प्रधानमंत्री-रोजगार मेला
प्रधानमंत्री नरेंद्र मोदी ह आज उन्नीसवां रोजगार मेला के तहत वीडियो कॉन्फ्रेंसिंग के माध्यम ले आने-आने सरकारी विभाग अउ संगठन मन म चुने हुए इंक्यावन हजार ले जादा युवा मन ल नियुक्ति पत्र बांटिन। ए मउका म श्री मोदी ह किहीन कि सरकारी नौकरी, नागरिक मन के जीवन ल बेहतर अउ आसान बनाय के महत्वपूर्ण माध्यम हरे। प्रधानमंत्री ह किहीन कि देस ह अपन कर्मयोगी मन उपर भरोसा जताय हे अउ अब ए उंखर जिम्मेदारी हरय कि ओमन अपन लगन, आचरण अउ रोजमर्रा के काम ले ओ भरोसा के मान राखय अउ ओला अउ मजबूत करय। श्री मोदी ह किहीन कि पूरा दुनिया भारत के विकास यात्रा के हिस्सा बने बर उत्सुक हे।
प्रधानमंत्री ह किहीन कि हर भारतीय देस ल ‘विकसित भारत बनाय के संकल्प‘ के संग काम करत हे। श्री मोदी ह नव नियुक्त कर्मचारी मन ल आईगोट कर्मयोगी‘ प्लेटफॉर्म के इस्तेमाल करे बर प्रोत्साहित घलो करीन।
रोजगार मेला आज देस म सैंतालीस अलग-अलग जघा मन म आयोजित करे गीस। रायपुर म ए आयोजन दक्षिण पूर्व मध्य रेलवे डहार ले पंडित दीन दयाल उपाध्याय ऑडिटोरियम म करे गीस। कारीकरम म केंद्रीय जनजातीय कार्य राज्य मंत्री दुर्गादास उइके अउ राज्यसभा सदस्य लक्ष्मी वर्मा के उपस्थिति म दू सौ संतावन युवा मन ल नियुक्ति पत्र सौंपे गीस।
क्षेत्रीय सहकारिता कार्यशाला
प्रधानमंत्री नरेंद्र मोदी के ‘‘सहकार से समृध्दि‘‘ के संकल्पना ल धरातल म उतारे बर केंद्रीय सहकारिता मंत्रालय डहार ले नवा रायपुर म पूर्वी क्षेत्र के छै राज्य मनके क्षेत्रीय कार्यसाला आयोजित करे गीस। एमा छत्तीसगढ़ के अलावा बिहार, मध्यप्रदेस, झारखंड, ओडिसा अउ पश्चिम बंगाल के वरिष्ठ अधिकारी मन सामिल होइन। कार्यशाला के अध्यक्षता केंद्रीय सहकारिता मंत्रालय के सचिव डॉ. आशीष कुमार भुटानी ह करीन।
कार्यशाला म केंद्रीय सहकारिता मंत्री अमित शाह के पहल म संचालित योजना मनके प्रगति के समीक्षा करे गीस। विसेसज्ञ मन बतइन कि पैक्स समिति मन ल केवल ऋण वितरण तक सीमित नही रख के बहुउद्देशीय ग्रामीण सेवा केंद्र के रूप म विकसित करे जात हे। एखर तहत खाद-बीज वितरण, धान खरीदी, सार्वजनिक वितरण प्रणाली, डेयरी, मत्स्य पालन, वेयर हाउसिंग अउ ग्रामीण उद्यमिता जइसे गतिविधि मन ल बढ़ावा दे जात हे। एखर ले किसान अउ ग्रामीण मन ल गांव स्तर म ही बेहतर सुविधा अउ रोजगार के अवसर मिलही।
पेट्रोल/डीजल कीमत
पेट्रोल अउ डीजल के दाम एक घांव फेर बाढ़ गेहे। पेट्रेाल नवासी पइसा अउ डीजल छियानवे पइसा महंगा होय हे। रायपुर म अब पेट्रेाल एक सौ पांच रूपिया छत्तीस पइसा अउ डीजल अंठानवे रूपिया सैंतालीस पइसा प्रति लीटर मिलत हे। पाछू दस दिन म पेट्रेाल अउ डीजल के दाम म ए बढ़ोत्तरी तीसरइया घांव होय हे।
इही बीच, राज्य शासन ह काली जारी आदेस म सबो पेट्रोल-डीजल पंप मन म ड्रम, बोतल अउ जेरीकेन म ईंधन के बिक्री उपर तत्काल रोक लगा देहे। हलांकि रबी, खरीफ सीजन बर किसान, कलेक्टर मन डहार ले चिन्हांकित शासकीय निर्माण कार्य अउ अस्पताल, मोबाइल टावर जइसे अत्यावश्यक सेवा मन ल ए प्रतिबंध म छूट दे गेहे। एखर बर अनुविभागीय अधिकारी परीक्षण के बाद सुरक्षा मानक मनके अनुरूप बिक्री के अनुमति होही।
डायल-112 सेवा
प्रदेस के आने-आने जिला म डायल- एक सौ बारह के जघा अत्याधुनिक मोबाइल फॉरेसिंक वैन उपलब्ध कराय जात हे। इही कड़ी म आज मंुगेली जिला म घलो ए सुविधा सुरू हो गेहे। जिला के वरिष्ठ पुलिस अधीक्षक भोजराम पटेल अउ दूसर वरिष्ठ अधिकारी मन ह हरी झंडी दिखाके ए वैन ल रवाना करीन। ए कारीकरम म उप मुख्यमंत्री अरूण साव वर्चुअली सामिल होइन।
मुख्यमंत्री-लोकार्पण
मुख्यमंत्री विष्णुदेव साय ह काली राजधानी रायपुर म कचना रेलवे ओव्हर ब्रिज के लोकार्पण कर एला आम जनता ल सौंपिन।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के आकाशवाणी के सबो कंेंद्र रिले करही। ए बखत के अंक म ‘‘गौरेला-पेण्ड्रा-मरवाही‘‘ जिला के संबंध म जानकारी दे जाही।
यूपीएससी-परीक्षा
संघ लोक सेवा आयोग-यूपीएससी के सिविल सर्विस प्रारंभिक परीक्षा काली चौबीस मई के आयोजित करे जाही। ए परीक्षा दू पाली म होही। पहिली पाली बिहनिया नौ बजके तीस मिनट ले ग्यारा बजके तीस मिनट तक अउ दूसर पाली मंझनिया दू बजके तीस मिनट ले चार बजके तीस मिनट तक होही। दूनों पाली म परीक्षा सुरू होय के आधे घंटा पहिली परीक्षा केंद्र के दरवाजा बंद कर दे जाही। ए बखत परीक्षार्थी मन ल फेस स्कैन सिस्टम ले गुजरना होही। चेहरा मैच होय के बाद ही ओमन ल परीक्षा केंद्र के अंदर जाय के अनुमति दे जाही।
ए परीक्षा बर रायपुर जिला म बाईस ठन परीक्षा केंद्र बनाय गेहे। परीक्षा ल लेके कड़ी सुरक्षा व्यवस्था करे गेहे। कलेक्टर डॉ. गौरव सिंह ह परीक्षा केंद्र ले पंाच मीटर के दायरा म ध्वनि प्रदूषण अउ कोनो भी प्रकार के अव्यवस्था ल रोके के निरदेस देहे।
अंबिकापुर-वॉकथन
आकाशवाणी के नब्बे बछर पूरा होय के मउका म आज अंबिकापुर आकाशवाणी केंद्र म वॉकथन के आयोजन करे गीस, जेमा आकाशवाणी परिवार के सदस्य मन के संगेसंग जनप्रतिनिधि, प्रशासनिक अधिकारी अउ आने-आने सामाजिक संगठन के प्रतिनिधि मन सामिल होइन। वॉकथन आज बिहनिया आकाशवाणी केंद्र से सुरू होके आने-आने रद्दा ले होवत लहुटत आकाशवाणी केंद्र म सिराइस।
ए मउका म लुण्ड्रा विधायक प्रबोध मिंज ह किहीन कि रेडियो आज भी समाज के हरेक वर्ग तक पहुंचने वाला प्रभावी माध्यम हरय। कारीकरम के आखिरी म आकाशवाणी केंद्र अंबिकापुर के सहायक निदेशक कारीकरम प्रमेन्द्र कुमार ह अपन संबोधन म आकाशवाणी के नब्बे बछर के ऐतिहासिक अउ अनवरत यात्रा ल सुरता करीन।
स्वरोत्सव
आकाशवाणी के नब्बे बछर पूरा होय के उपलक्ष्य म आकाशवाणी केंद्र रायपुर डहार ले राजधानी म ‘‘स्वरोत्सव‘‘ संगीत समारोह के आयोजन करे गीस। दू सत्र म होय ए कारीकरम के दउरान पद्मश्री मदन चौहान ह सुगम संगीत पेस करीन। उहें, श्वेता शिवाले डहार ले उप शास्त्रीय संगीत के प्रस्तुति दे गीस। दूनों ही गायन मन अपन मनमोहक प्रस्तुति ले दर्सक मन ल मंत्रमुग्ध कर दीन। ए अवसर म बड़ संख्या म संगीत प्रेमी मन उपस्थित रिहीन।
राष्ट्रीय बाल पुरस्कार
प्रधानमंत्री राष्ट्रीय बाल पुरस्कार बर इकतीस जुलाई तक नामांकन आमंत्रित करे गेहे। एखर बर एक ले अट्ठारा आयु वर्ग के लइका मन आवेदन कर सकत हे। आवेदन केवल राष्ट्रीय पुरस्कार पोर्टल के माध्यम ले ऑनलाइन स्वीकार करे जाही। छत्तीसगढ़ शासन ह प्रदेस के प्रतिभाशाली लइका मन ल जादा ले जादा संख्या म आवेदन करे के अपील करे हे।
आईईडी बरामद
दंतेवाड़ा जिला म सुरक्षा बल ह आज बारसूर थाना क्षेत्र म माओवादी मन डहार ले लुका के रखे पांच किलो वजनी प्रेसर कुकर आईईडी बरामद करीन, जेला मउका म ही निष्क्रिय कर दे गेहे। मिले जानकारी के अनुसार जिला म नक्सल उन्मूलन अभियान के तहत सुरक्षा बल के टीम हिड़पाल गांव के पहाड़ी अउ घना जंगल म सर्च ऑपरेसन म निकले रिहीन, इही दउरान ए आईईडी बरामद करे गीस।
अउ अब पेस हे मौसम के हाल…
प्रदेस म ए बखत भारी गर्मी पड़त हे, जेखर ले जनजीवन प्रभावित होवत हे। मौसम विभाग ह अवइया अड़तालीस घंटा के दउरान रायपुर, बिलासपुर, दुर्ग, राजनांदगांव, महासमुंद समेत प्रदेस के अट्ठारा ठन जिला मन म एक-दू जघा म लू चले के संभावना जताय हे। ए दउरान गरम हवा चले अउ अधिकतम तापमान चवालीस ले पैंतालीस डिग्री सेल्सियस के आसपास रेहे के संभावना हे।
इही बीच, विशेषज्ञ मन ह लू ले बांचे बर सावधानी बरते के अपील करे हे। विशेषज्ञ मन पानी अउ तरल पदार्थ के सेवन करे, हल्का रंग के सूती कपड़ा पहने अउ पूरा सरीर ल ढ़क के राखे के सलाह देहे। संगेसंग बिना कारण बाहिर झन जाय के अपील घलो करे हे।
कोपरा जलाशय-कार्यक्रम
अंतर्राष्ट्रीय जैव विविधता दिवस के मउका म बिलासपुर जिला के कोपरा रिजर्वायर परिसर म पर्यावरण संरक्षण अउ जैव विविधिता संवर्धन ल लेके जागरूकता कारीकरम के आयोजन करे गीस।