त्रिस्तरीय पंचायत उपचुनाव-मतगणना
प्रदेस म होय नगरीय निकाय चुनाव बर काली चार जून के मतगणना होही। कालीच त्रिस्तरीय पंचायत चुनाव के परिणाम घलो घोषित करे जाही। राज्य निर्वाचन आयोग ह मतगणना के जम्मों तियारी लगभग पूरा कर लेहे।
बतादन कि नगरीय निकाय अउ त्रिस्तरीय पंचायत के आम अउ उप-निर्वाचन बर एक जून के मतदान होय रिहीस। नगरीय निकाय म अध्यक्ष अउ पार्षद पद बर होय मतदान म चौरासी दशमलव पांच-आठ प्रतिशत मतदाता मन अपन मताधिकार के प्रयोग करीन। उहें, त्रिस्तरीय पंचायत म जनपद सदस्य, सरपंच अउ पंच पद बर अठहत्तर दशमलव छह-एक प्रतिशत मतदान दरज करे गीस।
राज्यपाल-रेत उत्खनन कार्रवाई
राज्यपाल रमेन डेका ह आज लोकभवन म राखे गे एक ठिन उच्च स्तरीय बइठका म खनिज विभाग के सचिव पी. दयानंद ले प्रदेस के नदियां अउ बड़का नरवा म होवत रेती के अवैध उत्खनन उपर चर्चा करीन। राज्यपाल ह अवैध अउ अनियंत्रित रेत उत्खनन म तुरते रोक लगाय के निरदेस दीन। ओमन किहीन कि रेत, राज्य के विकास अउ बुनियादी ढांचा के निर्माण बर एक अनिवार्य खनिज हे, लेकिन उंखर अनियंत्रित दोहन ले पर्यावरण ल गंभीर नुकसान पहुंचत हे।
सुशासन तिहार-मुख्यमंत्री
सुशासन तिहार के तहत मुख्यमंत्री विष्णुदेव साय काली चार जून के गौरेला विकासखंड के ग्राम पंचायत लमना म राखे गे जनसमस्या निवारण सिविर म सामिल होही। मुख्यमंत्री के प्रवास ल लेके जिला कलेक्टर डॉक्टर संतोष कुमार देवांगन ह आज सिविर स्थल के निरीक्षण करके तियारी के संबंध म जानकारी लीन।
एखर पहिली, मुख्यमंत्री ह काली कांकेर जिला म सुशासन तिहार के तहत कांकेर, कोंडागांव, नारायणपुर अउ बस्तर जिला म संचालित योजना अउ विकास काम के समीक्षा करीन।
ईडी-कार्रवाई
प्रवर्तन निदेशालय के रायपुर क्षेत्रीय कार्यालय ह छत्तीसगढ़ लोक सेवा आयोग-सीजीपीएससी भर्ती घोटाला ले जुड़े धनशोधन मामला के जांच के तहत आज राज्य के आने-आने जगह म तलाशी अभियान चलईस। ए कार्रवाई भिलाई, दुरूग, राजनांदगांव अउ रईपुर के लगभग दस ठिकाना म करे गीस। तलाशी ले गे प्रमुख जघा म पूर्व सीजीपीएससी सचिव जेके धु्रव के भिलाई स्थित निवास सामिल हे। सीआरपीएफ के सुरक्षा घेरा म ईडी अधिकारी मन ह दस्तावेज, डिजिटल उपकरण अउ वित्तीय लेन-देन ले जुड़ अभिलेख के जांच करीन। ए कार्रवाई बछर दू हजार बीस ले दू हजार बाईस के बीच आयोजित सीजीपीएससी भर्ती परीक्षा म कथित अनियमितता के सीबीआई जांच के आधार म करे जात हे।
ईडी के टीम ह दुरूग जिला के तलपुरी स्थित सेवानिवृत्त आईएएस अधिकारी अमृत कुमार खलखो के निवास के घलो जांच करीस। अधिकारी मन संपत्ति, बैंक खाता अउ दूसर वित्तीय अभिलेख ले जुड़े दस्तावेज के परीक्षण करीन। एखर अलावा ईडी ह राजनांदगांव म कृषि विस्तार अधिकारी भूपेन्द्र गणवीर अउ तत्कालीन परीक्षा नियंत्रक आरती वासनिक के रईपुर स्थित निवास म घलो दबिस दीस।
बाल सक्षम नीति-अभियान
छत्तीसगढ़ म सड़क उपर रहइया लइका मनके पुनर्वास बर जून महीना म विशेष सघन अभियान चलाय जात हे। राज्य सरकार के बाल सक्षम नीति के तहत सड़क म रहइया, भिक्षावृत्ति, बाल श्रम अउ कचरा सकेले म लगे लइका मनके पहिचान करके ओमन के बचाव अउ पुनर्वास करे जात हे। अभियान के तहत लइका मन ल सुरक्षित आश्रय, सिक्षा, स्वास्थ्य सुविधा अउ सामाजिक सुरक्षा उपलब्ध कराय जात हे। जिला कलेक्टर मनके अगुवई म गठित बिसेस बचाव टीम डहार ले चिन्हित हॉटस्पॉट जघा म अभियान चलाके लइका मन ल संरक्षण दे जात हे। राज्य सरकार ह केहे हे कि लइका मनके पुनर्वास सरलग प्रक्रिया हरय अउ ए काम सालभर तक चालू रइही
विशेष कार्यक्रम
प्रधानमंत्री नरेन्द्र मोदी के अगुवई म केन्द्र के एनडीए सरकार के बारह बछर पूरा होय म प्रादेशिक समाचार एकांश, आकाशवाणी केन्द्र रईपुर डहार ले आज रतिहा आठ बजे ले छत्तीसगढ़ी म विशेष कार्यक्रम के प्रसारण करे जाही। ए कार्यक्रम के बेरा पांच मिनट के रइही अउ एखर प्रसारण छत्तीसगढ़ स्थित आकाशवाणी के जम्मों केन्द्र एके संग करही।
सीजीपीएससी-मुख्य परीक्षा
छत्तीसगढ़ लोक सेवा आयोग-सीजीपीएससी ह राज्य सेवा मुख्य परीक्षा दू हजार पच्चीस के लिखित परीक्षा के कार्यक्रम जारी कर देहे। आयोग के अनुसार मुख्य परीक्षा छह ले नौ जून तक राखे जाही। परीक्षा हरेक दिन दू पाली म होही। पहिली पाली बिहनिया नौ बजे ले मंझनिया बारह बजे तक अउ दूसरइया पाली मंझनिया दू बजे ले संझा पांच बजे तक आयोजित करे जाही।
मुख्य परीक्षा अंबिकापुर, बिलासपुर, दुरूग, जगदलपुर अउ रईपुर स्थित परीक्षा केन्द्र म आयोजित करे जाही। आयोग ह बताय हे कि प्रवेस पत्र पच्चीस मई के जारी करे जा चुके हे। अभ्यर्थी आयोग के वेबसाइट ले अपन प्रवेस पत्र डाउनलोड कर सकत हे। आयोग ह स्पष्ट करे हे कि कोनों भी अभ्यर्थी ल अलग से प्रवेस पत्र या एसएमएस नइ भेजे जाही।
माशिमं-समय सारिणी
छत्तीसगढ़ माध्यमिक सिक्षा मंडल ह दसवीं अउ बारहवीं के दूसरा अवसर बर मुख्य परीक्षा के समय-सारिणी जारी कर देहे। हायर सेकेंडरी सर्टिफिकेट परीक्षा आठ जुलाई ले बाईस जुलाई अउ हाईस्कूल सर्टिफिकेट परीक्षा नौ जुलाई ले इक्कीस जुलाई तक राखे जाही। दूनांें परीक्षा बिहनिया नौ बजे ले मंझनिया सवा बारह बजे तक आयोजित करे जाही।
‘‘मंथ ऑफ सोलर‘‘-सम्मान
छत्तीसगढ़ ल प्रधानमंत्री सूर्यघर मुफ्त बिजली योजना के तहत आयोजित ‘‘मंथ ऑफ सोलर‘‘ अभियान म उत्कृष्ट प्रदर्शन बर राष्ट्रीय सम्मान मिलही। मुख्यमंत्री विष्णुदेव साय ह एला राज्य बर गरब के बात बतईन हे। मध्यम उपभोक्ता आधार वाला राज्य मनके श्रेणी म सबले जादा वेंडर पंजीकरण के मामला म छत्तीसगढ़ ह देस म दूसरा स्थान पाय हे, जेखर बर राज्य के चयन पीएम सूर्यघर एक्सीलेंस अवॉर्ड खातिर होय हे। मुख्यमंत्री ह ए उपलब्धि बर ऊर्जा विभाग, क्रेडा अउ विद्युत वितरण कंपनी के टीम ल बधाई दीन हे।
प्रधानमंत्री शोध पीठ योजना
उच्च सिक्षा विभाग ह प्रधानमंत्री सोध पीठ योजना बर आवेदन आमंत्रित करे हे। ए प्रमुख राष्ट्रीय पहल के उद्देश्य वैश्विक स्तर म प्रतिष्ठित विश्वविद्यालय, प्रयोगशाला, अनुसंधान संस्थान अउ उद्योग ले भारतीय मूल के प्रतिभाशाली अनुसंधानकर्ता, वैज्ञानिक, प्रौद्योगिकी के बिसेसज्ञ अउ पेशेवर मन ल देसभर के प्रमुख सरकारी उच्च सिक्षा संस्थान, राष्ट्रीय प्रयोगशाला अउ अनुसंधान केन्द्र कोति आकर्षित करना हे।
ठगी-आरोपी गिरफ्तार
दुरूग पुलिस ह शेयर बाजार म निवेस के नाम म लाखों रूपिया के धोखाधड़ी के मामला म एक झिन आरोपी ल गिरफ्तार करे हे। पुलिस के अनुसार सुपेला रहवासी एक मनखे ह जादा मुनाफा के लालच देके कई मनखे मन ल रकम निवेस करईस अउ ओमन ले करोड़ों रूपिया के ठगी करीस। सिकायत के आधार म पुलिस ह आरोपी के खिलाफ दू ठिन आने-आने प्रकरण दरज करे हे। पुलिस ह आरोपी करा ले एक ठिन कार, लैपटॉप, कम्प्यूटर उपकरण, मोबाइल फोन, चेक बुक अउ लेनदेन ले जुड़े दस्तावेज जब्ती करे हे। आरोपी ल न्यायिक रिमांड म भेज दे गेहे।
अउ अब पेस हे मौसम के हाल…
प्रदेस म अवइया चौबीस घंटा के दउरान एक-दू जघा म हल्का बरसा होय या गरज-चमक के संग छींटा पड़े के संभावना हे। उहें, कुछेक जघा म अंधड़ चले अउ गाज गिरे के चेतावनी दे गेहे। मौसम विभाग के अनुसार मानसून पूर्व गतिविधि सुरू होगे हे। एखर सेती राज्य के कई ठिन जघा म मौसम अचानक बदलत हे।
इही बीच, बीजापुर जिला के पेरमपल्ली गांव म गाज गिरे ले एक माईलोगिन के मउत होगे। उहें, दंतेवाड़ा जिला के चंदेनार साप्ताहिक बाजार म काली गाज गिरे ले ग्यारह मनखे एखर चपेट म आगीन, जेमा ले एक महिला के मउत होगे। एखर अलावा मनेन्द्रगढ़ करा चरखर गांव म घलो गाज गिरे ले एक महिला के मउत होगे। उहें, पांच झिन दूसर मनखे झुलसा गेहे।
अउ अब थोरकुन समाचार सार म –
– छत्तीसगढ़ के पूर्व वरिष्ठ प्रशासनिक अधिकारी अउ सेवानिवृत्त आईएएस बी.के.एस. रे के निधन होगे हे। ओमन लंबा बेरा ले बीमार रिहीन अउ उंखर उपचार रईपुर एम्स म चलत रिहीस।
– रईपुर नगर निगम ह संपत्ति कर के साथ वसूले जाने वाल यूजर चार्ज म बढ़ोतरी करे हे। नगर निगम के अनुसार आवासीय संपत्ति म सालाना एक सौ बीस रूपिया, उहें, व्यावसायिक संपत्ति म तीन सौ साठ रूपिया के बढ़ोतरी करे हे।
अउ
– सक्ती जिला के सेंदुरस गांव म पाछु रतिहा एक सियान दंपत्ति के हत्या
कर दे गीस। पुलिस ह मामला के जांच सुरू कर देहे।