किसान उर्वरक-वितरण
राज्य सरकार ह खरीफ बछर-दू हजार छब्बीस बर सहकारी क्षेत्र म खातू बांट संबंधी नवा दिसा-निरदेस जारी करे हे। एखर मुताबिक पाछू बछर किसान मन ल बांटे गे खातू के मात्रा के आधार म ए बछर के कोटा तय करे गेहे। एखर चलतम ए बछर किसान मन ल यूरिया के अस्सी प्रतिसत मात्रा ही पांरपरिक यूरिया के रूप म दे जाही। बांचे बीस प्रतिसत मात्रा ल उपलब्ध आधार म दे जाही या फेर एखर बदला नैनो यूरिया दे जाही। डीएपी बांटे के काम घलो पाछू बछर के मुकाबला साठे प्रतिसत करे गेहे। बांचे चार प्रतिसत ल वैकल्पिक एनपीके उर्वरक या नैनो डीएपी दे जाही। शासन ह स्पष्ट करे हे कि कोनो भी किसान ल नैनो खातू लेबर मजबूर नइ करे जाही। एहा ऑप्शन रूप म रइही।
इंहा ए बतादन कि वर्तमान अंतर्राष्ट्रीय हालत अउ खाड़ी क्षेत्र म चलत तनाव ल देखत राज्य सरकार ह किसान मन ल बेरा म खातू दे के निरनय लेहे।
राष्ट्रपति-पद्म पुरस्कार
राष्ट्रपति द्रौपदी मुर्मु काली पच्चीस मई के नई दिल्ली म होवइया नागरिक अलंकरण समारोह म बछर-दू हजार छब्बीस बर पदम पुरस्कार देही। ए मउका म आकाशवाणी ह अपन श्रृंखला ‘‘आकाशवाणी पर पीपल्स पद्म‘‘ के तहत सोलह ठिन कारीकरम प्रस्तुत करत हे।
ए ऐपिसोड म पद्म पुरस्कार विजेता मन के काम अउ जीवन के बारे म जानकारी दे जाही। एखर प्रसारण आज अउ कल आकाशवाणी गोल्ड के सौ दसमलव एक चैनल म करे जाही। एला न्यूज ऑन एआईआर ऐप अउ न्यूज ऑन एआईआर ऑफिशियल यू-ट्यूब चैनल म घलो सुने जा सकत हे।
डीजीसीए-गाइडलाइन
नागरिक उड्डयन महानिदेशालय-डीजीसीए अउ ब्यूरो ऑफ सिविल एविएशन सिक्यूरिटी ह नियम कानून म सख्ती राखत नवा गाइडलाइन जारी करे हे। जेखर मुताबिक अब हवाई यात्री मन एयरपोर्ट के सुरक्षा होल्ड एरिया म मोबाइल ले रील बनाना पूरी तरल ले बैन रइही। संगे जउन जघा म हवाई जहाज खड़े रइही अउ बस ले यात्री मन ल विमान ले जाय तक वाले जघा म रूकके रील, फोटो या वीडियो बनाय उपर घलो रोक लगा दे गेहे।
जी राम जी-अधिनियम
केंद्र सरकार ह जन परामर्श बर विकसित भारत-जी राम जी अधिनियम के तहत मसौदा नियम प्रकासित करे हे। ग्रामीण विकास मंत्रालय ह केहे हे कि कोनो भी मनखे, हितधारक, संगठन या संस्था अवइया महिना के इक्कीस तारीख तक ए मसौदा नियम मन उपर आपत्ति या सुझाव दे सकत हे। विकसित भारत जी राम जी अधिनियम ए बछर एक जुलाई ले सबो राज्य मन म लागू हो जही।
सरकार-अपील
छत्तीसगढ़ सरकार ह केहे हे कि प्रदेस म पेट्रोल अउ डीजल के कोनो कमी नई हे अउ आम लोगन ल घबरा के उपराहा एला बिसाय के जरूरत नइ हे। सरकार के मुताबिक राज्य म करीबन तीन करोड़ चौरानवे लाख लीटर पेट्रोल अउ आठ करोड़ आठ लाख लीटर ले जादा डीजल के भंडार उपलब्ध हे। किसान अउ जरूरी सेवा मन ल प्राथमिकता देवत ईंधन के रोजिना आपूर्ति जारी हे। राज्य म बाईस मई ले ड्रम अउ जरीकेन म पेट्रोल-डीजल दे उपर रोक लगाय गेहे। सरकार ह लोगन मन ल अफवाह ले बांच के अपील करे हे।
यूपीएससी-परीक्षा
संघ लोक सेवा आयोग-यूपीएससी के सिविल सर्विस प्रारंभिक परीक्षा आज दू पाली म राखे गे रिहीस। ए दरी परीक्षा देवइया मन ल पहिली घांव फेस स्केन सिस्टम ले गुजरे ले पड़िस। चेहरा मैच होय के बादे ओमन ल परीक्षा केंद्र भीतरी जाय के परमिसन दे गीस। परीक्षा ल लेके कड़ा सुरक्षा व्यवस्था रिहीस। ए परीक्षा ल रईपुर जिला म बाईस ठिन केंद्र बनाय गे रिहीस।
सुप्रीम कोर्ट-निर्देश
सुप्रीम कोर्ट ह बिसेस आवश्यकता वाले लइका मन के पढ़ई-लिखई ल लेके छत्तीसगढ़ शासन ल बिसेस शिक्षक मनके भर्ती प्रक्रिया ल दू महिना भीतरी पूरा करे के निरदेस देहे। एक ठिन याचिका के सुनवाई बेरा अदालत ह किहीस कि राज्य म उनचास हजार ले जादा बिसेस आवश्यकता वाले लइका मन बर करीबन चार हजार बिसेस शिक्षक के जरूरत हे। राज्य सरकार ह अदालत ल बतइस कि आठ सौ अड़तालीस स्वीकृत पद मिले बैंसठ झिन शिक्षक मनके नियुक्ति हो चुके हे। सुप्रीम कोर्ट ह किहीस कि एक सौ पचपन ब्लॉक रिसोर्स पर्सन अउ पचयासी झिन बिसेस शिक्षक मन ल स्क्रीनिंग कमेटी के आगू म प्रस्तुत होके मउका दे जाय।
अल्प बचत योजना
छत्तीसगढ़ डाक परिमंडल डहार ले प्रदेस के सबो डाक घर मन म काली अउ परनदीन याने पच्चीस अउ छब्बीस मई के अल्प बचत खाता खोले बर बिसेस अभियान चलाय जाही। ए दउरान कोनो भी नागरिक अपन तीर-तखार के पोस्ट आफिस जाके या राज्य सरकार डहार ले नियुक्त अधिकृत एजेंट मनके माध्यम ले अल्प बचत योजना जइसे मासिक आय योजना, वरिष्ठ नागरिक बचत योजना, सुकन्या समृध्दि योजना ए सब म निवेस कर सकही।
माओवादी-डंप बरामद
नक्सल उन्मूलन अभियान के चलत कांकेर-नारायणपुर के सीमावर्ती जघा म सुरक्षा बल मन दू ठिन आने-आने जघा ले डंप बरामद करे हे। डीआरजी, बीएसएफ अउ बीडीएस के संघरा टीम ह कांकेर जिला के कोयली बेड़ा के थाना जघा के गांव पल्लाहुर अउ जपमरका तीर जंगल भीतरी लुका के राखे गे नक्सल डंप बरामद करे हे। एमा बीजीएल लॉन्चर, बीजीएल सेल, फायर कार्टिज, एके फोर्टीसेवन अउ एसएलआर के खाली कार्टिज समेत बड़ अकन बिस्फोटक जिनिस घलो हे।
इही तरह, सुरक्षा बल मन ह कांकेर नारायणपुर सीमावर्ती जघा के गांव मरका बेड़ा आदनार अउ एलूर के जंगल भतीरी ले घलो नक्सल जिनिस बरामद करे हे। एमा तीन ठिन बारह बोर के रायफल, बीजीएल लॉन्चर, बारूद अउ इलेक्ट्रिक डेटोनेटर समेत बिस्फोटक जिनिस सामिल हे।
ओति, राजनांदगांव जिला के बार्डर ले लगे महाराष्ट्र के गढ़चिरौली म माओवादी विरोधी अभियान के चलत पुलिस ल भारी सफलता मिले हे। पुलिस ह सर्चिंग आपरेसन बेरा इंहो ले नक्सली डंप बरामद करे हे।
धान खरीदी-गबन
सारंगढ़-बिलाईगढ़ जिला के सरिया पुलिस धान खरीदी म फर्जीवाड़ा के खुलासा करत साल्हेओना उपार्जन केंद्र के समिति प्रबंधक अउ कम्प्यूटर ऑपरेटर ल गिरफ्तार कर न्यायिक रिमांड म भेज देहे। एखर मन उपर आरोप हे कि बिना धान के वास्तविक आवक के ऑनलाइन एंट्री करके करीबन निन्यानवे लाख रूपिया के गबन करे गेहे। ए मामला म सहायक खाद्य अधिकारी के रिपोर्ट उपर मामला दर्ज करे गीस।
अउ अब पेस हे मौसम के हाल…
प्रदेस म ए बेरा जोरदरहा गर्मी पड़त हे, जेखर ले जनजीवन परभावित हे। मौसम विभाग ह चेताय हे कि अवइया चौबीस घंटा के दउरान रईपुर, बिलासपुर, दुरूग, राजनांदगांव अउ महासमुंद समेत प्रदेस के अट्ठारा ठिन जिला म ले एक-दू जघा म लू चल सकत हे। मौसम विभाग के मुताबिक उत्तर-पश्चिम ले अवइया सुष्क अउ तात हवा के सेति तापमान बाढ़ गे हवय। एखर सेति फिलहाल गर्मी ले राहत नइ मिलत हे।
उहें, आज रईपुर म तिरालीस दसमलव छै, बिलासपुर म तीरालीस दसमलव चार अउ जगदलपुर म तिरालीस डिग्री सेल्सियस टेम्प्रेचर दर्ज करे गीस।
इही बीच, विसेसज्ञ मन लूह ले बांचे बर सावधानी बरते के अपील करे हे। लोगन मन ल भरपूर पानी अउ तरल पदार्थ पिये के संगे हल्का रंग के सूती कपड़ा पहिने अउ पूरा सरीर ल तोप के रखे के सलाह देहे। संगे बिना काम के बाहिर नइ जाय के अपील करे हे।
अउ अब थोरकुन समाचार सार म –
– बलौदाबाजार-भाटापारा जिला म जिला शिक्षा अधिकारी ह दू झिन सहायक शिक्षा ल सस्पेंड कर देहे। ए दूनों उपर कर्तव्य पालन म लापरवाही बरते के आरोप हे।
– रईपुर पुलिस ह पंजाब ले नसा के तस्करी करइया एक ठिन गिरोह के पर्दाफाश करत तीन झिन आरोपी ल गिरफ्तार करे हे। एखर मन तीर ले करीबन छप्पन ग्राम हेरोइन जब्त करे गेहे।
– जांजगीर के करही गांव म करीबन एक महिना पहिली होय गोलीकांड के मामला म पुलिस ह तीन झिन आरोपी ल गिरफ्तार करे हे।
अउ
– बिटकॉइन म निवेस करके मुनाफा देवाय के झांसा देके एक झिन मनखे ले साढ़े सात लाख रूपिया के धोखाधड़ी
के मामला म दुरूग पुलिस ह एक झिन आरोपी ल रईपुर ले गिरफ्तार करे हे।