लाॅकडाउन-01
कोरोना संक्रमण के बाढ़त मामला ल देखत छत्तीसगढ़ के आने-आने जिला म संपूर्ण लाॅकडाउन लगाय के फइसला ले गेहे। दुर्ग जिला म आज ले लाॅकडाउन लागू होगे हे, जउन ह तीस सितंबर तक प्रभावसील रइही। ए दउरान अति-आवश्यक सेवा ही संचालित करे जा सकही। उहें, आने व्यावसायिक प्रतिष्ठान बंद रइही, जेमा किराना, स्टेशनरी संग आने-आने दुकान सामिल हे। कोरोना संक्रमण ले बांचे बर लोगन ल बिना कारण के घर ले बाहिर नइ निकले के अपील करे गेहे।
उहें, राजधानी संग पूरा रईपुर जिला काली इक्कीस सितंबर के रतिहा नौ बजे ले अट्ठाईस सितंबर के रतिहा बारह बजे तक संपूर्ण लाॅकडाउन रइही। ए दउरान जिला म किराना अउ साग-भाजी के दुकान नइ खुलय। सिरिफ मेडिकल दुकान ल निर्धारित बेरा म खोले के अनुमति होही। पेट्रोल पंप म सिरिफ सासकीय काम म लगे गाड़ी, आपातकालीन चिकित्सा ले संबंधित प्राईवेट गाड़ी, एम्बुलेंस अउ एलपीजी परिहवन काम म लगे गाड़ी मन ल ही पेट्रोल-डीजल दे जाही।
अइसने, सरगुजा जिला म काली इक्कीस सितंबर ले लाॅकडाउन लागू हो जही। लाॅकडाउन अवधि म जरूरी सेवा ल छोड़के बाकी व्यावसायिक गतिविधि म रोक रइही।
एखरे संगेसंग बिलासपुर, बलौदाबजार, जशपुर, बालोद अउ धमतरी म घलो बाईस सितंबर ले लाॅकडाउन लगाय के निर्णय ले गेहे। बिलासपुर नगर निगम क्षेत्र के संग रतनपुर, तखतपुर, बोदरी, बिल्हा, कोटा अउ मल्हार नगरीय क्षेत्र म घलो बाईस सितंबर के बिहनिया छह बजे ले अट्ठाईस सितंबर के रतिहा बारह बजे तक संपूर्ण लाॅकडाउन घोषित करे गेहे।
लाॅकडाउन-02
उहें, रायगढ़ म चैबीस सितंबर के संझा पांच बजे ले तीस सितंबर के रतिहा बारह बजे तक लाॅकडाउन प्रभावी रइही। लाॅकडाउन अवधि म दवई दुकान बिहनिया नौ बजे ले संझा छह बजे तक खुलही। उहें, बैंक मन म बिहनिया दस बजे ले मंझनिया दू बजे तक काजकाज होही।
खबर के मुताबिक बेमेतरा म तेरह ले बीस सितंबर तक, मुंगेली म सत्रह ले तेईस सितंबर अउ कबीरधाम जिला म चैदह सितंबर ले अवइया आदेस तक लाॅकडाउन करे गेहे।
इही बीच, राजनांदगांव म कोरोना संक्रमण के बाढ़त मामला ल देखत बसंतपुर कृषि उपज मंडी ल अब सत्ताईस सितंबर तक बंद राखे के फइसला ले गेहे।
कोविड-देखभाल केन्द्र
प्रदेस म कोरोना के बिना लक्षण अउ हल्का लक्षण वाले मरीज मनके स्थानीय स्तर म देखभाल बर कोविड देखभाल केन्द्र सुरू करे जाही। स्वास्थ्य विभाग डहार ले जिला प्रसासन के माध्यम ले ए केन्द्र मनके संचालन म स्वयं सेवी, गैर सरकारी अउ सामाजिक संगठन के सहायता ले जाही। स्वास्थ्य विभाग के अपर मुख्य सचिव रेणुजी पिल्ले ह सहरी अउ ग्रामीण क्षेत्र म कोरोना संक्रमित मन बर पायलट सामुदायिक देखभाल केन्द्र सुरू करे बर सबो कलेक्टर मन परिपत्र जारी करे हे।
परिपत्र म जिला प्रसासन ल सामुदायिक देखभाल केन्द्र बर भवन, भोजन अउ साफ-सफई के बेवस्था सी.एस.आर., डी.एम.एफ मद अउ सैक्षिक संथान मनके सहयोग ले कराय के निरदेस दे गेहे।
कैबिनेट-निर्णय
छत्तीसगढ़ म अन्य पिछड़ा वर्ग के आरक्षण बर अब सार्वजनिक वितरण प्रणाली के रासन कार्ड अउ आंकड़ा ल आधार बनाय जाही। मुख्यमंत्री भूपेश बघेल के अध्यक्षता म आज होय राज्य मंत्रिमंडल के बइठका म ए फइसला ले गेहे। एखर मुताबिक अन्य पिछड़ा वर्ग के स्थिति के आंकलन ग्राम पंचायत मन म दू अक्टूबर के होवइया ग्राम सभा म करे जाही। ओबीसी आरक्षण बर रासन कार्ड ल गणना के आधार बनाय जाही।
खबर के मुताबिक हाईकोर्ट ह राज्य सरकार के ओबीसी ल सत्ताईस प्रतिसत आरक्षण दे बर रोक लगाय हे। एला देखत अब राज्य सरकार रासन कार्ड ल आधार अउ बैंक ले लिंक जातिगत डाटा पटेल कमीसन ल सौंपही।
मुख्यमंत्री-स्कूल प्रवेश
मुख्यमंत्री भूपेश बघेल ह किहीन कि कोरोना संक्रमण के चलत कोनों भी विद्यार्थी के पढ़ई म कोन्हों व्यवधान नइ होना चाही। स्कूल सिक्षा विभाग ह ए संबंध म सबो कलेक्टर अउ जिला सिक्षा अधिकारी मन ल पत्र जारी करत कहिन कि कुछ अइसे समाचार मिलत हे कि कतकोन विद्यार्थी कोरोना महामारी के दउरान आने-आने कारण ले स्कूल छोड़त हे।
संचालक लोक सिक्षण ह सबो कलेक्टर अउ जिला सिक्षा अधिकारी ले कहिन कि ए प्रयास करना जरूरी हे कि कोन्हों भी विद्यार्थी के सिक्षा म व्यवधान झन होवय। एखर बर जम्मों प्राईवेट स्कूल ले अइसे विद्यार्थी के सूची प्राप्त करे जाही, जउन पाछु बछर तक ओ निजी स्कूल म पढ़त रिहीस। फेर कोन्हों कारण ले ओमन ह ए बछर ओ निजी स्कूल म प्रवेस नइ लेहे या फेर प्रवेस लेके बाद स्कूल ल छोड़ देहे। सूची म विद्यार्थी मनके नाव के संग उंखर पालक के नाव, पता अउ मोबाइल घलो प्राप्त करे जाही। माता-पिता के संग संपर्क करके ए विद्यार्थी मन ल सरकारी स्कूल म प्रवेस ले बर प्रेरित करे जाही।
कर्मचारी हड़ताल-नोटिस
छत्तीसगढ़ प्रदेश एन.एच.एम. कर्मचारी संघ के बैनर तले संविदा स्वास्थ्य कर्मचारी मन डहार ले नियमितीकरण के मांग ल लेके हड़ताल जारी हे। आने-आने जिला म सीएमएचओ ह हड़ताली संविदा कर्मचारी मन ल नोटिस जारी करके चैबीस घंटा के भीतर काम म लहुटे बर केहे हे। ड्यूटी म नइ जवइया कर्मचारी मनके खिलाफ कार्रवाई करे के चेतावनी घलो देे गेहे।
कर्मयोगी-प्रसारण
सुनइया मन ल बतादन कि प्रधानमंत्री नरेन्द्र मोदी के जन्म दिवस सत्रह सितंबर ले चैबीस सितंबर तक देसभर म सेवा सप्ताह मनाय जात हे। ए मउका म प्रधानमंत्री श्री मोदी के जीवन अउ उंखर उपलब्धि म केन्द्रित एक बिसेस कारीकरम ‘‘कर्मयोगी‘‘ के प्रसारण आकाशवाणी केन्द्र रायपुर डहार ले काली करे जाही। ए कारीकरम काली इक्कीस सितंबर सोमवार के बिहनिया साढ़े दस बजे ले प्रसारित होही।
एला छत्तीसगढ़ स्थित आकाशवाणी के जम्मों केन्द्र एके संघरा रिले करही। ए कारीकरम आकाशवाणी के समाचार सेवा प्रभाग डहार तैयार करे गेहे।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव आज रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म लैंगिक समानता अउ महिला ससक्तिकरण के बारे म विस्तार ले जानकारी दीही। ए कारीकरम ल मीडियम वेब नौ सौ इक्यासी किलोहटर््स म सुने जा सकथे। ए कारीकरम ल प्रदेस स्थित आकाशवाणी के जम्मों केन्द्र एके संघरा रिले करही।
अइसने, आकाशवाणी केन्द्र अंबिकापुर ले छत्तीसगढ़ी अउ सरगुजिया, रायगढ़ केन्द्र ले छत्तीसगढ़ी अउ कुडुख के संगेसंग जगदलपुर केन्द्र छत्तीसगढ़ी अउ हल्बी बोली म ए कारीकरम के प्रसारण करे जाही।
बीएबीएड-प्रवेश
प्रदेस के निजी सिक्षा महाविद्यालय मन म संचालित बी.ए.बी.एड., बी.एस.सी.बीएड पाठ्यक्रम अउ सासकीय डाईट, बीटीआई अउ डी.एल.एड. पाठ्यक्रम म प्रवेस प्रक्रिया सुरू करे जात हे। बी.ए.बी.एड., बी.एस.सी.बीएड पाठ्यक्रम म प्रवेस बर प्रचलित प्रवेस नियम के अनुसार इच्छुक पात्र अभ्यर्थी पच्चीस सितंबर ले निर्धारित सुल्क आॅनलाईन भुगतान करके अपन पंजीयन करा सकथे। अइसने, डी.एल.एड. पाठ्यक्रम म प्रवेस बर छत्तीसगढ़ डी.एड. प्रवेस नियम के अनुसार इच्छुक पात्र अभ्यर्थी छह अक्टूबर ले निर्धारित रासि आनलाइन भुगतान कर अपन पंजीयन करा सकही।
विधानसभा उप चुनाव-प्रशिक्षण
प्रदेस म मरवाही विधानसभा उप चुनाव के तैयारी सुरू होगे हे। मुख्य निर्वाचन पदाधिकारी छत्तीसगढ़ डहार ले उप चुनाव के तैयारी अउ सुगम संचालन बर आज ले दू दिवसीय प्रसिक्षण कारीकरम के आयोजन करे जात हे। रईपुर के एक ठिन निजी होटल म आयोजित ए प्रसिक्षण कारीकरम म कलेक्टर अउ जिला निर्वाचन अधिकारी रिटर्निंंग अउ सहायक रिटर्निंंग अधिकारी के संग आने अधिकारी सामिल होवत हे।