नगरीय निकाय के आम अउ उप चुनाव बर आज मतगणना होइस। राज्य निर्वाचन आयोग ले मिले जानकारी के अनुसार नगरीय निकाय म अध्यक्ष के पांच म ले तीन पद म भाजपा अउ दू पद म कांग्रेस ह जीत हासिल करीस। उहंे, पार्षद के इकहत्तर पद म ले उनतालीस म भाजपा अउ तीस म कांग्रेस के प्रत्यासी जितिन हे। दू पद म निर्दलीय प्रत्यासी मन जीत हासिल करे हे।
उहें, त्रिस्तरीय पंचायत चुनाव बर मतगणना, मतदान के दिन ही हो गे रिहीस। आज सारिणीकरण करे गीस अउ जीते हुए प्रत्यासी मन ल प्रमाण पत्र जारी करे गीस। बतइन हे कि त्रिस्तरीय पंचायत अउ नगरीय निकाय मन के आम अउ उपचुनाव बर एक जून के मतदान होय रिहीस।
एनडीए सरकार-बारह वर्ष
प्रधानमंत्री नरेंद्र मोदी के अगुवई म केंद्र म एनडीए सरकार के बारह बछर पूरा होय म मुख्यमंत्री विष्णुदेव साय ह छत्तीसगढ़ के जनता कोति ले श्री मोदी ल बधई अउ सुभकामना दीन। ओमन किहीन कि ए बारह बछर म देस ह बहुतअकन ऐतिहासिक उपलब्धि हासिल करे हे अउ विकास, सुशासन अउ जन कल्याण के क्षेत्र म नवा आयाम स्थापित करे हे।
राष्ट्रीय पंचायत पुरस्कार
केंद्रीय पंचायती राज मंत्री राजीव रंजन ंिसंह ह आज नई दिल्ली म देसभर के बयालीस उत्कृष्ट पंचायत मन ल राष्ट्रीय पंचायत पुरस्कार प्रदान करीन। कारीकरम म छत्तीसगढ़ के जशपुर जिला के सरदिह ग्राम पंचायत ल स्वच्छ अउ हरित पंचायत के पुरस्कार प्रदान करे गीस।
तहसीलदार-हड़ताल स्थगित
तहसीलदार म अपन हड़ताल स्थगित कर देहे। शासन स्तर म होय सकारात्मक चर्चा, आरोपी मन के खिलाफ एफआईआर अउ वैधानिक कारवाई सुरू होय के बाद छत्तीसगढ़ कनिष्ठ प्रशासनिक सेवा संघ ह सामूहिक अवकाश स्थगित करे के निरनय लेहे। संघ ह स्पष्ट करे हे कि प्रदेसभर के तहसीलदार, नायब तहसीलदार अउ कार्यपालिक मजिस्ट्रेट आज ल नियमित काम म लहुट गीन हे।
संघ के प्रांत अध्यक्ष कृष्णकुमार लहरे ह बतइन कि दू नामजद आरोपी मनके थाना म समर्पण के बाद हड़ताल स्थगित करे के निर्णय ले गीस।
बताइन कि सरगुजा के राजापुर म नायब तहसीलदार तुषार मानिक संग मारपीट अउ सरकारी काम म बाधा डाले के मामला म प्रदेसभर के तहसीलदार, नायब तहसीलदार अउ कार्यपालिक मजिस्ट्रेट प्रशासनिक विरोध जतात एक जून ले सामूहिक अवकाश म रिहीन।
सुशासन तिहार
सुशासन तिहार के तहत मुख्यमंत्री विष्णुदेव साय आज सारंगढ़-बिलाईगढ़ जिला के भीखमपुरा गांव पहंुचिन। ए दउरान मुख्यमंत्री ह जन चौपाल लगाके ग्रामीण मन ले गोठबात करीन अउ शासन जन कल्याणकारी योजना के क्रियान्वयन के जानकारी लीन। श्री साय भीखमपुरा गांव करा स्थित सपेरा बस्ती घलो पहुंचिन जिंहा ओमन पीएम आवास योजना के हितग्राही मनले भेंट करके ओमन के समस्या सुनिन।
सहकारिता मंत्री-खाद
सहकारिता मंत्री केदार कश्यप ह विभागीय अधिकारी मन ल निरदेस दीन हे कि किसान मन ल बेरा म खातू उपलब्ध कराय जाय। रासायनिक उर्वकर के उपलब्धता अउ वितरण व्यवस्था के समीक्षा करत श्री कश्यप ह जम्मो सहकारी समिति के गोदाम म जरूरी उर्वरक मन के पर्याप्त भंडार सुनिश्चित करे बर किहीन।
श्री कश्यप ह किसान क्रेडिट कार्ड-केसीसी योजना के बिस्तार म जोर देवत जम्मो जिला म बिसेस सिविर आयोजित करे के निरदेस दीन।
बासमती धान मिशन
प्रदेस म किसान मनके आय बढ़ाय अउ कृषि क्षेत्र म विविधीकरण ल बढ़ावा देके उद्देस्य ले राज्य सरकार ह बासमती धान के खेती ल प्रोत्साहित करे के निर्णय ले हे। कृषि मंत्री रामविचार नेताम के अध्यक्षता म नवा रईपुर म ए बिसय म उच्च स्तरीय बइठका आयोजित करे गीस। बइठका म श्री नेताम ह किहीन कि राज्य सरकार किसान मनके आय दोगुना करे के लक्ष्य के संग बासमती धान के खेती ल प्रोत्साहित करही। ओमन अधिकारी मन ल ए दिसा म गंभीरता ले काम करे के निरदेस दीन।
विश्व पर्यावरण दिवस
विश्व पर्यावरण दिवस के मउका म काली पांच जून के वन अउ जलवायु परिवर्तन विभाग डहार ले रईपुर के राजीव स्मृति वन म एक कारीकरम के आयोजन करे जाही। ‘‘प्रकृति से प्रेरित-जलवायु के लिए, हमारे भविष्य के लिए‘‘थीम म आयोजित ए कारीकरम के मुख्य अतिथि मुख्यमंत्री विष्णुदेव साय होही। उहें, वन मंत्री केदार कश्यप विशिष्ट अतिथि होही।
प्रधान मुख्य वन संरक्षक अउ वन बल प्रमुख अरूण कुमार पांडे ह बतइन कि ए मउका म मुख्यमंत्री अउ वन मंत्री ‘‘एक पेड़ मां के नाम‘‘ अभियान के सुभारंभ करही।
उहें, छत्तीसगढ़ पर्यावरण संरक्षण मंडल डहार ले विश्व पर्यावरण दिवस म काली रईपुर म कारीकरम के आयोजन करे जाही। कारीकरम म मुख्य अतिथि के रूप म पर्यावरण मंत्री ओपी चौधरी सामिल होही। कारीकरम के सुभारंभ पोस्टर प्रतियोगिता अउ ईको क्लब के शिक्षक मनके प्रसिक्षण सत्र ले होही।
मेडिकल कॉलेज-संविदा भर्ती
छत्तीसगढ़ के पांच ठिन नवा शासकीय मेडिकल कालेज म एक सौ उनचास पद मन उपर संविदा भर्ती करे जाही। चिकित्सा शिक्षा विभाग ह दंतेवाड़ा, मनेन्द्रगढ़, कुनकुरी, जांजगीर-चांपा अउ कबीरधाम मेडिकल कालेज बर प्राध्यापक सह प्राध्यापक अउ सीनियर रेजीडेंट के पद म ऑनलाइन आवेदन आमंत्रित करे हे। आवेदन के आखिरी तारीख पंद्रह जून निर्धारित करे गेहे। विभाग के अनुसार पात्र अभ्यर्थी मन के चयन दस्तावेज सत्यापन अउ साक्षातकार के आधार म करे जाही। इच्छुक उम्मीदवार विभाग के आधिकारिक वेबसाइट म ऑनलाइन आवेदन करे सकत हे।
इबोला वायरस
दुरूग जिला म इबोला वायरस ल लेके स्वास्थ्य विभाग अउ प्रशासन सतर्क हो गेहे। कांगो, इथियोपिया अउ युगांडा ले लहुटे तीन लोगन मन ल इबोला वायरस के संदिग्ध मानके ओमन के निगरानी करे जात हे। दुरूग कलेक्टर अभिजीत सिंह ह घलो एखर पुष्टि करत बतइन कि एकीकृत रोग निगरानी कारीकरम-आई. डी. एस. पी. ले सूचना मिल के बाद स्वास्थ्य विभाग ह संबंधित लोगन मन ल पहिचान के ओमन ल होम आईसोलेसन म राखे के निरदेस दे गेहे।
बतादन कि केंद्र सरकार ह इथियोपिया अउ युगांडा ले आय दू मनखे मनके आने-आने एयरपोर्ट के जरिया सीधा दुरूग पहुंचे के जानकारी दे रिहीस। जबकि, कांगो ले लहुटे एक मनखे पहिली मुंबई म रूकिस अउ एखर बाद दुरूग पहुंचिस। प्रदेस म इबोला वायरस ले जुड़े संदिग्ध मनखे ए पहिली मामला आगू आय के सेति स्वास्थ्य विभाग अउ प्रशासन बिसेस सतर्कता बरतत हे।
मुख्यमंत्री-निर्माण श्रमिक सम्मान
मुख्यमंत्री विष्णुदेव साय काली रईपुर म मुख्यमंत्री नोनी बाबू मेधावी शिक्षा सहायता योजना के तहत सैक्षणिक सत्र दू हजार पच्चीस-छब्बीस के कक्षा दसवीं अउ बारहवीं के बोर्ड परीक्षा म टॉपटेन म जघा बनइया पंजीकृत श्रमिक परिवार मन के निर्धारित लइका मन ल सम्मानित करही। योजना के तहत हरेक मेधावी छात्र ल एक लाख रूपिया के प्रोत्साहन रासि दे जाही। एखरे संग दूपहिया गाड़ी खरीदे बर एक लाख रूपिया के बिसेस अनुदान देके घलो प्रावधान हे।
मानसून-दस्तक
दक्षिण-पश्चिम मानसून आज केरलम पहुंच गेहे। मौसम विभाग ह एखर पुष्टि करत बतइस कि मानसून तीन दिन के देरी ले केरलम पहुंचे हे। मानसून के एक जून के केरलम पहुंचे के संभावना रिहीस।
केरलम पहुंचे के बाद मानूसन ल छत्तीसगढ़ तक पहुंचे म पंद्रह ले बीस दिन के समय लगथे।
मुख्यमंत्री किसान संवाद
मुख्यमंत्री विष्णुदेव साय ह किहीन हे कि खरीफ सीजन बर खातू अउ बीजा के पर्याप्त व्यवस्था करे गेहे अउ कालाबाजारी रोके बर निगरानी राखे जात हे। रईपुर म दूरदर्सन डहार ले आयोजित मुख्यमंत्री किसान, संवाद कारीकरम म ओमन प्रदेस के आने-आने जिला ले आय किसान मन ले चर्चा करके खेती किसानी मन नवा तकनीक अपनाय के आग्रह करीन। मुख्यमंत्री ह किहीन कि राज्य सरकार ड्रोन तकनीक, नैनो उर्वरक, जैविक खेती अउ फसल विविधीकरण ल बढ़ावा देके कृषि ल जादा फायदामंद अउ टिकाऊ बनाय बर काम करत हे। श्री साय ह किहीन कि खेती केवल आजीविका के साधन नही बल्कि हमर संस्कृति अउ पहिचान के आधार हे।