राष्ट्रीय पिछड़ा वर्ग आयोग के अध्यक्ष साध्वी निरंजन ज्योति ह आज अपन छत्तीसगढ़ दउरा बेरा राजधानी के राज्य अतिथि गृह पहुना म पिछड़ा वर्ग ले जुड़े आने-आने समाज के प्रतिनिधि मन ले भेंट करीन। ए दउरान साध्वी निरंजन ज्योति ह प्रतिनिधि मन डहार ले बताय गे समस्या के संगे उंखर मांग अउ सलाह बारे म जरूरी कदम उठाय के भरोसा देवाइन। ए मउका म राज्य पिछड़ा वर्ग के आयोग के अध्यक्ष नेहरू राम निषाद, उपाध्यक्ष चंद्रकांति वर्मा, पिछड़ा वर्ग कल्याण आयोग के अध्यक्ष आर.एस. विश्वकर्मा अउ लौह सिल्पकार विकास बोर्ड के अध्यक्ष प्रफुल्ल विश्वकर्मा समेत पिछड़ा वर्ग म अवइया कई ठिल समाज मनके प्रतिनिधि उपस्थित रिहीन।
अपन दउरा बेरा राष्ट्रीय पिछड़ा वर्ग आयोग के अध्यक्ष ह राज्यपाल रमेन डेका ले लोक भवन म सौजन्य मुलाकात करीन।
उहें, साध्वी निरंजन ज्योति ह मुख्यमंत्री विष्णुदेव साय ले घलो आज रईपुर स्थित उंखर निवास कार्यालय म भेंट करीन। ए दउरान इंखर मन बीच पिछड़ा वर्ग के कल्याण, सामाजिक न्याय, शिक्षा म विकास अउ सामाजिक आर्थिक विकास ले जुड़े कतकोन बिसय म गोठबात होइस।
घरेलू रसोई गैस-कीमत
घरेलू रसोई गैस के कीमत म चौदह किलो दू सौ ग्राम के सिलेंडर बर उनतीस रूपिया बढ़ाय गेहे। नवा रेट रतिहा बारह बजे ले लागू हो गेहे। दिल्ली म आज ले घरेलू रसोई गैस के कीमत नौ सौ तेरह रूपिया ले बाढ़के नौ सौ बयालीस रूपिया हो जही।
इही बीच, केंद्र सरकार ह केहे हे की अंतर्राष्ट्रीय एलपीजी के कीमत म बहुत जादा बाढ़े के बावजूद भारतीय घर मन म रांधे पसाय वाले गैस ह विश्व स्तर म सबले कम कीमत म मिलत हे। पेट्रोलियम अउ प्राकृतिक गैस मंत्रालय ह एक ठिन बयान म केहे हे कि भारतीय सिलंेडर के कीमत कोनो भी पड़ोसी देस के तुलना म सस्ता हे अउ अमेेरिका, आस्ट्रेलिया अउ कनाड़ा असन विकसित अर्थव्यवस्था के तुलना म बहुत कमती हे।
एनटीए-खंडन
राष्ट्रीय परीक्षा एजेंसी-एनटीए ह सोसल मीडिया अउ मैसेजिंग प्लेटफार्म बर नीट-यूजी के पुर्नपरीक्षा प्रश्नपत्र के कथित लीक या बेचे के दावा बारे म खंडन करे हे। एनटीए ह केहे हे कि एहर विद्यार्थी अउ उंखर परिवार वाले मनके संसो के फायदा उठइया नकल गिरोह के काम हे।
पद्म पुरस्कार
राष्ट्रपति द्रोपदी मुर्मू ह तेइस जून के दूसरइया नागरिक अलंकरण समारोह म ए बछर के पैंसठ झिन मनखे मन ल पद्म पुरस्कार देही। एखर पहिली पाछू महिना श्रीमती मुर्मू ह राष्ट्रपति भवन म होय पहलइया नागरिक अलंकरण समारोह म छैंसठ झिन प्रतिष्ठित मनखे मन ल पद्म पुरस्कार दे रिहीन। इंहा बतादन कि ए पुरस्कार ल हर बछर गणतंत्र दिवस के मउका म घोसित करे जात हे।
केंद्र सरकार ह कानूनी माप सिस्टम के चलत खाद्य तेल बर मानक पैकिंग लागू करे हे। उपभोक्ता कार्य, खाद्य अउ सार्वजनिक वितरण मंत्रालय ह केहे हे कि संसोधित नियम मन ले प्रमुख खाय के तेल मन बर मानक पैक आकार तय करे गेहे। स्वीकृत पैक आकार दू सौ ग्राम, पांच सौ ग्राम, एक से पांच किलो ग्राम, पंद्रह किलोग्राम अउ बीस किलो ग्राम हे। ए पहल के उद्देस्य बड़ अकन पेकेट साईज मनके बाढ़त संख्या ले कम करना हे। एखर ले बउरइया मन बर कीमत के तुलना अउ सोचबिचार के बिसाय म सहुलियत होही।
मुख्यमंत्री-समीक्षा बैठक
मुख्यमंत्री विष्णुदेव साय ह रईपुर संभाग के समीक्षा बइठका म किहीन हे कि किसान मन ल खाद अउ बीज मिले बारे म कोनो प्रकार के हलाकानी नइ होना चाही। ओमन निरदेस दे हे कि छोटे अउ सीमांत किसान मन ल प्राथमिकता के आधार म खातू अउ बीजा दे जाय अउ एखर जवाबदेही संबंधित कलेक्टर के होही। मुख्यमंत्री ह नैनो उर्वरक के बउरइ ल बढ़ावा देबर अउ गैर कानूनी ढंग ले रेती खनई उपर कड़ा कारवाई के निरदेस घलो देहे।
विद्यार्थी उत्कर्ष योजना
छत्तीसगढ़ सरकार ह अनुसूचित जाति अउ जनजाति वर्ग के ग्रामीण प्रतिभावान पढ़इया लइका मन बर मुख्यमंत्री अनुसूचित जाति और जनजातीय विद्यार्थी उत्कर्ष योजना के तहत एडमिसन के काम सुरू कर देहे। योजना के माध्यम ले चुने गे पढ़इया लइका मन ल प्रतिष्ठित निजी आवासीय विद्यालय मन म कक्षा छठवीं ले बारहवीं तक निसुल्क शिक्षा दे जाही। आवेदन जमा करे के आखिरी तारीख पदं्रह जून राखे गेहे। एखर बर चयन परीक्षा पांच जुलाई के होही। ए बछर बिसेस पिछड़ी जनजातीय मनके लइका मन बर पहिली बेर दू प्रतिसत आरक्षण घलो राखे गेहे।
राज्यपाल-सीए छात्र सम्मेलन
देसभर के सीए याने चार्टड अकाउंटेंट मनके दू दिनी राष्ट्रीय सम्मेलन आज ले रईपुर म सुरू हो गेहे। राज्यपाल रमेन डेका ह पंडित दीन दयाल उपाध्याय ऑडिटोरियम म ए सम्मेलन के उद्घाटन करीन। एमा बोलत ओमन किहीन कि चार्टर्ड अकाउंटेंट मनके काम न केवल वित्तीय सलाह हे, भलुक ओमन कई ठिन व्यवसाय के सफलता म एक ठिन सुघ्घर मार्गदर्सक के भूमिका घलो निभाथे। ओमन यहू किहीन कि आम लोगन के सहूलियत ल धियान म राखत टैक्स सिस्टम ल अउ जादा सरल बनाय जाना चाही।
विश्व सायकल दिवस
विश्व साइकिल दिवस के उपलक्ष्य म आज प्रदेस के कई ठिन जिला मन म फीट इंडिया मूवमेंट के तहत ‘संडे ऑन साइकिल‘ कारीकरम राखे गे रिहीस। एखर चलत उपमुख्यमंत्री अरूण साव ह जगदलपुर म राखे गे कारीकरम म सामिल होइन। ए मउका म श्री साव ह खुदे साइकिल चलाके पर्यावरण संरक्षण अउ खुद के फीट रहे बर आरो दीन। ए कारीकरम म सांसद महेश कश्यप, महापौर संजय पांडे अउ कलेक्टर आकाश छिकारा घलो सामिल होइन।
उहें, कोंडागांव जिला म ‘संडे ऑन साइकिल‘ के तहत रैली निकाले गीस। ए कारीकरम म कलेक्टर नुपूर राशि पन्ना समेत आने-आने विभाग के अधिकारी-कर्मचारी, विद्यार्थी खिलाड़ी अउ आम लोगन घलो सामिल होइन।
इही कड़ी मुंगेली पुलिस डहार ले जिला मुख्यालय अउ लोरमी म साइकिल रैली राखे गे रिहीस।
उहें, कोरिया के जिला मुख्यालय बैकुंठपुर म साइकल रैली निकाले गीस। जेमा कलेक्टर रोक्तिमा यादव समेत जिला प्रशासन के आधिकारी-कर्मचारी सामिल होइन।
मुंगेली-स्वच्छता अभियान
प्रधानमंत्री नरेंद्र मोदी के अगुवई म केंद्र म एनडीए सरकार के बारह बछर पूरा होय के मउका म देसभर म कई ठिन कारीकरम होवत हे। इही बड़ी म मुंगेली स्थित जिला अस्पताल म साफ-सफाई के अभियान चलाय गीस। ए मउका म भारतीय जनता पार्टी के पदाधिकारी अउ कार्यकर्ता मन अस्पताल कैम्पस के साफ-सफाई करके स्वच्छता के आरो दीन।
आकाशवाणी-विशेष कार्यक्रम
आकाशवाणी के नब्बे बछर पूरा होय के उपलक्ष्य म आकाशवाणी केंद्र रईपुर डहार ले काली आठ जून के बिसेस कारीकरम प्रसारित होही। प्रादेशिक समाचार एकांश डहार ले बनाय गे ए कारीकरम के प्रसारण बिहनिया साढ़े आठ बजे ले नौ बजे तक होही। छत्तीसगढ़ के सबो आकाशवाणी केंद्र ए कारीकरम ल एके संघरा प्रसारित करही।
आयुष पांडे-चयन
छत्तीसगढ़ के क्रिकेट खिलाड़ी आयुष पांडे के चयन भारत ‘ए‘ टीम म श्रीलंका दउरा बर करे गेहे। एखर संगे ओमन सिनियर ‘‘इंडिया ए‘‘ टीम म जघा बनइया छत्तीसगढ़ के पहलइया क्रिकेटर बन गेहे। आयुष ह पिछला रणजी टॉªफी सीजन म छत्तीसगढ़ बर सात ठिन मैच के तेरह पारी म संतावन दसमलव तीन के औसत ले पांच सौ तिहत्तर रन बनाय हवय। जेमा दू सतक अउ दू अर्ध सतक सामिल हे।
ट्रेन परिचालन
दक्षिण पूर्व मध्य रेलवे के नागपुर मंडल के रसमड़ा टेसन म मालगोदाम लाइन के कमिश्निंग काम बर नौ जून ले बारह जून तक प्री-नॉन इंटरलॉकिंग अउ नॉन इंटरलॉकिंग काम होही। ए पाय के कई ठिन यात्री गाड़ी परभावित रइही। जेमा रईपुर-डोंगरगढ़, डोंगरगढ़-रईपुर समेत आठ ठिन डेमू अउ मेमू गाड़ी मन दस अउ ग्यारा जून के केंसिल रइही। उहें, रईपुर-डोंगरगढ़ अउ डोंगरगढ़-बिलासपुर पैसेंजर गाड़ी मन दुरूग स्टेसन तक के चलही।
अउ अब थोरकुन समाचार सार म –
– राज्यसभा सांसद लक्ष्मी वर्मा ल संसद के ‘‘स्वास्थ्य अउ परिवार कल्याण संबंधी विभागीय संसदीय स्थायी समिति के सदस्य नामित करे गेहे।
– राज्यपाल रमेन डेका ह रईपुर म छत्रपति शिवाजी महाराज राज्य अभिषेक समारोह दिवस म उंखर मूर्ति के अनावरण करीन। ए मउका म ओमन महाराष्ट्र मंडल ल एंबुलेंस देके घोसना घलो करीन।
अउ
– आज विश्व खाद्य सुरक्षा दिवस हरय। ए बछर विश्व खाद्य सुरक्षा दिवस के बिसय हे। समस्या ले समाधान तक-हर जघा सुरक्षित भोजन