प्रधानमंत्री-बारह साल
प्रधानमंत्री नरेन्द्र मोदी ह किहीन हे कि सरकार ह पाछू बारह बछर म महिला मन ल राष्ट्र निर्माण म ओमन के पूरा क्षमता के एहसास कराय बर अनुकूल वातावरण तियार करे हे। प्रधानमंत्री ह किहीन कि वित्तीय समावेसन अउ उद्यमिता ले लेके शिक्षा, हेल्थकेयर, साफ-सफाई, आवास, खेल, विज्ञान अउ गर्वर्नेंस तक महिला मन आने-आने क्षेत्र म अहम भूमिका निभावत हे। एक ठिन सोसल मीडिया पोस्ट म श्री मोदी ह किहीन कि ड्रोन टेक्नालॉजी जइसे उभरते क्षेत्र म महिला मनके बाढ़त भागीदारी ले अवसर के नवा रस्ता खुलत हे अउ पूरा देस के विकास परिदृश्य बदलत हे।
केंद्रीय मंत्री-दौरा
केंद्रीय वस्त्र मंत्री गिरिराज सिंह आज छत्तीसगढ़ के दू दिन के प्रवास म रईपुर पहुंचिन। श्री सिंह ह आज मंझनिया रईपुर के एक निजी अस्पताल म आयोजित बिसेस जनसंपर्क कारीकरम म सामिल होइन। एखर बाद ओमन मोदी सरकार के बारह बछर पूरा होय के उपलक्ष्य म राजधानी म राखे गे विकसित भारत संकल्प सम्मेलन म सामिल होइन।
श्री सिंह आज संझा राजधानी म हैंडलूम, हस्तसिल्प, सिल्क अउ राज्य अउ क्षेत्रीय टेक्सटाइल अधिकारी मन संग बइठका घलो करही। उहें, अपन प्रवास के दूसरइया दिन काली तेरह जून के राजधानी म स्वच्छता अभियान कारीकरम म सामिल होही।
केंद्र सरकार-पेट्रोल
केंद्र सरकार ह खुदरा पेट्रोल पंप ले संस्थागत औद्योगिक अउ वाणिज्यिक ग्राहक मनके ईंधन खरीदे उपर रोक लगा देहे। सरकार ह केहे हे कि एमन ल अपन जरूरत के पेट्रोल अउ डीजल थोक बिक्री केंद्र ले ही लेना होही।
राजस्व मंत्री-बैठक
राजस्व मंत्री टंकराम वर्मा ह किहीन हे कि डिजीटल भू-अभिलेख के सुरक्षा बर कड़ा इंतजाम करे जाही। काली रईपुर म एक ठिन उच्च स्तरीय समीक्षा बइठका म ओमन किहीन कि गड़बड़ी रोके बर ई-एचआरएमएस पोर्टल बनाय जाही। राजस्व मंत्री ह आने-आने जिला म तीन साल या ओखर ले जादा बेरा ले एके जघा म पदस्थ तहसीलदार, नायब तहसीलदार, अधीक्षक, सहायक अधीक्षक अउ राजस्व निरीक्षक के सूची मंगाय हे। एखरे संग एके हल्का म तीन साल जादा बेरा ले जमे पटवारी मनके घलो पूरा ब्योरा तियार करे के निरदेस दे गेहे। ओमन अधिकारी मनल नगरीय क्षेत्र म पात्र हितग्राही मन ल पट्टा वितरण करे के जम्मो जरूरी सर्वे काम अवइया पंद्रह अगस्त तक अनिवार्य रूप ले पूरा करे के निरदेस दीन हे।
स्कूल प्रारंभ
प्रदेस के जम्मो सरकारी अउ निजी स्कूल गर्मी के छुटटी के बाद सोलह जून के खुलही। ए संबंध म स्कूल शिक्षा विभाग ह जिला शिक्षा अधिकारी अउ संयुक्त संचालक मन ल आदेस जारी कर देहे। आदेस म विभाग ह सबो स्कूल मन ल पहिली ही दिन ले समय-सारिणी के अनुसार पढ़ई-लिखई के काम सुरू करे बर केहे हे। बतादन कि राज्य सरकार ह भयंकर गर्मी ल देखत पंद्रह अप्रैल ले सोलह जून तक ग्रीष्मकालीन अवकाश घोसित करे रिहीस।
बातों-बातों-में
प्रादेशिक समाचार एकांश के समसामयिक बिसय उपर आधरित कारीकरम ‘‘बातों-बातों-में‘‘ ए दारी मोदी सरकार के बारह बछर पूरा होय उपर केंद्रित रइही। एखर तहत छत्तीसगढ़ साहित्य परिषद के अध्यक्ष अउ वरिष्ठ पत्रकार शशांक शर्मा ले लेगे भेंटवार्ता के प्रसारण करे जाही। एखर प्रसारण काली तेरह जून के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
संगीत नाटक अकादमी पुरस्कार
केंद्र सरकार के संस्कृति मंत्रालय ह बछर दू हजार पचीस बर संगीत नाटक अकादमी फेलोशिप-अकादमी रत्न, संगीत नाटक अकादमी पुरस्कार अउ उस्ताद बिस्मिल्लाह खां युवा पुरस्कार मनके घोसना कर देहे। ए सम्मान सूची म छत्तीसगढ़ के चार झिन कलाकार के चयन करे गेहे। एमा लोक कला कार अउ रंगकर्मी संघरा पद्मश्री सम्मान ले सम्मानित हो चुके डॉक्टर अनूप रंजन पांडे घलो सामिल हे, जेमन ल ए साल के संगीत नाटक अकादमी पुरस्कार दे गेहे।
डॉक्टर अनूप रंजन पांडे के अलावा कत्थक नृत्य के वरिष्ठ साधक पंडित रामलाल बरेठ ल संगीत नाटक अकादमी फेलोशिप अउ युवा रंगकर्मी घनश्याम साहू अउ डॉक्टर आनंद कुमार पांडे ल उस्ताद बिस्मिल्लाह खां युवा पुरस्कार बर चुने गेहे।
आकाशीय बिजली-मौत
कांकेर जिला के कलगांव म गाज गिरे ले तीन मनखे मनके मउत हो गेहे। उहें, पांच झन दूसर महिला झूलस गीन। बताय जात हे कि कलगांव म मनरेगा के तहत तालाब गहरीकरण के काम चलत रिहीस, जेमा करीबन साठ ले सत्तर मजदूर काम करत रिहीन। आज बिहनिया बारिस सुरू होय म कुछेक मजदूर रूख के नीचे खड़े होगिन। इही दउरान अचानक गाज गिर गे। ए हादसा म कलगांव के उप सरपंच समेत तीन झन पुरूष के मउकच म मउत हो गेहे। उहें, पांच महिला गंभीर रूप ले झूलस गीन, जेमन ल सामूदायिक स्वास्थ्य केंद्र अंतागढ़ म भर्ती कराय गेहे। एमा ले एक महिला के हालत गंभीर बताय जात हे, जेला बेहतर उपचार बर कांकेर जिला अस्पताल म रिफर करे गेहे। कलेक्टर नीलेश कुमार महादेव क्षीरसागर ह मुख्य चिकित्सा अउ स्वास्थ्य अधिकारी ल घायल मनके बेहतर उपचार के निरदेस दीन हे।
गांजा-बरामद
बलरामपुर जिला म पुलिस ह करीबन दस करोड़ रूपिया के गांजा बरामद करे हे। ए मामला म पुलिस ह उत्तरप्रदेस के रहवासी दू झिन तस्कर मनल गिरफ्तार करे हे। पुलिस ह बताय हे कि गांजा एक ठिन टरक म भरके ओडिसा के सोनपुर ले उत्तरप्रदेस ले जाय जात रिहीस। मुखबिर मिले सूचना के आधार म पुलिस ह आज बिहनिया नाकाबंदी करके टरक ल रोकिस अउ जांच करीस। ए दउरान बोरी मन म भरे करीबन एक हजार नौ सौ इकचालीस किलो ले जादा के गांजा बरामद करे गीस।
एशियन पैरा-आर्म रेसलिंग चैंपियनशिप
किर्गिस्तान म राखे गे एशियन पैरा-आर्म रेसलिंग चैंपियनशिप म छत्तीसगढ़ के अंतर्राष्ट्रीय खिलाड़ी श्रीमंत झा ह रजत पदक जीते हे। ओमन पीआईयूएच-पचासी किलोग्राम वर्ग म कजाकिस्तान के खिलाड़ी ल हराके ए उपलब्धि हासिल करे हे। श्रीमंत ह अपन पदक देस के वीर सहीद जवान मन ल समर्पित करीन हे।
कायाकिंग-केर्नोइंंग-प्रतियोगि
नवा रईपुर स्थित सेंधलेक म आज ले छत्तीसवां राष्ट्रीय सब जूनियर अउ जूनियर कायाकिंग-केनोईंग प्रतियोगिता सुरू हो गेहे। छत्तीसगढ़ प्रदेस कायाकिंग-केनोईंग एसोसिएशन डहार ले भारतीय कायाकिंग-केनोईंग संघ अउ छत्तीसगढ़ ओलम्पिक संघ के संयुक्त तत्वावधान म होवइया तीन दिन के ए प्रतियोगिता म देस भरके खिलाड़ी हिस्सा लेवत हे।
आबकारी विभाग कार्रवाई
छत्तीसगढ़ म सराब के ओवरेटिंग के सिकायत म आबकारी विभाग ह बड़का कार्रवाई करे हे। राज्य स्तरीय उड़नदस्ता दल कोति ले आने-आने जिला के सराब दुकान म करे गे औचक निरीक्षक के दउरान निर्धारित दर ले जादा कीमत म सराब बेचे के मामला आगू आय के बाद आबकारी आयुक्त पी.एस.एल्मा ह चार झिन आबकारी उपनिरीक्षक ल निलंबित कर दीन हे। उहें, आठ झिन अधिकारी मन ल कारण बताओ नोटिस जारी करके जुवाब मांगे गेहे।
नीट परीक्षा-अतिरिक्त समय
राष्ट्रीय परीक्षण एजेंसी-एनटीए ह इक्कीस जून के होवइया नीट यूजी पुर्नपरीक्षा के अवधि म पंद्रह मिनट के अतिरिक्त समय जोड़े के फइसला करे हे। अब ले अभ्यर्थी मन ल परीक्षा पूरा करे बर कुल एक सौ पचानवे मिनट मिलही।