रामचंद्र/सुनीता गोडबोले-पद्मश्री
राष्ट्रपति द्रौपदी मुर्मु ह आज राष्ट्रपति भवन म छियासठ झिन विशिष्ट लोगन मन ल बछर-दू हजार छब्बीस के पद्म पुरस्कार दीन। एमा छत्तीसगढ़ के दंतेवाड़ा जिला के रामचंद्र गोडबोले अउ सुनीता गोडबोले ल संयुक्त रूप ले चिकित्सा के क्षेत्र म बढ़िया काम काज बर पद्मश्री पुरस्कार ले सम्मानित करे गीस।
समारोह म उपराष्ट्रपति सी.पी. राधाकृष्णन, प्रधानमंत्री नरेंद्र मोदी अउ केंद्रीय गृहमंत्री अमित शाह आय रिहीन।
जनजाति सांस्कृतिक समागम
केंद्रीय गृह अउ सहकारिता मंत्री अमित शाह ह काली नई दिल्ली म भगवान बिरसा मुंडा के एक सौ पचासवीं जयंती वर्ष उपर राखे गे जनजाति सांस्कृतिक समागम ल संबोधित करीन। ओमन किहीन कि ए समागम अवइया बछर म जनजातीय महाकुंभ के रूप म विश्व म चिन्हा बनाही। ओमन किहीन कि भगवान बिरसा मुंडा ह जनजातीय समाज ल अपन संस्कृति, धर्म अउ जल-जंगल-जमीन के रक्षा के संदेस दीन। ओमन किहीन कि केंद्र सरकार ह जनजातीय समाज के विकास बर सरलग काम करत हे। जनजातीय कल्याण के बजट ल अट्ठाईस हजार करोड़ ले बढ़ाके डेढ़ लाख करोड़ रूपिया करे गेहे। ओमन किहीन कि नक्सल हिंसा म बड़ संख्या म जनजातीय लोगन मनके जान गीस, फेर अब सरकार ह नक्सलवाद उपर प्रभावी नियंत्रण पाय हे। गृहमंत्री ह किहीन कि समान नागरिक संहिता माने यूसीसी ले जनजातीय समाज के परंपरा अउ अधिकार उपर कोनो असर नइ पड़य।
कारीकरम ल संबोधित करत मुख्यमंत्री विष्णुदेव साय ह किहीन कि जनजातीय समाज ह दुनिया ल प्रकृति के संग बने विकास के रद्दा देखा सकथे। ओमन जनजातीय भाषा, संस्कृति अउ परंपरा ल संजोय उपर जोर देवत किहीन कि राज्य सरकार ह गोंडी, हल्बी अउ सादरी जइसन भाषा म पारंभिक शिक्षा ल बढ़ावा देवत हे। मुख्यमंत्री ह किहीन कि आदि परब, बस्तर पंडुम अउ बस्तर ओलंपिक जइसन आयोजन ह जनजातीय पहिचान अउ प्रतिभा ल राष्ट्रीय मंच देवत हे।
पेट्रोल/डीजल-कीमत
पेट्रोल के भाव म आज दू रूपिया इकसठ पइसा अउ डीजल म दू रूपिया इकहत्तर पइसा के बढ़ोत्तरी होय हे। पेट्रोल अउ डीजल के भाव म पाछू दू हफ्ता म चार बार बढ़ोत्तरी होय हे। अब राजधानी रईपुर म पेट्रोल एक सौ सात रूपिया छियानवे पइसा प्रति लीटर अउ डीजल एक सौ एक रूपिया सत्रह पइसा प्रति लीटर मिलत हे।
उर्वरक-भंडारण
केंद्रीय उर्वरक विभाग के अतिरिक्त सचिव अपर्णा एस शर्मा ह किहीन हे कि पश्चिम एशिया संकट के बाद घलो देस म खातू मनके भंडार पूरा मात्रा म हवय। एसो के आंकलन के मुताबिक तीन सौ नब्बे लाख मीट्रिक टन भंडारण हवय। ए बेरा दू सौ लाख मीट्रिक टन के भंडारण हवय, जउन ह सामान्य स्तर ले जादा हे।
उर्वरक-भंडारण
केंद्रीय उर्वरक विभाग के अतिरिक्त सचिव अपर्णा एस शर्मा ह किहीन हे कि पश्चिम एशिया संकट के बाद घलो देस म खातू मनके भंडार पूरा मात्रा म हवय। एसो के आंकलन के मुताबिक तीन सौ नब्बे लाख मीट्रिक टन भंडारण हवय। ए बेरा दू सौ लाख मीट्रिक टन के भंडारण हवय, जउन ह सामान्य स्तर ले जादा हे।
मुख्य सचिव-निर्देश
मुख्य सचिव विकाससील ह अधिकारी मन ल प्रदेस म सड़क दुर्घटना ल रोेके बर जम्मों कारवाई करे के निरदेस देहे। मंत्रालय म सड़क सुरक्षा ल लेके राखे गे बइठका म मुख्य सचिव ह किहीन कि सड़क दुर्घटना बर चिन्हारी करे गे ब्लैक स्पॉट के सरलग मॉनिटरिंग करे जाय अउ तुरते जरूरी सुधार करे जाय। ओमन राष्ट्रीय राजमार्ग अउ लोक निर्माण विभाग के अधिकारी मन के बीच आपस म तालमेल बिठाके काम करे के बात किहीन।
बकरीद-अवकाश
केंद्र सरकार ह ईद-उल-अजहा माने बकरीद के सरकारी छुट्टी म बदलाव करे हे। जम्मो केंद्रीय कार्यालय, विभाग अउ सरकारी संस्थान मन म सत्ताईस मई के जघा अब अट्ठाईस मई के छुट्टी रइही।
एनटीए-संयुक्त विश्वविद्यालय प्रवेस परीक्षा
राष्ट्रीय परीक्षा एजेंसी-एन.टी.ए. ह अट्ठाईस मई के होवइया संयुक्त विश्व विद्यालय प्रवेस परीक्षा के तारीख आगू बढ़ा देहे। एजेंसी ह किहीन हे कि बकरीद के तारीख म बदलाव के सेति ए फइसला ले गेहे। नवा परीक्षा के तारीख जल्दीच जारी कर दे जाही। ताजा जानकारी छात्र मन, एनटीए के आाधिकारिक वेबसाइट म देख सकथे।
इबोला संक्रमण-स्वास्थ्य विभाग
स्वास्थ्य विभाग ह प्रदेस म इबोला संक्रमण ल रोके बर जरूरी निरदेस जारी करे हे। संचालनालय स्वास्थ्य सेवा डहार ले जारी निरदेस म एयरपोर्ट ले अवइया यात्री मनके स्वास्थ्य जांच, संदिग्ध मामला के पहिचान अउ आपातकालीन प्रबंधन व्यवस्था ल बने ढंग ले राखे बर केहे हे। संगेसंग मुख्य चिकित्सा अउ स्वास्थ्य अधिकारी रईपुर ल स्वामी विवेकानंद विमानतल परिसर म एक झिन नोडल अधिकारी नियुक्त करे के घलो निरदेस देहे।
जानबाके मुताबिक कांगो अउ युगांडा म इबोला संक्रमण के बाढ़त मामला के बाद दुनिया म सर्तकता बढ़ा दे गेहे। विश्व स्वास्थ्य संगठन ह पहिलीच ले एला सार्वजनिक स्वास्थ्य आपातकाल घोसित कर चुके हे। एला देखत भारत म घलो ऐहतियात बरते जात हे।
दुर्घटना
बलरामपुर जिला म सनावल रोड स्थित गांव पीपरपान के तीर एक ठिन सड़क दुर्घटना म चार झिन मनखे के मउत होगे। ए चारों मनखे मन काली संझा एक ठिन फटफटी म बइठके बाजार ले लहुटत रिहीन। इही दउरान ओखर गाड़ी ह सड़क के तीर खडे़ ट्रैक्टर ट्राली ले टकरागे। ए दुर्घटना ले दू झिन मनखे के मउकच म पराण छूट गे अउ दू झिन आने मनखे मन के इलाज के दउरान अस्पताल म मउत होगे।
झीरम-श्रध्दांजलि
झीरम घाटी म कांग्रेस नेता मन उपर होय हमला के आज तेरह साल होगे। ए मउका म कांग्रेस नेता अउ कार्यकर्ता मन ह रईपुर स्थित कांग्रेस के प्रदेस मुख्यालय म राखे गे कारीकरम म झीरम घाटी म सहीद होय नेता मन ल श्रध्दांजलि दीन।
जानबा के मुताबिक पच्चीस मई दू हजार तेरह के बस्तर संभाग के झीरम घाटी म माओवादी मन डहार ले करे गे हमला म कांग्रेस के बड़का नेता अउ सुरक्षा बल के जवान मनके संगेसंग करीबन तीस झिन लोगन के मउत हो गे रिहीस।
बाल सक्षम नीति-विशेष अभियान
राज्य शासन डहार ले ‘‘बाल सक्षम नीति-दू हजार बाईस‘‘ के प्रभावी क्रियान्वयन बर एक ले तीस जून तक पूरा प्रदेस म बिसेस सघन अभियान चलाय जाही। ए दउरान सड़क म रइहया, भिक्षावृत्ति, बाल श्रम अउ कचरा सकेले म लगे लइका मनके पहिचान करके ओमन ल समाज के मुख्यधारा ले जोड़े के प्रयास करे जाही। ए अभियान के तहत कलेक्टर के अगुवई म जम्मो जिला मन म बिसेस टीम बनाय जाही।
अउ पेस हे मौसम के हाल…
प्रदेस म आज ले नवतपा सुरू हो गेहे अउ संगेसंग ए बेरा प्रदेस के कतकोन जघा म जोरदरहा गर्मी पड़े के सेति लोगन मन परेसान होय हे। इही बीच, मौसम विभाग ह अवइया चौबीस घंटा के दउरान प्रदेस के कतकोन जघा म लू चले के चेतावनी देहे। उहें, एक-दू जघा म हवा गरेर के संग हल्का बरसा होय के संभावना बताय गेहे।
पेयजल समस्या-निराकरण
राज्य शासन ह लोक स्वास्थ्य यांत्रिकी विभाग के जम्मो तकनीकी कर्मचारी मन ल बिगडे़ बोरिंग अउ पाईपलाइन मन ल सुधारे के संगेसंग पेयजल समस्या के तुरते निपटारा करे के निरदेस देहे। निरदेस के बाद गांव-गंवई मन म साफ पिये के पानी पहुंचाय बर लोक स्वास्थ्य यांत्रिकी विभाग के टीम ह काम सुरू कर देहे। विभाग डहार ले जल जीवन मिसन के तहत चलाय जात योजना मनके बने ढंग ले संचालन के संगेसंग गांव के लोगन मन ल पानी बचाय कोति जागरूक करे जात हे।
त्रिस्तरीय पंचायत उपचुनाव
प्रदेस म नगरीय निकाय अउ त्रिस्तरीय पंचायत उपचुनई म एक जून के मतदान होही। एखर बर छत्तीसगढ़ राज्य निर्वाचन आयोग डहार ले नामांकन पत्र के जांच अउ नाम वापसी के काम पूरा होय के बाद अभ्यर्थी मन के आखिरी सूची जारी कर दे गेहे। नगरीय निकाय म कुल दू सौ चालीस के संगेसंग त्रि-स्तरीय पंचायत म कुल तीन सौ बयानवे अभ्यर्थी मन चुनावी मैदान म हवय।
अउ अब थोरकुन समाचार सार म –
– मुख्यमंत्री के अगुवई म राज्य मंत्रि परिषद के बइठका काली छब्बीस मई के संझा छै बजे अटल नगर स्थित मंत्रालय म होही।
– मुख्यमंत्री विष्णुदेव साय ह आज नई दिल्ली के मुख्यमंत्री रेखा गुप्ता ले मिलिन।
– बेमेतरा जिला के साजा म एंटी करप्शन ब्यूरो- एसीबी के टीम ह एक झिन पटवारी ल पंद्रह हजार रूपिया के रिस्वत लेवत गिरफ्तार करे हे।
– धमतरी जिला म कृषि विभाग के टीम ह जांच के दउरान एक ठिन खातू दुकान म अनियमितता पाय जाय के सेति दुकान के लाइसेंस ल तुरते निलंबित कर देहे।
– गौरेला-पेण्ड्रा-मरवाही जिला रोजगार अउ स्व-रोजगार मार्गदर्सन केंद्र डहार ले काली छब्बीस मई के बिहनिया दस बजे ले संझा चार बजे तक रोजगार मेला के आयोजन करे जाही।
अउ
– बलौदाबाजार-भाटापारा जिला के बारनवापारा अभ्यारण्य क्षेत्र म दतैल हाथी के हमला ले एक झिन गांव के लोगन के मउत होगे।