उपमुख्यमंत्री विजय शर्मा ह आज रईपुर पुलिस परेड मैदान म डायल-एक सौ बारह फेस-टू नेक्स्ट जनरेशन सेवा के सुभारंभ करीन। ए मउका म ओमन चौव्वन ठिन नवा इमरजेंसी गाड़ी ल हरियर झंडी देखाके रवाना करीन। ओमन किहीन कि पहली डायल-एक सौ बारह सेवा सिरिफ सोलह ठिन जिला तक सीमित रिहीस, जेखर बढ़वार अब प्रदेस के सबो तैंतीस जिला म कर दे गेहे। ओमन बतईन कि सबो गाड़ी म आधुनिक जीपीएस सिस्टम, स्मार्ट कंट्रोल, मॉनिटरिंग सिस्टम अउ डिजिटल कम्युनिकेशन तकनीक हवय। डायल-एक सौ बारह म पुलिस सहायता, फायर बिग्रेड, मेडिकल इमरजेंसी, महिला हेल्पलाइन, चाइल्ड हेल्पलाइन, आपदा प्रबंधन अउ हाईवे इमरजेंसी जइसन सबो आपातकालीन सेवा ले जा सकत हे।
सरकारी शुल्क-स्कूल
छत्तीसगढ़ के स्कूल शिक्षा विभाग ह अवइया सिक्षा सत्र बर सरकारी स्कूल म स्थानीय सुल्क बढ़ाय के आदेस जारी करे हे। ए नवा दर सरकारी स्कूल के संगेसंग आत्मानंद स्कूल अउ अनुदान मिले विद्यालय मन म घलो लागू होही। जारी आदेस के मुताबिक हाईस्कूल स्तर के विद्यार्थी मनके स्थानीय सुल्क चार सौ दस रूपिया ले बढ़ाके पांच सौ रूपिया करे गेहे। उहें, उच्चतम माध्यमिक स्कूल के लइका मन ल चार सौ पैंतालीस रूपिया के जघा पांच सौ पचास रूपिया दे बर पड़ही। विभाग के मुताबिक नवा दर अवइया सिक्षा सत्र ले लागू हो जही।
केन्द्रीय कृषि मंत्री-उर्वरक
केन्द्रीय कृषि मंत्री शिवराज सिंह चौहान ह किहीन हे कि अंतर्राष्ट्रीय बाजार ले उर्वरक लेना मुश्किल होत जात हे। ओमन रासायनिक उर्वरक म निर्भरता कमती करे बर जैविक खेती म जादा जोर दीन। श्री चौहान ह किहीन कि वैश्विक चुनौती के बादो केन्द्र सरकार किसान मन बर पर्याप्त खातू आपूर्ति सुनिश्चित करे के परयास करत हे। ओमन छूट वाले खातू के दुरूपयोग के खिलाफ चेतावनी दीन अउ राज्य ले नकली अउ घटिया किसम के खातू के आपूर्ति करइया मनके खिलाफ कड़ा कार्रवाई करे बर किहीन।
केन्द्रीय शिक्षा मंत्री-बैठक
केन्द्रीय सिक्षा मंत्री धर्मेन्द्र प्रधान ह आज नई दिल्ली म एक उच्च स्तरीय बइठका के अगुवई करीन, जेमा अवइया नीट-यूजी के फेर ले परीक्षा के तियारी ल देखीन। परीक्षा के आयोजन म ईमानदारी अउ साफगोई के जरूरत म जोर देवत श्री प्रधान ह निरदेस दीन कि पाछु परीक्षा म जउन कमी रिहीस, तेला दुरिहाय जाय। बइठका के बेरा सबो राज्य के जिला मजिस्ट्रेट अउ पुलिस अधीक्षक के संग मिलके बइठका करे के निरदेस दे गीस, जेखर ले परीक्षा के बेवस्था बने ढंग ले होवय।
शहरी नागरिक-सहकारी बैंक
छत्तीसगढ़ के सहरी नागरिक सहकारी बैंक म आधुनिक बैंकिंग सुविधा के बढ़वार करे जाही। ए संबंध म सहकारिता आयुक्त अउ पंजीयक सहकारी संस्था महादेव कावरे ह रईपुर म समीक्षा बइठका करीन। बइठका म राज्य के बारह ठिन सहरी सहकारी बैंक के प्रतिनिधि संघरीन। सहकारिता आयुक्त ह बैंक ल मोबाइल बैंकिंग, इंटरनेट बैंकिंग अउ आधार आधारित भुगतान प्रणाली जइसन सुविधा सुरू करे के निरदेस दीन। एखर ले प्रदेस के सहकारी बैंक म डिजिटल सेवा ल बढ़ावा मिलही अउ लोगन ल बने सुभीता मिल सकही।
अग्निवीर भर्ती परीक्षा-परिणाम
भारतीय सेना कोति ले अग्निवीर भर्ती के तहत अग्निवीर लिपिक अउ स्टोर कीपर टेक्निकल पद बर होय परीक्षा के परिणाम घोषित कर दे गेहे। ए परीक्षा म छत्तीसगढ़ के बीस झिन उम्मीदवार मन ल सफलता मिले हे। परीक्षा के नतीजा भारतीय सेना के वेबसाइट म हवय अउ सेना भर्ती कार्यालय रईपुर के नोटिस बोर्ड म घलो देखे जा सकत हे। पास होय उम्मीदवार मन ल काली इक्कीस मई के बिहनिया नौ बजे सबो दस्तावेज संघ नवा रईपुर के सेना भर्ती कार्यालय म उपस्थित होय बर पड़ही।
राज्यपाल-मुलाकात
राज्यपाल रमेन डेका ह आज लोकभवन म छत्तीसगढ़ पर्यटन मंडल के प्रबंध संचालक विवेक आचार्य ले भेंट करीन। ए दउरान राज्य म पर्यटन वाले जघा के बढ़वार अउ पर्यटक मन बर बने सुभीता ल लेके गोठबात होइस। राज्यपाल ह चित्रकूट जलप्रपात, गंगरेल बांध अउ बूका जलाशय म पर्यटन सुभीता के बढ़वार म जोर दीन। ओमन किहीन कि ए जघा म पर्यटक मन बर जरूरी सुभीता बढ़वार करे जाय। संगेसंग वरिष्ठ नागरिक मन बर जादा सुभीता दे जाय। उहें, कोरबा जिला के बूका जलाशय म क्रूज सेवा सुरू करे के सुझाव दीन।
राज्यपाल ले आज लोकभवन म प्रसिद्ध पंडवारी गायिका तीजन बाई के परिवार वाले मन ह भेंट करीन। ए दउरान राज्यपाल ह तीजन बाई के हालचाल जानीन अउ उंखर जल्दी स्वस्थ होय के कामना करीन। तीजन बाई के परिवार वाले मन ह बतईन कि तीजन बाई के सम्मान म अवइया सात अगस्त के एक समारोह राखे जात हे, जेमा राज्यपाल ल मुख्य माईपहुना के रूप म सामिल होय बर नेवता दीन।
ऑनलाइन दवा बिक्री-हड़ताल
दवई के ऑनलाइन बिक्री के विरोध म आने-आने केमिस्ट संगठन मन ह आज देशभर म हड़ताल के आह्वान म छत्तीसगढ़ समेत देसभर म दवई दुकान बंद राखीन। बिलासपुर म जिला औषधि विक्रेता संघ के बैनर म दवई व्यापारी मन ह रैली निकालीन। व्यापारी मन ह आरोप लगईन कि बिना जांच पड़ताल के ऑनलाइन दवई बेचे जात हे, जेखर ले मरीज मनके सुरक्षा ल खतरा हो सकत हे। उहें, छोटे दवई दुकान के व्यापार म घलो असर होवत हे।
इही बीच, जिला प्रशासन ह सरकारी अस्पताल, जनऔषधि केन्द्र अउ धवंतरी मेडिकल स्टोर म दवई के उपलब्धता सुनिश्चित करीन हे।
वॉकथन
आकाशवाणी के नब्बे बछर पूरा होय के मउका म आज बिलासपुर म आकाशवाणी केन्द्र कोति ले वॉकथन राखे गीस। एमा आकाशवाणी के कर्मचारी उद्घोषक, कम्पियर, श्रोता अउ सहर के नागरिक संघरीन। कार्यक्रम के मुख्य अतिथि कलेक्टर संजय अग्रवाल ह बदलत बेरा म रेडियो के पहुंच अउ ओखर महत्ता के संबंध म अपन विचार साझा करीन।
उहंें, वरिष्ठ पुलिस अधीक्षक रजनेश सिंह ह कहिन कि रेडियो जीवन के हर क्षेत्र ले जुड़े हे अउ लोगन ल सरलग जोड़त हे।
ऐति, आकाशवाणी केन्द्र बिलासपुर के कार्यक्रम प्रमुख डॉक्टर सुप्रिया भारतीयन ह रेडियो के महत्व अउ वॉकथन के संबंध म जानकारी दीन।
राष्ट्रीय आम महोत्सव
रईपुर के इंदिरा गांधी कृषि विश्वविद्यालय परिसर म उनतीस ले इकतीस मई तक राष्ट्रीय आम महोत्सव के आयोजन करे जाही। एमा आमा के ढाई सौ ले जादा किसम देखाय जाही। संगेसंग आमा के आने-आने किसम के प्रतियोगिता होही, जेमा छत्तीसगढ़ अउ आने राज्य के आम उत्पादक संघरही। ए मउका म आमा ले बने कतकोन व्यंजन के प्रदर्सनी लगाय जाही। आम महोत्सव म पंजीयन अउ प्रवेश मुफत म हे। ए महोत्सव इंदिरा गांधी कृषि विश्वविद्यालय, उद्यानिकी अउ प्रक्षेत्र वानिकी, छत्तीसगढ़ शासन अउ प्रकृति की ओर सोसायटी कोति जुल मिरके आयोजित करे जात हे।
संक्षिप्त समाचार
– केन्द्रीय माध्यमिक सिक्षा बोर्ड-सीबीएसई ह कक्षा बारहवीं बोर्ड परीक्षा के जांचे उत्तर पुस्तिका के स्कैन करे गे प्रति बर अरजी देके आखिरी तारीख ल एक दिन बढ़ा देहे। उम्मीदवार अब तेईस मई तक अरजी दे सकत हे।
– छत्तीसगढ़ माध्यमिक सिक्षा मंडल ह राष्ट्रीय साधन सह प्रावीण्य छात्रवृत्ति परीक्षा के आदर्श उत्तर जारी कर देहे। उम्मीदवार कोनों प्रश्न या ओखर आदर्श उत्तर म अपन दावा आपत्ति पच्चीस मई तक माध्यमिक सिक्षा मंडल कार्यालय रईपुर म जमा करा सकत हे।
– छत्तीसगढ़ उच्च न्यायालय ह जोहार छत्तीसगढ़ पार्टी के प्रमुख अमित बघेल के जमानत याचिका खारिज कर देहे। बलौदाबाजार आगजनी कांड म गिरफ्तार होय के बाद श्री बघेल ह हाईकोर्ट म जमानत याचिका दायर करे रिहीन।
– धमतरी जिला के कोतवाली थाना क्षेत्र म सिहावा चउक तीर पाछु रतिहा गश्त के बेरा चौपहिया गाड़ी के चपेट म आय ले एक प्रधान आरक्षक के मउत होगे। उहें, एक नगर सैनिक गंभीर रूप ले घायल होगे हे।
अउ
– दुरूग म बाईस मई के जिला स्तरीय रोजगार मेला अउ प्लेसमेंट कैंप लगाय जाही। छत्रपति शिवाजी इंस्टीट्यूट ऑफ टेक्नोलॉजी म होवइया ए आयोजन म दसवीं ले लेके इंजीनियरिंग, नर्सिंग अउ मेडिकल योग्यता वाले उम्मीदवार मन ल रोजगार के मउका मिलही।