प्रधानमंत्री-सरकार बारह वर्ष
प्रधानमंत्री नरेंद्र मोदी ह गरीब मनके हित म सरकार के बारह बछर के विकास यात्रा ल रेखांकित करे हे। प्रधानमंत्री ह आज किहीन कि ए दउरान देस ह कतकोन बदलाव के साक्षी बने के संगेसंग गरीब कल्याण अउ वंचित वर्ग मन ल ए बदलाव के केंद्र बिन्दु म राखे गीस। ओमन किहीन कि अंत्योदय जम्मो बेरा सरकार बर प्ररेणा स्त्रोत रिहीस अउ परयास रिहीस कि विकास के फायदा पाछू छूटे लोगन मन तक पहुंचे। प्रधानमंत्री ह किहीन कि जनधन खाता, प्रत्यक्ष लाभ अंतरण, स्वच्छ भारत अभियान, पीएम आवास योजना, जल जीवन मिसन अउ आयुष्मान भारत जइसन हर पहल के उद्देस्य लोगन मन बर गरिमा अउ मउका देवाना हवय। प्रधानमंत्री ह किहीन कि गरीब अउ वंचित मनके उत्थान के संकलप सबका साथ सबका विकास के मंत्र, गरीब कल्याण, गरीब के सेवा ओखर जिनगी म बेहतरी के संगेसंग देस के विकास इही सब सरकार के सबले बड़का प्राथमिकता रिहीस।
शौर्य चक्र-सम्मान
राष्ट्रपति द्रौपदी मुर्मु ह आज नई दिल्ली म रक्षा अलंकरण समारोह म जवान मन ल वीरता पुरस्कार दीन। एमा छत्तीसगढ़ के तीन झिन जवान घलो सामिल हे। असम रायफल म पदस्थ जवान भोजराम साहू ल मणिपुर म आतंकी मनके संग मुठभेड़ म साहस अउ वीरता बर शौर्य चक्र ले सम्मानित करे गीस। त उहें, छत्तीसगढ़ म नक्सल अभियान के दउरान बड़का भूमिका निभइया पुलिस निरीक्षक लक्ष्मण केवट अउ निरीक्षक रामेश्वर देशमुख ल घलो शौर्य चक्र ले सम्मानित करे गीस।
नीट-यूजी
राष्ट्रीय परीक्षा एजेंसी-एन.टी.ए. ह इक्कीस जून के होवइया नीट यूजी पुर्नपरीक्षा बर परीक्षा मनके सहर के सूचना जारी कर देहे। पंजीकृत उम्मीदवार मन आधिकारिक वेबसाइट म लॉगिन करके अपन परीक्षा सहर के जानबा ले सकथे।
सुरक्षित मातृत्व अभियान
प्रधानमंत्री सुरक्षित मातृत्व अभियान के दस बछर पूरा होय के मउका म केंद्रीय स्वास्थ्य अउ परिवार कल्याण मंत्रालय ह काली ले राष्ट्रव्यापी समारोह के सुरूआत करही। केंद्रीय स्वास्थ्य मंत्री जगत प्रकाश नड्डा ह उद्घाटन समारोह के अध्यक्षता करही। ए मउका म राज्य अउ केंद्रशासित प्रदेस मन म जागरूकता अउ जनसंपर्क अभियान चलाय जाही। जानबा के मुताबिक प्रधानमंत्री ह नौ जून दू हजार सोलह के ए अभियान के सुभारंभ करे रिहीन। एमा गर्भवती माईलोगिन मन ल मुफत म स्वास्थ्य सेवा दे जात हे।
आकाशवाणी-90 वर्ष
देस के विश्वसनीय लोक प्रसारक आकाशवाणी ह आज अपन नब्बे बछर पूरा होय के उत्सव मनावत हे। बछर उन्नीस सौ छत्तीस म आजे के दिन इंडियन स्टेट ब्रॉडकास्ट सर्विस के नाव बदलके ऑल इंडिया रेडियो कर दे गीस। बछर उन्नीस सौ छप्पन म ऑल इंडिया रेडियो के नाव ल बदल के आकाशवाणी करे गीस। आकाशवाणी ह आज पांच सौ इंक्यावने रेडियो स्टेसन मनके संचालन करत हे। आकाशवाणी के प्रसारण तेईस ठिन भाषा अउ एक सौ छियालीस बोली म करे जात हे। आकाशवाणी के ध्येय वाक्य हवय-बहुजन हिताय, बहुजन सुखाय।
अभिलेखागार सप्ताह
अंतर्राष्ट्रीय अभिलेखागार सप्ताह के मउका म रईपुर म आज बिसेस प्रदर्सनी अउ व्याख्यान कारीकरम होइस। महंत घासीदास स्मारक संग्रहालय के आठ गैलरी म ए बिसेस प्रदर्सनी म ऐतिहासिक दस्तावेज अउ अभिलेख मनके छायाचित्र देखाय गीस। प्रदर्सनी रोजे बिहनिया ग्यारा बजे ले संझा पांच बजे तक आम लोगन मन बर खुल्ला रइही। त उहें, नौ जून के अभिलेख मनके संरक्षण अउ ओखर महत्ता उपर बिसेस व्याख्यान राखे गेहे। कारीकरम के उद्देस्य ऐतिहासिक धरोहर मन ल सहेज के राखे के प्रति जन जागरूकता बढ़ाना हे। प्रदर्सनी बारह जून तक चलही।
आकार
संस्कृति विभाग डहार ले सरगुजा संभाग के उदयपुर अउ लखनपुर म आज ले आकार दू हजार छब्बीस पारंपरिक अउ शिल्प अउ कला सिविर आयोजित करे जात हे। चौदह जून तक चलइया ए सिविर म युवा मन ल चौदह ठिन पारंपरिक कला विधा के प्रसिक्षण दे जाही। जेखर उद्देस्य लोक कला अउ पारंपरिक शिल्प के संरक्षण के संग नवा पीढ़ी मन ल सांस्कृतिक विरासत ले जोड़ना हे। प्रसिक्षण अनुभवी कलाकार अउ कला गुरू मन डहार ले दे जाही।
गांजा तस्कर-गिरफ्तार
धमतरी पुलिस ह चार सौ अस्सी किलो गांजा के संग पांच झिन तस्कर मन ल गिरफ्तार करे हे। जब्त गांजा के कीमत दू करोड़ पैंतालीस लाख रूपिया ले जादा के बताय जात हे। पुलिस के मुताबिक मुखबिर ले सूचना मिले के बाद बस्तर ले रईपुर आवत एक ठिन कार अउ पिकअप गाड़ी के जांच करे गीस। ए दउरान ए गाड़ी मन म अब्बड़ मात्रा म सफेद बोरी म ले जात गांजा बरामद करे गीस। पुलिस ह बतइन कि आरोपी मन गांजा ल रईपुर अउ उत्तर प्रदेस म बेचे बर ले जात रिहीन।
हाथी हमला मौत
मनेन्द्रगढ़-चिरमिरी-भरतपुर जिला म हाथी के हमला म दू झिन लोगन के मउत हो गेहे। मिले जानबा के मुताबिक गुरूघासीदास तमोर पिंगला टाइगर रिजर्व के देवसील गांव म रद्दा बनाय के काम चलत रिहीस। पाछू रतिहा ए मजूर मन काम सिराय के बाद आराम करत रिहीन। इही दउरान हुरहा ए हाथी ह मजूर मन उपर हमला कर दीन। हमला म एक झिन मनखे के मउकच म मउत होगे। त उहें, एक झिन आने मनखे के मउत अस्पताल ले जात खानी होगे। वन विभाग ह मामला के जांच करत हे।
केर्नोइंंग प्रतियोगिता
मुख्यमंत्री विष्णुदेव साय ह काली रईपुर म छत्तीसवां राष्ट्रीय सब जूनियर अउ जूनियर कायाकिंग-केनोईंग प्रतियोगिता के मस्कट ‘पहाड़ी मैना‘ के विमोचन करीन। ए प्रतियोगिता बारह ले चौदह जून तक नवा रईपुर के सेंध लेक म होही। मुख्यमंत्री ह विस्वास जतइन कि अइसन आयोजन ले खिलाड़ी मन ल नवा प्रेरणा दिही अउ प्रदेस के खेल पहिचान ल अउ मजबूती मिलही।
हाथी संरक्षण-प्रशिक्षण
हाथी मनके मउत के कारण के वैज्ञानिक जांच, वन्य जीव अपराध के पहिचान अउ संरक्षण जइसन प्रयास उपर रायगढ़ म दू दिन के बिसेस प्रसिक्षण राखे गीस। जेमा प्रदेस के अठहत्तर वन अधिकारी अउ पशु चिकित्सा बिसेसज्ञ मन भाग लीन। सिविर म विसेसज्ञ मन बतइन कि छत्तीसगढ़ म ए बेरा करीबन चार सौ पचास हाथी घूमत हवय। रायगढ़, जशपुर, कोरबा अउ सूरजपुर जइसन जिला म हाथी मनके बाढ़त गतिविधि ल देखत ए प्रसिक्षण राखे गीस। बिसेसज्ञ मन बतइन कि हाथी मनके मउत के सही जानकारी मिले ले अवइया बेरा म अइसन घटना मन ल रोके अउ वन्य जीव संरक्षण के प्रयास मन ल अउ जादा प्रभावी बनाय जा सकही।
ए मउका म वन मंत्री केदार कश्यप ह किहीन कि आधुनिक तकनीक, वैज्ञानिक अनुसंधान अउ क्षमता निर्माण के माध्यम ले हाथी के संगेसंग जम्मो वन्य जीव मनके सुरक्षा ल बने ढंग के राखे के प्रयास सरकार ह करत हे।
हेमचंद यादव विवि-शोध पीठ
केंद्रीय सामाजिक न्याय अउ अधिकारिता मंत्रालय कोति ले काम करत डॉक्टर अंबेडकर फाउंडेसन ह दुरूग स्थित हेमचंद यादव विश्वविद्यालय म डॉक्टर अंबेडकर चेयर शोध-पीठ के स्थापना के प्रस्ताव ल मंजूरी दे देहे। डॉक्टर अंबेडकर चेयर के स्थापना ले विश्वविद्यालय म शोध प्रकाशन, राष्ट्रीय संगोष्ठ, कार्यसाला, जन जागरूकता कारीकरम अउ पीएचडी कारीकरम ल नवा दिसा मिलही।
मौसम
मौसम विभाग ह अवइया चौबीस घंटा के दउरान प्रदेस के कोनो-कोनो जघा म जोरदरहा हवा गरेर के संग बरसा होय के चेतावनी देहे। इही दउरान करीबन पचास ले साठ किलो मीटर प्रतिघंटा के रफ्तार ले तेज हवा चल सकथे। उहें, कोनो-कोनो जघा म गाज गिरे के संभावना हे। मौसम विभाग के मुताबिक मानसून अवइया तीन ले चार दिन के भीतर छत्तीसगढ़ पहुंच सकथे, जेखर बाद बारह जून ले प्रदेस म बने ढंग ले बरसा होय के संभावना हे। इही बीच, आज राजधानी रईपुर के संगेसंग कुछेक जिला म हुरहा मौसम बदलीस अउ तेज हवा के संग हल्का बरसा होइस।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म राज्यमंत्री परिषद के बइठका काली बिहनिया ग्यारा बजे नवा रईपुर अटल नगर के मंत्रालय म होही।
अउ
– उपमुख्यमंत्री अरूण साव ह अपन बस्तर प्रवास के दउरान आज सुकमा म अमृत मिसन ले बनाय जात वाटर ट्रीटमेंट प्लांट के कामकाज के निरीक्षण करीन। संगेसंग शबरी नदी उपर बनत इंटेक-वेल के काम ल घलो देखिन।