सुशासन तिहार म मुख्यमंत्री विष्णुदेव साय ह आज गौरेला-पेण्ड्रा-मरवाही जिला के निमधा गांव पहुंचिन अउ ग्रामीण मन ले भेंट करीन। ओमन ले बिजली, पानी, रासन, रद्दा, दवई पानी, शिक्षा अउ आवास जइसन जरूरी सुविधा के बारे म बिस्तार ले चर्चा करीन। ए मउका म मुख्यमंत्री ह ग्रामीण मनके मांग उपर जिला म नर्सिंग कालेज, निमधा गांव म मिनी स्टेडियम अउ मंगल भवन बर रासि स्वीकृत करे के घोसना करीन।
इही गोठबात के दउरान राजस्व विभाग ले जुड़े एक सिकायत सामने आइस, जेमा मुख्यमंत्री ह संबंधित राजस्व निरीक्षक ल कड़ा चेतावनी देवत हुए साफ किहीन कि जनता के समस्या ल बेरा म निराकृत करव, नइ तो कड़ा कारवाई बर तियार रहो। मुख्यमंत्री ह बतइन कि प्रदेस म जल्दीच सीएम हेल्पलाइन सुरू करे जाही, जेखर माध्यम ले लोगन मन टोल फ्री नंबर, ईमेल अउ व्हाट्सएप ले घलो अपन सिकायत दर्ज करा सकही।
मुख्यमंत्री ह आज सक्ती जिला के ठठारी गांव म घलो जनचौपाल लगइन। ए गांव म ग्रामीण मनके मांग उपर मुख्यमंत्री ह सहकारी बैंक खोले के घोसना करीन।
उपमुख्यमंत्री-निरीक्षण
लोक निर्माण मंत्री अरूण साव ह रईपुर-जगदलपुर रद्दा म केसकाल घाट फोरलेन बायपास रूट के निरीक्षण करीन। ओमन निर्माण एजेंसी ल बेरा म गुणवत्ता के संग काज ल पूरा करे के निरदेस दीन। ग्यारा किलोमीटर ले जादा लंबा ए रद्दा ल तीन सौ आठ करोड़ रूपिया के लागत ले बनाय जावत हे। ए बायपास म दू ठिन बड़का अउ दू ठिन मध्धम पूल घलो बनही। श्री साव ह केसकाल ले सलना तक रद्दा ल मजबूत करे बर चलत काम के निरीक्षण घलो करीन।
श्री साव ह अपन कोंडागांव प्रवास के दउरान जिला मुख्यालय म विभागीय अधिकारी मन संग बइठका करीन अउ आने-आने विकास काम के समीक्षा करीन। बइठका म ओमन जिला के तीन नगरीय निकाय-कांेडागांव, केसकाल अउ फरसगांव म बरसा ले पहिली सबो तियारी पूरा करे के निरदेस दीन अउ पिये के पानी के गुणवत्ता ल बनाय राखे बर सरलग जांच करे बर घलो किहीन।
श्री साव ह आज अपन जगदलपुर प्रवास के दउरान निर्माणाधीन नालंदा परिसर के संगेसंग आने-आने विकास काम के निरीक्षण करीन अउ अधिकारी मन ल सबो काम ल बेरा म पूरा करे के निरदेस दी
पिछड़ा वर्ग आयोग-बैठक
राष्ट्रीय पिछड़ा वर्ग आयोग के अध्यक्ष साध्वी निरंजन ज्योति ह काली सात जून के रईपुर के एक दिनी प्रवास म रइही। ओहा रईपुर म राखे गे पिछड़ा वर्ग संगठन के सामाजिक प्रगति चिंतन सम्मेलन म सामिल होही। एखर अलावा अधिकारी मनके एक ठिन समीक्षा बइठका लिही। ए बइठका म मुख्य सचिव के संग राज्य पिछड़ा वर्ग आयोग के प्रमुख सचिव घलो मौजूद रइही। अपन प्रवास के दउरान ओमन राज्यपाल रमेन डेका अउ मुख्यमंत्री विष्णुदेव साय संग शिष्टाचार भेंट करही।
उहंे, भारतीय जनता पार्टी के पिछड़ा वर्ग मोर्चा के राष्ट्रीय उपाध्यक्ष कृष्णा गौर ह घलो रईपुर पहुंचत हे। पिछड़ा वर्ग मोर्चा के प्रदेस अध्यक्ष अशोक साहू ह बतइन कि श्रीमती गौर ह प्रदेस पदाधिकारी मन संग बइठका करही अउ संगठन, पिछड़ा वर्ग के समाज के सशक्तिकरण अउ अवइया कारीकरम मनके बारे म मार्गदर्सन देही।
भाजपा पौधारोपण
भारतीय जनता पार्टी डहार ले पर्यावरण ल बचाय अउ संवारे बर एक बड़का पौधारोपण अभियान के सुरूआत करे गेहे। एखर तहत पूरा प्रदेस म इक्कीस लाख पउधा रोपे के लक्ष्य राखे गेहे। भाजपा प्रदेस महामंत्री अखिलेश सोनी ह बतइन कि प्रदेस के सबो बूथ म खच्चित पउधा रोपण के काम करे जाही।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सबो आकाशवाणी कंेंद्र एके संग रिले करही। ए दारी के अंक म आपमन ‘‘बिलासपुर‘‘ जिला के बारे म जानकारी सुनिहा।
पीएससी-परीक्षा
छत्तीसगढ़ लोक सेवा आयोग याने सीजी पीएससी के मुख्य लिखित परीक्षा आज ले सुरू हो गेहे। ए परीक्षा नौ जून तक चलही। परीक्षा दू पाली म होवत हे। पहिली पाली बिहनिया नौ बजे ले मंझनिया बारह बजे तक अउ दूसरइया पाली मंझनिया दू बजे ले संझा पांच बजे तक होही। परीक्षा बर पांच ठन केंद्र बनाय गेहे। रईपुर, बिलासपुर, दुरूग, अंबिकापुर अउ जगदलपुर।
छत्तीसगढ़ लोक सेवा आयोग के सदस्य डॉक्टर प्रवीण वर्मा अउ कलेक्टर डॉक्टर गौरव सिंह ह रईपुर म परीक्षा केंद्र के निरीक्षण करीन अउ व्यवस्था के जायजा लीन।
सनुइया मन ल बतादन कि सीजीपीएससी के प्रारंभिक परीक्षा बाईस फरवरी के आयोजित करे गे रिहीस।
धमतरी-गोदाम निर्माण
धमतरी जिला म भारतीय सहकारी उपभोक्ता महासंघ लिमिटेड याने एनसीसीएफ अउ छत्तीसगढ़ राज्य भंडारण गृह निगम कोति ले तीस हजार मीट्रिक टन के अतकहा अनाज भंडारण क्षमता विकसित करे जावत हे। केंद्र सरकार के विश्व के सबले बड़े अनाज भंडारण योजना अउ रेलवे माल गोदाम के तहत जिला म बड़का स्तर म अब्बड़ अकन गोदाम बनाय जावत हे। एखर बर धमतरी जिला के चार ठन प्राथमिक कृषि साख सहकारी समिति ल चुने गेहे। एमा अंवरी, कोसमर्रा, पोटियाडीह-आमदी अउ कोलियारी ह सामिल हे। ए चारों समिति मन म ढाई-ढाई हजार मीट्रिक टन क्षमता के नवा आधुनिक गोदाम बनत हे। एखरे संग राज्य भंडारण गृह निगम कोति ले धमतरी अउ कुरूद म दस-दस हजार मीट्रिक टन क्षमता के दू बड़का गोदाम के निर्माण चलत हे। एखर अलावा कुर्रा स्थित समिति म घलो नवा गोदाम बने के काम चालू होगे हे। उहें, धमतरी-केन्द्री बड़ी रेल लाइन परियोजना म रेलवे स्टेसन के संगेसंग माल गोदाम के निर्माण के काम घलो तेजी ले चलत हे।
सुनइया मन ल बतादन कि सरकार ह ए रबी मौसम म जिला के किसनहा मन ले साठ करोड़ चौव्वन लाख रूपिया के चना बिसाय गेहे।
रेरा-नोटिस
छत्तीसगढ़ रियल एस्टेट विनियामक प्राधिकरण-यानी रेरा ह प्रोजेक्ट के कॉमन एरिया ल रहइया या उंहा के समिति ल नइ सौंपे के मामला म पांच सौ पंचानवे बिल्डर मन ल कारण बताओ नोटिस जारी करे हे। रेरा अधिनियम के तहत घर के कब्जा देके बाद या ओ प्रोजेक्ट म एक निश्चित संख्या म घर बुक होय के बाद कॉमन एरिया ल हस्तांतरित करना जरूरी हे। रेरा ह पंद्रह दिन म ए नोटिस के जवाब मांगे हे। जवाब नइ देके स्थिति म बिल्डर मन उपर रेरा अधिनियम म मामला दर्ज करके कानूनी कारवाई करे जाही।
पद्म पुरस्कार
पद्म पुरस्कार बर नामांकन के प्रक्रिया जुलाई तक जारी रइही। गृह मंत्रालय ह बतइस हे कि पद्म पुरस्कार बर नामांकन अउ अनुसंसा जेन ह पंद्रह मार्च ले सुरू होइस हे, बस राष्ट्रीय पुरस्कार पोर्टल उपर ऑनलाइन ही स्वीकार करे जाही।
सुनइया मन ल बतादन कि पद्म पुरस्कार जेमा पद्म विभूषण, पद्म भूषण अउ पद्मश्री सामिल हे, एमन ह देस के सर्वोच्च नागरिक पुरस्कार म हेे।
म्यू थाई चैंपियनशिप
उत्तराखंड के हल्द्वानी म होय नेशनल म्यू थाई चैंपियनशिप म छत्तीसगढ़ ह सात स्वर्ण पदक समेत सत्रह मेडल जीते हे। ए चैंपियनशिप म छब्बीस राज्य अउ पांच केंद्रशासित प्रदेस के लगभग नौ सौ खिलाड़ी मन भाग लीन, जेमा छत्तीसगढ़ ले छत्तीस सदस्यीय दल ह सामिल होइन।
आजीविका कार्यक्रम
छत्तीसगढ़ के सात जिला म ग्रामीण परिवार मनके आय बढ़ाय बर एकीकृत त आजीविका कारीकरम सुरू करे जाही। मुख्य सचिव विकाससील ह ए संबंध म अधिकारी मन ल विस्तृत कार्य योजना तियार करे के निरदेस दीन हे। ए कारीकरम बस्तर, कांकेर, दंतेवाड़ा, सुकमा, बीजापुर, नारायणपुर अउ मोहला मानपुर अंबागढ़ चौकी जिला म सुरू करे जाही।