पश्चिम एशिया संघर्ष ले पैदा होय वैश्विक ऊर्जा संकट ल देखत प्रधानमंत्री नरेन्द्र मोदी के अपील के बाद केन्द्र अउ राज्य सरकार मन ह ईधन बचत उपाय तेज कर देहे। वैश्विक ईंधन कीमत म बढ़ावार के सेती प्रधानमंत्री ह हाले म घरेलू दौरा बर अपन काफिला के आकार छोटे कर देहे। विशेष सुरक्षा समूह एसपीजी प्रोटोकाल के जरूरी सुरक्षा व्यवस्था बरकरार रइही।
उहें, केन्द्रीय गृहमंत्री अमित शाह ह घलो अपन काफिला के आकार घटाके आधा ले कमती कर देहे।
ऐति, छत्तीसगढ़ के राज्यपाल रमेन डेका ह अपन आधिकारिक काफिला म चलइया गाड़ी के संख्या कमती कर देहे। श्री डेका ह आम लोगन ले मितव्ययता बरते के आह्वान करीन हे। राज्यपाल ह किहीन कि सामूहिक जिम्मेवारी अउ संसाधन के संतुलित उपयोग ले ही हमर देस भविष्य के चुनौती के प्रभावी ढंग ले सामना कर सकही।
इही बीच, मुख्यमंत्री विष्णुदेव साय ह घलो प्रदेसवासी मन ले ईंधन अउ संसाधन के कमती उपयोग करे के अपील करीन हे। ओमन किहीन कि सबो सरकारी गाड़ी ल चरणबद्ध तरीका ले इलेक्ट्रिक गाड़ी म बदले के काम सुरू करे जाही। मुख्यमंत्री ह बतईन कि ओमन अपन काफिला म गाड़ी के संख्या म कटौती करे के फइसला लेहे।
मंत्रिमंडल-निर्णय
केन्द्रीय मंत्रिमंडल ह विपणन सीजन दू हजार छब्बीस-सत्ताईस बर चौदह ठिन खरीफ फसल के न्यूनतम समर्थन कीमत म बढ़वार ल मंजूरी देहे। केन्द्रीय मंत्रिमंडल के बइठका के बाद सूचना अउ प्रसारण मंत्री अश्वनी वैष्णव ह किहीन कि सरकार ह किसान मन ल उंखर उत्पाद के लाभकारी मूल्य सुनिश्चित करे बर खरीफ फसल के न्यूनतम समर्थन मूल्य बढ़ा देहे। ओमन किहीन कि खरीफ सीजन बर किसान मन ल अनुमानित दू लाख साठ हजार करोड़ रूपिया के भुगतान करे जाही। ओमन किहीन कि ए सीजन म आठ सौ चौबीस लाख मीटरिक टन ले जादा के फसल बिसाय जाही।
सीबीएसई-बारहवीं परिणाम
केन्द्रीय माध्यमिक सिक्षा बोर्ड-सीबीएसई ह आज कक्षा बारहवीं के बोर्ड परीक्षा के नतीजा घोषित कर देहे। एसो सीबीएसई के कक्षा बारहवीं के विज्ञान, वाणिज्य अउ मानविकी विषय परीक्षा सत्रह फरवरी ले दस अप्रैल तक राखे गे रिहीस। सीबीएसई ह बताय हे कि सत्रह लाख अड़सठ हजार ले जादा विद्यार्थी परीक्षा म संघरीन, जेमा पन्द्रह लाख सात हजार ले जादा विद्यार्थी पास होय हे। एसो के कुल उत्तीर्ण प्रतिशत पच्यासी दशमलव दू शून्य प्रतिशत हे। छात्र अपन परिणाम सीबीएसई के आधिकारिक वेबसाइट अउ उमंग ऐप म देख सकत हे।
मुख्यमंत्री विष्णुदेव साय ह सीबीएसई बारहवीं बोर्ड के परीक्षा म सफल होय विद्यार्थी मन ल बधाई अउ सुभकामना दीन हे।
सोना-आयात शुल्क
केन्द्र सरकार ह सोना अउ आने कीमती धातु म आयात शुल्क बढ़ा देहे, जउन आज ले परभावी होगे हे। केन्द्रीय वित्त मंत्रालय ह केहे हे कि सोना अउ चांदी म पांच प्रतिशत अउ प्लेटिनम म पांच दशमलव चार प्रतिशत आयात सुल्क लगही। एखर पहिली, प्रधानमंत्री नरेन्द्र मोदी ह पश्चिम एशिया म चलत संकट ल देखत लोगन ले सोना बिसाय ले बांचे के अपील करे रिहीन।
भाजपा-बैठक
रईपुर के प्रदेश भाजपा कार्यालय म आज भाजपा के प्रदेस कार्यसमिति के बइठका राखे गीस। बइठका म राष्ट्रीय सह संगठन महामंत्री शिवप्रकाश, मुख्यमंत्री विष्णुदेव साय, क्षेत्रीय संगठन महामंत्री अजय जामवाल, प्रदेश अध्यक्ष किरण सिंह देव समेत कतकोन बड़का मौजूद रिहीन। बइठका म नक्सल उन्मूलन म प्रस्ताव पारित करे गीस।
सहायक संचालक-भर्ती
छत्तीसगढ़ लोक सेवा आयोग कोति ले आवास अउ पर्यावरण विभाग के सहायक संचालक-योजना के इक्कीस पद म भर्ती बर अंतिम चयन परिणाम जारी कर दे गेहे। वित्त मंत्री ओ.पी. चौधरी ह किहीन कि ए भर्ती सिरिफ खाली पद के पूर्ति नो हे, भलूक छत्तीसगढ़ के सुव्यवस्थित, वैज्ञानिक अउ दूरदर्शाी सहरी विकास के दिसा म एक महत्वपूर्ण कदम हरय।
मजदूर-मौत
बालोद जिला म मिट्टी धंसे ले तीन झिन मजदूर के दबके मउत होगे, जेमा एक महिला घलो सामिल हे। ए हादसा काली संझा दल्लीराजहरा नगर म ओ बेरा होइस, जब मजदूर बीएसपी के सीवरेज पाईप बिछाय बर खुदाई करत रिहीन। इही दउरान औचक माटी के धंसे ले उहां काम करत मजदूर मलबा म दबके मउत होगे।
घटना के बाद गुस्साय लोगन मन आरोप लगाय हे कि काम के दउरान सुरक्षा के बने बेवस्था नइ करे गे रिहीस। प्रसासान ह मामला के जांच सुरू कर देहे अउ दोसी मनके खिलाफ उचित कार्रवाई करे के भरोसा देवईन हे।
सिलेंडर ब्लॉस्ट-मुख्यमंत्री
दुरूग जिला के कुम्हारी थाना क्षेत्र के खपरी म गैस सिलेंडर ब्लॉस्ट म एके परिवार के चार झन के मउत के मामला म मुख्यमंत्री विष्णुदेव साय ह मृतक के परिजन मन ल पांच-पांच लाख रूपिया के सहायता रासि देके घोषणा करीन हे। ए रकम सासन के नियम के तहत मिलइया चार-चार लाख रूपिया के सहायता रकम ले अलग होही।
घटना के जानकारी मिले म स्वास्थ्य मंत्री श्याम बिहारी जायसवाल अउ स्कूल सिक्षा मंत्री गजेन्द्र यादव मउका म पहुंच के उहां के स्थिति ल देखीन।
शिक्षक-निलंबित
लोक सिक्षण संचालनालय ह महासमुंद जिला के भंवरपुर के स्वामी आत्मानंद उत्कृष्ट विद्यालय परीक्षा केन्द्र के अध्यक्ष अउ सहायक केन्द्राध्यक्ष समेत पांच कर्मचारी मन ल निलंबित कर देहे। ए सबो उपर परीक्षा संचालन म कोताही बरते के आरोप हे। खबर के मुताबिक हाईस्कूल अउ हायर सेकेंडरी परीक्षा के दउरान सुरक्षा अउ जांच नियम के उल्लंघन पाय गीस, जेखर सेती एक छात्र डिजिटल कैमरा लेके परीक्षा कक्ष के भीतरी प्रवेस करे म सफल रिहीस। छात्र परीक्षा कक्ष के भीतरी वीडियो अउ ऑडियो रिकॉर्ड करके सोशल मीडिया म प्रसारित कर दीस। निलंबन के बेरा ए सबो के मुख्यालय महासमुंद के जिला शिक्षा अधिकारी कार्यालय रइही।
आईपीएल
नवा रईपुर के शहीद वीरनारायण सिंह अंतर्राष्ट्रीय क्रिकेट स्टेडियम म आज रॉयल चैलेंजर्स बेंगलुरू अउ कोलकाता नाइट राइडर्स के बीच आईपीएल टी-ट्वेंटी क्रिकेट मैच खेले जाही। ए मैच संझा साढ़े सात बजे ले सुरू होही। एखर पहिली, दस मई के नवा रईपुर म खेले गे एक आने मुकाबला म रॉयल चैलेंजर्स बेंगलुरू ह मुंबई इंडियन ह हराय रिहीस।
स्वाभिमान पर्व-विशेष कार्यक्रम
आकाशवाणी रईपुर कोति ले आज सोमनाथ स्वाभिमान पर्व म विशेष कार्यक्रम प्रसारित करे जाही। प्रादेशिक समाचार एकांश कोति ले तियार ए कार्यक्रम के प्रसारण आज रतिहा आठ बजके पन्द्रह ले होही। एला छत्तीसगढ़ के सबो आकाशवाणी केन्द्र रिले करही।
प्रधानमंत्री राष्ट्रीय बाल पुरस्कार-नामांकन
प्रधानमंत्री राष्ट्रीय बाल पुरस्कार बर नामांकन के काम चलत हे। ए पुरस्कार खातिर पांच ले अट्ठारह बछर आयु वरग के लइका इकतीस जुलाई तक अरजी दे सकत हे। महिला अउ बाल विकास विभाग ले मिले जानकारी के मुताबिक अरजी सिरिफ राष्ट्रीय पुरस्कार पोर्टल ले ऑनलाइन मंजूर करे जाही। राज्य सासन ह प्रदेस के प्रतिभाशाली लइका मन ले जादा ले जादा संख्या म अरजी करे के अपील करीन हे। प्रधानमंत्री राष्ट्रीय बाल पुरस्कार हर बछर राष्ट्रपति कोति ले ओ लइका मन ल दे जाथे, जउन मन आने-आने क्षेत्र म बने प्रदर्सन करके देस के गौरव बढ़ाय हे।
एनसीईआरटी/सीबीएसई-नया पाठ्यक्रम
स्कूल सिक्षा अउ साक्षरता विभाग के सचिव संजय कुमार ह बतईन कि एनसीईआरटी अउ सीबीएसई ह मिलके तीसरी ले आठवीं कक्षा तक के विद्यार्थी मन बर कम्प्यूटेशनल थिंकिग अउ आर्टिफिशियल इंटेलिजेंस म आधारित एक ठिन नवा पाठ्यक्रम सुरू करे हे। ओमन बतईन कि सिक्षक मन ल गर्मी के छुट्टी के दउरान प्रसिक्षण दे जाही अउ छुट्टी सिराय के बाद स्कूल खुले म ए विषय के पढ़ई सुरू हो जही। ओमन यहू बतईन कि एनसीईआरटी कक्षा नौवीं ले लेके बारहवीं तक बर आर्टिफिशियल इंटेलिजेंस के पाठ्यपुस्तक तियार करत हे।