शिक्षा विभाग-जांच समिति
छत्तीसगढ़ शासन के स्कूल सिक्षा विभाग ह निजी स्कूल के मनमानी रोके बर प्रदेसभर म निगरानी अउ जांच समिति के गठन करे हे। ए समिति अशासकीय स्कूल म फीस बढ़ोतरी अउ पुस्तक-गणवेश खरीदी के सिकायत मनके निगरानी करही। ए संबंध म स्कूल सिक्षा विभाग ह जम्मों जिला कलेक्टर मन ल चिट्ठी जारी करे हे।
जारी आदेस म केहे गेहे कि सासन के संज्ञान म ए बात आय हे कि छत्तीसगढ़ म संचालित आशासकीय स्कूल मन कोति ले अभिभावक मन ल पुस्तक, गणवेश अउ दूसर जिनीस कोनों एक ही फर्म ले खरीदे बर बाध्य करे जात हे। फर्म के अप्रत्याशित कीमत के सेती अभिभावक मन उपर वित्तीय बोझा बाढ़त हे। ओमन के सिकायत के तुरते निराकरण बर जिला अउ विकासखंड स्तर म निगरानी अउ जांच समिति के गठन करे गेहे।
केन्द्र-काॅस्मेटिक उत्पाद
केन्द्र सरकार ह केहे हे कि उपभोक्ता, पेशवर अउ सौंदर्यबोध क्लीनिक डहार ले कोनों भी काॅस्मेटिक उत्पाद के प्रयोग इंजेक्शन के रूप म करे के अनुमति नइ हे। केन्द्रीय औषधि मानक नियंत्रण संगठन ह केहे हे कि काॅस्मेटिक के प्रयोग केवल मानव सरीर म लगाय, छिड़के अउ स्प्रे करे बर करे जाना चाही। ए उत्पाद म प्रतिबंधित सामग्री के उपयोग, भ्रामक दावा, इलाज बर काॅस्मेटिक के इस्तेमाल अउ इंजेक्शन ले काॅस्मेटिक के प्रयोग अधिनियम अउ नियम के उल्लंघन माने जाही।
मुख्यमंत्री-सूरजपुर
प्रदेस म चलत सुशासन तिहार के तहत मुख्यमंत्री विष्णुदेव साय ह आज सूरजपुर जिला अस्पताल म अत्याधुनिक सिटी स्कैन मसीन के वीडियो काॅन्फ्रेंस के जरिया सुभारंभ करीन। ए मसीन करीबन साढ़े चार करोड़ रूपिया के लागत ले स्थापित करे गेहे। ए मउका म मुख्यमंत्री ह किहीन कि नवा सिटी स्कैन मसीन के सुरू होय ले तीर-तखार के मरीज मन ल इलाज के बने सुविधा मिल पाही।
एखर पहिली, मुख्यमंत्री ह अपन सूरजपुर प्रवास के दउरान रामानुजनगर म तेंदूपत्ता संग्राहक मन ले गोठबात करीन। ओमन तेंदूपत्ता संग्रहण काम के जायजा लेवत संग्राहक के समस्या अउ ओमन के आजीविका ले जुड़े बुनियादी सुविधा के जानकारी लीन। श्री साय ह किहीन कि वनोपज संग्रहण करइया वाला मनके जीवन म समृद्धि लाना सरकार के प्राथमिकता हरय। रामानुजनगर क्षेत्र के वनोपज सहकारी समिति डहार ले ए साल निर्धारित लक्ष्य ले जादा मात्रा म तेंदूपत्ता संग्रहण करे जा चुके हे। बतादन कि ए साल राज्य सरकार ह तेंदूपत्ता संग्रहण के दर साढ़े पांच हजार रूपिया प्रति मानक बोरा तय करे हे।
आंतकवाद विरोधी दिवस
देसभर म आज आतंकवाद विरोधी दिवस मनाय जात हे। ए दिवस ल मनाय के उद्देश्य युवा मन ल आतंकवाद अउ हिंसा के प्रवृत्ति ले दूर करना हे। ए मउका म आने-आने सासकीय अउ अशासकीय संस्था मन म आतंकवाद विरोधी सपथ घलो दिलाय गीस। आजे के दिन बछर उन्नीस सौ इंक्यानवे म पूर्व प्रधानमंत्री राजीव गांधी एक आतंकवादी हमला के सिकार होय रिहीन।
भारतीय सेना-परीक्षा
भारतीय सेना ह आॅनलाइन सामान्य प्रवेश परीक्षा के तिथि घोषित कर देहे। आने-आने श्रेणी बर निर्धारित ए आॅनलाइन परीक्षा अवइया एक जून ले पांच जून तक अउ एखर बाद आठ जून ले बारह जून तक आयोजित करे जाही। छत्तीसगढ़ के पांच प्रमुख सहर – भिलाई, दुरूग, रायपुर, बिलासपुर अउ जगदलपुर म एखर बर कुल दस परीक्षा केन्द्र बनाय गेहे, जिहां हरेक दिन परीक्षा के आयोजन तीन ले चार शिफ्ट म करे जाही। जम्मों पंजीकृत उम्मीदवार भारतीय सेना के आधिकारिक वेबसाइट म जाके अपन प्रवेस पत्र डाउनलोड कर सकत हे।
धमतरी-एमओयू
धमतरी जिला के युवा मन ल रोजगार के मउका उपलब्ध कराय बर जिला प्रशासन अउ एक निजी संस्था के बीच समझौता ज्ञापन म हस्ताक्षर करे गेहे। एखर तहत जिला के बेरोजगार युवा, आईटीआई उत्तीण अभ्यर्थी, डिप्लोमा धारक मनके संघरा कुशल अउ अर्द्धकुशल श्रमिक मन ल देस के आने-आने राज्य म रोजगार के मउका दे जाही।
आकाशवाणी रायपुर-स्वरोत्सव
आकाशवाणी के नब्बे बछर पूरा होय के उपलक्ष्य म आकाशवाणी केन्द्र रायपुर डहार ले काली बाईस मई के रायपुर म ‘‘स्वरोत्सव‘‘ संगीत समारोह के आयोजन करे जाही। ए कार्यक्रम शांति नगर स्थित विमतारा आॅडिटोरियम म संझा साढ़े छह बजे ले आयोजित करे जाही। दू सत्र म होवइया ए कार्यक्रम के दउरान सुगम संगीत अउ उप शास्त्रीय प्रस्तुति होही।
पद्मश्री मदन चैहान सुगम संगीत कार्यक्रम पेस करही। उहें, श्वेता शिवाले डहार ले उप शास्त्रीय संगीत के प्रस्तुति दे जाही।
आकाशवाणी रायपुर के उप महानिदेशक अउ कलस्टर प्रमुख वी. राजेश्वर ह बतईन कि आकाशवाणी ह लोक प्रसारण के रूप म पाछु नब्बे बछर म उल्लेखनीय काम करे हे। ए दउरान आकाशवाणी ह सूचना, सिक्षा, समाचार, मनोरंजन के माध्यम ले अपन ध्येय वाक्य ‘‘बहुजन हिताय-बहुजन सुखाय‘‘ के परिकल्पना ल साकार करे के काम करे हे।
आकाशवाणी केन्द्र रायपुर ह घलो स्थानीय संस्कृति, लोक कला, सिक्षा, समाचार अउ मनोरंजन ल गांव-गांव तक पहुंचाय म अहम भूमिका निभाय हे।
चिंतन शिविर
राज्य सरकार ह केहे हे कि मछली पालन ल प्रदेस म कृषि का दर्जा दे जाय ले एखर लागत म लगभग दस प्रतिशत के कमी आय हे। एखर ले मछली पालक मन ल बने आर्थिक फायदा घलो मिलत हे। आज रायपुर म मछली पालन के वैज्ञानिक तकनीक म राखे गे चिंतन सिविर ल संबोधित करत मछली पालन मंत्री रामविचार नेताम ह किहीन कि प्रदेस के किसान मन बर मछली पालन अब ओमन के समृद्धि के साधन बन गेहे। ओमन किहीन कि मछली पालक मनके आमदनी बढ़ाय बर आने-आने वैज्ञानिक तरीका अपनाय जात हे। इही कड़ी म ‘‘गिफ्ट तिलापिया‘‘ तकनीक के तहत रायपुर अउ कांकेर म विशेष कलस्टर बनाय गेहे। श्री नेताम किहीन कि बछर दू हजार अट्ठाईस तक तेलपिया मछरी उत्पादन ल तीस हजार मीटरिक टन पहुंचाय के लक्ष्य राखे गेहे।
बतादन कि मछरी उत्पादन के मामला म छत्तीसगढ़ देस म छठवां स्थान म हे। इहां सालाना साढ़े नौ लाख मीटरिक टन ले जादा मात्रा म मछरी के उत्पादन होवत हे।
यूपीएससी-प्रारंभिक परीक्षा
संघ लोक सेवा आयोग-यूपीएससी ह ए बछर भारतीय प्रशासनिक सेवा के प्रारंभिक परीक्षा बर भुवनेशवर, कानपुर अउ मेरठ म तीन ठन नवा परीक्षा केन्द्र सुरू करे हे। एखरे संघ अब केन्द्र के कुल संख्या तिरासी होगे हे। आयोग के अनुसार लगभग तेईस हजार उम्मीदवार मन ए नवा केन्द्र बर आवेदन करे हे। आयोग के अध्यक्ष डाॅक्टर अजय कुमार ह केहे हे कि एखर उद्देश्य केन्द्र म भीड़ कम करना अउ परीक्षा प्रक्रिया ल अनुकूल, सुलभ अउ कुशल बनाना हे। ए बछर सिविल सेवा प्रारंभिक परीक्षा चैबीस मई के राखे जाही। परीक्षा बर कुल आठ लाख उन्नीस हजार ले जादा आवेदन मिले हे।
इही बीच, रायपुर म यूपीएससी के सिविल सर्विस प्रारंभिक परीक्षा जिला के बाईस केन्द्र म दू पाली म होही। पहिली पाली बिहनिया साढ़े नौ बजे ले साढ़े ग्यारह बजे तक अउ दूसर पाली मंझनिया ढाई बजे ले संझा साढ़े चार बजे तक संचालित होही।
संक्षिप्त समाचार
– लोक निर्माण विभाग के सचिव मुकेश कुमार बंसल ह आज नवा रायपुर म विभागीय समीक्षा बइठका म जम्मों टेंडर प्रक्रिया ल पारदर्सिता के संग पूरा करे बर किहीन।
– केन्द्र सरकार ह प्रधानमंत्री राष्ट्रीय बाल पुरस्कार बर अवइया इकतीस जुलाई तक नामांकन मंगाय गेहे। एखर बर पांच ले अट्ठारह बछर के भारतीय नागरिक पात्र होही।
– भिलाई पुलिस ह नौकरी दिलाय के नाव म करीबन साढ़े सात लाख रूपिया के ठगी के आरोपी ल गिरफ्तार करे हे।
– रायपुर के स्वामी विवेकानंद विमानतल के प्रतीक्षालय म तीस फीट ऊंचा सीलिंग ले गिरे के सेती एक मजदूर के मउत होगे। पुलिस ह मामला के जांच सुरू कर देहे।
– जांजगीर-चांपा जिला के अर्जुनी गांव म तरिया म डूबे ले आठ अउ नौ साल के दू सगे बहिनी के मउत होगे।
– जांजगीर-चांपा जिला के खोखसा ओवरब्रिज के उपर पाछु संझा तेज रफ्तार चार चक्का गाड़ी के अनियंत्रित होके पलटे ले एक छात्र समेत दू मनखे के मउत होगे। उहें, एक झिन दूसर छात्र घायल होगे।
अउ
– दुरूग स्थित छत्रपति शिवाजी इंस्टीट्यूट आॅफ टेक्नोलाॅजी म काली बाईस मई के जिला
स्तरीय रोजगार मेला अउ प्लेसमेंट कैम्प राखे जाही।