राष्ट्रीय कृषि सम्मेलन
केंद्रीय कृषि विकास मंत्री शिवराज सिंह चौहान के अध्यक्षता म नई दिल्ली म राष्ट्रीय कृषि सम्मेलन के आयोजन करे गीस। सम्मेलन ल संबोधित करत केंद्रीय मंत्री श्री चौहान ह किहीन हे कि अब ले हर राज्य ल अपन एग्रीक्लाइमेटिक हालात, उपलब्ध संसाधन अउ स्थानीय संभावना के आधार म कृषि रोड मैप तियार करना चाही। केंद्र सरकार वैज्ञानिक संस्थान अउ मंत्रालय के पूरा टीम राज्य के संग ए दिसा म काम करे बर तियार हरय। श्री चौहान ह किहीन हे कि भारत ह खाद्यान्न उत्पादन म अभूतपूर्व उपलब्धि हासिल करीन हे। तीसरइया अग्रिम अनुमान के अनुसार देस के कुल खाद्यान्न उत्पादन करीबन तीस सौ छिहत्तर मिलियन टन ले जादा हे, जउन अब तक के सबले जादा हे। ओमन किहीन कि चांउर उत्पादन म भारत विश्व म पहिली स्थान म पहुंच गीस हे।
सम्मेलन म प्रदेस के कृषि मंत्री रामविचार नेताम घलो सामिल होइन। ए मउका म कृषि मंत्री श्री नेताम ह किहीन कि छत्तीसगढ़ अब परंपरागत धान के खेती के संघरा फसल विविधीकरण, डिजीटल तकनीक अउ पर्यावरण अनुकूल स्थायी कृषि के एक नवा युग म आगू बाढ़त हे। राज्य सरकार नवा अंजोर विजन- दू हजार सैंतालीस के जरिया राज्य के लगभग चालीस लाख किसान परिवार मनके आर्थिक उत्थान बर काम करत हे। एमा बयासी प्रतिसत लघु अउ सीमांत किसान अउ इकतीस प्रतिसत अनुसूचित जनजातीय के किसान सामिल हे। कृषि मंत्री ह बतइन कि सरकार के लक्ष्य किसान ल गुणवत्तायुक्त बीज संतुलित खातू उपलब्ध कराना हे।
प्रधानमंत्री आवास योजना-राशि
प्रधानमंत्री आवास योजना ग्रामीाण के तहत छत्तीसगढ़ समेत बारह ठिन राज्य ल दस हजार इक्कीस करोड़ रूपिया ले जादा के रासि स्वीकृत करे गेहे। मुख्यमंत्री विष्णुदेव साय ह ए फइसला के सुवागत करत किहीन कि प्रधानमंत्री नरेंद्र मोदी के अगुवई म हर गरीब ल पक्का घर के संकल्प तेजी ले पूरा होवत हे। ओमन किहीन कि ए सहायता ले छत्तीसगढ़ के हजारों ग्रामीण परिवार मनके पक्का घर के सपना साकार होही। मुख्यमंत्री ह किहीन कि राज्य सरकार जम्मों पात्र परिवार तक योजना के फायदा समय बध्द अउ पारदर्सी तरीका ले पहुंचाय बर प्रतिबध्द हरय।
राष्ट्रीय आम महोत्सव
रईपुर के इंदिरा गांधी कृषि विश्वविद्यालय म आज ले राष्ट्रीय आम महोत्सव के आयोजन करे जात हे। तीन दिन के महोत्सव के सुभारंभ राज्यपाल रमेन डेका ह करीन। उहें, समारोह के अध्यक्षता मुख्यमंत्री विष्णुदेव साय ह करीन। ए मउका म कृषि मंत्री रामविचार नेताम अउ रईपुर सांसद बृजमोहन अग्रवाल अति विशिष्ट अतिथि के रूप म मौजूद रिहीन। ए महोत्सव म छत्तीसगढ़ समेत आने-आने राज्य के आम उत्पादक सामिल होवत हे समारोह ल संबोधित करत राज्यपाल ह किहीन कि ए महोत्सव हमर कृषि परंपरा, ग्रामीण अर्थव्यवस्था, उद्यानिकी नवाचार अउ भारतीय सांस्कृतिक विरासत के उत्सव हरय।
उहें, मुख्यमंत्री ह राष्ट्रीय आम महोत्सव ल प्रदेस के किसान मन ल फायदेमंद बतइन हे। उद्यानिकी अउ प्रक्षेत्र वाणिकी अउ इंदिरागांधी कृषि विश्वविद्यालय डहार ले राखे गे ए महोत्सव म आम के आने-आने कीसम के प्रदर्सनी लगाय गेहे। ए प्रदर्सनी हरेक दिन मंझनिया बारह बजे रतिहा नौ बजे तक आम लोगन मन बर खुला रइही।
शिक्षा मंत्री-परीक्षा
केंद्रीय शिक्षा मंत्री धर्मेन्द्र प्रधान ह नीट पेपर लीक के घटना ल दुर्भाग्यपूर्ण बताय हे। श्री प्रधान ह आस्वासन दीन कि नीट के पुर्नपरीक्षा प्रक्रिया उचित अउ व्यवस्थित तरीका ले बिना कोनो गलती के संपन्न करे जाही।
छात्र मन ल संबोधित करत श्री प्रधान ह ओमन ल आस्वासन दीन कि सरकार ओमन के चिंता ल समझथे। केंद्रीय शिक्षा मंत्री श्री प्रधान ह किहीन कि सरकार ए सुनिश्चित करत हे कि केंद्रीय जांच ब्यूरो-सीबीआई ए मामला के पूरा जांच करय अउ दोषी मन ल कड़ा सजा दे जाय।
आईटीआई-आवेदन
राज्य के शासकीय औद्योगिक प्रसिक्षण संस्था-आईटीआई के खाली सीट मन उपर प्रवेस बर आज ले ऑनलाइन आवेदन के प्रक्रिया सुरू हो गेहे। इच्छुक पात्र अभ्यर्थी पंद्रह जून तक आधिकारिक वेबसाइट म आवेदन कर सकत हे। संचालनालय डहार ले जारी कारीकरम के अनुसार प्रवेस के प्रक्रिया तीन चरण म होही। पहिली चरण के चयन सूची सोलह ले बाईस जून तक जारी करे जाही। उहें, दूसरइया चरण के चयन सूची छब्बीस जून ले तीन जुलाई तक अउ तीसरइया चरण के चयन सूची आठ ले बारह जुलाई तक जारी करे जाही।
मुख्यमंत्री-मुलाकात
पद्मश्री सम्मान ले अंलकृत डॉ. सुनीता गोडबोले अउ डॉ. रामचंद्र गोडबोले ह आज रईपुर म मुख्यमंत्री विष्णुदेव साय ले सौजन्य भेंट करीन। मुख्यमंत्री ह ओमन के ए उपलब्धि म बधई अउ सुभकामना दीन। संघरा मुख्यमंत्री ह बस्तर के दूर-दराज के जनजातीय अंचल म दसक भर ले निःस्वार्थ चिकित्सा प्रदान करे के ओखर योगदान के सराहना करीन।
उहें, गोडबोले दंपत्ति ह आज वित्त मंत्री ओपी चौधरी ले घलो भेंट करीन। ए दउरान श्री चौधरी ह ओमन ल ए राष्ट्रीय उपलब्धि बर बधई अउ सुभकामना दीन।
माओवादी-सामग्री बरामद
महाराष्ट्र के गढ़चिरौली अउ छत्तीसगढ़ के नारायणपुर जिला के पुलिस ह आत्मसमर्पण कर चुके माओवादी मन ले मिले सूचना के आधार म एक ठिन संयुक्त अंतर्राज्यीय अभियान चलाइस। ए दउरान सुरक्षा बल मन गढ़चिरौली-नारायणपुर सीमा के जंगल म संचालित करे जात माओवादी मनके हथियार, निर्माण केंद्र ले हथियार, विस्फोटक अउ शस्त्र बनाय के जिनिस जब्ती करीस। जब्ती करे गे कई ठिन माओवादी जिनिस ल घटना स्थल म ही नष्ट घलो करे गीस।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए बखत ग्रीष्महलर अउ मानसून उपर रईपुर स्थित मौसम विज्ञान केंद्र के विज्ञानी डॉक्टर गायत्री वाणी ले लेगे बिसेस भेंटवार्ता के प्रसारण करे जाही। एखर प्रसारण काली तीस मई के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
अउ अब पेस हे मौसम के हाल…
मौसम विभाग के अनुसार एक ठिन द्रोणिका मध्य पाकिस्तान ले अंदरूनी ओडिसा, राजस्थान, मध्यप्रदेस अउ उत्तर छत्तीसगढ़ तक फइले हे। उहें, उपरी हवा के चक्रीय-चक्रवाती घेरा पूर्व मध्य बंगाल के खाड़ी म बने हुए हे। एखर अलावा बंगाल के खाड़ी ले नमी के आगमन सरलग होवत हे। एखर असर ले प्रदेस के मौसम म बदलाव होय के संभावना हे। मौसम विभाग ह अवइया चौबीस घंटा के दउरान प्रदेस के जम्मो संभाग के एक-दू जघा म गरज-चमक के संग अंधड़ चले अउ गाज गिरे के चेतावनी देहे। उहें, कुछेक जघा म हल्का बरसा होय या गरज-चमक के संग छींटा पड़े के आसार हे।
‘‘नियद नेल्लानार योजना-टू प्वाइंट ओ‘‘
छत्तीसगढ़ सरकार ‘‘नियद नेल्लानार योजना-टू प्वाइंट ओ‘‘ के तहत वामपंथ उग्रवाद ले मुक्त क्षेत्र अउ वनांचल के जम्मो ग्रामीण मन ल जन कल्याण कारी योजना ले जोड़के सत-प्रतिसत फायदा पहुंचाही। मुख्य सचिव विकाससील के अध्यक्षता म मंत्रालय म राखे गे उच्च स्तरीय बइठका म ए योजना के रूप रेखा म आज चर्चा करे गीस।
योजना के तहत दूसरइया चरण म इकतीस ठन व्यक्तिगत हितग्राही योजना, चौदह सामुदायिक सुविधा अउ दस ठिन जरूरी सेवा गांव-गांव तक पहुंचाय जाही। सरकार डहार ले ग्रामीण मन ल मनरेगा जॉब कार्ड, प्रधानमंत्री आवास योजना, आयुष्मान कार्ड, रासन कार्ड, वृध्दावस्था पेंसन, किसान सम्मान निधि, महतारी वंदन योजना अउ कौशल विकास जइसे योजना ले जुड़े जाही। संघरा गांव मन म आंगनबाड़ी केंद्र, स्वास्थ्य सुविधा, सड़क अउ मोबाइल कनेक्टिविटी, बैंकिंग सेवा, पंचायत भवन अउ नवा कालेज बनाय जाही।
अउ अब थोरकुन समाचार सार म –
– एंटी करप्शन ब्यूरो-एसीबी के टीम ह कोरबा जिला के पोड़ी-उपरोड़ा विकासखंड के तुमान म चलत सुशासन तिहार समाधान सिविर म एक झन लिपिक प्रदीप मिश्रा ल चालीस हजार रूपिया के रिस्वत लेवत रंगेहाथ गिरफ्तार करे हे।
– बालोद जिला के पुरूर थाना पुलिस ह स्कूटी ले गांजा तस्करी करत एक झन आरोपी ल गिरफ्तार करे हे। एखर करा ले बारह किलो ले जादा गांजा बरामद करे गेहे, जेखर कीमत छै लाख रूपिया ले जादा बताय गेहे।
अउ
– रोजगार कार्यालय रईपुर कोति ले अस्थिबाधित दिव्यांगजन मन बर पांच जून के शासकीय कन्या पॉलीटेक्निक कॉलेज बैरन बाजार बिसेस रोजगार मेला के आयोजन करे जाही।