउ वन्य जीव अभ्यारण्य मन ल पर्यटक मन बर बंद कर दे गेहे। ए जम्मो संरक्षित वन क्षेत्र अब एक अक्टूबर तक बंद रइही। वन विभाग के मुताबिक पर्यटक मन बर अब जंगल के दरवाजा दू अक्टूबर ले खोले जाही।
नीट-प्रवेस परीक्षा
राष्ट्रीय परीक्षा एजेंसी-एनटीए ह मेडिकल के स्नातक पाठ्यक्रम म दाखिला बर दुबारा होवत परीक्षा के प्रवेस पत्र जारी कर देहे। एला एनटीए के वेबसाइट नीट डॉट एनटीए डॉट एनआईसी डॉट इन ले डाउनलोड करे जा सकथे। परीक्षा इक्कीस जून के मंझनिया दू बजे ले सुरू होही।
सरकार-बस्तर विकास
पशु पालन ल बढ़ावा देबर राज्य सरकार ह बस्तर के हर परिवार ल दू-दू गाय या भैंस दिही। ए घोसना काली रईपुर म होय एक ठिन पुस्तक के विमोचन समारोह के मउका म मुख्यमंत्री ह करीन। ओमन किहीन कि नक्सलवाद के सेति बस्तर के लोगन मन ह विकास ले दूरिहा रिहीस। एखरे सेति अब तेजी ले विकास काम करे जाही। एखर बर रोड मैप तियार करे गेहे। मुख्यमंत्री ह बतइन कि गांव-गांव म रासन दुकान खोले जात हे अउ सुरक्षा सिविर मन ल सेवा डेरा के रूप म विकसित करे जात हे। कारीकरम के ए मउका म विधानसभा अध्यक्ष डॉक्टर रमन सिंह अउ उपमुख्यमंत्री विजय शर्मा घलो सामिल होइन।
जवान-सम्मान
दुरूग जिला के पुलिस लाइन सभागार म होय एक ठिन कारीकरम म आज राष्ट्रपति कोति ले शौर्य चक्र ले सम्मानित निरीक्षक लक्ष्मण केवट अउ निरीक्षक रामेश्वर प्रसाद देशमुख के नागरिक अभिनंदन करे गीस। ए मउका म पुलिस अधीक्षक विजय अग्रवाल ह किहीन हे कि ए दूनों अधिकारी मन ह कठिन स्थिति म साहस, धैर्य के परिचय देके छत्तीसगढ़ पुलिस के गौरव बढ़ाय हे। ओमन बतइन कि शौर्य चक्र सांतिकाल म दे जाय देस के तीसरा सर्वोच्च वीरता सम्मान हरय। ए बेरा कांकेर जिला के पखांजूर थाना प्रभारी निरीक्षक लक्ष्मण केवट ह चालीस ठिन सफल नक्सल मुठभेड़ मन म सामिल रिहीन। त उहें, भानूप्रतापपुर थाना प्रभारी निरीक्षक रामेश्वर प्रसाद देशमुख ह पच्चीस ठिन नक्सल विरोधी अभियान म अपन भूमिका निभाइन
अंतर्राष्ट्रीय योग दिवस
आयुष मंत्रालय ह आज नई दिल्ली म बारहवां अंतर्राष्ट्रीय योग दिवस के होवइया कारीकरम बर औपचारिक कारीकरम मनके सुभारंभ करीन। आयुष मंत्री प्रतापराव जाधव ह नई दिल्ली म संवाददाता मन ल बतइन कि प्रमुख कारीकरम प्रधानमंत्री नरेंद्र मोदी के अगुवई म कोलकाता के रेड रोड म करे जाही। ओमन बतइन कि ए मउका म पैंतालीस मिनट के योग प्रोटोकाल राखे जाही। एसा के े अंतर्राष्ट्रीय योग दिवस के बिसय हे-‘स्वस्थ्य जीवन के लिए योग‘।
मोदी सरकार-12 साल
केंद्र के मोदी सरकार के बारह बछर पूरा होय के मउका म गौरेला-पेण्ड्रा-मरवाही जिला के भारतीय जनता पार्टी पिछड़ा वर्ग मोर्चा डहार ले पेण्ड्रा नगर के मुक्तिधाम परिसर म स्वच्छता अभियान चलाय गीस।
उहें, सक्ति जिला पंचायत कार्यालय म घलो मोदी सरकार के बारह साल पूरा होय उपर प्रदर्सनी राखे गेहे।
राष्ट्रीय कैनो स्प्रिंट-प्रतियोगिता
रईपुर म होय छत्तीसवां राष्ट्रीय कैनो स्प्रिंट जूनियर पुरूष महिला अउ सब जूनियर प्रतियोगिता म छत्तीसगढ़ के खिलाड़ी मन ह बढ़िया प्रदर्सन करीन। नवा रईपुर स्थित सेंध लेक म होय तीन दिन के प्रतियोगिता के आखिरी दिन काली छत्तीसगढ़ ह एक स्वर्ण, दू रजत अउ एक ठिन कांस्य पदक के संग चार ठिन पदक जितिन। प्रतियोगिता म छत्तीसगढ़ ल कुल तीन स्वर्ण, दू रजत अउ चार ठिन कांस्य पदक मिलिस। पूरा प्रतियोगिता म मध्यप्रदेस ह पहिली जघा बनइस। त उहें, दूसर स्थान म केरल अउ ओडिसा ल तीसर स्थान मिलिस। प्रतियोगिता म देस के चौबीस राज्य ले करीबन आठ सौ खिलाड़ी मन भाग लीन।
अउ अब पेस हे मौसम के हाल…
मौसम विभाग के मुताबिक छत्तीसगढ़ म मानसून के पहंुचे म थोरिक समय लग सकथे। मौसम विज्ञानी डॉक्टर गायत्रीवाणी ह बतइन कि बिहार ले लेके दक्षिण छत्तीसगढ़ तक एक ठिन द्रोणिक बने हे। एखर प्रभाव ले कोनो-कोनो जघा म गरज-चमक के संग बरसा हो सकथे।
अउ अब थोरकुन समाचार सार म
– दुरूग जिला के अग्रसेन चौक अउ ओखर तीर-तखार के रद्दा म अवैध रूप ले चलाय जात ठेला खोमचा वाले मन ल प्रशासन डहार ले हटाय के कारवाई करे गीस।
– कबीरधाम जिला के दशरंगपुर, पिपरिया थाना अउ साइबर सेल के संयुक्त टीम ह बिजली वाले जिनिस के गबन अउ चोरी के आरोप म पांच झिन आरोपी मन ल गिरफ्तार करे गेहे।
अउ
– कोंडागांव जिला म पटवारी भर्ती म चयन कराय के झांसा देवइया एक झिन मनखे ले करीबन साढ़े छै लाख रूपिया के ठगी करे के मामला आगू आय हे। ए मामला म पुलिस ह एक झिन युवक ल गिरफ्तार करे हे।