स्वास्थ्य मंत्री – कोरोना वैक्सिन
केंद्रीय स्वास्थ अउ परिवार कल्याण मंत्री डॅाक्टर हर्षवर्धन ह भरोसा जताइन हे कि कोविड नाइंटिन वैक्सिन अवइया बछर के शुरूआत म मिल जाही। राज्यसभा म आज देश म कोरोना संक्रमण के स्थिति म चर्चा के जुआब देवत डॅाक्टर हर्षवर्धन ह ये बात कीहिन । ओमन लोगन ले अपील करीन कि वैक्सिन आय तक एक दूसर ले सुरक्षित दूरी बनाय रखयं। ओमन कीहिन कि एक विशेषज्ञ समिति आने आने निकाय ल जरूरी सहायता देके वैक्सिन तियार करे के काम करत हे।
स्वास्थ मंत्री ह कोरोना संक्रमण ले निपटे म कोरोना योद्धा मनके प्रशंसा करीन। ओमन कीहिन कि केंद्र सरकार ह राज्य सरकार मन ल हर किसम के सुविधा देवाय हे। संगेसंग यहू कीहिन कि नमूना के जांच के मामला म भारत कुछ दिन म दुनिया म अव्वल स्थान म पहुंच जाही।
कोरोना समाचार
कोरोना संक्रमण के बाढ़त मामला ल देखत मुंगेली जिला म आज ले तेईस सितंबर तक तालाबंदी रीही। जिला के लोरमी,पथरिया, सरगंाव, समेत पंद्रा ग्राम पंचायत म तालाबंदी के बेरा जरूरी जीनिस के दुकान प्रशासन कोति ले तय करे गे बेरा म खोले जाही। आज मुंगेली म पुलिस ह फ्लैग मार्च करीन। जिला कलेक्टर पी.एस. एल्मा ह ये संबंध म निर्देश जारी कर देहे।
उंहें सरगुजा जिला म कोरोना संक्रमित मरीज मनके चिन्हारी करे बर शिविर लगाके कोरोना जांच करे जात हे। एति जांजगीर के दिव्यांग कोविड सेंटर म इलाज बर भर्ती एक कोरोना संक्रमित मरीज अस्पताल ले भाग के खुदकुशाी कर लीस। कुलीपोटा गांव के रहइया ये मनखे ह खोखसा रेलवे फाटक तीर ट्रेन के आगू कूदके आत्महत्या कर लीस। मामला के जांच करे जात हे।
महासमुंद जिला के जम्मों अस्पताल म आयुष विभाग कोति ले काढ़ा बांटे जात हे।
कोरोना मरीज
प्रदेश म कोरोना संक्रमित मामला म सरलग बढ़वार होत हे। दुर्ग जिला म आज अब तक एक सौ उनतीस कोरोना नवा मरीज मिले हे। इंहा बीस ले तीस सितंबर तक तालाबंदी लागू करे जाही। जिला कलेक्टर सर्वेश्वर नरेंद्र भुरे ह लोगन ले अपील करीन हे कि जम्मों झन तालाबंदी के नियम के पालन करय।
ये स्थिति ल देखत जिला के मुख्य चिकित्सा अउ स्वास्थ्य अधिकारी – डॅाक्टर गंभीर सिंह ठाकुर ह आकाशवाणी समाचार ले गोठबात करीन।
होल्ड बाईट – डॅा. गंभीर सिंह ठाकुर
प्रधानमंत्री जन्मदिन
प्रधानमंत्री नरेंद्र मोदी के जन्मदिन मनाय बर आज देशभर म कतकोन कल्याणकारी कार्यक्रम करे जात हे। भारतीय जनता पार्टी ह ये बेरा म सेवा सप्ताह के आयोजन करे हे। एमा चैदा सितंबर ले बीस सितंबर तक देश भर म व्हीलचेयर बांटे के संगेसंग साफ सफई संबंधी कतकोन कार्यक्रम होवत हे।
राष्ट्रपति रामनाथ कोविंद, उपराष्ट्रपति एम. वेंकैया नायडू, केंद्रीय गृहमंत्री अमित शाह अउ सूचना प्रसारण मंत्री प्रकाश जावड़ेकर समेत कतकोन प्रतिनिधि अउ गणमान्य लोगन मन प्रधानमंत्री श्री मोदी ल जनमदिन के शुभकामना दीन हे। अपन संदेश म छत्तीसगढ़ के मुख्यमंत्री भूपेश बघेल ह प्रधानमंत्री ल शुभकामना देवत उंखर स्वस्थ जीवन के कामना करीन हे ।प्रधानमंत्री श्री मोदी के जनमदिन के मउका म राज्यपाल सुश्री अनुसूइया उइके ह छिंदवाड़ा जिला के अपन फार्म हाउस म पौधारोपण करीन।
श्री मोदी के जन्मदिन के मउका म सेवा सप्ताह म आज जांजगीर म विधायक नारायण चंदेल के उपस्थिति म पांच झिन दिव्यांग मन ल ट्राइसिकल बांटे गीस। कोंडागांव म घलो जिला भाजपा इकाई कोति ले कोरोना ले बचाव बर जनजागरूकता कार्यक्रम अउ पौधारोपण करे गीस।
राज्य के पूर्व महिला अउ बाल विकास मंत्री लता उसेण्डी ह बताइन कि सेवा सप्ताह के बेरा जिला म कतकोन कार्यक्रम होही। बस्तर जिला म भारतीय जनता युवा मोर्चा कोति ले रक्तदान कार्यक्रम राखे गीस। जगदलपुर म कोरोना योद्धा मनके सम्मान करे गीस।
सीएम-शिलान्यास
मुख्यमंत्री भूपेश बघेल काली वीडियो काॅन्फे्रसिंग ले गौरेला, पेण्ड्रा, मरवाही जिला बर चैरासी करोड़ रूपिया ले जादा के उनतीस ठिन विकास काम के लोकार्पण करही। संगेसंग श्री बघेल ये जिला म दू सौ अड़तालिस करोड़ रूपिया ले जादा के एक सौ नवासी काम के भुंइया पूजन करहीं।
उंहें मुख्यमंत्री इक्कीस सितंबर के वीडियो कॅान्फ्रेसिंग ले ही जगदलपुर ले हैदराबाद अउ रायपुर बर नवा विमान सेवा के शुभारंभ करहीं।
पुस्तक खरीदी
छत्तीसगढ़ पाठ्यपुस्तक निगम के एनसीईआरटी पाठ्यक्रम म आधारित कक्षा ग्यारहवीं अउ बारहवीं के किताब आॅनलाईन बिसाय जा सकही। उंहें प्रदेश के जम्मों स्कूल के प्रचार्य, शिक्षक, अउ पढ़ईया लईका मन ल पंद्रा प्रतिशत के विशेष छूट दे जावत हे। निगम के वेबसाईट म पुस्तक आर्डर करके आॅनलाईन भुगतान के बाद डिपो ले किताब ले जा सकथे। ये किताब डाक ले भेजे जाही अउ बिसइया मन ल डाक के खरच नइ देबर पड़य।
चबूतरा निर्माण
बरसा के मौसम म धान ल फुले ले बचाय खातिर राज्य के जम्मों धान खरीदी केंद्र मन म चबूतरा बनाय के दूसर चरण के तियारी शुरू कर दे गेहे।
पंचायत अउ ग्रामीण विकास विभाग के प्रमुख सचिव गौरव द्विवेदी ह सबो जिला कलेक्टर अउ जिला कार्यक्रम समन्वयक मन ल चबूतरा बनाय बर जगा चुने के निर्देश दीन हे।
खबर के मुताबिक पहिली चरण म अब तक चार हजार छै सौ तीस चबूतरा बनाय के काम पूरा होगे हे।
चिकित्सा पदस्थापना
राज्य सरकार ह चिकित्सा शिक्षा विभाग म दू अधिकारी मनके नवा पदस्थापना देहे। अंबिकापुर के शासकीय चिकित्सा महाविद्यालय के अधिष्ठाता डॅाक्टर आर.के. सिंह ल चिकित्सा शिक्षा संचालनालय के प्रभारी संचालक बनाय गेहे। उंखर जगा म रायपुर के पंडित जवाहर लाल नेहरू स्मृति चिकित्सा महाविद्यालय म चर्म विभाग के अध्यक्ष डॅाक्टर पी.के. निगम ल अंबिकापुर चिकित्सा महाविद्यालय के प्रभारी अधिष्ठाता बनाय गेहे।
शिक्षा मंत्री निरिक्षण
स्कूल शिक्षा मंत्री डॅाक्टर पे्रमसाय सिंह टेकाम ह रायपुर शहर अउ तीर तखार के मोहल्ला कक्षा के जांच करीन। डॅाक्टर टेकाम ह काली कचना, फुंडहर, पुरैना तालाब, कबीरनगर, अउ लाखेनगर म – पढ़ई तुंहर पारा- कार्यक्रम म चलाये जात आॅफलाइन कक्षा म पढ़ई के बेवस्था ल देखीन अउ शिक्षक अउ लईका मनले गोठबात करीन।
संक्षिप्त समाचार
अउ अब थोरकुन समाचार सार म-
– केंद्रीय युवा कल्याण अउ खेल मंत्रालय कोति ले राखे गे फिट इंडिया फ्रीडम रन ले बलरामपुर जिला म युवा मन ल स्वस्थ रेहे के संदेस दे जावत हे।
– मुख्यमंत्री भूपेश बघेल कोति ले प्रदेश म चैदा हजार पांच सौ अस्सी शिक्षक मनके नियुक्ति के मंजूरी देबर छत्तीसगढ़ प्रशिक्षित डी.एड अउ बी.एड संघ के पदाधिकारी मन ह आभार जताइन हे।
– अंबिकापुर के नवापारा के शहरी प्राथमिक स्वास्थ केंद्र म कैंसर बीमारी के इलाज बर कीमोथेरेपी के सुविधा देवाय गेहे। स्वास्थ्य मंत्री टी.एस. सिंहदेव ह वीडियो कॅान्फे्रसिंग ले ए सुविधा के शुभारंभ करीन।
– जांजगीर चंापा जिला के कलेक्टर यशवंत कुमार ह समर्थन मूल्य म धान बिसाय के तियारी ल लेके आज राइस मिल वाले मन संग बइठका करीन। ओमन जिला के चार ठिन संग्रहण केंद्र म जमा धान के उठाव तुरते करे के निर्देश दीन।
अउ
– राजनांदगांव म आॅनलाइन ठगी के दू ठिन मामला आगू आय हे। अज्ञात आरोपी मन ह दू झिन के बैंक खाता ले एक लाख रूपिया ले जादा के रकम निकाल लेहे।