मुख्यमंत्री-केन्द्रीय गृहमंत्री मुलाकात
मुख्यमंत्री विष्णुदेव साय ह आज नई दिल्ली प्रवास के दउरान केन्द्रीय गृहमंत्री अमित शाह ले मुलाकात करीन। ए मउका म छत्तीसगढ़ के बस्तर क्षेत्र म होवत सकारात्मक बदलाव, जनकल्याणकारी पहलु अउ विकास काम ल लेके गोठबात करीन। मुख्यमंत्री ह श्री शाह ल बतईन कि बस्तर क्षेत्र म पुराना सुरक्षा सिविर मन ल अब धीरे-धीरे जनसुविधा केन्द्र के रूप म विकसित करे जावत हे, जिहां गांव के मनखे मन ल स्वास्थ्य, सिक्षा, बैंकिंग अउ आने-आने सासकीय योजना ले जुड़े सुविधा एक ही जघा म उपलब्ध होवत हे। मुख्यमंत्री ह केन्द्रीय गृहमंत्री ल बस्तर क्षेत्र म चलाय जात मुख्यमंत्री स्वस्थ बस्तर अभियान अउ बस्तर मुन्ने अभियान के बारे म घलो जानकारी दीन। ए मउका म राज्य के उपमुख्यमंत्री विजय शर्मा घलो मौजूद रिहीन।
केन्द्रीय राज्यमंत्री-छत्तीसगढ़
केन्द्रीय ग्रामीण विकास राज्यमंत्री कमलेश पासवान ह अपन छत्तीसगढ़ प्रवास के दूसरइया दिन आज रायपुर के सेरीखेड़ी स्थित मल्टी यूटिलिटी सेंटर के दउरा करीन। राष्ट्रीय ग्रामीण आजीविका मिशन-बिहान के तहत संचालित ए केन्द्र म ओमन ह महिला स्व-सहायता समूह डहार ले करे जात नवाचार अउ आजीविका गतिविधि के निरीक्षण करीन। ए दउरान केन्द्रीय राज्यमंत्री ह विशेष रूप ले माईलोगिन डहार ले संचालित एकीकृत बकरी पालन-अजा परियोजना अउ अच्छा बाजार लिंकेज के तारीफ करत हुए एला देसभर बर एक अनुकरणीय मॉडल बतईन। केन्द्रीय राज्यमंत्री ह छत्तीसगढ़ के आजीविका मॉडल ल आने राज्य मन बर प्रेरणास्त्रोत बतात हुए अधिकारी मन ल ए योजना के अउ जादा विस्तार उपर जोर दे बर कहिन। ए बेरा म श्री पासवान ह नवा रायपुर म संचालित ई-ऑटो सेवा ‘‘प्रोजेक्ट पिंक दीदी‘‘ के घलो सराहना करीन।
एखर पहिली, केन्द्रीय राज्यमंत्री श्री पासवान ह राज्यपाल रमेन डेका ले लोकभवन म सौजन्य भेंट करीन। ए बेरा म राज्यपाल ह शॉल अउ स्मृति चिन्ह भेंट करके उंखर स्वागत अउ सम्मान करीन।
राज्य ओपन स्कूल-परिणाम
छत्तीसगढ़ राज्य ओपन स्कूल ह आज हाईस्कूल अउ हायर सेकेंडरी परीक्षा के परिणाम घोषित कर देहे। स्कूल सिक्षा मंत्री गजेन्द्र यादव ह मंत्रालय ले बोर्ड परीक्षा के परिणाम जारी करीन। हाईस्कूल के परीक्षा म ए बछर अंठावन दशमलव तीन-नौ प्रतिशत अउ हायर सेकेंडरी परीक्षा म इकहत्तर प्रतिशत विद्यार्थी पास होय हे।
केन्द्र-एलपीजी
केन्द्र सरकार ह कहिन हे कि पूरा देस म पर्याप्त मात्रा म कच्चा तेल, एलपीजी अउ प्राकृतिक गैस के उपलब्धता सुनिश्चित करे बर प्रभावी कदम उठाय गेहे। आज नई दिल्ली म पश्चिम एशिया के हालिया घटनाक्रम उपर आयोजित अंतर-मंत्रालयी ब्रीफिंग ल संबोधित करत पेट्रोलियम अउ प्राकृतिक गैस मंत्रालय के संयुक्त सचिव सुजाता शर्मा ह कहिन कि पूरा देस म घरेलू एलपीजी के आपूर्ति सुचारू रूप ले चलत हे अउ कोनो ल भी डिस्ट्रीब्यूटरशिप म स्टॉक खत्म होय के कोई सूचना नइ मिले हे।
सिकलसेल संस्थान-राशि
चिकित्सा शिक्षा विभाग ह प्रदेस के सिकलसेल संस्थान मन ल सेंटर ऑफ एक्सीलेंस के रूप म विकसित करे बर लगभग पच्यासी करोड़ रूपिया के रासि स्वीकृत करे हे। एखर तहत सिकलसेल संस्थान म उच्च स्तरीय आधुनिक लैब के निर्माण करे जाही, जेखर ले मरीज मन ल तुरते ही सही जांच रिपोर्ट मिल सकही अउ समय म उंखर इलाज सुरू हो सकही। एखर अलावा विशेषज्ञ डॉक्टर के उपलब्धता, ब्लड ट्रांसफ्यूजन सुविधा अउ जेनेटिक काउंसलिंग जइसन सेवा घलो एके छत के नीचे मिल सकही।
स्वास्थ्य मंत्री श्याम बिहारी जायसवाल ह कहिन कि ए संस्थान इलाज के संग रोकथाम अउ जागरूकता के दिसा म घलो मील के पत्थर साबित होही। नवजात शिशु मनके स्क्रीनिंग ले लेके वाहक दंपत्ति के काउंसलिंग तक ए केन्द्र छत्तीसगढ़ म सिकल सेल उन्मूलन अभियान ल नवा गति दीहीं
केन्द्रीय राज्यमंत्री-वाहन काफिला
प्रधानमंत्री नरेन्द्र मोदी के ईंधन बचत संबंधी अपील के बाद केन्द्रीय राज्यमंत्री तोखन साहू ह घलो अपन सुरक्षा म लगे फॉलोअप अउ काफिला म सामिल गाड़ी मनके संख्या ल कम करे के निरदेस देहे। ओमन ह कहिन कि वर्तमान वैश्विक संकट अउ ऊर्जा संरक्षण के आवश्यकता ल देखत हुए संसाधन के संतुलित उपयोग समय के मांग हे
दीक्षांत समारोह
रायपुर स्थित इंदिरा गांधी कृषि विश्वविद्यालय के ग्यारहवां दीक्षांत समारोह काली पन्द्रह मई के आयोजित करे जाही। समारोह के अध्यक्षता राज्यपाल रमेन डेका करही। उहें, मुख्यमंत्री विष्णुदेव साय समारोह के मुख्य अतिथि होही। दीक्षांत समारोह म एक हजार आठ सौ अस्सी विद्यार्थी मन ल उपाधि दे जाही।
वॉकाथॉन
आकाशवाणी के नब्बे बछर पूरा होय के मउका म आकाशवाणी रायपुर काली पन्द्रह मई के वॉकाथॉन के आयोजन करही। आकाशवाणी रायपुर के उप महानिदेशक अभियांत्रिकी अउ कल्स्टर प्रमुख वी. राजेश्वर ह बतईन कि ए वॉकाथॉन म आकाशवाणी के कर्मचारी, सेवानिवृत्त अधिकारी-कर्मचारी, समाचार वाचक, आउटसोर्स कर्मचारी, श्रोता अउ सहर के नागरिक सामिल होही। वॉकाथॉन के सुरूआत बिहनिया सात बजे आकाशवाणी भवन सिविल लाईंस ले होही। ए वॉकाथॉन घड़ी चौक, मोतीबाग, सुभाष स्टेडियम अउ ओ.सी.एम. चउक होवत वापस आकाशवाणी परिसर म संपन्न होही। ए आयोजन ऑल इंडिया रेडियो के नब्बे बछर के गौरवशाली यात्रा के याद म करे जात हे।
ज्ञानेश्वरी यादव-पदक
राजनांदगांव के वेटलिफ्टर खिलाड़ी ज्ञानेश्वरी यादव ह सीनियर एशियाई वेटलिफ्टिंग चैंपियनशिप म अच्छा प्रदर्शन करत हुए तिरपन किलोग्राम वर्ग म रजत अउ कांस्य पदक जीते हे। ज्ञानेश्वरी ह स्नैच म अठासी किलोग्राम अउ क्लीन एंड जर्क म एक सौ छह किलोग्राम वजन उठाके अच्छा प्रदर्सन करीन।
ए उपलब्धि बर मुख्यमंत्री विष्णुदेव साय ह ज्ञानेश्वरी ल बधाई अउ सुभकामना दीन। ओमन कहिन कि ज्ञानेश्वरी यादव के सफलता पूरा प्रदेस के युवा, विशेषकर बेटी मन बर प्रेरणादायक हे।
हत्या/घायल
जांजगीर-चांपा जिला के भंवतरा गांव म एके परिवार के चार लोगन के हत्या करे के मामला आगू आय हे। ए मामला म पुलिस ह दू आरोपी मन ल गिरफ्तार करे हे।
जानबा के मुताबिक शिवरीनारायण थाना क्षेत्र म जमीन विवाद के चलत पिता-बेटा मिलके अपनेच परिवार के चार लोगन उपर सोवत समय टंगिया ले हमला करके उंखर हत्या कर दीन। घटना के जानकारी मिलत ही पुलिस के आला अधिकारी मउका म पहुंच के जांच सुरू करीन। बताय जात हे कि मुख्य आरोपी ह पन्द्रह बछर पहिली अपन छोटे भाई के हत्या करे रिहीस अउ डेढ़ बछर पहिली जेल ले रिहा होय रिहीस।
उहें, गौरेला-पेण्ड्रा-मरवाही जिला के ग्राम दौंजरा के बिझरवार म घलो जमीन के लड़ई-झगड़ा के चलत एके परिवार के दू पक्ष म होय विवाद म सात लोगन घायल होगे हे। घायल मनके इलाज जिला अस्पताल म चलत हे। पुलिस मामला के जांच करत हे।
दुर्ग पुलिस-म्यूक खाताधारक
दुर्ग पुलिस ह साइबर ठगी के मामला म कार्रवाई करत हुए जिला म तीन सौ बैसठ संदिग्ध म्यूल खाताधारक मनके खिलाफ एफआईआर दर्ज करे हे। ए कार्रवाई केन्द्रीय गृह मंत्रालय के निर्देश अउ समन्वय पोर्टल ले मिले जानबा के आधार म करे गेहे। जांच म सुपेला, उतई अउ पुरानी भिलाई थाना क्षेत्र के आने-आने बैंक मनके खाता म साइबर ठगी के रकम के लेनदेन के सबूत मिले हे। पुलिस ह बतईन कि ए खाता के इस्तेमाल ठगी के रकम ल छिपाय अउ ट्रांसफर करे म करे गेहे।
सिपेट-डिप्लोमा पाठ्यक्रम
रायपुर के भनपुरी स्थित केन्द्रीय पेट्रोल रसायन अभियांत्रिकी अउ प्रौद्योगिकी संस्थान म आने-आने डिप्लोमा पाठ्यक्रम म प्रवेस बर आवेदन के अंतिम तिथि तीस मई निर्धारित करे गेहे। सिपेट रायपुर के प्रमुख डॉक्टर आलोक साहू ह बतईन कि डिप्लोमा पाठ्यक्रम म प्रवेस बर सात जून के देसभर म ऑनलाइन परीक्षा आयोजित करे जाही।