एनडीए सरकार-बारह साल
प्रधानमंत्री नरेन्द्र मोदी के अगुवई म एनडीए सरकार ल आज बारह बछर पूरा होगे हे। ए मउका म छत्तीसगढ़ के मुख्यमंत्री विष्णुेदव साय ह प्रधानमंत्री ल सोशल मीडिया प्लेटफॉर्म ‘‘एक्स‘‘ म बधाई दीन हे। मुख्यमंत्री ह कहिन कि प्रधानमंत्री के दूरदर्शी, निर्णायक अउ जनकेन्द्रित अगुवई म भारत ह सेवा, सुरक्षा, आत्मविश्वास अउ विकास के नवा युग म पहुंचत हे। श्री साय ह कहिन कि पाछु बारह बछर म प्रधानमंत्री ह सेवा, सुशासन अउ अंत्योदय के भावना ल केन्द्र म राखत ए सुनिश्चित करे हे कि विकास के फायदा समाज के आखिरी मनखे तक पहुंचे। ओमन किहीन कि गरीब, किसान, माईलोगिन, युवा अउ जनजातीय समाज के जीवन म सकारात्मक बदलाव लाय के जउन संकल्प प्रधानमंत्री ह लीन हे, ओ ह आज देस के हरेक जघा दिखाई देवत हे।
आदर्श शहर समृद्धि योजना
राज्य सरकार ह नगर पालिका अउ नगर पंचायत के समग्र विकास बर ‘‘आदर्श शहर समृद्धि योजना‘‘ सुरू करे के घोषणा करे हे। योजना के पहिली चरण म प्रदेस के बत्तीस नगरीय निकाय के चयन करे गेहे। एमा बस्तर, सरगुजा अउ रायपुर संभाग के छह-छह अउ बिलासपुर संभाग के नौ अउ दुरूग संभाग के पांच निकाय सामिल हे। एमा सड़क, जल आपूर्ति, ड्रेनेज, परिवहन, पार्क, आवास, ई-गवर्नेंस, स्मार्ट टैªफिक अउ हरित क्षेत्र समेत नागरिक सुविधा के विकास करे जाही। योजना के तहत काम के चुनई अउ निरीक्षण बर संभाग स्तरीय समिति के गठन करे गेहे, जउन मन ल पन्द्रह दिन म कार्ययोजना तैयार करे के निरदेस दे गेहे।
मुख्यमंत्री विष्णुेदव साय ह कहिन कि आदर्श शहर समृद्धि योजना प्रदेस के सहरी विकास ल नवा गति अउ नवा दिसा देके काम करही।
मुख्यमंत्री-खरीफ सीजन
प्रदेस म अवइया खरीफ सीजन के तैयारी ल देखत मुख्यमंत्री विष्णुदेव साय ह किसान मनके हित म निरदेस देहे। ओमन कहिन हे कि ट्रैक्टर ले जुताई अउ सिंचाई पंप बर किसान मन ल जरूरत मुताबिक डीजल के व्यवस्था सुनिश्चित करे जाय, जेखर ले खेती-किसानी के काम प्रभावित झन होवय। खबर के मुताबिक राज्य म पेट्रोल-डीजल के दुरूपयोग ल रोके बर ड्रम अउ अउ जरीकेन म ईंधन वितरण म लगे रोक म किसान मन ल छूट दे गेहे, जेखर ले खरीफ काम बाधित झन होवय।
रूपनारायण सिन्हा-निधन
छत्तीसगढ़ योग आयोग के अध्यक्ष रूपनारायण सिन्हा के आज निधन होगे। मिले खबर के मुताबिक श्री सिन्हा बिलासपुर म राखे गे भारतीय जनता पार्टी के दू दिन के प्रसिक्षण कार्यक्रम म सामिल होय बर गे रिहीन। ए दउरान उंखर तबीयत बिगड़े म ओमन ल बिलासपुर के सिम्स म भर्ती कराय गीस, जिहां डॉक्टर मन ह ओमन ल मृत घोषित कर दीन। रूपनारायण सिन्हा लंबा बेरा ले भाजपा संगठन ले जुड़े रिहीन।
उंखर निधन म मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह समेत भाजपा के बड़का नेता मन सोक जताय हे।
बकरीद-अवकाश
राज्य सासन ह ईद-उल-अजहा यानी बकरीद के मउका म घोषित छुट्टी म बदलाव करे हे। सामान्य प्रशासन विभाग डहार ले जारी आदेस के मुताबिक प्रदेस के जम्मों कार्यालय, विभाग अउ सरकारी संस्थान मन म अब सत्ताईस के जघा अट्ठाईस मई के छुट्टी रइही। ए फइसला चांद दिखे के संभावित तारीख अउ तिहार ल ध्यान म राखत ले गेहे।
राज्यपाल-पीएम जनमन योजना
राज्यपाल रमेन डेका ह आज लोकभवन म प्रधानमंत्री जनजाति आदिवासी न्याय महाअभियान-पीएम जनमन योजना के समीक्षा बइठका लीन। बइठका म पीएम जनमन योजना के तहत ग्यारह बिन्दु उपर चर्चा करे गीस। राज्यपाल ह विशेष पिछड़ी जनजाति मन बर मंजूर करे गे प्रधानमंत्री आवास योजना के काम ल जल्दी पूरा करे के निरदेस दीन। ओमन जनजातीय क्षेत्र के रद्दा के खराब स्थिति म नाराजगी जतावत अधिकारी मन ल गुणवत्ता के संग सड़क बनाय बर कहिन।
नवा रायपुर-एसईजेड
राज्य सासन ह नवा रायपुर म इलेक्ट्रॉनिक्स अउ इंजीनियरिंग आधारित दूसर विशेष आर्थिक क्षेत्र-एसईजेड स्थापित करे ल मंजूरी दे देहे। एखर तहत पॉलीमेटेक इलेक्ट्रॉनिक्स लिमिटेड डहार ले दस हेक्टेयर ले जादा क्षेत्र म सेमीकंडक्टर अउ इलेक्ट्रॉनिक्स उत्पाद के निर्माण करे जाही। नवा रायपुर म बनइया ए विशेष आर्थिक क्षेत्र राज्य के निर्यात ल बढ़ावा देके संगेसंग नवा निवेस आकर्षित करे अउ छत्तीसगढ़ ल वैश्विक इलेक्ट्रॉनिक्स आपूर्ति श्रृंखला ले जोड़े म बिसेस भूमिका निभाही।
मुख्यमंत्री विष्णुदेव साय ह कहिन हे कि सेमीकंडक्टर तकनीक भविष्य के जरूरत हे। ओमन कहिन कि नवा रायपुर म राज्य के पहिली सेमीकंडक्टर निर्माण संयंत्र स्थापित होय ले छत्तीसगढ़ के तकनीकी भविष्य के नींव मजबूत होही। संगेसंग युवा मन ल रोजगार घलो मिलही।
आंगनबाड़ी केन्द्र-भवन स्वीकृति
राज्य सरकार ह बस्तर संभाग के जिला म चलत बांचे पांच सौ छह बिना भवन के आंगनबाड़ी केन्द्र मन बर भवन मंजूरी के काम ल तेज कर देहे। मुख्य सचिव स्तर म पाछु सोलह मई के राखे गे समीक्षा बइठका म बस्तर संभाग के हरेक ग्राम पंचायत म आंगनबाड़ी भवन निर्माण ल सासन के प्राथमिकता बतावत संबंधित जिला कलेक्टर मन ल निरदेस जारी करे गेहे। आंगनबाड़ी भवन निर्माण बर हरेक भवन बर ग्यारह लाख उनहत्तर हजार रूपिया के रासि निर्धारित करे गेहे।
मुख्यमंत्री विष्णुदेव साय ह कहिन हे कि सरकार के लक्ष्य नक्सल मुक्त घोषित जिला मन म आंगनबाड़ी भवन के निर्माण कराना हे। ओमन अधिकारी मन ल निर्माण काम ल गुणवत्ता के संग करे के निरदेस दीन हे।
तेंदूपत्ता गोदाम-आगजनी
बीजापुर जिला के ईटपाल स्थित एक तेंदूपत्ता गोदाम म आगी लगे ले करीबन दस करोड़ रूपिया ले जादा के तेंदूपत्ता जलके राख होगे। ए घटना म गोदाम के स्ट्रक्चर ल करीबन दू ले तीन करोड़ रूपिया के नुकसान होय हे।
बस्तर वृत्त के मुख्य वन संरक्षक आलोक तिवारी ह बतईन कि गोदाम म आठ फड़ म राखे गे तेंदूपत्ता म काली आगी लग गे। ओमन बतईन कि घटना के जानकारी मिलतेच कलेक्टर अउ पुलिस अधीक्षक के संगेसंग वरिष्ठ अधिकारी मउका म पहुंचीन। फेर अभी आगी लगे के कारण के पता नइ चल पाय हे। प्रशासन अउ संबंधित विभाग की टीम मन जांच म जुट गेहे।
मिले खबर के मुताबिक करीबन सत्ताईस हजार चार सौ स्क्वेयर फीट म ुफैले ए गोदाम म लगे आगी म चौबीस घंटा के बाद घलो काबू नइ पाय गेहे।
डिजिटल अरेस्ट-आरोपी गिरफ्तार
बिलासपुर पुलिस ह डिजिटल अरेस्ट के मामला म दू झिन आरोपी ल गिरफ्तार करे हे। दूनों आरोपी मन ह एक झिन सियान माईलोगिन ल आतंकवादी संगठन के आदमी बताके आने-आने खाता म एक करोड़ चार लाख रूपिया ले जादा के पइसा जमा करा लीन। पुलिस ह दूनों आरोपी मन ल गिरफ्तार करके जेल भेज देहे। आरोपी मन डहार ले बउरे गे नौ सौ आने-आने बैंक खाता के पता चले हे। ए जम्मों खाता म कुल मिलाके तीस लाख रूपिया जमा हे, जेला होल्ड करवाय गेहे।
राष्ट्रीय आम महोत्सव
रईपुर के इंदिरा गांधी कृषि विश्वविद्यालय म उनतीस ले इकतीस मई तक राष्ट्रीय आम महोत्सव के आयोजन करे जाही। ए महोत्सव म कृषि मंत्री रामविचार नेताम ह किसान अउ आम उत्पादक मन ल संबोधित करही। उद्यानिकी अउ प्रक्षेत्र वानिकी अउ इंदिरा गांधी कृषि विश्वविद्यालय के सामलात तत्वावधान म राखे गे ए महोत्सव म आम के आने-आने किस्म के प्रदर्सनी लगाय जाही। प्रदर्सनी हर दिन मंझनिया बारह बजे ले रतिहा नौ बजे तक लोगन मन बर खुल्ला रइही।
अउ अब थोरकुन समाचार सार म –
– पेट्रोल-डीजल के बाद अब सीएनजी के कीमत म दू रूपिया प्रति किलोग्राम के बढ़ोतरी करे गेहे। नवा कीमत आज ले लागू होगे हे।
– एंटी करप्शन ब्यूरो-एसीबी के टीम ह मनेन्द्रगढ़-चिरमिरी म बिजली विभाग म पदस्थ कनिष्ठ अभियंता अउ लाइनमेन ल साढ़े नौ हजार रूपिया के रिश्वत लेवत रंगेहाथ गिरफ्तार करे हे।
– उहें, बेमेतरा म एसीबी ह जमीन के बटांकन अउ खाता विभाजन करके ऋण पुस्तिका बनाय के एवज म रिश्वत मांगे के आरोप म पटवारी ल गिरफ्तार करे हे।
– अकलतरा पुलिस ह पोस्ट आफिस म पदस्थ सहायक डाकपाल ल खाताधारक मनके खाता ले उन्नीस लाख इक्कीस हजार रूपिया के गबन के आरोप म गिरफ्तार करे हे।
अउ
– रायपुर पुलिस ह कोलकाता अउ हरियाणा म दबिस देके आईपीएल क्रिकेट मैच म सट्टा लगइया छब्बीस आरोपी मन ल गिरफ्तार करे हे। इंखर तीर ले सत्रह लाख रूपिया नगद,
चारपहिया गाड़ी समेत आने-आने सामान बरामद करे गेहे।