केंद्रीय गृहमंत्री-छत्तीसगढ़ दौरा
केंद्रीय गृह अउ सहकारिता मंत्री अमित शाह ले छत्तीसगढ़ के अपन दू दिन के दउरा बेरा काली बिहनिया रईपुर स्थित पुलिस परेड ग्राउंड ले आपातकालीन सेवा डायल-एक सौ बारह के चलत नवा आधुनिक गाड़ी मन ल हरा झंडी दिखाके पठोही। एखर बाद केंद्रीय मंत्री बस्तर जिला के नेतानार जाही, जिंहा ले ओमन ‘‘जन सुविधा केंद्र‘‘ के सुभारंभ करही। तहां पाछू श्री शाह जगदलपुर के अमरवाटिका म अमर शहीद मन ल श्रध्दांजलि देही।
केंद्रीय गृहमंत्री ह कालीच जगदलपुर के बादल अकादमी म एक ठिन संवाद कारीकरम म सामिल होही। जिंहा ओमन शहीद मनके परिवार वाले, नक्सल मोर्चा म तैनात सीएपीएफ अउ राज्य के विसेस सुरक्षा बल, पुलिस अधिकारी, नक्सल पीड़ित अउ स्थानीय समाज के प्रतिनिधि मनले भेंट मुलाकात करके गोठबात करही।
अपन दउरा बेरा के दूसर दिन श्री शाह उन्नीस मई के जगदलपुर म होवइया मध्य क्षेत्रीय परिषद के बइठका के पगरइती करही।
जनगणना
छत्तीसगढ़ म जनगणना-दू हजार सत्ताईस के चलत अब तक साठ प्रतिसत ले जादा घर-कुरिया के गनती के काम पूरा कर ले गेहे। ए अभियान म डिजीटल टेक्नालॉजी याने मोबाइल के माध्यम ले अब तक अड़तालीस हजार सात सौ ले जादा ब्लाक मन ले उनतीस हजार छै सौ ले जादा ब्लाक म गनती हो गे हवय। गनती काम के मामला म गौरेला-पेण्ड्रा-मरवाही जिला सबले आगू हे, जिंहा सौ प्रतिसत टारगेट पूरा कर ले गेहे। ए जिला ह अपन सबो पांच सौ अट्ठाईस ब्लाक म मकान लिस्टिंग के काम तय समय ले आगूच पूरा कर ले हे। उहें, जशपुर अउ मोहला-मानपुर-अंबागढ़ चौकी जिला म गनती के काम पूरा होवइया हे।
एखर संगे नगर-निगम क्षेत्र मन म ए काम के रफ्तार धीमा गति ले दर्ज करे गेहे। ए मामला म रायगढ़ नगर-निगम सबले निचला पायदान म हे, जिंहा केवल चार प्रतिसत ले जादा के काम पूरा होय हे। उहें, राजधानी रईपुर म एक हजार नौ सौ ले जादा ब्लाक म ले खाली दू सौ तीने ब्लाक म गनती के काम होय हवय।
इंहा ए बतादन कि प्रदेस म एक मई ले घर-कुरिया के गनती के काम ह एक मई ले सुरू होय हे, जउन ह तीस मई तक चलही।
सुशासन तिहार
सुशासन तिहार के चलत मुख्यमंत्री विष्णुदेव साय ह रायगढ़ दउरा बेरा क्षेत्रीय न्यायिक विज्ञान प्रयोगशाला के सुभारंभ करीन। ए प्रयोगशाला के सुरू होय ले रायगढ़, सक्ती अउ सारंगढ़, बिलाईगढ़ जिला मनके पुलिस जांच व्यवस्था ल मजबूती मिलही। ए मउका म मुख्यमंत्री ह किहीन कि रायगढ़ म ए अत्याधुनिक प्रयोगशाला के सुरू होय ले पुलिस ल सहूलियत मिलही अउ अपराध अनुसंधान जादा सुघ्घर होही।
अपन रायगढ़ दउरा बेरा मुख्यमंत्री ह काली कुसमुरा गांव म करीबन एक सौ तीन करोड़ रूपिया के कई ठिन विकास काम मनके लोकार्पण अउ भुंईया पूजा करीन।
रायगढ़-सौ बिस्तर अस्पताल
रायगढ़ जिला के धरमजयगढ़ विकासखंड के गंवरघुटरी गांव म सौ ठिन दसना वाले अत्याधुनिक अस्पताल बनाय जाही। एला अजीम प्रेमजी फाउंडेशन ह बनाही। राजस्व अउ आपदा प्रबंधन विभाग डहार ले जारी आदेस मुताबिक ए अस्पताल बर अजीम प्रेमजी फाउंडेशन ल दू हेक्टेयर भुंईया तीस बछर बर अस्थाई लीज्म दे गेहे।
मुख्यमंत्री विष्णुदेव साय ह अपन रायगढ़ दउरा बेरा फाउंडेशन ल भुंईया आवंटन आदेस के कापी सौंपिन।
सीबीएसई-भाषा
केंद्रीय माध्यमिक शिक्षा बोर्ड-सीबीएसई ह ए बछर एक जुलाई ले कक्षा नवमीं के पढ़इया लइका मन बर तीन भाखा के पढ़ई अनिवार्य कर देहे। सीबीएसई ह किलीयर करीस कि कक्षा दसवीं म तीसर भाखा आर-थ्री बर कोनो बोर्ड परीक्षा नइ होही। उहें, आर-थ्री बर पूरा मूल्यांकन स्कूल स्तर म होही।
जनभागीदारी-‘‘सबसे दूर, सबसे पहले‘‘-अभियान
प्रदेस के जनजातीय गांव तक सरकारी योजना के फायदा पहुंचाय बर अवइया अट्ठारा मई ले जनभागीदारी-सबसे दूर, सबसे पहले अभियान सुरू होही। पच्चीय मई तक चलइया ए अभियान ह प्रदेस के आठ हजार ले जादा गांव मन म चलही। आदिमजाति विकास विभाग के ए अभियान म प्रधानमंत्री जनजातीय आदिवासी न्याय महा अभियान अउ धरतीआबा जनजातीय ग्राम उत्कर्ष अभियान ले जुड़े गांव मन ल सामिल करे गेहे। रईपुर जिला ल छोड़के प्रदेस के सबो जिला मन म स्वास्थ्य, शिक्षा, सामाजिक सुरक्षा, पोषण अउ पेयजल योजना के फायदा पात्र लोगन तक पहुंचाय जाही। अधिकारी मन ह गांव-गांव म जाके जन सुनवाई करही अउ आदिसेवा केंद्र मन म मामला के निपटारा होही। ए दउरान सिकल सेल अउ टीबी जांच बर स्वास्थ्य सिविर घलो लगाय जाही।
राज्यपाल-भोरमदेव
राज्यपाल रमेन डेका ह कबीरधाम जिला के दउरा बेरा आज ढोलबज्जा गांव म बैगा विद्यार्थी अउ बिहान योजना ले जुड़े बैगा माईलोगिन मन ले मुलाकात करीन। ए दउरान ओमन पढ़इया लइका मन के उंखर सपना, पढ़ई, लिखई अउ भविष्य के योजना मन उपर गोठबात करत ओमन ल आगु बाढ़े बर प्रेरित करीन। श्री डेका ह शिक्षादूत के रूप म काम करइया शिक्षक अउ जवान लइका मनल किहीन कि ओमन ड्रापआउट याने स्कूल त्यागे लइका मन ल एक घांव फेर ले स्कूल म लाय के प्रयास करय।
राज्यपाल ह भोरमदेव मंदिर के घलो दउरा करीन अउ भगवान भोलेनाथ के पूजापाठ करके प्रदेस के रहवइया मन बर सुख-समृध्दि के बिनती बिनोइन।
उहें, राज्यपाल ह बेमेतरी जिला के घलो दउरा करीन। ए दउरान ओमन सर्किट हाउस कैम्पस म ‘‘एक पेड़ मां के नांव‘‘ अभियान के चलत पउधा लगइन।
भिलाई-आवासीय कार्यशाला
भिलाई स्थित नेशनल थर्मल पावर कार्पोरेसन अउ स्टील अथॉरिटी ऑफ इंडिया लिमिटेड के संघरा उद्यम एनएसपीसीएल ह बालिका सशक्तिकरण मिसन के तहत एक ठिन आवासीय वर्कशॉप सुरू करे हे। एखर सुभारंभ एनएसपीसीएल के मुख्य महा प्रबंधक अउ व्यापार प्रमुख नील कुमार शर्मा ह करीन। ए वर्कसॉप म तीर-तखार के गंवई जघा के दस बछर ले तेरह बछर तक के उमर के नोनी मन भाग लेवत हे। श्री शर्मा ह बतइन कि करीबन एक महिना तक चलइया ए आवासीय ट्रेनिंग ह नोनी मनके सर्वांगीन विकास उपर केंद्रित रइही।
एनटीपीसी लिमिटेड के लारा अउ सीपत प्रोजेक्ट घलो ‘बालिका सशक्तिकरण अभियान सुरू करे गेहे। रायगढ़ जिला के लारा म ए अभियान के सुभारंभ उपपुलिस महानिरीक्षक शशिमोहन सिंह ह करीन। उहें, बिलासपुर जिला के सीपत म बालिका आवासीय प्रसिक्षण कारीकरम के उद्घाटन पुलिस उप महानिरीक्षक रजनेश सिंह ह करीन।
वॉकथन
आकाशवाणी के नब्बे बछर पूरा होय के मउका म आज आकाशवाणी जगदलपुर डहार ले वॉकथन राखे गीस। ए वॉकथन ह दंतेश्वरी मंदिर ले सुरू हो के कई ठिन रद्दा ले होवत आकाशवाणी केंद्र जघा पहुंचिस। ए आयोजन म आकाशवाणी के अधिकारी, कर्मचारी, उद्घोषक, कंपीयर, श्रोंता अउ कर्मचारी मनके परिवार वाले के संगे लोगन मन भाग लीन। ए मउका म आकाशवाणी जगदलपुर के कारीकरम प्रमुख चंद्रऋषि ठाकुर ह किहीन कि वॉकथन के माध्यम ले आकाशवाणी ह स्वास्थ्य अनुशासन अउ सामाजिक सहभागिता के आरो देके प्रयास करे हे।
अवासीय खेल-अकादमी
बस्तर के लइका मनके खेल प्रतिभा ल निखारे बर जगदलपुर म बहुत जल्दी बस्तर के पहला आवासीय खेल अकादमी सुरू करे जाही। खेल अउ युवा कल्याण विभाग के संचालक तनुजा सलाम ह काली जगदलपुर पहुंच के अकादमी के तियारी बारे म जायजा लीन। ओमन खेल अधिकारी मन संग बइठका म आवास, भोजन, खेल सामग्री, शिक्षा, परिवहन अउ आने सहूलियत के समीक्षा करीन। ए अकादमी म लइका मन ल एथलेटिक्स, फुटबाल अउ तीरंदाजी के ट्रेनिंग दे जाही। एडमिसन बर बहुत जल्द चुनई ट्रायल राखे जाही। एमा तेरह ले सत्रह बछर के उमर वाले खिलाड़ी मन भाग ले सकही।