मुख्यमंत्री-जांजगीर
मुख्यमंत्री विष्णुदेव साय ह आज जांजगीर-चांपा जिला के गांव पोड़ी म दू सौ पचानवे करोड़ रूपिया ले जादा के लागत वाले तीन सौ एकचालीस ठिन विकास काम के लोकार्पण अउ भूमिपूजन करीन। ए मउका म श्री साय ह किहीन कि ए विकास काम मनके माध्यम ले सड़क, पिये के पानी, सिंचई, स्वास्थ्य, नगरीय, अधोसंरचना गांव के विकास ले जुड़े सहूलियत ह बाढ़ही।
विश्व रक्तदान दिवस
आज विश्व रक्तदान दिवस हरय। ए मउका म केंद्रीय स्वास्थ्य मंत्री जगत प्रकाश नड्डा अउ स्वास्थ्य अउ परिवार कल्याण राज्य मंत्री प्रताप राव जाधव ह देसवासी मनले स्वेच्छिक रक्तदान के अपील करे हे। श्री नड्डा अउ श्री जाधव ह सोसल मीडिया पोस्ट म रक्तदान के महत्व बारे म जागरूकता बढ़ाय बर जोर दीन। ए बछर विश्व रक्तदान दिवस के थीम मानवता के एक बूंद-रक्तदान करय जीवन बचावंय राखे गेहे।
विश्व रक्तदान दिवस के मउका म आज छत्तीसगढ़ म घलो अब्बड़ अकन कारीकरम होवत हे। ए कड़ी म भारतीय रेडक्रास सोसायटी के छत्तीसगढ़ ईकाई डहार ले लोकभवन म होय समारोह म राज्यपाल रमेन डेका ह तीस झिन स्वेच्छिक रक्तदाता मन ल सम्मानित करीन। ए मउका म लोकभवन म रक्तदान सिविर राखे गीस। जेमा लोकभवन के अधिकारी, कर्मचारी समेत आने मनख्ेा मन घलो रक्तदान करीन।
समारोह म बोलत राज्यपाल ह किहीन कि कोनो भी मनखे के सबले बड़का धरम हे, दूसर के जीवन बचाना अउ एहर कहूं अपन खुदे के खून के एक बूंद ले होही, त एखर ले बड़का कोनो पुण्य नइ हो सकय। ओमन बतइन कि थैलेसिनिया, सिकलसेल, एनीमिया, हिमोफिलिया, कैंसर अउ एक्सीडेंट असन इमरजेंसी हालत म खून के जरूरत ह जियई-मरई के बीच अंतर तय करथे।
अंतर्राष्ट्रीय योग दिवस
अंतर्राष्ट्रीय योग दिवस के तियारी चलत आयुष मंत्रालय, भारत सरकार अउ मोरारजी देसाई राष्ट्रीय योग संस्थान के सहयोग ले आज बिहनिया एक ठिन विश्व स्तरीय ऑनलाइन योग कारीकरम राखे गे रिहीस। ए कारीकरम के उद्देस्य यूट्यूब लाइव योग स्ट्रीम बर सबले जादा देखइया मन के नवा विश्व रिकार्ड बनाना रिहीस। एखर जरिए संसार भरके योग अभ्यासकर्ता अउ वेलनेस उत्साही मन ल एके ठिन डिजीटल मंच म सकेले के परयास करे गीस। ए ऑनलाइन योग सत्र बिहनिया छै बजके पंद्रह मिनट ले सात बजके पैंतीस मिनट तक राखे गे रिहीस। एमा करीबन एक सौ तीस देस ले लोगन मन सामिल होइन।
योग दिवस-दुर्ग
अवइया इक्कीस जून के अंतर्राष्ट्रीय योग दिवस मनाय जाही। एखर पहिली दुरूग पुलिस लाइन म आज ‘सहज योग द्वारा स्वयं को पहचानों‘‘ ए कारीकरम होइस। एमा योग विशेषज्ञ मन योग के जरिया पुलिस कर्मी मन के मानसिक स्वास्थ्य अउ तनाव प्रबंधन खातिर उत्साह बढ़ाय बर जोर दीन। ओमन यहू बतइन कि मानसिक सांति अउ आत्म जागरूकता ह मनखे मन ल नसा-पानी ले दूर राखथे।
जशपुर- रेल नेटवर्क
जशपुर जिला अब रेलवे नेटवर्क ले जुड़ही। केंद्र सरकार ह धरमजयगढ़-पत्थलगांव- लोहरदगा नवा रेल लाइन प्रोजेक्ट ल बिसेस रेल परियोजना के रूप म अधिसूचित करे हे। करीबन दू सौ बयानवे किलोमीटर ए रेल लाइन ह जशपुर ल पहिली बेर राष्ट्रीय रेल नेटवर्क ले जोड़ही। एखर ले क्षेत्र म पर्यटन, रोजगार अउ उद्योग मन ल घलो बढ़ावा मिले के उम्मीद हे।
दुर्ग पुलिस-जागरूकता कार्यक्रम
कबीर प्रकट दिवस के मउका म दुरूग जिला के करहीडीह गांव म पुलिस विभाग डहार ले सड़क सुरक्षा अभियान के संगे नसामुक्ति अउ साइबर जागरूकता कारीकरम राखे गे रिहीस। कारीकरम दउरान लोगन मन ल ट्रैफिक नियम के पालन करे के संगे दूपहिया गाड़ी चलात बेरा हेलमेट लगाय बर जागरूक करे गीस। उहें, साइबर ठगी अउ ऑनलाइन धोखाधड़ी ले बांचे बर लोगन मन ल फर्जी लिंक म क्लिक नइ करे के संगे कोनो भी मनखे ल ओटीपी नइ दे बर अपील करे गीस। कारीकरम म माईलोगिन कमांडो मन ल सुरक्षा किट बांटे गीस।
मोर गांव मोर पानी
राज्य सरकार डहार ले मोर गांव मोर पानी म अभियान के चलत जल संरक्षण ल जन आंदोलन के रूप दे जात हे। इही कड़ी म बलरामपुर जिला के रामचंद्रपुर विकासखंड म गंवई के मनखे, जन प्रतिनिधि अउ स्व-सहायता समूह मनके माईलोगिन मन श्रमदान करके एके दिन म दू हजार जल संरक्षण संरचना ल बनाइन हे। ए अभियान के उद्देस्य बरसा के पानी ल सकेलना, भू-जल स्तर ल सुधारना अउ गंवई जघा म जल सुरक्षा तय करना हे।
लोक शिक्षण संचालनालय-स्पष्टीकरण
छत्तीसगढ़ लोक शिक्षण संचालनालय डीपीआई ह स्पष्ट करे हे कि राज्य के सबो सरकारी अउ गैर सरकारी स्कूल मन परनदिन सोलह जून ले सुरू होही। विभाग ह बतइस कि सोसल मीडिया के आने-आने माध्यम म एक जुलाई ले स्कूल सुरू होय के भ्रामक अउ फर्जी सूचना प्रसारित करे जात हे। डीपीआई ह पढ़इया लइका, उंखर पालक अउ लोगन मनले अपील करे हे कि ओमन अधिकारिक सूचना उपर ही भरोसा करय।
इही बीच, जांजगीर म पत्रकार मनले गोठबात करत मुख्यमंत्री ह स्पष्ट करे हे कि प्रदेस के सबो स्कूल परनदिन सोलह जून ले ही खुलही। ओमन किहीन कि तारीख आगू घुचाय बर कोनो चर्चा नइ होय हे। उहें, हर साल असन ए बछर घलो स्कूल मन म साला प्रवेस उत्सव मनाय जाही।
एनटीपीसी-बालिका सशक्तिकरण
बिलासपुर म एनटीपीसी सीपत के बालिका सशक्तिकरण अभियान के काली समापन होगे। चार सप्ताह तक चले ए ट्रेनिंग म एक सौ इक्कीस झिन ग्रामीण नोनी मन योग आत्मरक्षा, कम्प्यूटर, संवाद, कौशल अउ अंतरिक्ष विज्ञान समेत कई ठन बिसय के प्रसिक्षण लीन। कलेक्टर संजय अग्रवाल ह ओखर पालक मनले नोनी मन ल आगू बाढ़े के समान मउका दे खातिर अपील करीन। ए मउका म एनटीपीसी ह हर बछर दस झिन मेधावी नोनी मन ल कक्षा छटवीं ले बारहवीं तक निसुल्क शिक्षा दे के घोसना करे हे।
हॉकी खिलाड़ी-मुख्यमंत्री मुलाकात
मुख्यमंत्री विष्णुदेव साय ह आज रईपुर स्थित अपन निवास कार्यालय म भारतीय अंडर-एटीन हॉकी टीम के एशिया कप विजेता सदस्य अवि मानिकपुरी ले मुलाकात करीन। ए मउका म मुख्यमंत्री ह किहीन कि छत्तीसगढ़ के युवा खिलाड़ी अपन प्रतिभा, अनुशासन अउ कड़ा मेहनत के बल म राष्ट्रीय अउ अंतर्राष्ट्रीय स्तर म सुघ्घर प्रदर्सन करके प्रदेस अउ देस के नाव ल उज्जर करत हे। मुख्यमंत्री ह किहीन कि बिलासपुर के रहवइया अवि मानिकपुरी के ए उपलब्धि हे।
कैदी मौत-परिजन हंगामा
रायगढ़ जिला म जेल म धंधाय एक झिन बिचारधीन कैदी के सस्पेंस हालत म मउत होय बाद ओखर परिवार वाले मन हंगामा मचाइन। काली हुरहा तबीयत बिगड़े बाद ए कैदी ल मेडिकल कालेज अस्पताल म भर्ती कराय गे रिहीस, जिंहा ईलाज के दउरान ओखर मउत होगे। परिवार वाले मन जेल म मारपीट के आरोप लगाय हे, फेर पुलिस अउ जेल प्रशासन ह ए आरोप ल खारिज कर देहे।
ठगी आरोपी-गिरफ्तार
सक्ती जिला के छपोरा म भारतीय स्टेट बैंक के फर्जी शाखा चलाय अउ नौकरी लगाय के नाम म ठग के फरार तीन झिन आरोपी ल मालखरौदा पुलिस ह गिरफ्तार करे हे। मामला म आगू घलो मुख्य आरोपी अनिल भास्कर समेत छै झिन आरोपी ल गिरफ्तार करके जेल पठो दे गेहे।
अउ अब पेस हे मौसम के हाल…
मौसम विभाग के मुताबिक छत्तीसगढ़ म मानसून पहुंचे म अउ बेरा लग सकत हे। मौसम वैज्ञानी डॉक्टर गायत्रीवाणी ह आकाशवाणी समाचार ल बतइन कि आज उत्तर छत्तीसगढ़ म एक-दू जघा म गरजइ-चमकई के संगे सिटीर-साटर पानी अउ गाज गिर सकत हे।
उहें, अवइया तीन-चार दिन म दक्षिण-पश्चिम मानसून ह कर्नाटक, तेलंगाना, आंध्रप्रदेस, ओडिसा अउ दक्षिण छत्तीसगढ़ के कोनो जघा म पहुंच सकत हे।
अउ अब थोरकुन समाचार सार म –
– जांजगीर-चांपा जिला म एक ठिन कथित ऑडियो वायरल होय बाद जिला शिक्षा अधिकारी ह संविदा पीटीआई नलसाय दिवाकर ल सस्पेंड कर देहे।
– जगदलपुर म होय बस्तर आम महोत्सव म किसान मन ह आमा के दू हजार ले जादा प्रजाति ल देखइन।
– बलौदाबाजार भाटापारा जिला के खर्वे गांव म कथित जहरीला सराब पिये ले चार महिना भीतरी आठ झिन ग्रामीण के मउत मामला म पुलिस अउ राजस्व विभाग के अधिकारी मनके आगू म लास ल कब्र ले खोद के निकाले गीस।
अउ
– चंडीगढ़ म दस जून ले तेरह जून तक होय राष्ट्रीय कैडेट जूडो प्रतियोगिता म कों
डागांव के हेमबती नाग ह कांस्य पदक जीते हे।