विश्व पर्यावरण दिवस
आज विश्व पर्यावरण दिवस आय। ए मउका म देसभर म आने-आने कारीकरम के आयोजन करे जावत हे। राष्ट्रपति द्रौपदी मुर्मू, उपराष्ट्रपति सी.पी.राधाकृष्णन, प्रधानमंत्री नरेंद्र मोदी अउ कतकोन केंद्रीय मंत्री मन विश्व पर्यावरण ेदिवस के सुभकामना देइन। ए मउका म प्रधानमंत्री नरेंद्र मोदी ह किहीन हे कि एक पेड़ मां के नाम जइसन पहल ह हर बछर लगभग एक दसमलव एक लाख हेक्टेयर वन क्षेत्र बढ़ाय म महत्वपूर्ण योगदान देहे। सोशल मीडिया पोस्ट म श्री मोदी ह किहीन कि आज के दिन ह पर्यावरण संरक्षण अउ सरलग बिकास ल बढ़ावा देय के प्रतिबध्दता ल व्यक्त करे के प्रतीक आय।
ऐति, प्रदेस म घलो आने-आने कारीकरम आयोजित करे जावत हंे। राज्यपाल रमेन डेका ह रइपुर के लोकभवन अउ नवा रइपुर म निर्माणाधीन लोकभवन परिसर म वृक्षा रोपण करीन। ए मउका म ओमन लोगन ले जादा ले जादा पेड़-पउधा लगाय अउ पर्यावरण ल सुरक्षित राखे के अपील करिन।
उहें, मुख्यमंत्री विष्णुदेव साय ह वन अउ जलवायु परिवर्तन विभाग डाहर ले रइपुर के राजीव स्मृति वन म ‘‘प्रकृति से प्रेरित-जलवायु के लिए, हमारे भविष्य के लिए‘‘ थीम उपर आयोजित कारीकरम म सामिल होइन। ए मउका म ओमन ‘‘एक पेड़ मां के नाम‘‘ अभियान के सुभारंभ करिन अउ प्रदेसवासी मनले घलो एक ठन पेड़ मां के नांव लगाय बर अपील करिन। इही बेरा, वन मंत्री केदार कश्यप ह किहीन कि छत्तीसगढ़ ह अपन समृध्द वन संपदा, जैव विविधता अउ प्राकृतिक संसाधन के सेति देस के समृध्द राज्य आय। राज्य सरकार ह पर्यावरण संरक्षण अउ हरित विकास ल सर्वोच्च प्राथमिकता देवत सरलग कारज करत हे। श्री कश्यप ह बतइन कि राज्य म एक पेड़ मां के नाम अभियान के तहत पाछू दू बछर म करोड़ों पेड़ लगाय गेहे। ए अभियान ह एक ठन बड़े जन आंदोलन के रूप ले चुके हे।
उहें, रइपुर म स्कूली लइका मन वन्यप्राणी के वेसभूषा म धारन करके रैली निकालीन अउ पर्यावरण संरक्षण के संदेस दीन। छत्तीसगढ़ पर्यावरण संरक्षण मंडल डाहर ले रइपुर म ही एक ठन कारीकरम होइस, जेमा पोस्टर प्रतियोगिता अउ इको क्लब के सिक्षक मन के प्रसिक्षण सत्र आयोजित करे गिस।
एखर अलावा, विश्व पर्यावरण दिवस के मउका म आज प्रदेस के आने-आने ग्राम पंचायत म घलो बिसेस ग्रामसभा के आयोजन करे गिस।
उच्च न्यायालय-नदी प्रदूषित
छत्तीसगढ़ उच्च न्यायालय ह प्रदेस के सराब फैक्ट्री ले निकलइया जहरीला पानी ले नदिया मनके प्रदूषित होय उपर नाराजगी जतइस हे। मुख्य न्यायाधीश के डिवीजन बेंच ह ए मामला के सुनवाई करत दू झन अधिवक्ता मन ल कोर्ट कमिश्नर नियुक्त करे हे। उहें, कोर्ट कमिश्नर मन प्रदेस के तीन ठन सराब डिस्टलरी यूनिट के संयुक्त निरीक्षण करहीं अउ अवइया तीस दिन के भीतर अपन रिपोर्ट सौंपही। ए मामला के अगला सुनवाई छै जुलाई के होही।
अरूण साव-प्रेसवार्ता
उपमुख्यमंत्री अरूण साव ह किहीन हे कि प्रधानमंत्री नरेंद्र मोदी के अगुवई म केंद्र सरकार के बारह बछर देस के बिकास, सुशासन अउ जनकल्याण के रेहे हे। ए दउरान देस ह हर क्षेत्र म कतकोन उपलब्धि हासिल करिस। श्री साव ह आज रइपुर पत्रकार मनले गोठबात करत बतइन कि केंद्र सरकार के उपलब्धि अउ जनकल्याणकारी योजना मन लेके आज ले इक्कीस जून तक महाजनसंपर्क अभियान चलाय जाही। भाजपा कार्यकर्ता घर-घर जाके जनसंपर्क अउ हितग्राही मनले संवाद करही। एखर अलावा प्रदर्सनी अउ जनजागरन कारीकरम आयोजित घलो करे जाही।
श्रमिक बच्चे-सम्मानित
मुख्यमंत्री विष्णुदेव साय ह आज श्रम विभाग डाहर ले रइपुर म आयोजित मेधावी छात्र-छात्रा सम्मान समारोह म सामिल होइन। ए मउका म मुख्यमंत्री ह छत्तीसगढ़ माध्यमिक शिक्षा मंडल के दसवीं अउ बारहवीं बोर्ड परीक्षा के मेरिट सूची म टॉप टेन म जघा बनइया पंजीकृत निर्माण श्रमिक मन के बाईस छात्र-छात्रा मन ल मुख्यमंत्री नोनी-बाबू मेधावी शिक्षा सहायता योजना के तहत दू-दू लाख रूपिया के प्रोत्साहन रासि देके सम्मानित करिन। एमा कक्षा दसवीं के नौ अउ बाहरवीं के तेरह विद्यार्थी सामिल हें। ए विद्यार्थी रइपुर, महासमुंद, दुरूग, गरियाबंद, सक्ती, बलौदाबाजार, रायगढ़ अउ कांकेर के संग आने-आने जिला के हंे।
मुख्यमंत्री ह सम्मानित विद्यार्थी मन ल बधई देत हुए किहीन कि उंखर सफलता सिरिफ व्यक्तिगत नइ, भलुक श्रमिक परिवार के संघर्ष, परिश्रम अउ संकल्प के प्रेरक कहानी हे।
बातों-बातों-में
प्रादेशिक समाचार एकांश के समसामयिक बिसय उपर आधरित कारीकरम ‘‘बातों-बातों-में‘‘ ए दारी विश्व पर्यावरण दिवस के मउका म अंबिकापुर म संचालित गार्बेज कैफे के संचालक रितेश सैनी ले लेय गे भेंटवार्ता के प्रसारण करे जाही। एखर प्रसारण काली छै जून के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे करे जाही। एला छत्तीसगढ़ के जम्मो आकाशवाणी केंद्र एक्के संघरा रिले करहीं।
दीक्षांत समारोह
राज्यपाल रमेन डेका अउ मुख्यमंत्री विष्णुदेव साय ह पंडित दीनदयाल उपाध्याय स्मृति स्वास्थ्य विज्ञान अउ आयुष विश्वविद्यालय के चौंथा दीक्षांत समारोह म सामिल होइन। जिंहा मेडिकल, डेंटल, आयुर्वेद, होम्योपैथी, मेडिकल बायोटेक, बी.पी.टी. एम.पी.टी. नर्सिंग, बीए एस.एल.पी. के संगे आने-आने संकाय के नौ हजार ले जादा विद्यार्थी मन ल उपाधि प्रदान करे गिस। एमा ले साढ़े सात हजार ले जादा स्नातक, डेढ़ हजार ले जादा स्नात्कोत्तर अउ पंाच सुपर स्पेशयलिटी उपाधि देय गिस। उहें, आने-आने संकाय म सबले जादा अंक पवइया विद्यार्थी मन ल स्वर्ण पदक प्रदान करे गिस।
कारीकरम ल संबोधित करत राज्यपाल ह किहीन कि-डिजीटल एडिक्सन आज के सबले बड़का समस्या म एक हे। ए हा सिरिफ मनखे नइ भलुक, पारिवारिक अउ सामाजिक जीवन ल घलो परभावित करत हे। नवा पीढ़ी ल एखर ले बाहिर निकले के जरूरत हे।
उहें, मुख्यमंत्री ह किहीन कि आज के दिन ह सिरिफ उपाधि पाय के दिन नइ हे, भलुक समाज अउ मानवता के प्रति नवा दायित्व के निर्वहन बर संकल्प लेके मउका आय। विद्यार्थी मनके सफलता उंखर व्यक्तिगत उपलब्धि के संगेसंग छत्तीसगढ़ के प्रगति अउ विश्वविद्यालय के प्रतिष्ठा ल घलो दरसाथे। ऐति, कारीकरम ल स्वास्थ्य मंत्री श्याम बिहारी जायसवाल ह घलो संबोधित करिन।
राष्ट्रीय कार्यशाला
वन अउ जलवायु परिवर्तन मंत्री केदार कश्यप ह अपन निवास कार्यालय म वर्चुअल माध्यम ले प्रदेस म हाथी संरक्षण, मनखे अउ हाथी के संघर्ष ल कम करे के मंसा ले आयोजित राष्ट्रीय कार्यसाला के सुभारंभ करीन। ए मउका म श्री कश्यप ह बतइन कि हाल बेरा हाथी मनके बिचरन- सरगुजा, बिलासपुर, रायगढ़, रइपुर अउ दुरूग संभाग के कतकोन इलाका म बगरे हे। अइसन म हाथी संरक्षण के संगेसंग प्रभावित इलाका म रहइया लोगन के सुरक्षा करना घलो जरूरी हे। राज्य सरकार ह जनभागीदारी, निगरानी अउ वैज्ञानिक प्रबंधन के जरिया ले मनखे अउ हाथी के संघर्ष ल कम करे बर सरलग उदिम करत हे। मंत्री ह बतइन कि बछर दू हजार बाईस म करीबन दू सौ चालीस हाथी रिहीन, जिंखर संख्या बाढ़ के बछर दू हजार छब्बीस म करीबन चार सौ पचास हो गेहे। एहा वन्य जीव संरक्षण के क्षेत्र म बड़का उपलब्धि आय।
बतादन कि, कार्यसाला म भारतीय वन्यजीव संस्थान देहरादून अउ भारतीय पशु चिकित्सा अनुसंधान संस्थान बरेली के संग देसभर के कतकोन बड़का संस्थान के बिसेसज्ञ, वन अधिकारी अउ पशु चिकित्सक मन ल प्रसिक्षण दे जावत हे। ए बेरा हाथी मनके मउत के कारण के वैज्ञानिक जांच, नमूना के संरक्षण, स्वास्थ्य परीक्षण, सह प्रबंधन अउ स्वास्थ्य निगरानी जइसन बिसय उपर जानकारी दे जाही।
उच्च न्यायालय-परीक्षा सुनवाई
छत्तीसगढ़ उच्च न्यायालय ह प्रदेस म एक्के दिन आयोजित होवइया दू ठन परीक्षा के तिथि म बदलाव ले इनकार कर देहे। एक ठन याचिका के सुनवाई करत न्यायालय ह किहीस कि-डी.एल.एड. के परीक्षा साल म दू घांव आयोजित करे जाथे, एखर सेति परीक्षार्थी मनके तिर अवइया परीक्षा म सामिल होय के विकल्प सुरक्षित हे। अइसन म जम्मो परीक्षा प्रणाली के कारीकरम म हस्तक्षेप करना उचित नइ होही।
अउ अब पेस हे मौसम के हाल…
मौसम विभाग के जानकारी ले दक्षिण-पश्चिम मानसून बारह जून तक छत्तीसगढ़ अमरे के संभावना हे। बतादन कि अवइया चौबीस घंटा के दउरान प्रदेस म एक-दू जघा हल्का ले मध्यम बरसा हो सकत हे। उहें, कुछेक जघा गरज-चमक के संग गाज गिरे के घलो चेतावनी देहे।