प्रधानमंत्री स्वनिधि योजना
प्रधानमंत्री स्वनिधि योजना के छै बछर पूरा हो गेहे। प्रधानमंत्री नरेंद्र मोदी ह ए योजना के प्रसंसा करत किहीन कि पीएम स्वनिधि योजना ह बिना गारंटी के कर्जा, वित्तीय समावेसन अउ विकास के नवा मउका खोल के लाखों रेहड़ी-पटरी वाले मनके जिनगी म सुधार करे हे। प्रधानमंत्री ह सोसल मीडिया पोस्ट म किहीन कि ए योजना विस्वास, सम्मान उपर आधारित हे। बछर दू हजार बीस म योजना के सुरू होय के बाद अब तक ए करोड़ बारह लाख ले जादा कर्जा दे गेहे।
खेत बचाओ-अभियान
केंद्रीय कृषि मंत्री शिवराज सिंह चौहान ह आज मध्यप्रदेस के रायसेन जिला के रामसिया गांव ले राष्ट्रव्यापी ‘‘खेत बचाओ अभियान‘‘ के सुभारंभ करीन। एक महिना तक चलइया ए अभियान देस के खेती वाले भुंइया ल बचाय अउ किसान मन ल वैज्ञानिक खेती करे बर जागरूक करे के दिसा म ए बड़का पहल हरय।
ऐति, छत्तीसगढ़ म घलो प्राकृतिक खेती अउ मृदा संरक्षण ल बढ़ावा देबर आज ले खेत बचाओ अभियान सुरू हो गेहे। कृषि मंत्रालय के ए अभियान म किसान मन ल प्राकृतिक खेती, सही मात्रा म खातू के परयोग अउ माटी के उरवरा सक्ति ल बचाय के बारे म जागरूक करे जाही। ग्राम पंचायत, विकासखंड अउ जिला स्तर म कृषक संगोष्ठी, कृषि चौपाल अउ जन जागरूकता कारीकरम राखे जाही। कृषि वैज्ञानिक मन ह किसान मन ल रासायनिक खातू के दुष्प्रभाव अउ प्राकृतिक खेती के फायदा के बारे म जानबा दिही। अभियान के दउरान किसान मन ल अपन खेती वाले भुंइया के एक हिस्सा म प्राकृतिक खेती करे के बात केहे जाही। संगेसंग खातू के काला बाजारी अउ जमाखोरी रोके बर निगरानी व्यवस्था ल अउ मजबूत करे जाही।
त्रिस्तरीय पंचायत उपचुनाव
प्रदेस म नगरीय निकाय अउ त्रिस्तरीय पंचायत उपचुनइ बर आज मतदान डारे गीस। राज्य निर्वाचन आयोग के मुताबिक नगरीय निकाय म अध्यक्ष के पांच अउ पार्षद के इकहत्तर ठिन पद बर छियानवे मतदान केंद्र म मतदाता मन ह वोट डारिन। त उहें, त्रिस्तरीय पंचायत मन म जनपद पंचायत सदस्य, सरपंच अउ पंच के कुल एक सौ इंक्यावन पद बर दू सौ चौहत्तर मतदान केंद्र म एक लाख ले जादा मतदाता मन अपन मत के परयोग करीन।
नगरीय निकाय म मतदान बिहनिया आठ बजे ले संझा पांच बजे तक इलेक्ट्रानिक वोटिंग मसीन ले कराय गीस। त उहें, पंचायत चुनई म मतदान बिहनिया सात बजे ले मंझनिया तीन बजे तक मत पेटी के माध्यम ले होइस। पंचायत चुनाव के मतगणना मतदान के बाद एखर ले जुड़े केंद्र मन म चलत हे।
राज्यपाल-सम्मान
राज्यपाल रमेन डेका ह आज लोकभवन म राखे गे एक ठिन बिसेस कारीकरम म माना स्थित एसओएस बालिका गृह के नोनी मन ले गोठबात करीन। संगेसंग ओमन अंगदान अउ देहदान के संकलप लेवइया, मानवता के सेवा के संदेस देवइया पचहत्तर झिन लोगन मन ल सम्मानित करीन। ए मउका म राज्यपाल ह किहीन कि समाज म अंगदान के प्रति जागरूकता बढ़ाय ले कतकोन जरूरतमंद लोगन मन ल नवा जिनगी मिल सकथे। ओमन किहीन कि जउन लोगन मन अंगदान अउ देह दान के संकलप लेहे। ओमन समाज के बड़का नायक हरय। राज्यपाल ह नोनी मन ल शिक्षा, अनुशासन, आत्मविश्वास अउ कड़ा मेहनत करे के बारे म किहीन।
विश्व तंबाकू निषेध दिवस
विश्व तंबाकू निषेध दिवस के मउका म प्रदेसभर म नसा मुक्ति अउ जन-जागरूकता अभियान चलाके लोगन मन ल तंबाकू अउ आने नसीला पदार्थ के दुष्प्रभाव ले जागरूक करे गीस। इही कड़ी म सूरजपुर जिला विधिक सेवा प्राधिकरण डहार ले जागरूकता कारीकरम चलाय गीस। अभियान के तहत सहरी अउ ग्रामीण क्षेत्र मन म जागरूकता कारीकरम, संगोष्ठी अउ जन-संवाद राख के लोगन मन ल नसा के गलत प्रभाव के जानबा दे गीस। थाना मन म नियुक्त पैरालीगल वॉलेंटियर्स मन डहार ले कतकोन जघा म लोगन मन ल तंबाकू सेवन ले होवइया बीमारी के बारे म बताय गीस। ए मउका म गांव के लोगन मन के संगेसंग युवा मन ल नसा मुक्त समाज बनाय के सपथ देवाय गीस।
एलपीजी सिलेंडर-कीमत
होटल रेस्टारेंट अउ आने व्यवसाय मन म परयोग होवइया उन्नीस किलोग्राम के व्यवसायिक एलपीजी सिलेंडर के भाव म बढ़ोत्तरी करे गेहे। राजधानी रईपुर म वाणिज्यिक एलपीजी सिलेंडर के भाव म बावन रूपिया के बढ़ोत्तरी होय हे। त उहें, पांच किलोग्राम के सिलेंडर के भाव म तेरह रूपिया पचास पइसा के बढ़ोत्तरी होय हे।
मुख्यमंत्री-डिजीटल सुविधा केंद्र
मुख्यमंत्री ह आज कोंडागांव जिला के ग्राम पंचायत बड़ेकनेरा म बने अटल डिजीटल सुविधा केंद्र के निरीक्षण करीन। ए दउरान ओमन ग्रामीण डिजीटल सुशासन के अभिनव मॉडल ‘सेवा सेतु‘ के कामकाज ल घलो देखिन।
मुख्य कार्यपालन अधिकारी-निलंबित
सुशासन तिहार म राखे गे जनसमस्या निवारण सिविर म आम लोगन मन ले गलत व्यवहार अउ अपन काम म लापरवाही बरते के आरोप म जनपद पंचायत दुर्ग के मुख्य कार्यपालन अधिकारी रूपेश कुमार पांडे ल निलंबित कर दे गेहे। संभागयुक्त दुर्ग डहार ले जारी निलंबन आदेस म केहे गेहे कि जनसमस्या निवारण सिविर म ए अधिकारी मन डहार ले आम लोगन मनके संग गलत व्यवहार करे गीस, जउन ह छत्तीसगढ़ सिविल सेवा नियम के विपरीत हवय। ए बारे म संभागायुक्त दुर्ग डहार ले मुख्य कार्यपालन अधिकारी ल कारण बताओ नोटिस घलो जारी करे गे रिहीस। फेर ओमन एखर बने ढंग ले जवाब नइ दे पाइन। ए आदेस तुरते प्रभाव ले लागू हो गेहे।
विभागीय समीक्षा-बैठक
लोक निर्माण विभाग ह मार्च-दू हजार छब्बीस तक मंजूर करे गे जम्मों काम बर तीस जून तक निविदा मंगाय अउ इकतीस जुलाई तक काम सुरू करे के निरदेस देहे। लोक निर्माण विभाग के सचिव मुकेश कुमार बंसल ह आज जम्मों मुख्य अभियंता, अधीक्षण अभियंता, अउ कार्यपालन अभियंता मनके बइठका लेके विभागीय कामकाज के समीक्षा करीन। ओमन नक्सल प्रभावित क्षेत्र मन म सड़क संपर्क परियोजना ल अवइया बछर के इकतीस मार्च तक पूरा करे अउ संगेसंग भू-अर्जन ले जुड़े मामला मन ल अवइया छै महिना म निपटारा करे बर किहीन।
त उहें, पंचायत अउ ग्रामीण विकास विभाग के अपर मुख्य सचिव ऋचा शर्मा ह नवा रईपुर म विभागीय कामकाज के समीक्षा करीन। बइठका म ओमन किहीन कि आम लोगन मन ल विकसित भारत अधिनियम के बारे म पूरा जानबा देना शासन के पहिली प्राथमिकता हरय। ओमन एक जुलाई ले लागू होवइया ए अधिनियम के बारे म पूरा जानबा समाज के आखिरी मनखे तक पहुंचाय बर बिसेस जागरूकता अभियान चलाय के बात किहीन।
हिमाचल प्रदेश-हादसा
हिमाचल प्रदेस के चंबा जिला म होय सड़क दुघर्टना म भिलाई के चंद्राकर परिवार के संगेसंग आठ झिन लोगन के मउत होगे। ए घटना साच पास रद्दा उपर होइस, जिंहा पर्यटक मन ले भरे एक ठिन कार करीबन पांच सौ मीटर गहरा खाई म गिरगे। मृतक म भिलाई के एक दंपत्ति अउ दू झिन लइका घलो सामिल हे। ए परिवार मन बैंगलुरू म राहत रिहीन। जानबा के मुताबिक दू परिवार डलहौजी ले साच पास घूमे बर गे रिहीन। गाड़ी के वापिस नइ लहुटे के जानबा मिले के बाद जीपीएस के माध्यम ले एखर पता लगाय गीस। हादसा के कारण के जांच करे जात हे।
सट्टा-आरोपी गिरफ्तार
जुआ अउ सट्टा के विरूध्द चलाय जात ‘‘ऑपरेशन अंकुश‘‘ के तहत रायगढ़ पुलिस ह आईपीएल फाइनल मुकाबला के दउरान ऑनलाइन क्रिकेट सट्टा चलावत एक ठिन संगठित गिरोह के पर्दाफास करके दू झिन सटोरी मन ल गिरफ्तार करे हे। आरोपी मनके तीर ले मोबाइल फोन, नोट गिने के मसीन अउ सट्टा के रकम ले जुड़े इकतीस लाख निन्यानवे हजार रूपिया नगदी बरामद करे गेहे।
संक्षिप्त समाचार
अउ अब थोरकुन समाचार सार म –
– उपमुख्यमंत्री अरूण साव ह आज लोरमी के गांव जरहापारा म जन चौपाल लगाके गांव के लोगन मनले गोठबात करके जरहापारा म देवगुड़ी बनाय बर पांच लाख रूपिया देके घोसना करीन।
– प्रदेस के पुलिस महानिदेशक अरूणदेव गौतम ह धमतरी जिला म ‘पुलिस की पाठशाला‘ के लोकार्पण करीन। एमा आने-आने प्रतियोगी परीक्षा के तियारी ले जुड़े खिताब मन ल मुफत म दे जाही।
अउ
– रायगढ़ जिला के मांड नदी म हाथी के सावक के नदिया म डूबे ले मउत होगे। ए घटना खरसिया रेंज के गुर्दा गांव के तीर होइस।