केंद्रीय मंत्री-पत्रकारवार्ता
प्रधानमंत्री नरेंद्र मोदी के नेतृत्व म केंद्र म एनडीए सरकार के बारह बछर पूरा होय उपर आज रायपुर म आयोजित मीडिया संवाद कारीकरम म मुख्यमंत्री विष्णुदेव साय ह किहीन कि प्रधानमंत्री नरेंद्र मोदी के बारह बछर के ए कार्यकाल ऐतिहासिक रेहे हे। उंखर नेतृत्व म नवा, समृध्द अउ सशक्त भारत के निर्माण होवत हे। ओमन किहीन कि जनजातीय वर्ग बर घलो ए बारह बछर स्वर्णिम रेहे हे। ए दउरान अंठावन करोड़ ले जादा जनधन खाता खोले गेहे। छत्तीसगढ़ म पाछू ढाई बछर म दस लाख ले जादा प्रधानमंत्री आवास योजना के तहत मकान बने हे। ए मउका म केंद्रीय मंत्री गिरीराज सिंह ह किहीन कि प्रधानमंत्री नरेंद्र मोदी ह विकास के संग विरासत ल घलो बढ़ाय के काम करे हे। ओमन किहीन कि पाछू बारह बछर म भारत के अर्थव्यवस्था मजबूत होय हे। पच्चीस करोड़ लोगन मन गरीबी रेखा ले उपर आय हे। एखर संग ही दुनिया म भारत के सम्मान घलो बाढ़े हे।
केंद्रीय मंत्री छत्तीसगढ़ प्रवास
केंद्रीय वस्त्र मंत्री गिरीराज सिंह ह अपन छत्तीसगढ़ प्रवास के दउरान आज रायपुर म स्वच्छता मित्र मन के सम्मान करीन अउ उनला मेडिकल कीट प्रदान करीन। ए मउका म ओमन स्वच्छता कर्मी मन ले संवाद करत हुए स्वच्छ भारत अभियान म उंखर समर्पन, परिश्रम अउ योगदान के सराहना करीन। श्री ंिसंह ह किहीन कि स्वच्छता केवल अभियान नोहय, बल्कि जनभागीदारी ले राष्ट्र निर्माण के सशक्त माध्यम हरय। ए मउका म केंद्रीय मंत्री ह भारतरत्न डॉक्टर भीमराव अंबेडकर के प्रतिमा उपर माल्यार्पण कर श्रध्दा सुमन अर्पित करीन। एखर बाद केंद्रीय मंत्री श्री सिंह ह कलेक्ट्रेट परिसर करा स्थित आक्सीजोन म ‘‘एक पेड़ मां के नाम‘‘ अभियान के तहत वृक्षारोपण घलो करीन।
उहें, केंद्रीय मंत्री गिरीराज सिंह ह मुख्यमंत्री विष्णुदेव साय ले रायपुर स्थित मुख्यमंत्री निवास कार्यालय म सौजन्य मुलाकात करीन। ए बेरा म मुख्यमंत्री ह किहीन कि प्रधानमंत्री नरेंद्र मोदी के नेतृत्व म केंद्र अउ राज्य सरकार के बीच बेहतर समन्वय अउ निरंतर संवाद के भावना ह विकास काम मन ल नवा गति प्रदान करे हे।
एखर पहिली, केंद्रीय मंत्री श्री सिंह ह काली रायपुर म रेशम, खादी, ग्रामोद्योग, हथकरघा अउ हस्तसिल्प क्षेत्र के समीक्षा करीन। केंद्रीय मंत्री ह अधिकारी मन ल निर्देशित करीन कि अलग-अलग योजना मनके माध्यम ले ग्रामीण अउ कुटीर उद्योग क्षेत्र के उद्यमी मन के वार्षिक आय पांच लाख रूपिया तक पहुंचाय बर बिसेस प्रयास करे जाय।
मुख्यमंत्री-एनएचएम सम्मेलन
मुख्यमंत्री विष्णुदेव साय आज रायपुर म आयोजित छत्तीसगढ़ प्रदेस राष्ट्रीय स्वास्थ्य मिशन-एन.एच.एम. कर्मचारी संघ के प्रदेस स्तरीय सम्मेलन म सामिल होइन। ए मउका म मुख्यमंत्री ह एन.एच.एम. कर्मचारी मन के तैंतीस दिन के हड़ताल अवधि के वेतन दे जाय के घोसना करीन। ओमन एन.एच.एम. कर्मचारी मन ल स्वास्थ्य सेवा के रीढ़ बतावत हुए किहीन कि प्रदेस के दूरस्त अउ दुुर्गम क्षेत्र मन म घलो स्वास्थ्य सुविधा पहुंचाय म उंखर अहम भूमिका हे।
जवान-उपमुख्यमंत्री मुलाकात
राष्ट्रपति द्रौपदी मुर्मु के हाथों शौर्य चक्र ले सम्मानित सुरक्षाबल के जवान मन ले आज उपमुख्यमंत्री विजय शर्मा ह नवा रायपुर स्थित अपन निवास कार्यालय म मुलाकात कर उनला बधाई अउ सुभकामना दीन। ए दउरान उपमुख्यमंत्री श्री शर्मा ह शौर्य चक्र ले सम्मानित इंस्पेक्टर लक्ष्मण केंवट, इंस्पेक्टर रामेश्वर प्रसाद देशमुख अउ रायफल मैन भोजराम साहू के साहसिक काम मनके सराहना करीन।
माओवादी-डंप बरामद
गरियाबंद जिला म सुरक्षा बल के टीम ह तलासी अभियान के दउरान माओवादी मनके एक ठन बड़े हथियार डंप बरामद करे हे। मिले जानकारी के अनुसार सीआरपीएफ अउ जिला पुलिस के संयुक्त टीम ह तलासी अभियान बर निकले रिहीन, इही दउरान दंडईपानी के जंगल म माओवादी मन डहार ले लुका के राखे गे चार किलो के आईईडी, कुकर बम, टिफिन बम, हथियार अउ भारी मात्रा म विस्फोटक सामग्री बरामद करे हे। बम निरोधक दस्ता के टीम ह मउका म ही विस्फोटक मन ल निष्क्रिय कर देहे।
शाला प्रवेश उत्सव/राष्ट्रगान निर्देश
प्रदेस के सबो सरकारी अउ निजी स्कूल मन म अवइया सोलह जून ले शाला प्रवेस उत्सव मनाय जाही। प्रवेस उत्सव के दउरान स्कूल पहुंचइया नव प्रवेसी लइका मन के तिलक लगाके सुवागत करे जाही। ए मउका म विद्यार्थी मन ल निसुल्क पाठ्यपुस्तक, यूनिफार्म अउ साइकिल के वितरण करे जाही। उहें, बोर्ड अउ स्थानीय परीक्षा म टाप करइया लइका मन ल घलो सम्मानित करे जाही।
स्कूल शिक्षा विभाग ह प्रदेस के स्कूल मन म नवा शिक्षा सत्र ले राष्ट्रगान, राष्ट्रगीत अउ राज्यगीत समेत अलग-अलग गतिविधि मन ल अनिवार्य रूप ले कराय जाय के निरदेस जारी करे हे। निरदेस म केहे गेहे कि बिहनिया के प्रार्थना सभा म राष्ट्रगान, राष्ट्रगीत अउ आने-आने गतिविधि होही, जबकि मध्यान्ह भोजन के बेरा भोजन मंत्र अउ छुट्टी के बेरा राज्य गीत के सामूहिक वाचन कराय जाही।
इही बीच, लोक शिक्षण संचालनालय ह सोलह जून ले ही ऑनलाइन उपस्थिति अउ अवकाश व्यवस्था अनिवार्य करे जाय के निरदेस देहे। संचालनालय ह अधिकारी, कर्मचारी अउ शिक्षक मन ल डिजीटल माध्यम ले हाजिरी दर्ज करे बर केहे हे। स्कूल मन म वी एस के ऐप अउ कार्यालय मन म बायोमेट्रिक प्रणाली ले उपस्थिति दर्ज होही। ऑनलाइन हाजिरी नइ मिले उपर जून माह के वेतन रोके जा सकत हे। उहें, अब ऑफलाइन छुट्टी आवेदन पूरी तरह ले प्रतिबंधित रइही।
क्रिकेटर-मुलाकात
मुख्यमंत्री विष्णुदेव साय ह आज रायपुर म राजनांदगांव के प्रतिभाशाली युवा क्रिकेटर महक नरवासे ले सौजन्य मुलाकात करीन। ए मउका म श्री साय ह भारतीय महिला अंडर-नाइंटीन क्रिकेट टीम के आगामी श्रीलंका दउरा बर टी-ट्वेंटी अउ वनडे टीम के उपकप्तान नियुक्त करे जाय उपर सुश्री नरवासे ल बधाई अउ सुभकामना दीन।
देवर्षि नारद पत्रकार सम्मान
रायपुर म आज देवर्षि नारद जयंती पत्रकार सम्मान समारोह आयोजित करे गीस। ए बछर के देवर्षि नारद सम्मान वरिष्ठ पत्रकार प्रशांत शर्मा ल प्रदान करे गेहे। उहें, बब्बन प्रसाद मिश्र सम्मान महिला पत्रकार आकांक्षा तिवारी ल अउ रमेश नैयर सम्मान फोटो जर्नलिस्ट रूपेश यादव ल प्रदान करे गेहे। ए कारीकरम के मुख्य अतिथि नवा रायपुर स्थित ट्रिपल आईटी के निदेशक, प्रोफेसर डॉक्टर ओमप्रकाश व्यास अउ मुख्य वक्ता डीडी न्यूज के वरिष्ठ सलाहकार संपादक प्रखर श्रीवास्तव रिहीन।
दुर्घटना
जांजगीर-चांपा जिला के पंतोरा थाना क्षेत्र म आज भारतमाला सड़क करा एक ठन ट्रेलर अउ पिकअप के बीच होय टक्कर म पिकअप सवार दू झिन युवक मनके मउका म ही मउत होगे। उहें, तीन झन घायल होगे। घायल मन ल अस्पताल म भर्ती कराय गेहे। पुलिस ले मिले जानकारी के मुताबिक कोरबा जिला के केरवा गांव ले पिकअप म पांच झन भिलाई जात रिहीन।
कायाकिंग-प्रतियोगिता
राजधानी रायपुर के नवा रायपुर स्थित सेंध लेक म छत्तीसवां राष्ट्रीय कैनो स्प्रिंट जूनियर पुरूष, महिला अउ सब-जूनियर बालक-बालिका प्रतियोगिता सुरू हो गेहे। एखर आयोजन भारतीय कायाकिंग कैनोइंग अउ छत्तीसगढ़ एंड कैनोइंग के संयुक्त तत्वाधान म करे जात हे।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सबो आकाशवाणी कंेंद्र एके संघरा रिले करही। ए बखत के अंक म ‘‘गरियाबंद‘‘ जिला के बारे म जानकारी दे जाही।
अउ अब पेस हे मौसम के हाल…
मौसम विभाग ह अवइया एक-दू दिन के भीतर मानसून के छत्तीसगढ़ म प्रवेस के संभावना जताय हे। विभाग के अनुसार दक्षिण-पश्चिम मानसून झारखंड अउ ओडिसा पहुंच गेहे। मानसून के आगू बाढ़े बर परिस्थिति सामान्य बने हुए हे। उहें, एक ठन द्रोणिका मध्यप्रदेस, उत्तर छत्तीसगढ़ अउ झारखंड के उपर बने हुए हे, एखर असर ले अवइया चौबीस घंटा के दउरान प्रदेस के कुछेक जघा म हल्का ले मध्यम बरसा होय अउ गरज-चमक के संग छींटा पड़े के संभावना हे। उहें, एक-दू जघा म अंधड़ चले अउ गाज गिरे के चेतावनी दे गेहे।