लाॅकडाउन-01
कोरोना संक्रमण के बाढ़त मामला ल देखत एक घांव फेर छत्तीसगढ़ के कुछेक जिला म संपूर्ण लाॅकडाउन लगाय के फइसला करे गे हवय। राजधानी रईपुर म इक्कीस सितंबर के रतिहा नौ बजे ले अट्ठाईस सितंबर के रतिहा बारह बजे तक संपूर्ण लाॅकडाउन रइही।
रईपुर जिला कलेक्टर के आदेस के अनुसार लाॅकडाउन अवधि के दउरान रईपुर जिला म ए बखत किराना अउ सब्जी के दुकान घलो नइ खुलय। सिरिफ मेडिकल दुकान ल निर्धारित बेरा म खोले के मंजूरी होही। पेट्रोल पंप म सिरिफ सरकारी गाड़ी अउ सरकारी काम म लगे गाड़ी, आपातकालीन चिकित्सा ले जुड़े गाड़ी, एम्बुलेंस अउ एलपीजी परिवहन काम म लगे गाड़ी मन ल ही पेट्रोल दे जाही। दूसर गाड़ी मन बर पेट्रोल दे जाय म रोक लगे रइही।
अइसने, दुग्ध पार्लर म दूध अउ दूसर चीज़ बांटे के बेरा बिहनिया छह ले आठ बजे तक अउ संझा पांच ले साढ़े छह बजे ही रइही। एलपीजी गैंस सिलेंडर के एजेंसी मन ह सिरिफ टेलीफोन म या आॅनलाइन आॅर्डर लीहीं अउ घर पहुंच सेवा दीहीं। लाॅकडाउन के दउरान सराब दुकान मन घलो बंद रइही। उहें, सबो धार्मिक, सांस्कृतिक अउ पर्यटन स्थल मन आम जनता बर बंद रइही। जिला के अंतर्गत अवइया सबो सासकीय अउ निजी कार्यालय मन घलो बंद रइही। जिला के सबो सीमा मन पूरा सील रइही। जरूरी काम बर जिला ले बाहर जवइया मन ल ई-पास के माध्यम ले पहिली ले मंजूरी लेना जरूरी होही। काली इतवार के सामान्य दिन जइसन सबो कामकाज के अनुमति दे गे हवय।
लाॅकडाउन-02
ऐति, धमतरी जिला के सबो नगरीय निकाय क्षेत्र मन ल बाईस सितंबर ले दस दिन बर कंटेनमेंट जोन घोषित करे जाही। ए दउरान कंटेनमेंट जोन म कोनों भी किराना, सब्जी अउ फल के दुकान नइ खोले जाही। जरूरी सेवा ले जुड़े संस्थान, कार्यालय अउ अस्पताल मन खुले रइही। गैस एजेंसी, मेडिकल स्टोर्स अउ पेट्रोल पंप मन चैबीसों घंटा खुले रइही। दूध बर बिहनिया छह ले दस बजे तक के बेरा तय करे गे हवय। जिला के सबो पर्यटन स्थल मन घलो दस दिन तक बंद रइही।
उहें, बिलासपुर सहर म घलो इक्कीस सितंबर के रतिहा ले लाॅकडाउन लागू करे के खबर मिले हे। ए लाॅकडाउन अट्ठाईस सितंबर तक रइही। ए दउरान सब्जी, किराना दुकान संघरा दूसर व्यवसायिक संस्थान मन घलो बंद रइही। सिरिफ जरूरी सेवा जइसे, दूध, पेट्रोल अउ दवा के दुकान मन खुला रइही।
ऐति, दुरूग जिला म काली बीस सितंबर ले लाॅकडाउन लागू हो जही, जउन तीस सितंबर तक रइही। ए दउरान जरूरी सेवा ही चालू रइही अउ दूसर दुकान मन बंद रइही। कोरोना ले बाचे बर लोगन ल बिना जरूरत के घर ले बाहिर नइ निकले के अपील करे गे हवय।
एखर अलावा, कोरोना संक्रमण ले देखत प्रदेस के कतकोन सहरी क्षेत्र ल कंटेनमेंट जोन घोषित करे गे हवय।
दूसर कोति, राजनांदगांव सहरी क्षेत्र के दुकान मन आज ले खुल गे हवय। नगर निगम सीमा क्षेत्र के सबो दुकान मन बिहनिया छह बजे ले रतिहा नौ बजे तक खुलही। जिला प्रसासन ह दू चरण म राजनांदगांव सहरी क्षेत्र म अट्ठारह सितंबर तक लाॅकडाउन करे रिहीस। जिला प्रशासन ह लाॅकडाउन ल समाप्त कर के नवा आदेस जारी करे हे, जेमा सबो बाजार मन ल अनलाॅक करत व्यावसायिक प्रतिष्ठान मन ल चलाय के अनुमति दे गे हवय। कलेक्टर ह किहीन हे कि जिहां कोरोना के जादा मरीज मिलही, ओ क्षेत्र मन ल कंटेनमेंट जोन घोषित करके उहां के दुकान मन ल बंद करे जाही।
गृह मंत्रालय-निर्देश
केन्द्रीय गृह मंत्रालय ह सबो राज्य मन ले केहे हे कि ओमन ह आॅक्सीजन लेगइया गाड़ी मन के बिना रोक-टोक के अवई-जवई निश्चित करय। काबर कि कोरोना रोगी मनके इलाज म आॅक्सीजन बहुत जरूरी हे। एखर बर लिखे गे चिट्ठी म केन्द्रीय गृह सचिव अजय भल्ला ह किहीन हे कि कोनों-कोनों राज्य मन ए काम म रोक लगाय के प्रयास करत हे। ओमन किहीन कि कुछ राज्य अपन आपूर्तिकर्ता मन ल आदेस देवत हे कि आॅक्सीजन के आपूर्ति अपनेच राज्य के अस्पताल मन तक सीमित राखय।
श्री भल्ला ह किहीन कि मेडिकल आॅक्सीजन लोगन के सेहत ले जुड़े जरूरी जिनीस हे अउ एखर आपूर्ति म रूकावट डाले ले देस के दूसर भाग म रोगी मनके इलाज म एखर गंभीर प्रभाव पड़ सकत हे। ओमन ह राज्य मन ले किहीन हे कि आॅक्सीजन के आपूर्ति म कोनों प्रतिबंध नइ होना चाही अउ परिवहन अधिकारी मन ल निरदेस दे जाना चाही कि ओमन ह एक राज्य ले दूसर राज्य म आॅक्सीजन गाड़ी के अवई-जवई ल निश्चित करय।
कोरोना-निर्देश
राज्य सासन ह कोरोना मरीज मनके उपचार के दउरान हाई रिजाल्यूशन एच.आर.सी.टी. इन्वेस्टिगेशन के जरूरत होय म निजी अस्पताल अउ डायग्नोस्टिक केन्द्र म सीटी स्कैन के दर निर्धारित करे हे।
ऐति, जांजगीर-चांपा जिला कलेक्टर ह जिला स्तरीय अधिकारी मनके बइठका लेके लक्षण रहित कोरोना संक्रमित मरीज मन ल मेडिसीन किट के साथ होम आइसोलेशन बर प्रोत्साहित करे जाय के निरदेस दीन। ओमन ह किहीन कि अइसन मरीज मन ल होम आइसोलेशन के अनुमति आसानी ले मिलना चाही।
उहें, महासमुंद जिला म कोरोना पाॅजिटिव गर्भवती माईलोगिन मनके प्रसव अउ दूसर सर्जरी के मामला बर सामुदायिक स्वास्थ्य केन्द्र तुमगांव ल अधिकृत करे गे हवय।
विमान सेवा
बस्तर संभागीय मुख्यालय जगदलपुर ले हैदराबाद अउ रईपुर बर नवा विमान सेवा परन दिन इक्कीस सितंबर ले सुरू होही। मुख्यमंत्री भूपेश बघेल ह वीडियो कान्फ्रेंसिंग के माध्यम ले ए सेवा के सुरूवात करही। ए मउका म ओमन ह विमान यात्री मन ले घलो गोठबात करही। जिला प्रसासन के बिसेस प्रयास ले आर.सी.एस. स्कीम म सुरू करे जावत ए नवा विमान सेवा ले बस्तरवासी मन ल जगदलपुर ले हैदराबाद अउ रईपुर बर सीधा विमान सेवा के सुविधा मिलही।
पोषण रथ
राष्ट्रीय पोषण माह म लइका मन ल पोषण के संदेश दे जाय बर राजनांदगांव जिला म प्रचार रथ बनाय गे हवय। जिला कलेक्टर टोपेश्वर वर्मा ह ए पोषण रथ ल रवाना करीन। पांच सूत्रीय संदेस वाला ए रथ गांव-गांव म जाके पोषा के विषय म जागरूकता के प्रचार करही। पोषण रथ म गंभीर अउ मध्यम कुपोसित लइका मनके पहिचान करके ओमन ल तुरते स्वास्थ्य सुविधा देवाना, स्तनपान, पूरक पोषण आहार के संबंध म संदेस दे जाही।
उहें, महासमुंद जिला के भलेसर के कृषि विज्ञान केन्द्र म पोषण अभियान के आयोजन करे गीस। ए दउरान जिला के पैंतीस झन आंगनबाड़ी कार्यकर्ता अउ गांव के चालीस झिन महिला किसान मन ल बाड़ी प्रोजेक्ट अउ गृहवाटिका म हरा सब्जी उगाय के अउ फलदार पौधा मनके बारे म जानकारी दे गीस।
संक्षिप्त समाचार
अउ अब थोरकुन समाचार सार म-
– छत्तीसगढ़ प्रदेस एन.एच.एम. कर्मचारी संघ के बैनर म रईपुर, धमतरी, राजनांदगांव अउ बालोद संघरा आने-आने जिला म संविदा स्वास्थ्य कर्मचारी मन ह नियमितीकरण के मांग ल लेके हड़ताल सुरू कर दीन हे।
– जांजगीर-चांपा जिला म खनिज उड़नदस्ता टीम ह खनिज के अवैध परिवहन के मामला म पन्द्रह ठन वाहन ल जब्त करे हे।
– दंतेवाड़ा जिला म शंखिनी नदी के जलस्तर बाढ़े ले उहां फंसे सात झिन मजदूर मन ल पुलिस के जवान मन ह रेस्क्यू आॅपरेसन चलाके सुरक्षित बाहिर निकाल लीन।
– दुरूग पुलिस ह जमीन सौदा म बीस लाख रूपिया के धोखाधड़ी करे के आरोप म दू झिन आरोपी मन ल गिरफ्तार करीन हे।
– कोरिया जिला म पटना थाना म अवइया जमगहना के तीर मालगाड़ी के चपेट म आय ले एक झिन युवक के मउत होगीस।
– कोंडागांव जिला म फरसगांव पुलिस ह राष्ट्रीय राजमार्ग म एक ठिन गाड़ी ले साढ़े सत्रह किलो गांजा जब्त करीन हे, जेखर कीमत करीब तिरासी हजार रूपिया बताय जावत हे।
– कोंडागांव जिला के विश्रामपुरी ले लापता होय नोनी ल पुलिस ह नागपुर ले बरामद करे हे।
– जांजगीर-चांपा जिला म लूट के वारदात ल अंजाम देवइया तीन झिन आरोपी मन ल जैजेपुर पुलिस ह गिरफ्तार करे हे।
– कांकेर जिला के नरहपुर विकासखंड के ग्राम मुरूमतरा के बाद हाथी मनके दल ह अब ग्राम मरवाड़ी तक पहुंच गे हवय। इहां हाथी मनके दल ह फसल ल नकसान पहुंचाय हे।