केन्द्रीय गृहमंत्री-पत्रकारवार्ता
केन्द्रीय गृह अउ सहकारिता मंत्री अमित शाह ह किहीन हे कि अवइया पांच साल म छत्तीसगढ़ के बस्तर संभाग ह देस के सबले विकसित आदिवासी संभाग बन जही। आज बस्तर के संभागीय मुख्यालय जगदलपुर म मीडिया ले गोठबात करत श्री शाह किहीन कि सरकार के लक्ष्य हे कि बछर दू हजार इकतीस तक बस्तर के लोगन मनके आमदनी ह छह गुना तक बाढ़ जही। ओमन किहीन कि बस्तर ल नक्सलमुक्त बनाय के बाद केन्द्र अउ राज्य सरकार ह मिलके अवइया पांच साल बर एखर विकास ले जुड़े एक वैज्ञानिक रोडमैप तियार करे हे, जेखर ले बस्तर संभाग म बनाय गे सुरक्षा बल के करीबन दू सौ सिविर म ले सत्तर ठन कैम्प मन ल शहीद वीर गुण्डाधूर सेवा डेरा म बदले जाही। ए सेवा डेरा के माध्यम ले स्थानीय लोगन मन ल सासन के जम्मों योजना मनके फायदा पहुंचाय जाही, जेमा बैंकिंग, कौशल प्रशिक्षण, स्कूल, आंगनबाड़ी वनोपज प्रसंस्करण सामिल हे। एखर अलावा बस्तर के हर आदिवासी परिवार ल एक-एक ठन गाय अउ भईंस दे जाही अउ अवइया छह महीना के भीतर इहां सहकारी डेयरी के एक ठिन बहुत बड़े नेटवर्क तियार करे जाही। ए काम बर छत्तीसगढ़ सरकार ह राष्ट्रीय दुग्ध विकास बोर्ड के संग अनुबंध कर लेहे।
केन्द्रीय गृहमंत्री ह यहू किहीन कि सरकार ह बस्तर के लोगन मनके सुरक्षा के संगेसंग ओखर विकास बर घलो प्रयास करही। श्री शाह किहीन कि हिंसा ह कोनों भी समस्या के समाधान नइ हे अउ हिंसा ले आज तक काखरो विकास नइ होय हे। ओमन किहीन कि अवइया पांच साल के दउरान केन्द्र अउ राज्य सरकार ह मिलके बस्तर के लोगन मन तक सरकार के जम्मों सुविधा पहुंचाही अउ ए ह दुनिया म विकास के एक ठन लोकतांत्रिक मॉडल बनही।
केन्द्रीय गृहमंत्री अमित शाह ह आज जगदलपुर म राखे गे मध्य क्षेत्रीय परिषद के छब्बीसवां बइठका के अगुवई करीन। ए बइठका म छत्तीसगढ़, उत्तरप्रदेश, मध्यप्रदेश अउ उत्तराखंड के मुख्यमंत्री के संगेसंग केन्द्रीय गृह सचिव इंटेलीजेंस ब्यूरो के निदेसक अउ ए चारों राज्य के पुलिस महानिदेसक के अलावा पुलिस अउ प्रसासन के बड़का अधिकारी मन ह सामिल होइन।
पेट्रोल/डीजल-कीमत
तेल कंपनी डहार ले पेट्रोल अउ डीजल के कीमत म आज फेर एक घांव बढ़ोतरी करे गेहे। तेल कंपनी के छत्तीसगढ़ राज्य स्तरीय समन्वयक नितिन चौहान ह आकाशवाणी समाचार ल बतईन कि पेट्रोल के कीमत म नब्बे पइसा अउ डीजल के कीमत म छियानवे पइसा प्रतिलीटर के बढ़ोतरी करे गेहे।
पेट्रोल-डीजल-स्पष्टीकरण
राज्य सरकार ह किहिन हे कि प्रदेस म पेट्रोल अउ डीजल के कोनों कमी नइ हे। एखर ले लोगन मन ल घबराय के कोनों बात नइ हे। सरकार के मुताबिक राज्य म अभी तीन करोड़ अट्ठायासी लाख लीटर ले जादा पेट्रोल अउ सात करोड़ पचहत्तर लाख लीटर ले जादा डीजल हवय।
खाद्य विभाग डहार ले जम्मों तेल कंपनी मनके संग समीक्षा बइठका राखे गीस। ए दउरान किहीन हे कि जउन-जउन पेट्रोल पंप मन म स्टॉक कमती हे, उहां प्राथमिकता के मुताबिक पेट्रोल अउ डीजल के आपूर्ति करे जाय। प्रदेस म कुल दू हजार पांच सौ सोलह ठन पेट्रोल पंप हवय। पाछु कुछ दिन म मांग बढ़े के सेती पेट्रोल के खरीदी म सैंतालीस प्रतिसत अउ डीजल के खरीदी म बाईस प्रतिशत के बढ़ोतरी दरज करे गेहे। सरकार ह लोगन मन ले अपील करे हे कि कोनों प्रकार के अफवाह म मत आवय अउ जादा पेट्रोल ल स्टॉक म झन राखय।
लोकभवन-स्थापना दिवस
राजधानी रईपुर के लोकभवन म हिमाचल प्रदेश, गुजरात, सिक्किम अउ महाराष्ट्र के स्थापना दिवस के कार्यक्रम पारंपरिक उछाह अउ उमंग के संग मनाय गीस। राज्यपाल रमेन डेका ल ए कार्यक्रम के माईपहुना बनाय गे रिहीस। लोकभवन के छत्तीसगढ़ मंडपम म ‘‘एक भारत-श्रेष्ठ भारत‘‘ कार्यक्रम के अंतर्गत राखे गे ए कार्यक्रम म राज्य के प्रतिनिधि मन ह घलो सामिल होइन। राज्यपाल ह ए जम्मों के राज्य के लोगन मन ल बधाई अउ सुभकामना दीन। ए मउका म राज्यपाल ह किहीन कि अनेकता म एकता ह भारत के सबले बड़े सक्ती हरय, जेखर ले आपस म मान-सम्मान ह बाढ़थे। कार्यक्रम म राज्यपाल ह समाज म बढ़िया काम करइया लोगन मन ल सम्मानित करीन।
‘‘जन भागीदारी-सबसे दूर, सबसे पहले‘‘ अभियान
प्रदेस म जनजातीय समुदाय मन तक सरकारी योजना मन ल बताय खातिर काली ले ‘‘जन भागीदारी सबले दूर, सबले पहिली‘‘ अभियान सुरू करे गेहे। जनजातीय गरिमा उत्सव के तहत ए अभियान ल पच्चीस मई तक चलाय जाही। अभियान के तहत जनजातीय क्षेत्र मन म जादा ले जादा जन-जागरूकता कार्यक्रम चलाय जाही। ए दउरान सेवा केन्द्र मन म जनसुनवाई कार्यक्रम राख के सिकईत मनके समाधान करे जाही। प्रदेस म पीएम जन-मन योजना अउ धरती आबा जनजातीय ग्राम उत्कर्ष अभियान के तहत चुने गे करीबन आठ हजार गांव सात हजार ले जादा सेवा केन्द्र मनके माध्यम ले ए अभियान ल चलाय जाही।
सुप्रीम कोर्ट-लावारिस कुत्ता
सर्वोच्च न्यायालय ह सार्वजनिक स्थान मन ले पकड़े गे लावारिस कुकुर मन ल टीकाकरण या नसबंदी करे के बाद वापिस नइ छोड़े के अपन पूर्व निरदेस ल वापस ले म इंकार कर दीन। न्यायमूर्ति विक्रम नाथ के अध्यक्षता वाले पीठ ह नवंबर दू हजार पच्चीस के आदेस म संशोधन करे के मांग वाला याचिका ल खारिज कर दीन अउ अधिकारी मन ल अइसन कुकुर मन ल आश्रय जघा म राखे गे निरदेस दीन। पीठ ह चेतावनी देहे कि निरदेस मनके पालन नइ करइया अधिकारी मन ल अवमानना अउ अनुशासनात्मक कार्रवाई के सामना करे बर पड़ सकत हे।
ऑनलाइन सट्टा-आरोपी गिरफ्तार
दुरूग पुलिस के टीम डहार ले आईपीएल मैच के दउरान ऑनलाइन सट्टा ऐप चलइया गिरोह के तेरह झिन आरोपी मन ल गिरफ्तार करे गीस। पुलिस ह बतईन कि ऑनलाइन सट्टा कारोबार के प्रमुख संचालक ‘सेट स्पोर्ट बुक‘ अउ ‘लोटस ऐप‘ के माध्यम ले म्यूल अकाउंट के उपयोग करके करोड़ों रूपिया के लेनदेन करत रिहीस। पुलिस ल आरोपी मन तीर ले मिले म्यूल खाता ले करीबन पांच करोड़ रूपिया के लेनदेन के जानकारी मिले हे।
चोर गिरोह-गिरफ्तार
दुरूग-भिलाई के नेहरू नगर इलाका म होय एक ठन चोरी के मामला के जांच करत पुलिस ह अंतर्राज्यीय गिरोह के खुलासा करे हे। पुलिस अधीक्षक विजय अग्रवाल ह बतईन कि ए मामला म मेरठ ले दू झिन आरोपी मन ल गिरफ्तार करे गेहे। ओखर तीर ले साठ लाख रूपिया कीमत के करीबन चार सौ ग्राम सोना अउ साढ़े तीन लाख रूपिया नगदी बरामद करे गेहे। ए गिरोह ह दुरूग, भिलाई, नवा रायपुर, बिलासपुर, अउ जबलपुर म चोरी करत रिहीन। श्री अग्रवाल ह बतईन कि ए आरोपी मन ह दिन म फेरी वाले बनके कपड़ा अउ कंबल बेचे के बहाना रेकी करय।
गांजा-बरामद
बिलासपुर जिला म पुलिस अउ ए.सी.सी.यू. के टीम ह सरकंडा थाना क्षेत्र के अंतर्गत नब्बे किलो गांजा के संग आठ झिन माईलोगिन मन ल गिरफ्तार करीन हे। ए माईलोगिन मन ह इलेक्ट्रॉनिक ऑटो गाड़ी ले गांजा के तस्करी करत रहिन। ए जम्मों झन माईलोगिन मन ह मटियारी गांव के रहवइया हरय अउ ओमन ओडिसा ले गांजा लाके तीर-तखार के इलाका म बेचत रिहीन। पुलिस के टीम ह गांजा के संग दू ठन इलेक्ट्रॉनिक गाड़ी ल घलो जब्त कर लेहे। एखर कीमत ल छियालीस लाख पचहत्तर हजार रूपिया बताय जात हे।
मौसम
मौसम विभाग डहार ले आज प्रदेस के रायपुर, दुरूग, बालोद, राजनांदगांव, बलौदाबाजार, जांजगीर-चांपा, रायगढ़ अउ बिलासपुर के संगेसंग कोनों-कोनों जिला मन म हवा-गरेर अउ हल्का बारिस होय के संभावना जताय हे। ओति, बस्तर संभाग के जिला मन म गरज-चमक के संग छिटपुट बरसा होय अउ गाज गिरे के चेतावनी दे गेहे।
संक्षिप्त समाचार
– छत्तीसगढ़ संस्कृत विद्यामंडलम ह उत्तर मध्यमा पहिली बछर अउ ग्यारहवीं के दूसरइया मुख्य परीक्षा के समय-सारिणी ल जारी कर देहे। ए परीक्षा एक जून ले नौ जून तक राखे जाही।
– मुख्यमंत्री अनुसूचित जाति अउ जनजाति विद्यार्थी उत्कर्ष योजना के तहत कक्षा छठवीं म दाखिला खातिर अनुसूचित जाति-जनजाति वर्ग के विद्यार्थी मन ह बीस जून तक अपन अरजी दे सकत हे। चयन परीक्षा ल छब्बीस जुलाई के मंझनिया बारह बजे ले दू बजे तक राखे गेहे।
– जिला रोजगार अउ स्वरोजगार मार्गदर्शन केन्द्र राजनांदगांव डहार ले काली बीस मई के बिहनिया दस बजे ले अंबागढ़ चौकी तहसील कार्यालय परिसर म जिला स्तरीय रोजगार मेला के कार्यक्रम राखे जाही।
– कांकेर जिला के भानुप्रतापपुर म आज बिहनिया रेलवे पटरी पार करत बेरा रेलगाड़ी के चपेट म आय ले एक झन रिटायर सिक्षक के मउत होगे।
अउ
– जांजगीर-चांपा जिला के खटोला गांव म कार अउ फटफटी के आपस म टकराय ले एक झिन जवान लइका के
मउत होगे। उहें तीन झन जवान लइका मन ह गंभीर रूप ले घायल हे।