प्रधानमंत्री-रोजगार मेला
प्रधानमंत्री नरेंद्र मोदी काली तेईस मई के वीडियो कॉन्फेंसिग के माध्यम ले देस के सैंतालीस जघा मन म रोजगार मेला के तहत इंक्यावन हजार ले जादा अभ्यर्थी मन ल नियुक्ति पत्र प्रदान करही। इही कड़ी म दक्षिण पूर्व मध्य रेलवे डहार ले रईपुर के पंडित दीन दयाल उपाध्याय ऑडिटोरियम म रोजगार मेला के आयोजन करे जाही। कारीकरम म केंद्रीय जनजातीय कार्य राज्य मंत्री दुर्गादास उइके मुख्य अतिथि के रूप म सामिल होही। रोजगार मेला म दू सौ संतावन युवा मन ल नियुक्ति पद दे जाही। एमा दक्षिण पूर्व मध्य रेलवे के अलावा डाक विभाग, वित्तीय सेवा विभाग, स्वास्थ्य सेवा विभाग अउ हिन्दुस्तान कॉपर लिमिटेड म चयनित अभ्यर्थी सामिल हेे।
मुख्यमंत्री-सुशासन तिहार
सुशासन तिहार के तहत आज मुख्यमंत्री विष्णुदेव साय बलौदाबाजार भाटापारा जिला के ग्राम करहीबाजार पहुंचिन। ए दउरान मुख्यमंत्री ह नल जल योजना के तहत निर्माणाधीन सोखता म श्रमदान करीन। संघरा मुख्यमंत्री ह पीएम आवास योजना के हितग्राही परिवार ले भंेट करीन। उहें, आयुष्मान आरोग्य मंदिर पहुंच के मुख्यमंत्री ह धात्री महतारी मन ल किट घलो प्रदान करीन। ए मउका म मुख्यमंत्री ह स्कूल मन के उन्नयन, सीसी रोड अउ मांगलिक भवन बनाय समेत आने-आने घोसना करीन।
एखर पहिली, मुख्यमंत्री ह काली सुशासन तिहार के दउरान चिरमिरी म अधिकारी मनके बइठका म पिये के पानी के समस्या अउ स्कूल परीक्षा परिणाम ल लेके नराजगी जतइन। ओमन कोरिया जिला म खातू वितरण म गड़बड़ी आगू आय म सहायक आयुक्त अउ सहायक पंजीयक सहकारी संस्था आयुष प्रताप सिंह ल तत्काल प्रभाव ले निलंबित करे के निरदेस दीन।
इही बीच, कोरिया जिला के जिल्दा समिति, खड़गंवा म खातू वितरण ले जुड़े गबन प्रकरण म दोषी मनके विरूध्द कारवाई म लापरवाही पाय जाय म प्रभारी साखा प्रबंधक अउ नोडल अधिकारी ल घलो निलंबित कर दे गेहे।
खनन सूचना केंद्र
राज्य सरकार ह खनन गतिविधि म पारदर्सिता अउ सिकायत मन उपर तुरते कारवाई सुनिश्चित करे बर खनन सूचना केंद्र के स्थापना करे हे। ए पहल के तहत टोल फ्री नंबर-एक आठ सून्य सून्य-दू तीन तीन-दू एक चार सून्य जारी करे गेहे। ए नंबर म आम नागरिक अवैध खनन, अवैध परिवहन अउ खनिज संबंधी अनियमितता के सिकायत सीधा दरज करा सकही। सूचना केंद्र के संचालन हरेक दिन बिहनिया दस बजे ले संझा साढ़े पांच बजे तक करे जाही।
बीजापुर-आकांक्षी ब्लॉक स्थान
नीति आयोग डहार ले जारी देस के आकांक्षी ब्लॉक मनके ‘‘चैम्पियंस ऑफ द क्वार्टर‘‘ रिपोर्ट म बीजापुर जिला के उसूर ब्लॉक ह सेंट्रल जोन म देसभर म दूसर स्थान हासिल करे हे। आयोग ह स्वास्थ्य अउ सामाजिक विकास ले जुड़े कई ठिन संकेतक के आधार म मूल्यांकन करे रिहीस, जेमा उसूर ब्लॉक के प्रदर्सन उत्कृष्ट पाय गीस।
ए उपलब्धि म मुख्यमंत्री विष्णुदेव साय अउ वन मंत्री केदार कश्यप ह जिला के नागरिक, स्वास्थ्य कार्यकर्ता अउ जिला प्रशासन ल बधई दीन हे।
खाद-निर्देश
सहकारिता विभाग के आयुक्त महादेव कावरे ह वीडियो कॉन्फ्रेंसिंग के माध्यम ले विभागीय योजना अउ काम के समीक्षा बइठका लीन। सहकारिता आयुक्त श्री कावरे ह अधिकारी मनले किहीन कि किसान मन ल बेरा म खातू उपलब्ध कराना शासन के सर्वोच्च प्राथमिकता हरय। एखर बर ओमन जम्मो पैक्स समिति म पर्याप्त मात्रा म खातू के आगू ले भंडारण सुनिश्चित करे बर किहीन। ओमन खातू के उपलब्धता अउ वितरण के नियमित रूप ले समीक्षा करे के निरदेस दीन।
डाक परिमंडल-विशेष अभियान
छत्तीसगढ़ डाक परिमंडल डहार ले प्रदेस के जम्मो डाक घर म अवइया पच्चीस अउ छब्बीस मई के अल्प बचत खाता खोले बर बिसेस अभियान चलाय जाही। ए दउरान कोनो भी नागरिक अपन नजदीकी डाक घर जाके या राज्य सरकार डहार ले नियुक्त अधिकृत एजेंट के माध्यम ले अल्प बचत योजना जइसे मासिक आय योजना, वरिष्ठ नागरिक बचत योजना, सुकन्या समृध्दि योजना या अउ कोनो योजना म निवेस कर सकही।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए बखत बस्तर संभाग म नक्सलवाद के सिराय के बाद स्थानीय लोगन तक विकास के रोसनी पहंुचाय बर सरकार डहार ले करे गे अभिनव पहल उपर छत्तीसगढ़ के उपमुख्यमंत्री अउ गृहमंत्री विजय शर्मा ले लेगे बिसेस भेंटवार्ता के प्रसारण करे जाही। एखर प्रसारण काली तेईस मई के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
वॉकथन
आकाशवाणी के नब्बे बछर पूरा होय के उपलक्ष्य म आकाशवाणी अंबिकापुर डहार ले काली बिहनिया वॉकथन के आयोजन करे जाही। ए वॉकथन म आकाशवाणी के अधिकारी-कर्मचारी, श्रोंता अउ सहर के नागरिक सामिल होही। वॉकथन के सुरूआत बिहनिया छै बजे आकाशवाणी भवन अंबिकापुर ले होही। ए वॉकथन चंद्रशेखर आजाद चौक, घड़ी चौक, पुराना बस स्टैंड अउ गांधी चौक होवत लहुट के आकाशवाणी परिसर म सिराही। ए आयोजन ऑल इंडिया रेडियो के नब्बे बछर के गौरवसाली यात्रा के सुरता म करे जात हे।
आकार-प्रशिक्षण शिविर
छत्तीसगढ़ शासन के संस्कृति विभाग डहार ले पारंपरिक सिल्प कला के संरक्षण, प्रचार-प्रसार अउ रूचि जगाय के उद्देस्य ले आने-आने कला प्रसिक्षण सिविर आकार दू हजार छब्बीस के आयोजन करे जात हे। ए आयोजन पच्चीस मई ले नौ जून तक रईपुर स्थित महंत घासीदास संग्रहालय परिसर म करे जाही। सिविर म दू पाली म बिहनिया सात बजे ले दस बजे तक अउ संझा पांच बजे ले आठ बजे तक आने-आने कला के प्रसिक्षण दे जाही। जादा जानकारी बर प्रसिक्षु मन संस्कृति विभाग के वेबसाइट डब्ल्यू डब्ल्यू डब्ल्यू डॉट सीजी कल्चर डॉट इन ल देख सकत हे।
संगीत विश्वविद्यालय-नाम
खैरागढ़-छुईखदान-गंडई जिला म स्थित इंदिरा कला संगीत विश्वविद्यालय के नांव अब बदलके ‘‘राजकुमारी इंदिरा ंिसंह कला संगीत विश्वविद्यालय‘‘ करे जाही। राज्य शासन के सामान्य प्रशासन विभाग ह विश्वविद्यालय के नांव बदले के प्रस्ताव ल औपचारिक स्वीकृति प्रदान कर देहे।
दुर्ग-मौत
दुरूग के मोहन नगर थाना क्षेत्र के अंतर्गत आर्य नगर म एक ठिन मकान ले दंपत्ति अउ ओखर दू झिन लइका के सव संदिग्ध परिस्थिति म मिले हे। सुरूआती जांच म पुलिस ह आसंका जताय हे कि दंपत्ति ह पहिली दूनों लइका मनके हत्या करीस, एखर बाद खुद फांसी लगाके आत्महत्या कर लीन। पुलिस ह मउका ले सुसाइड नोट बरामद करे हे, जेमा आर्थिक तंगी अउ पारिवारिक झगड़ा के जिकर हरय। पुलिस मामला के जांच करत हे।
अउ अब पेस हे मौसम के हाल…
राजधानी रईपुर समेत मध्य छत्तीसगढ़ के कई जिला मन म तापमान सामान्य ले जादा दरज करे जात हे। मौसम विभाग ह रईपुर समेत बिलासपुर, रायगढ़, धमतरी, दुरूग, कबीरधाम के अलावा प्रदेस के चौदह जिला के कुछेक जघा म लू चले के चेतावनी दे हे। मौसम विभाग के अनुसार राजस्थान ले आवत गरम हवा के सेति अवइया तीन दिन म प्रदेस के अधिकतम तापमान म लगभग एक ले तीन डिग्री सेल्सियस तक के बढ़ोत्तरी होय के संभावना हे। प्रदेस के अधिकतम तापमान पैंतालीस डिग्री सेल्सियस रईपुर के माना म दरज करे गीस।
अउ अब थोरकुन समाचार सार म –
– लोक निर्माण विभाग ह अपन जम्मो अनुविभागीय अधिकारी मन ले लेके प्रमुख अभियंता तक सबो ल मुख्यालय म रहे के निरदेस देहे। निर्माणधीन कार्य मनके गुणवत्ता अउ समयबध्दता सुनिश्चित करे, काम के मॉनिटरिंग अउ स्वीकृत कार्य ल तुरते सुरू करे बर विभाग ह ए निरदेस जारी करे हे।
– छत्तीसगढ़ राज्य ओपन स्कूल कोति ले हाई स्कूल अउ हायर सेकेंडरी मुख्य अवसर परीक्षा खातिर अभ्यर्थी मन ले पच्चीस मई ले तीस जून तक आवेदन मंगाय गेहे।
अउ
– महासमंुद जिला ले लगे बारनवापारा परियोजना मंडल के रवान रेंज म जंगली जानवर गौर के हमला म एक ग्रामीण के मउत हो गेहे, जबकि दू झन दूसर गंभीर रूप ले घायल हो गेहे। बताय जात हे कि ए ग्रामीण जंगल के आने-आने जघा ले तेंदू पत्ता संग्रहण करत रिहीन।