केंद्रीय गृहमंत्री-छत्तीसगढ़ प्रवास
केंद्रीय गृहमंत्री अमित शाह ह आज रईपुर म चार सौ अत्याधुनिक डायल एक सौ बारह अउ बत्तीस ठिन फॉरेंसिक मोबाइल वैन ल हरा झंडी देखाके रवाना करीन। संगेसंग तैंतीस ठिन बिसेस निगरानी वाहन अउ साठ ठिन राजमार्ग गस्ती गाड़ी ल रवाना करीन। एखर उद्देस्य राज्य के आपात कालीन सहायता प्रणाली के विस्तार करना अउ नवा आपराधिक कानून के तहत वैज्ञानिक अनुसंधान क्षमता ल मजबूत करना हे। अभी तक प्रदेस के सिरिफ सोलह जिला मन म ए सुविधा मिलत रिहीस, फेर अब राज्य सरकार ह डायल एक सौ बारह सेवा ए विस्तार करके जम्मों तैंतीस जिला मन म कर देहे। ‘एक्के नंबर सबो बर थीम उपर आधारित ए सेवा पुलिस, मेडिकल इमरजेंसी, आगजनी, सड़क दुर्घटना अउ आपदा जइसन आपात स्थिति म तुरते मदद दे जाही। अब राज्य के नागरिक पारंपरिक दूरभाष काल के अलावा एक सौ बारह इंडिया अनुप्रयोग‘‘ संकट संकेत सेवा, एआई आधारित संवाद प्रणाली, ई-मेल, वेब अनुरोध के संगेसंग सामाजिक माध्यम ले घलो आपातकालीन मदद मिल सकही।
नवा आपराधिक कानून के तहत वैज्ञानिक जांच ल मजबूती देबर बत्तीस ठिन आधुनिक फॉरेंसिक मोबाइल वैन चलाय जात हे। ए कारीकरम म मुख्यमंत्री के संगेसंग विधानसभा अध्यक्ष अउ उपमुख्यमंत्री घलो सामिल होइन।
केंद्रीय गृहमंत्री-छत्तीसगढ़ प्रवास
केंद्रीय गृहमंत्री अमित शाह ह आज बस्तर जिला के गांव नेतानार स्थित सीआरपीएफ कैम्प पहुंचिन, ंिजंहा ओमन ‘‘शहीद वीर गुंडाधूर सेवा डेरा‘‘- जन सुविधा केंद्र के उद्घाटन करीन। ए मउका म ओमन किहीन कि पाछू छै दसक ले नक्सलवाद के सेति बस्तर के आर्थिक, सामाजिक अउ सांस्कृतिक नकसान होय हे, जेखर भरपई प्रधानमंत्री नरेंद्र मोदी के अगुवई म भाजपा सरकार ह पाछू पांच साल म करही। ओमन किहीन कि बस्तर के जम्मो एक सौ छियानवे म सत्तर सुरक्षा कैम्प ल अवइया डेढ़ साल म जनसुविधा केंद्र म बदल के ओला आदिवासी कल्याण केंद्र बनाही। इही दिसा म आज ए जन सुविधा केंद्र के लोकार्पण करे गीस। उहें, केंद्रीय गृहमंत्री ह ईमली प्रसिक्षण केंद्र म प्रसिक्षण लेवत स्व-सहायता समूह के माईलोगिन मन ले गोठबात करीन। जन सुविधा केंद्र के खुले ले दूर-दराज म रहइया लोगन मन ल शासकीय अउ डिजीटल सेवा जेमा- नवा आधार, आधार अपडेट, केवाईसी, मोबाइल नंबर अपडेट अउ ई-आधार जइसन सुविधा मिल सकही। संगेसंग गांव के लोगन मन ल ऑनलाइन प्रमाण पत्र के फायदा मिलही। केंद्र म जन्म, आय-जाति जइसन प्रमाण पत्र बनाय म अब लोगन मन ल ऐति-ओति जाय के जरूरत नइ पड़ही।
केंद्रीय गृहमंत्री ह जगदलपुर म स्थित अमर वाटिका म माओवाद के विरूध्द संघर्ष म जान गंवइया एक हजार ले जादा शहीद जवान मन ल श्रध्दांजलि दीन। ए मउका म ओमन किहीन कि बस्तर के धरती ल सांति, सुरक्षा अउ विकास कोति ले जाय म ए जवान मन के बड़का भूमिका हे।
ए दउरान गृहमंत्री ह बीजापुर नक्सली हमला म शहीद जवान कालेन्द्र प्रसाद नायक अउ पवन कुमार मंडावी के परिवार वाले मनले मिलिन। केंद्रीय गृहमंत्री ह सुरक्षाबल के जवान मन ले गोठबात करके उंखर साहस अउ समर्पण के प्रसंसा करीन। कारीकरम म मुख्यमंत्री घलो सामिल होइन।
केंद्रीय गृहमंत्री अमित शाह ह काली जगदलपुर म होवइया मध्य क्षेत्रीय परिषद के बइठका के अगुवई करही। एमा छत्तीसगढ़ के मुख्यमंत्री के संगेसंग मध्यप्रदेस, उत्तर प्रदेस अउ उत्तराखंड के मुख्यमंत्री मन घनो सामिल होही।
केंद्रीय गृहमंत्री-छत्तीसगढ़ प्रवास
केंद्रीय गृहमंत्री ह किहीन कि बस्तर के संगेसंग अब भारत नक्सल मुक्त हो चुके हे। नक्सल मुक्त के अभियान म हजारों जवान मन अपन बलिदान देहे। श्री शाह ह आज जगदलपुर म राखे गे ‘‘उजर बस्तर-बदलते बस्तर की नई पहिचान‘‘ कारीकरम ल संबोधित करीन। ओमन किहीन कि जब केंद्र सरकार ह नक्सलवाद खतम करे के संकलप लीन, त उंखर उद्देस्य सिरिफ माओवाद के खातमा करना नइ रिहीस, भलूक बस्तर क्षेत्र के गरीब आदिवासी मनके जिनगी म जम्मों सुविधा पहंुचाना रिहीस, जउन ह बड़का सहर मन म होथे। ओमन किहीन कि अवइया पांच साल म बस्तर ह देस म सबले विकसित आदिवासी संभाग बनही।
‘‘जन भागीदारी-सबसे दूर, सबसे पहले‘‘ अभियान
प्रदेस के जनजातीय गांव मन तक सरकारी योजना मनके फायदा पहुंचाय बर आज ले ‘‘जनभागीदारी-सबसे दूर, सबसे पहले‘‘ अभियान के सुरूआत होगे। पच्चीस मई तक चलइया ए अभियान प्रदेस के आठ हजार ले जादा गांव मन म चलाय जाही। आदिमजाति विकास विभाग के ए अभियान के तहत प्रधानमंत्री जनजातीय आदिवासी न्याय महा अभियान अउ धरती आबा जनजातीय ग्राम उत्कर्ष अभियान ले जुड़े गांव मन सामिल करे गेहे। रईपुर जिला ल छोड़के प्रदेस के जम्मो जिला मन म स्वास्थ्य, शिक्षा, सामाजिक सुरक्षा, पोषण अउ पेयजल योजना मनके लाभ पात्र लोगन मन तक पहुंचाय जात हे। अधिकारी मन गांव मन म जन-सुनवाई करही अउ आदि सेवा केंद्र मन म सिकइत मनके निपटारा करे जाही।
ऑनलाइन-औषधि-हड़ताल
ऑनलाइन दवई मनके बिक्री के विरोध म कतकोन केमिस्ट संगठन डहार ले बीस मई के राष्ट्रव्यापी हड़ताल के आह्वान करे गेहे। एला देखत प्रदेस के खाद्य अउ औषधि प्रशासन ह जम्मो जिला मन म अधिकारी मन ल जरूरी जीवन रक्षक दवई, आपात कालीन स्वास्थ्य उत्पाद अउ चिकित्सकीय जिनिस मन ल राखे के निरदेस देहे। प्रशासन ह बतइन कि आपातकालीन स्थिति म सरकारी अस्पताल, जन औषधि केंद्र, धनवंतरी मेडिकल स्टोर अउ आने औषधि केंद्र मन म दवई मिलही। प्रशासन ह आम लोगन मन ले अपील करे हवय कि ओमन कोनो प्रकार के दवई ल सकेल के झन रखय।
सोना जब्त
महासमुंद जिला म आज पुलिस ह गाड़ी जांच के दउरान एक ठिन कार ले सवा सात किलो ले जादा के सोना के जेवरात बरामद करे हे। बरामद सोना के कीमत नौ करोड़ सत्रह लाख रूपिया आंके गेहे। हमर संवाददाता ले मिले जानबा के मुताबिक जिला के सिंघोड़ा थाना पुलिस डहार ले ओडिसा सीमा ले लगे रेहटीखोल नाका म जांच अभियान चलाय जात रिहीस हे, इही दउरान ओडिसा कोति ले आवत एक ठिन कार ल रोक के तलासी ले गीस। तलासी के दउरान सोना के आभूषण जब्त करे गीस। पुलिस ह दस्तावेज पेस नइ करे के ेसेति गुजरात के तीन झिन आरोपी मन ल हिरासत म लेहे। आयकर विभाग अउ राजस्व सुचना निदेशालय ल जानबा दे दे गेहे।
मौसम
मौसम विभाग ह अवइया चौबीस घंटा के दउरान प्रदेस के एक-दू जघा म हवागरेर चले अउ गाज गिरे के संभावना जताय हे। मौसम विभाग के मुताबिक दक्षिण-पश्चिम बंगाल के खाड़ी अउ पश्चिम मध्य बंगाल के खाड़ी के उपरी एक ठिन निम्नदाब के क्षेत्र बने हे। संगेसंग एक ठिन चक्रीय चक्रवात विस्तारित हे। एखर असर ले बदली बरसा के स्थिति बनत हे।
संक्षिप्त समाचार
– जगदलपुर के बालिंगा के तीर आज राष्ट्रीय राजमार्ग क्रमांक-तीस म बस के पलटे ले एक झिन यात्री के मउत होगे। उहें, तीस झिन यात्री मन घायल हो गेहे, जेमा ले सात झिन के हालत गंभीर बताय जात हे। ए बस रईपुर ले कोंटा जावत रिहीस।
अउ
– कोरबा जिला के पाली थाना क्षेत्र के गांव भादा के जंगल म तेंदूपत्ता टोरे बर गे दू झिन गांव के लोगन मन उपर भालू ह हमला कर दीन। ए घटना म घायल दूनों मनखे ल अस्पताल म भर्ती कराय गेहे।