प्रधानमंत्री नरेन्द्र मोदी ह कहिन हे कि सरकार ह पाछु बारह बछर म देस के युवा, माईलोगिन अउ किसान मन ल सशक्त बनाय म कोनो कसर नइ छोड़े हे। सोशल मीडिया पोस्ट म श्री मोदी ह किहीन कि एक सौ चालीस करोड़ लोगन मनके आशीर्वाद अउ राष्ट्र प्रथम के भावना ले प्रेरित होके सरकार ह विश्वास, विकास अउ जनकल्याण बर समर्पित हे। प्रधानमंत्री ह कहिन कि ए अथक प्रयास के बाद आज देस ह बुनियादी ढांचा ल लेके डिजिटल क्रांति तक वैश्विक मंच म एक नवा पहिचान हासिल करे हे। श्री मोदी ह ए बात उपर जोर दीन कि विकसित भारत के अपन संकल्प ल साकार करे बर सरकार सेवा, सुशासन अउ समृद्धि के ए पथ म सरलग आगू बाढ़त रइही।
विशेष कार्यक्रम
प्रधानमंत्री नरेन्द्र मोदी के अगुवई म केन्द्र म एनडीए सरकार के बारह बछर पूरा होय म आकाशवाणी केन्द्र रायपुर के प्रादेशिक समाचार एकांश डहार ले पन्द्रह मिनट के एक विशेष कार्यक्रम तैयार करे गेहे। ए कार्यक्रम के प्रसारण आज रात आठ बजके पन्द्रह मिनट म करे जाही। एला छत्तीसगढ़ स्थित आकाशवाणी के जम्मों केन्द्र एके संघरा रिले करही।
मंत्रिपरिषद-निर्णय
मुख्यमंत्री विष्णुदेव साय के अगुवई म आज मंत्रालय म होय राज्य मंत्रिपरिषद के बइठका म कतकोन फइसला ले गीस। बइठका के बाद पत्रकार मन ले गोठबात करत उपमुख्यमंत्री अरूण साव ह बतईन कि मंत्रिपरिषद ह छत्तीसगढ़ स्टेट पावर ट्रांसमिश्न कंपनी लिमिटेड ल आईपीओ के माध्यम ले स्टॉक एक्सचेंज म सूचीबद्ध करे जाय के मंजूरी देहे। एखर ले आम नागरिक अउ निवेसक मन ल कंपनी के विकास यात्रा म भागीदारी बनाय के मउका मिलही अउ कंपनी के वित्तीय क्षमता अउ पारदर्सिता ल नवा मजबूती मिलही।
एक ठिन आने फइसला म मंत्रिपरिषद ह चालू खरीफ सीजन ले कृषक उन्नति योजना के नवा स्वरूप ल मंजूरी दीन हे। एखर तहत धान के जघा म आने खरीफ फसल लेवइया किसान अउ दलहन, तिलहन, मक्का, कोदो, कुटकी, रागी अउ कपास के खेती करइया किसान मन ल हरेक एकड़ पाछु पन्द्रह हजार रूपिया के मदद दे जाही। ए योजना के फायदा एकीकृत किसान पोर्टल, एग्रीस्टेक पंजीयन अउ डिजिटल क्रॉप सर्वे के आधार म दे जाही।
उहें, सार्वजनिक वितरण प्रणाली के अंतर्गत पात्र हितग्राही मन ल चालू वित्तीय बछर म चना देवाय के घलो फइसला ले गेहे। एखर संगेसंग मंत्रिपरिषद ह ‘‘योग‘‘ विषय ल समाज कल्याण विभाग ले हटाके चिकित्सा सिक्षा विभाग के अंतर्गत लाय के प्रस्ताव ल मंजूरी देहे। एखर अलावा प्रधानमंत्री ई-बस सेवा योजना के क्रियान्वयन बर पेमेंट सिक्योरिटी मैकेनिज्म स्कीम के तहत डायरेक्ट डेबिट मैंडेट के सहमति केन्द्र सरकार ल भेजे के अनुमति देहे। ए फइसला ले रायपुर, दुर्ग-भिलाई, बिलासपुर अउ कोरबा म मंजूर होय दू सौ चालीस इलेक्ट्रिक बस के संचालन के रद्दा खुलही।
मंत्रिपरिषद ह नवा रायपुर अटल नगर विकास प्राधिकरण ल आपसी मंजूरी ले भूमि खरीदे उपर दे जावत मुद्रांक सुल्क छूट के बेरा ल इकतीस मार्च दू हजार अट्ठाईस तक बढ़ाय के फइसला लेहे। उहें, छत्तीसगढ़ खनिज नियम म संशोधन ल मंजूरी दे गेहे।
सीएम हेल्पलाइन सेवा
प्रदेस म आज ले ‘‘सीएम हेल्पलाइन – एक सून्य सात छह‘‘ सेवा सुरू हो गेहे। मुख्यमंत्री विष्णुदेव साय ह मंत्रालय ले ए सेवा के सुभारंभ करीन। ए मउका म ओमन कहिन कि अब लोगन मन ल अपन सिकायत, सुझाव अउ समस्या ल टोल फ्री नंबर – एक शून्य सात छह, मोबाइल ऐप अउ ऑनलाइन पोर्टल के माध्यम ले सीधा दर्ज करा सकही। हरेक सिकायकर्ता ल यूनिक आईडी दे जाही, जेखर ले उंखर ट्रैकिंग, मॉनिटरिंग अउ बेरा म निराकरण हो सकय। श्री साय ह कहिन कि ए व्यवस्था म समाधान ले असंतुष्ट होय म सिकायत के फेर ले समीक्षा के प्रावधान करे गेहे। संगेसंग प्रदेस के विकास ले जुड़े बिसेस सुझाव घलो नागरिक मनह सीधा सरकार तक पहुंचा सकही।
राष्ट्रपति-वीरता पुरस्कार
मुख्यमंत्री विष्णुदेव साय अउ उपमुख्यमंत्री विजय शर्मा ह कहिन हे ए ह पूरा प्रदेस बर गौरव के बात आय।
भगवान बिरसा मुंडा-पुण्यतिथि
आज पूरा देस महान स्वतंत्रता सेनानी अउ धरती आबा भगवान बिरसा मुंडा के पुण्यतिथि म ओमन ल श्रद्धांजलि अर्पित करत हे। ए मउका म उपराष्ट्रपति सीपी राधाकृष्णन, प्रधानमंत्री नरेन्द्र मोदी अउ केन्द्रीय गृहमंत्री अमित शाह ओमन ल श्रद्धांजलि अर्पित करीन।
सोशल मीडिया पोस्ट म प्रधानमंत्री ह कहिन कि भगवान बिरसा मुंडा ह जल, वन अउ भूईंया के रक्षा बर विदेसी सासन के विरूद्ध अदम्य साहस ले संघर्ष करीन। श्री मोदी ह कहिन कि उंखर पूरा जिनगी जनजातीय समुदाय के आत्मसम्मान, संस्कृति अउ अधिकार के रक्ष बर समर्पित रिहीन।
प्रधानमंत्री सुरक्षित मातृत्व अभियान
प्रधानमंत्री सुरक्षित मातृत्व अभियान ल आज दस बछर पूरा होगे हे। ए मउका म केन्द्रीय महिला अउ बाल विकास मंत्री अन्नपूर्णा देवी ह कहिन हे कि जम्मों शिशु मन ल गर्भावस्था के दउरान हरेक चरण म सुरक्षित अउ स्वस्थ देखभाल के अधिकार हवय। सोशल मीडिया पोस्ट म ओमन कहिन कि पाछु एक दसक म सरकार ह लाखों गर्भवती माईलोगिन मन ल समय-समय म स्वास्थ्य जांच, विशेषज्ञ परामर्स अउ सुघ्घर मातृ स्वास्थ्य सेवा देवाय के सुरक्षित मातृत्व ल एक जन-आंदोलन बना देहे।
भव्य योजना
केन्द्रीय वाणिज्य अउ उद्योग मंत्री पीयूष गोयल ह काली देशभर म सौ औद्योगिक पार्क के विकास म तेजी लाने बर पोर्टल ‘‘भव्य‘‘ के सुभारंभ करीन। नई दिल्ली म श्री गोयल ह कहिन कि ए पोर्टल आधुनिक औद्योगिक क्षेत्र के विकास म मदद करही। ओमन कहिन कि औद्योगिक तंत्र ल विकसित करे के संगेसंग पूरा भारत म बडे़ पैमाना म निवेस के माध्यम ले बड़े स्तर म रोजगार सृजन ल बढ़ावा दे बर ‘‘भव्य‘‘ योजना सुरू करे गेहे। भव्य योजना के अंतर्गत आने-आने आकार के सौ औद्योगिक पार्क बनाय जाही।
रेलवे-जागरूकता कार्यक्रम
अंतर्राष्ट्रीय समपार फाटक जागरूकता दिवस के मउका म दक्षिण पूर्व मध्य रेलवे के रायपुर मंडल डहार ले छह ले बारह जून तक आने-आने कार्यक्रम आयोजित करे जावत हे। इही कड़ी म आज रायपुर के मंडल रेल प्रबंधक दयानंद के अगुवई म वॉकथन के आयोजन करे गीस। ए वॉकथन मंडल रेल प्रबंधक कार्यालय ले सुरू होके वापिस कार्यालय परिसर म सिरईस। एमा अपर मंडल रेल प्रबंधक के संगेसंग मंडल के आने-आने अधिकारी अउ स्काउट गाईड के लइका मन सामिल होइन। ए दउरान स्काउट-गाइड के लइका मन ह खमतराई फाटक म नुक्कड़-नाटक के माध्यम ले लोगन मन ल जागरूक करीन।
धान खरीदी गबन-आरोपी गिरफ्तार
महासमुंद जिला के बसना पुलिस ह धान खरीदी म करीबन साढ़े चार करोड़ रूपिया के गबन के मामला म लंबा बेरा ले फरार दू झिन आरोपी मन ल गिरफ्तार करे हे। पुलिस के मुताबिक, प्राथमिक कृषि साख सहकारी समिति पिरदा म बछर दू हजार बीस-इक्कीस के दउरान सत्रह हजार दू सौ दस क्विंटल ले जादा धान के हेराफेरी करे गे रिहीस। तकनीकी साक्ष्य के आधार म ओ बेरा के व्यवस्थापक कन्हाई सेठ अउ सेल्समैन राजकुमार पटेल ल गिरफ्तार करके न्यायिक रिमांड म जेल भेज दे गेहे। खबर के मुताबिक ए मामला म दू झिन आरोपी के गिरफ्तारी पहिलीच ले करे गेहे।
अउ अब पेस हे मौसम के हाल…
मौसम विभाग के मुताबिक अवइया दू-तीन दिन म मानसून ह छत्तीसगढ़ म के कुछेक जघा म पहुंच सकत हे। एखर असर ले अवइया पांच दिन म प्रदेस के कुछेक जघा म गरज-चमक के संग हवा गरेर अउ बरसा होय के संभावना हे।
रईपुर जिला म पाछु रतिहा तेज बरसा ले तापमान म तीन ले चार डिग्री सेल्सियस के गिरावट आय हे। मौसम विभाग ह एला प्री मानसून के बरसा बताय हे।