गौण खनिज निधि
छत्तीसगढ़ सरकार ह त्रिस्तरीय पंचायत व्यवस्था ल मजबूत करे बर जिला पंचायत मन ल घलो गौण खनिज निधि म हिस्सा देय के आदेस जारी कर देहे। खनित साधन विभाग के मुताबिक गौण खनिज मन ले मिलइया रासि के वितरण ग्राम पंचायत, जनपद पंचायत अउ जिला पंचायत के बीच तय अनुपात म करे जाही। ए निधि के उपयोग स्कूल, अस्पताल, सामुदायिक, सौचालय, मुक्तिधाम अउ सड़क जइसन विकास काम म करे जा सकही।
मुख्यमंत्री विष्णुदेव साय ह कहिन हे कि ए फइलसा ले पंचायत मन ल आर्थिक मजबूती मिलही अउ ग्रामीण विकास काम म तेजी आही।
राष्ट्रीय कृषि सम्मेलन
केंद्रीय कृषि अउ किसान कल्याण मंत्री शिवराज सिंह चौहान ह किहीन हे कि भारत के किसान मन के मेहनत के सेति देस म पर्याप्त खाद्य भंडार मौजूद हे। नई दिल्ली म खरीफ अभियान बर राष्ट्रीय कृषि सम्मेलन के उद्घाटन समारोह ल संबोधित करत श्री चौहान ह बतइन कि ए बछर देस म अनुमानित खाद्यान्न उत्पादन तीन सौ छिहत्तर करोड़ टन ले जादा हे, जउन पाछू बछर के तुलना म पांच दसमलव तीन प्रतिसत जादा हे। श्री चौहान ह किहीन हे कि दू दिन के ए सम्मेलन खरीफ कृषि क्षेत्र के कल्याण बर एक रोडमैप तियार करे म सहायक होही। ए सम्मेलन के उद्देस्य अवइया खरीफ ऋतु बर रणनीति म विचार-विमर्स करना हे।
इम्प्रूव्ड राईस स्कीम
छत्तीसगढ़ म जल्दीच ‘इम्प्रूव्ड राईस स्कीम‘ लागू करे जाही। ए बारे म काली रायपुर म खाद्य विभाग के सचिव रीना बाबा साहेब कंगाले के अगुवई म राज्य स्तरीय कार्यशाला राखे गीस। बइठका म श्रीमती कंगाले ह कहिन हे कि केन्द्र सरकार अवइया खरीफ बछर म ‘इम्प्रूव्ड राईस स्कीम‘ ल प्राथमिकता के संग लागू करे के दिसा म काम करत हे। एखर बर राज्य के राईस मिल मन ल तकनीकी रूप ले अपग्रेड करना जरूरी होही। ओमन आश्वस्त करीन कि मिलर्स डहार ले दे गे सुझाव अउ समस्या के परीक्षण करके जरूरी प्रस्तव केन्द्र सरकार ल भेजे जाही।
सेल अध्यक्ष-भिलाई
स्टील अथॉरिटी ऑफ इंडिया लिमिटेड-सेल के अध्यक्ष अउ प्रबंध निदेशक डॉक्टर अशोक कुमार पंडा ह अपन भिलाई प्रवास के दउरान भिलाई इस्पात संयंत्र-बीएसपी के परिचालन, उत्पादन, वित्तीय स्थिति अउ विकास योजना मनके समीक्षा करीन। ए दउरान ओमन संयंत्र प्रबंधन ल लक्ष्य निर्धारित करे, सुरक्षा मानक ल मजबूत करे अउ उत्पादन म सुधार उपर बिसेस ध्यान देके निरदेस दीन।
पत्रकार मन ले गोठबात करत श्री पंडा ह कहिन कि रावघाट परियोजना छत्तीसगढ़, सेल अउ पूरा देस बर महत्वपूर्ण हवय। रावघाट म पर्याप्त लौह अयस्क भंडार मौजूद हवय। एखर ले देस ल लौह अयस्क मिलही अउ भिलाई इस्पात संयंत्र के विस्तारित क्षमता ल घलो मजबूती मिलही।
श्री पंडा ह सेल के भविष्य के योजना मनके बारे म बतईन कि कंपनी ह अवइया चार ले पांच बछर म अपन उत्पादन क्षमता बीस मिलियन टन ले बढ़ाके पैंतीस मिलियन टन हर बछर करे के लक्ष्य राखे हे।
ईएसआईसी मेडिकल कॉलेज-आवेदन
केन्द्रीय श्रम अउ रोजगार मंत्रालय के तहत अवइया कर्मचारी राज्य बीमा निगम-ईएसआईसी ह देसभर के अपन बीस प्रतिष्ठित मेडिकल कॉलेज मन म बीमित श्रमिक मनके लइका मन बर सात सौ सीट आरक्षित करे हे। एखर बर ऑनलाइन आवेदन करे के आखिरी तारीख इकतीस मई ले बढ़ाके इक्कीस जून कर दे गेहे।
छत्तीसगढ़ के श्रमायुक्त कार्यालय के मुताबिक ए आरक्षित सीट म योग्य उम्मीदवार के चयन नीट यूजी परीक्षा के माध्यम ले करे जाही।
सीबीएसई-ओएसएम प्रणाली
केंद्रीय शिक्षा मंत्री धर्मेद्र प्रधान ह विद्यार्थी मन ल आश्वस्त करे हे कि केंद्रीय माध्यमिक शिक्षा बोर्ड-सीबीएसई डहार ले सुरू करे गे नवा ऑन-स्क्रीन मार्किंग-ओएसएम प्रणाली जादा पारदर्सिता सुनिश्चित करे के उद्देस्य ले एक ‘‘प्रगतिशील साधन‘‘ आय। श्री प्रधान ह नई दिल्ली म सीबीएसई अधिकारी मन के संग बइठका के बाद ए बात किहीन। सीबीएसई कक्षा बारहवीं के परीक्षा के पुनर्मूल्यांकन पोर्टल म ओएसएम प्रणाली म विसंगती अउ तकनीकी खराबी ल लेके श्री प्रधान ह स्वीकार करीन हे कि कुछेक मुद्दा आगू आय हे। ओमन विद्यार्थी मन ल आश्वासन दे हे कि पुनर्मूल्यांकन के दउरान जम्मो सिकायत मन के समाधान करे जाही।
ईद-उल-अजहा
ईद-उल-अजहा आज छत्तीसगढ़ समेत देस के आने-आने भाग म मनाय जावत हे। त्याग अउ बलिदान के ए तिहार ल मुस्लिम समुदाय के लोगन मन ह ईदगाह अउ मस्जिद मन म बिसेस नमाज अदा करीन। ईद-उल-अजहा हजरत इब्राहिम डहार ले खुदा के आदेस के पालन करत अपन इकलौता बेटा के कुर्बानी देके सुरता म मनाय जाथे।
राष्ट्रपति द्रौपदी मुर्मु, उपराष्ट्रपति सी.पी.राधाकृष्णन अउ प्रधानमंत्री नरेंद्र मादी ह ईद-उल-अजहा म देसवासी मन ल बधई दीन हे।
वीर सावरकर-जयंती
आज महान क्रांतिकारी अउ चिंतक वीर दामोदर सावरकर के जयंती हवय। ए मउका म मुख्यमंत्री विष्णुदेव साय ह ओमन ल श्रद्धांजलि अर्पित करीन श्री साय ह कहिन कि भारत के स्वाधीनता बर अपन जिनगी समर्पित करइया वीर सावरकर के अदम्य साहस, त्याग, राष्ट्रनिष्ठा अउ अटूट संकल्प के अमर कहानी हवय। विपरीत परस्थिति म घलो राष्ट्रहित के प्रति उंखर अटूट प्रतिबद्धता अवइया पीढ़ि ल निरंतर प्रेरित करत रइही।
पीडब्ल्यूडी-समीक्षा बैठक
लोक निर्माण विभाग के सचिव मुकेश कुमार बंसल ह बरसा ले पहिली जम्म्मो सड़क के मरम्मत कर ओला गड्ढा मुक्त करे के निरदेस दीन हे। रायपुर परिक्षेत्र के दूनों मंडल के स्वीकृत, निर्माणाधीन अउ निविदा प्रक्रिया के प्रगति के समीक्षा के दउरान श्री बंसल ह अधिकारी मन ले किहीन कि स्वीकृत काम के प्राथमिकता सूची तियार कर दस जून तक भेजे जाही। ओमन निर्माण काम के गुणवत्ता के संगेसंग समय-सीमा म पूरा करे ल किहीन। संगेसंग अनुविभागीय अधिकारी मन ल लेके प्रमुख अभियंता तक जम्मो अधिकारी मन ल हर मंगलवार मुख्यालय म ही रहय के घलो निरदेस दीन।
सीयूईटी यूजी-परीक्षा तिथि
राष्ट्रीय परीक्षा एजेंसी-एनटीए ह संयुक्त विश्वविद्यालय प्रवेस परीक्षा-सीयूईटी यूजी दू हजार छब्बीस के संसोधित तारीख अउ प्रवेस पत्र जारी कर देहे। एनटीए के मुताबिक परीक्षा अब इकतीस मई, छह अउ सात जून के राखे जाही। ईद-उल-अजहा के सेती तारीख म बदलाव करे गेहे। एनटीए ह बतईन कि इकतीस मई के परीक्षा देवइया उम्मीदवार मनके प्रवेस पत्र जारी कर दे गेहे। छह अउ सात जून के परीक्षा बर प्रवेस पत्र जल्दीच जारी करे जाही।
राष्ट्रीय आम महोत्सव
रायपुर के इंदिरा गांधी कृषि विश्वविद्यालय म काली उनतीस मई ले राष्ट्रीय आम महोत्सव के आयोजन करे जाही। तीन दिवसीय ए महोत्सव के सुभारंभ राज्यपाल रमेन डेका ह करही। उहें, समारोह के पगरइती मुख्यमंत्री विष्णुदेव साय करही। ए मउका म कृषि मंत्री रामविचार नेताम अउ रायपुर सांसद बृजमोहन अग्रवाल माई पहुना के रूप म मौजूद रइही।
उद्यानिकी अउ प्रक्षेत्र वानिकी अउ इंदिरा गांधी कृषि विश्वविद्यालय डहार ले आयोजित ए महोत्सव म आम के आने-आने कीसम के प्रदर्सन लगाय जाही। इकतीस मई तक चलइया ए महोत्सव के दउरान आम उत्पादन के नवा तकनीक, प्रसंस्करण अउ विपणन संबंधी बिसय उपर बिसेसज्ञ डहार मार्गदर्शन दे जाही। प्रदर्सन हरेक दिन मंझनिया बारह बजे ले रतिहा नौ बजे तक आम लोगन मन बर खुले रइही।
अउ अब पेस के मौसम के हाल…
प्रदेस के मौसम म काली ले बदलाव होय के संभावना हे। मौसम विज्ञानी डॉक्टर गायत्री वाणी ह आकाशवाणी समाचार ल बतईन कि ए बेरा एक ठिन चक्रवाती घेरा झारखंड म बने हे। उहें, एक द्रोणिका उत्तरप्रदेश ले आंध्रप्र्रदेश तक विस्तारित हे। एखर असर ले प्रदेस के मौसम म बदलाव होय के संभावना हे। काली उत्तर छत्तीसगढ़ म एक-दू जघा म हवा गरेर अउ गरज-चमक के संग बरसा होय के संभावना हे। उहें, कुछ जघा म करा गिर सकत हे। काली ले अवइया चार दिन तक प्रदेस के अधिकतम तापमान म दू ले चार डिग्री सेल्सियस तक गिरावट संभावित हे।