वित्त मंत्रालय-निर्देश
वित्त विभाग ह शासकीय खर्चा म मितव्ययिता अउ वित्तीय अनुशासन निश्चित करे के उद्देस्य ले निरदेस जारी करे हे। एखर अनुसार सबो विभाग, संभागीय आयुक्त, कलेक्टर अउ विभागाध्यक्ष मन ल सरकारी संशाधन के बने उपयोग अउ गैर जरूरी खर्चा उपर नियंत्रण राखे बर केहे गेहे। वित्त विभाग के सचिव डॉक्टर रोहित यादव डहार ले जारी ए निरदेस ल तत्काल प्रभाव ले लागू कर दे गेहे। ए निरदेस अवइया तीस सितंबर तक प्रभावी रइही।
निरदेस के अनुसार मुख्यमंत्री, मंत्रिपरिषद, निगम-मंडल अउ आयोग के पदाधिकारी मन ह अपन काफिला म सिरिफ जरूरी गाड़ी मनके ही उपयोग कर सकही। एखर अलावा सबो सरकारी गाड़ी मन ल इलेट्रिक गाड़ी म बदले के निरदेस दे गेहे। पेट्रोल अउ डीजल म होवइया खर्चा ल कमती करे बर अउ एकेच दिसा म जाने वाला अधिकारी मन बर वाहन पुलिंग व्यवस्था लागू करे बर केहे गेहे।
उहें, जरूरी काम के अलावा राज्य सरकार के खर्चा म शासकीय सेवक मन के विदेस यात्रा उपर पूरा रोक लगे रइही। जरूरी होय म मुख्यमंत्री के मंजूरी लेबर पड़ही। वर्चुअल अउ ऑनलाइन बइठका ल बढ़ावा दे जाही। उहें, शासकीय भवन म ऊर्जा के बर्बादी ल रोके बर जरूरी उपाय करे जाही।
केंद्रीय गृहमंत्री-छत्तीसगढ़ दौरा
केंद्रीय गृह मंत्री अमित शाह काली ले उन्नीस मई तक छत्तीसगढ़ के तीन दिवसीय दउरा म आवत हे। ए दउरान ओमन ह उन्नीस मई के बस्तर म मध्य क्षेत्रीय परिषद के छब्बीसवां बइठका के अध्यक्षता घलो करही। बइठका म छत्तीसगढ़ के मुख्यमंत्री विष्णुदेव साय संघरा मध्यप्रदेस, उत्तर प्रदेस अउ उत्तराखंड के मुख्यमंत्री सामिल होही। बइठका के तियारी के बारे म मुख्यमंत्री श्री साय ह काली मंत्रालय म उच्च स्तरीय अउ समीक्षा बइठका करीन अउ अधिकारी मन ल जरूरी निरदेस दीन।
केंद्रीय गृहमंत्री के दउरा के बारे म उप मुख्यमंत्री अउ गृह मंत्री विजय शर्मा ह पत्रकार मन ल बतइन कि डॉयल एक सौ बारह अपातकालीन सेवा के विस्तार करे जावत हे। एखर तहत केंद्रीय गृहमंत्री श्री शाह ह अट्ठारा मई के रईपुर म चार सौ नवा गाड़ी के सुरूआत करीन। ए दउरान केंद्रीय गृहमंत्री ह राज्य ल एक ठन नवा फॉरेंसिक लैब अउ जांच बर तैंतीस ठन सर्व सुविधा युक्त वाहन के सौगात घलो देही।
श्री शर्मा ह बतइन कि बस्तर के नेतानार सुरक्षा केंद्र ह पहिली अइसन जघा हे, जेला जन सुविधा केंद्र के रूप म बदले जावत हे। केंद्रीय गृहमंत्री अमित शाह अपन बस्तर प्रवास के दउरान ए केंद्र के उद्घाटन करही। ए केंद्र म अस्पताल, स्कूल, बैंक अउ आंगनबाड़ी जइसन जरूरी सुविधा दे जाही।
उपमुख्यमंत्री विजय शर्मा ह आज जगदलपुर म कारीकरम स्थल म जाके तियारी के जायजा लीन अउ अधिकारी मन ल जरूरी निरदेस दीन।
मुख्यमंत्री-सुशासन तिहार
सुशासन तिहार के तहत आज मुख्यमंत्री विष्णुदेव साय जांजगीर-चांपा जिला के कोसला गांव पहुंचिन अउ चौपाल लगइन। ए दउरान ओमन ह लोगन ले सीधे चर्चा करीन अउ सरकार के आने-आने योजना म होय काम के जानकारी लीन। ओमन ह ग्रामीण मनके समस्या सुनिन अउ अधिकारी मन ल ओखर निपटारा करे के निरदेस दीन।
ए मउका म मुख्यमंत्री ह किहीन कि सुशासन तिहार के उद्देस्य शासन अउ जनता के बीच सीधा संवाद स्थापित करना अउ योजना मन के फायदा आखिरी मनखे तक पहुंचाना हे।
मुख्यमंत्री आज कोरबा जिला के लेमरू गांव घलो पहुंचिन अउ प्रधानमंत्री आवास योजना के हितग्राही के नवा बने आवास के उद्घाटन करीन। ए दउरान ओमन ह पीएम सूर्य घर मुफ्त बिजली योजना के तहत हितग्राही मन ल अंशदान के रासि के चेक घलो दीन।
द्वीप्ति योजना-मंजूरी
राज्य सरकार ह ग्रामीण महिला मन ल ऊर्जा के क्षेत्र म सशक्त बनाय बर बछर दू हजार छब्बीस ले दू हजार इकतीस तक के अवधि बर द्वीप्ति योजना ल मंजूरी दे देहे। ए योजना के तहत गांव मन म ‘‘सोलर दीदी‘‘ तियार करे जाही जउन मन ल सौर ऊर्जा के प्रणाली के स्थापना, संचालन अउ रख-रखाव के प्रसिक्षण दे जाही। ए माईलोगिन मन ह सोलर मिल, कोल्ड स्टोरेज अउ सिंचाई जइसन ऊर्जा सुविधा जइसन के संचालन करही।
जनभागीदारी-‘‘सबसे दूर, सबसे पहले‘‘-अभियान
प्रदेस के जनजातीय गांव तक सरकारी योजना के फायदा पहुंचाय बर अवइया अट्ठारा ले पच्चीस मई तक जनभागीदारी-सबसे दूर, सबसे पहले अभियान चलाय जाही। ए अभियान प्रदेस के आठ हजार ले जादा गांव मन म चलही। आदिमजाति विकास विभाग के ए अभियान म प्रधानमंत्री जनजातीय आदिवासी न्याय महा अभियान अउ धरतीआबा जनजातीय ग्राम उत्कर्ष अभियान ले जुड़े गांव मन ल सामिल करे गेहे। रईपुर जिला ल छोड़के प्रदेस के सबो जिला म स्वास्थ्य, शिक्षा, सामाजिक सुरक्षा, पोषण अउ पेयजल योजना के फायदा पात्र लोगन तक पहुंचाय जाही। अधिकारी मन ह गांव-गांव म जाके जन सुनवाई करही अउ आदिसेवा केंद्र म मामला के निपटारा होही। ए दउरान सिकल सेल अउ टीबी जांच बर स्वास्थ्य सिविर घलो लगाय जाही।
छत्तीसगढ़-डीजीपी
आईपीएस अधिकारी अरूण देव गौतम ल छत्तीसगढ़ के पुलिस महानिदेशक बनाय गेहे। गृह विभाग के प्रमुख सचिव निहारिका सिंह ह ए संबंध म आदेस जारी कर दीन हे। राज्य सरकार ह करीब डेढ़ साल पहिली ओमन ल प्रभारी डीजीपी के जिम्मेदारी दे रिहीस। आईपीएस अरूण देव गौतम ल संयुक्त राष्ट्र पदक के अलावा सराहनीय सेवा बर भारतीय पुलिस पदक अउ विशिष्ट सेवा बर राष्ट्रपति पुलिस पदक ले सम्मानित करे जा चुके हे। ओमन हा छत्तीसगढ़ कैडर के उन्नीस सौ बयानवे बैच के आईपीएस अधिकारी हवय।
छत्तीसगढ़-पेट्रोल/डीजल
राज्य शासन डहार ले स्पष्ट करे गेहे कि प्रदेस म ईंधन के पर्याप्त स्टाक हवय अउ पेट्रोल-डीजल के वितरण म सरकार डहार ले सरलग निगरानी राखे जावत हे।
इही बीच, रईपुर कलेक्टर ह पेट्रोल के ब्लैक मार्केटिंग ल रोके बर एक ठन हेल्पलाइन नंबर जारी करे हे।
उहें, सक्ती जिला म कलेक्टर ह पेट्रोल/डीजल के बिक्री के बारे म सख्त आदेस जारी करे हे। अब पेट्रोल अउ डीजल के बिक्री सिरिफ संबंधित वाहन म ही करे जाही। कलेक्टर के आदेस ल नइ माने म पेट्रोल पंप संचालक मन उपर कार्रवाई करे के चेतावनी दे गे हवय।
सफाई-कर्मचारी हड़ताल
रईपुर म सफाई व्यवस्था देखइया कंपनी के कर्मचारी मन के आंदोलन आज तीसर दिन घलो जारी रिहीस। हड़ताली कर्मचारी मन ह आज दलदल सिवनी म उग्र प्रदर्सन करीन। ए दउरान पुलिस के जवान अउ हड़ताली कर्मचारी मनके बीच झूमाझटकी घलो होइस।
कंपनी के आरोप हे कि नगर-निगम डहार ले करीब अठहत्तर करोड़ रूपिया के भुगतान नइ करे गेहे। ए हड़ताल म कचरा गाड़ी चलइया चालक मन घलो सामिल हे, जउन मन ह वेतन बढ़ाय के अउ सही बेरा म भुगतान करे के मांग ल लेके प्रदर्सन करत हे। ए कर्मचारी मनके हड़ताल म जाय ले सहर म डोर-टू-डोर कचरा कलेक्सन के व्यवस्था म घलो बाधा पड़े हे।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के आकाशवाणी के सबो कंेंद्र रिले करही। ए बखत के अंक म ‘‘खैरागढ़-छुईखदान-गंडई‘‘ जिला के संबंध म जानकारी दे जाही।
मौसम
प्रदेस म तेज गर्मी के संगेसंग आंधी अउ हलका बरसा के दउर सुरू हो गेहे। मौसम विभाग के अनुसार अवइया कुछेक दिन तक प्रदेस म धूप अउ छांव के स्थिति रइही। अवइया चौबीस घंटा के दउरान एक-दू जघा म हल्का बरसा होय के या गरज-चमक के संग छींटा पड़े के संभावना हे। उहें, कुछेक जघा म अंधड़ चले के अउ आकाशीय बिजली गिरे के आसार हे।
इही बीच, मानूसन आज अंडमान सागर, निकोबार द्वीप समूह अउ दक्षिण पूर्वी बंगाला के खाड़ी म प्रवेस कर चुके हे। एखर छब्बीस मई तक केरल पहुंचे के उम्मीद हे।